Gbohiiashitee Lɛ Hiɛnɔkamɔ ni Yɔɔ Miishɛɛ

HEMƆKƐYELI ni ayɔɔ akɛ abaatee gbohii ashi lɛ egbɛ eshwa he fɛɛ he. Islam wolo krɔŋkrɔŋ, ni ji Koran lɛ yitso muu ko wieɔ gbohiiashitee lɛ he. Surah 75 lɛ fã ko kɛɔ akɛ: “Mikɛ Gbohiiashitee Gbi lɛ miikã kita . . . Ani gbɔmɔ susuɔ akɛ Wɔnyɛŋ wɔtsara ewui lɛ? . . . Ebiɔ akɛ: ‘Mɛɛ be ji Gbohiiashitee Gbi lɛ?’ Ani Lɛ (nakai mɔ lɛ nɔŋŋ) bɛ hewalɛ ni ekɛaatee gbohii lɛ ashi?”—Surah 75:1-6, 40.

The New Encyclopædia Britannica lɛ wie akɛ: “Zoroasterbii heɔ Efɔŋ nɔ kunim ni abaaye yɛ naagbee mli, gbohii fɛɛ ashitee, Naagbee Kojomɔ, kɛ jeŋ ni abaafee lɛ ehee ekoŋŋ aha jalɔi lɛ amɛyeɔ.”

Encyclopaedia Judaica lɛ tsɔɔ gbohiiashitee lɛ shishi akɛ, “hemɔkɛyeli ni ayɔɔ akɛ yɛ naagbee lɛ abaatee gbohii lɛ ashi kɛ amɛgbɔmɔtsei, koni amɛbahi shikpɔŋ lɛ nɔ ekoŋŋ.” Niiamlitaomɔ wolo nɛɛ nɔŋŋ wie akɛ, hemɔkɛyeli akɛ gbɔmɔ yɛ susuma ni gbooo ní akpɛlɛ nɔ yɛ Yuda jamɔ mli lɛ haa mɔ yiŋ futuɔ lɛ. Ekpɛlɛ nɔ akɛ: “Yɛ anɔkwale mli lɛ hemɔkɛyelii enyɔ, ni ji gbohiiashitee he hemɔkɛyeli kɛ susuma ni gbooo lɛ he hemɔkɛyeli lɛ teɔ shi woɔ amɛhe.”

Hindubii heɔ amɛyeɔ akɛ gbɔmɔ babalaa shii abɔ. Kɛ́ enɛ ji anɔkwale lɛ, belɛ esa akɛ gbɔmɔ ahi susuma ni hiɔ shi yɛ gbele sɛɛ. Hindubii awolo krɔŋkrɔŋ ni ji Bhagavad Gita lɛ wie akɛ: “Anyɛŋ akpata susuma ni yɔɔ adesa gbɔmɔtso muu lɛ fɛɛ mli lɛ hiɛ. Mɔ ko mɔ ko nyɛŋ akpata susuma ni gbooo lɛ hiɛ.”

Esoro Buddha jamɔ lɛ yɛ Hindu jamɔ lɛ he, ejaakɛ Buddhabii lɛ heee susuma ni gbooo tsɔɔmɔ lɛ amɛyeee. Shi kɛlɛ, ŋmɛnɛŋmɛnɛ beaŋ Buddhabii ni yɔɔ Asia maji amli lɛ heɔ amɛyeɔ akɛ susuma lɛ gbooo, shi moŋ efãa kɛyaa gbɔmɔtso kroko mli. *

Yiŋfutumɔ ní Ahiɛ yɛ Gbohiiashitee Tsɔɔmɔ lɛ He

Bei pii lɛ yarafeemɔ wiemɔi ni Kristendom haa lɛ wieɔ susuma ni yaa nɔ ehiɔ shi yɛ gbele sɛɛ lɛ kɛ gbohiiashitee lɛ fɛɛ ahe. Ákɛ nɔkwɛmɔnɔ lɛ, Anglican osɔfoi fɔɔ wiemɔi nɛɛ amli tĩi akɛ: “Akɛni esa Nyɔŋmɔ Ofe lɛ hiɛ yɛ emɔbɔnalɛ ni fa lɛ naa akɛ eŋɔ wɔnyɛmi ni egbo ni wɔsumɔɔ lɛ lɛ susuma eha ehe hewɔ lɛ, wɔkɛ egbɔmɔtso lɛ miiwo shikpɔŋ: shia yɛ shia mli, lamlu yɛ lamlu mli, sũ yɛ sũ mli: yɛ hiɛnɔkamɔ ni ma shi shiŋŋ yɛ Gbohiiashitee lɛ mli kɛmiiya naanɔ wala mli, kɛtsɔ wɔ-Nuŋtsɔ Yesu Kristo nɔ.”—The Book of Common Prayer.

Wiemɔ nɛɛ baanyɛ aha mɔ yiŋ afee lɛ kɔshikɔshi kɛji akɛ Biblia lɛ tsɔɔ gbohiiashitee  loo susuma ni gbooo tsɔɔmɔ lɛ. Shi kɛlɛ, kadimɔ wiemɔ ni France Protestant Nilelɔ Kpanaa Oscar Cullmann wie lɛ. Eŋma yɛ ewolo ni ji Immortality of the Soul or Resurrection of the Dead? lɛ mli akɛ: “Srɔtofeemɔ agbo kã hemɔkɛyeli ni Kristofoi yɔɔ akɛ abaatee mɛi ni egboi lɛ ashi lɛ kɛ hemɔkɛyeli ni Helabii yɔɔ akɛ susuma lɛ gbooo lɛ teŋ. . . . Eyɛ mli akɛ sɛɛ mli lɛ Kristojamɔ fee hemɔkɛyelii enyɔ nɛɛ fɛɛ ekome, ni Kristofonyo folo ko kɛkɛ ni yɔɔ ŋmɛnɛ lɛ leee srɔtofeemɔ ni yɔɔ amɛteŋ lɛ kwraa moŋ, shi minaaa nɔ hewɔ ni esa akɛ matsĩmɔ nɔ ni mi kɛ woloŋlelɔi ateŋ mɛi babaoo heɔ yeɔ akɛ eji anɔkwale lɛ nɔ. . . . Gbohiiashitee lɛ mli hemɔkɛyeli lɛ he saji ji nɔ̃ titri ni yɔɔ Kpaŋmɔ Hee lɛ mli fɛɛ. . . . Abaatsɔ Nyɔŋmɔ nifeemɔ ni ekɛbɔɔ nii ehee lɛ nɔ akɛ mɔ ni egbo lɛɛlɛŋ lɛ aba wala mli ekoŋŋ.”

Belɛ ebɛ naakpɛɛ mɔ akɛ mɛi babaoo ayiŋ futuɔ amɛ yɛ gbele kɛ gbohiiashitee lɛ he. Bɔni afee ni wɔyiŋ akafutu wɔ yɛ sane nɛɛ he lɛ, ehe miihia ni wɔkwɛ Biblia lɛ, ní wieɔ anɔkwalei ni Yehowa Nyɔŋmɔ ni ji adesai a-Bɔlɔ lɛ ejie lɛ kpo lɛ ahe lɛ mli. Biblia lɛ wieɔ gbohiiashitee babaoo ahe. Nyɛhaa wɔpɛia gbohiiashitee he saji nɛɛ ateŋ ejwɛ mli ni wɔsusu nɔ ni amɛtsɔɔ lɛ ahe wɔkwɛa.

“Yei Anine Shɛ Amɛmɛi ní Egboi lɛ Anɔ Ekoŋŋ Kɛtsɔ Shitee Nɔ”

Yɛ wolo ni bɔfo Paulo ŋma eyaha Yudafoi ni ebatsɔmɔ Kristofoi lɛ mli lɛ, ewie akɛ yei ni yɔɔ hemɔkɛyeli lɛ “anine shɛ amɛmɛi ní egboi lɛ anɔ ekoŋŋ kɛtsɔ shitee nɔ.” (Hebribii 11:35) Yei nɛɛ ateŋ mɔ kome hi Zarefat, ni ji Foenikebii amaŋ ni bɛŋkɛ Zidon ni yɔɔ Mediterranean Ŋshɔ lɛ naa lɛ. Eji yoo okulafo, ni efee Nyɔŋmɔ gbalɔ Elia gbɔ ni eha lɛ niyenii yɛ hɔmɔ ni naa wa waa bei amli po. Dɔlɛ sane ji akɛ, hela mɔ yoo nɛɛ binuu ni egbo. Oya nɔŋŋ ni Elia wó gbekɛ lɛ kɛtee ŋwɛitsu ni eyɔɔ mli lɛ mli, ni ekpa Yehowa fai koni etee gbekɛ lɛ shi. Naakpɛɛ nɔ ko ba, ni gbekɛ lɛ ‘hiɛ tsɛ̃.’ Elia kɛ gbekɛ lɛ ku sɛɛ baha enyɛ ni ekɛɛ: “Kwɛ, obi lɛ yi ená wala!” Te yoo lɛ fee enii eha tɛŋŋ? Ekɛ miishɛɛ wie akɛ: “Kpaako miná mile akɛ Nyɔŋmɔ gbɔmɔ jio, ni akɛ Yehowa wiemɔ ni yɔɔ onaa lɛ anɔkwale ni!”—1 Maŋtsɛmɛi 17:22-24.

Gbalashihilɛ mli hefatalɔi komɛi ni nine kpɔɔ lɛ hi shi yɛ Zarefat wuoyigbɛ aaafee kilomitai 100, ni amɛkwɛ Elia sɛɛyelɔ ni ji gbalɔ Elisha lɛ. Yoo lɛ ji mɔ ko ni ale lɛ waa yɛ emaŋ ni ji Shunem lɛ mli. Ekɛ ewu lɛ kpɛlɛ nɔ akɛ amɛbaaha Elisha wɔɔhe yɛ ŋwɛitsu nɔ yɛ amɛshia lɛ mli. Beni yoo lɛ fɔ binuu lɛ, ŋkɔmɔ ni amɛyeɔ yɛ bi ni amɛfɔɔɔ hewɔ lɛ batsɔ miishɛɛ. Beni gbekɛ lɛ bada lɛ, ekɛ ŋmaakulɔi lɛ fɔɔ etsɛ ŋɔɔ yaa yɛ ŋmɔ lɛ mli. Gbi ko lɛ oshara ko ba trukaa. Gbekɛ nuu lɛ kɛ gbee ni wa kɛɛ akɛ eyitso miigba lɛ. Tsuji lɛ ateŋ mɔ kome kɛ oyaiyeli wo lɛ kɛtee shia. Enyɛ kɛ lɛ fɔ eshwuɔ nɔ, shi fiofio lɛ, gbekɛ lɛ gbo. Nyɛ ni ehao yɛ henumɔŋ lɛ kpɛ eyiŋ akɛ ebaaya Elisha ŋɔɔ kɛha yelikɛbuamɔ. Ekɛ etsulɔ lɛ fã gbɛ kɛtee  kooyi-anaigbɛ yɛ Karmel Gɔŋ lɛ he, he ni Elisha yɔɔ lɛ.

Gbalɔ lɛ tsu etsulɔ Gehazi kɛtsɔ ehiɛ, ni eyana akɛ gbekɛ lɛ egbo lɛɛlɛŋ. Elisha kɛ yoo lɛ hu tee jɛmɛ, shi mɛni ba beni naagbee lɛ amɛyashɛ Shunem lɛ? Sane ni yɔɔ 2 Maŋtsɛmɛi 4:32-37 lɛ tsɔɔ mli akɛ: “Ni beni Elisha shɛ shia lɛ, naa, gbekɛ lɛ egbo ekã esaa lɛ nɔ. Ni ebote tsu lɛŋ, ni eŋa shinaa lɛ ewo amɛyi enyɔ lɛ amɛyi, ni ekpa Yehowa fai. Ni ekwɔ eyabu gbekɛ lɛ nɔ, ni ekɛ enaabu bu enaabu nɔ, ni ekɛ ehiŋmɛii bumɔ ehiŋmɛii anɔ, ni ekɛ eniji hu shwie eniji anɔ, ni ekpã emli ebu gbekɛ lɛ nɔ; ni gbekɛ lɛ he dɔ la. Kɛkɛ ni eku esɛɛ kɛba, ni ebashara shi yɛ shia lɛ kɛtee kɛba shikome, ni esaa ekwɔ kɛtee ni eyakpã emli ebu enɔ; kɛkɛ ni gbekɛ lɛ tsine shii kpawo, ni gbekɛ lɛ gbele ehiŋmɛii. Ni etsɛ́ Gehazi kɛba ni ekɛɛ: Tsɛ́ Shunamyoo lɛ kɛba! Ni etsɛ́ lɛ, ni eba eŋɔɔ; ni ekɛɛ: Wó obi lɛ! Kɛkɛ ni eba ni ebaho egbee enaji anaa, ni ekoto lɛ; ni ewó ebi lɛ kɛje kpo.”

Taakɛ Zarefat yoo okulafo lɛ ji lɛ, Shunamyoo lɛ le akɛ nɔ ni ba lɛ jɛ Nyɔŋmɔ hewalɛ. Beni Nyɔŋmɔ kɛ yei enyɔ nɛɛ fɛɛ abii ni amɛsumɔɔ amɛ jogbaŋŋ lɛ ba wala mli ekoŋŋ lɛ, amɛná miishɛɛ jogbaŋŋ diɛŋtsɛ.

Gbohii ni Yesu Tee Amɛshi yɛ Esɔɔmɔ Nitsumɔ lɛ Mli

Aaafee afii 900 sɛɛ lɛ, atee gbonyo ko hu shi yɛ he ko ni kɛ Shunem kooyigbɛ jɛkɛɛɛ ni bɛŋkɛ Nain akrowa lɛ mli. Beni Yesu Kristo kɛ ekaselɔi lɛ fãa gbɛ kɛjɛɔ Kapernaum ní amɛbɛŋkɛɔ Nain agbo lɛ naa lɛ, amɛna ni atere gbonyo ko, ni Yesu na yoo okulafo ní binuu kome pɛ ji mɔ ni egbo lɛ. Yesu kɛɛ lɛ akɛ ekpa yaafo. Luka, ni eji tsofafeelɔ lɛ tsɔɔ nɔ ni nyiɛ sɛɛ kɛba lɛ mli akɛ: “Ni [Yesu] eba ebata adeka lɛ he; ni mɛi ni tere lɛ lɛ wa damɔ shi. Ni ekɛɛ: Oblanyo, miikɛɛo akɛ: Tee shi! Ni mɔ ni egbo lɛ te shi etá shi, ni ebɔi wiemɔ; ni eŋɔ lɛ eha enyɛ.” (Luka 7:14, 15) Mɛi ni na naakpɛɛ nii nɛɛ wo Nyɔŋmɔ hiɛ nyam. Gbohiiashitee lɛ he sane gbɛ eshwã kɛtee wuoyigbɛ, kɛtee Yudea kɛ maji ni bɛŋkɛ lɛ amli. Miishɛɛ sane ji akɛ Yohane Baptisilɔ lɛ kaselɔi lɛ nu naakpɛɛ nii lɛ he, ni amɛyakɛɛ Yohane. Lɛ hu etsu amɛ koni amɛyatao Yesu ní amɛbi lɛ kɛji akɛ Lɛ ji Mesia ní akpaa lɛ gbɛ lɛ. Yesu kɛɛ amɛ akɛ: “Nyɛyaa ni nyɛyagbaa Yohane nibii ni nyɛna ní nyɛnu lɛ, akɛ shwilafoi miina nii, obubuafoi miinyiɛ, kpitiyelɔi ahe miitse, toimulɔi miinu nii, gbohii miite shi, aajaje sanekpakpa lɛ aatsɔɔ ohiafoi.”—Luka 7:22.

 Gbohiiashitee lɛ he naakpɛɛ nii ni Yesu fee ni ale fe fɛɛ lɛ ji Lazaro ni ji enaanyo ni bɛŋkɛ lɛ kpaakpa lɛ shitee lɛ. Beni Lazaro gbo lɛ, be shwie mli dani Yesu ba weku shia lɛ. Yɛ naagbee mli lɛ, Yesu bashɛ Betania beni Lazaro egbo gbii ejwɛ sɛɛ. Beni Yesu fã ni ajie tɛ ni akɛtsĩ gbonyobu lɛ naa lɛ, Marta te shi ewo enɛ akɛ: “Nuŋtsɔ, be nɛɛ mli lɛ esha, ejaakɛ éye gbii ejwɛ.” (Yohane 11:39) Shi kɛlɛ, bɔ ni Lazaro gbonyo lɛ ekpɔtɔ eha lɛ etsĩii gbohiiashitee lɛ naa. Yesu fã, “ni gbonyo lɛ je kpo, fũu mamai lɛ fĩmɔ enaji kɛ eniji, ni duku fĩ ehiɛ.” Bɔ ni Yesu henyɛlɔi lɛ fee amɛnii amɛha yɛ sɛɛ mli lɛ maa nɔ mi akɛ Lazaro diɛŋtsɛ ji mɔ ni ba wala mli lɛ.—Yohane 11:43, 44; 12:1, 9-11.

Mɛni wɔkaseɔ kɛjɛɔ gbohiiashitee he saji ejwɛ nɛɛ amli? Amɛteŋ mɔ fɛɛ mɔ ni atee lɛ shi lɛ ku esɛɛ kɛba wala mli akɛ nakai mɔ lɛ nɔŋŋ. Amɛwekumɛi ni bɛŋkɛ amɛ kpaakpa lɛ po yoo amɛteŋ mɔ fɛɛ mɔ. Mɛi ni atee amɛshi lɛ ateŋ mɔ ko mɔ ko ewieee nɔ ni ba yɛ be kukuoo ni amɛgbo yɛ mli lɛ he sane ko. Amɛteŋ mɔ ko ewieee akɛ efã gbɛ kɛtee jeŋ kroko mli. Eeenyɛ efee akɛ amɛteŋ mɔ fɛɛ mɔ kɛ gbɔmɔtsoŋ hewalɛnamɔ kpakpa ba wala mli. Yɛ amɛgbɛfaŋ lɛ, taakɛ Yesu tsɔɔ lɛ, efee tamɔ nɔ ni amɛwɔ bei fioo ko ni amɛte shi. (Yohane 11:11) Shi kɛlɛ, yɛ be ko sɛɛ lɛ amɛteŋ mɔ fɛɛ mɔ gbo ekoŋŋ.

Suɔlɔi ní Akɛ Amɛ Aaakpe Ekoŋŋ—Hiɛnɔkamɔ ni Yɔɔ Miishɛɛ

Owen gbele ni ba trukaa, ni wɔtsĩ tã yɛ sane ni tsɔ hiɛ lɛ mli lɛ sɛɛ bei fioo ko lɛ, etsɛ yasara enaanyo ko yɛ eshia. Ena dɛhiɛmɔ wolo ko ni miitswa maŋshiɛmɔ ko ni Yehowa Odasefoi eto he gbɛjianɔ lɛ he adafi kã okpɔlɔ ko nɔ. Ená wolo lɛ saneyitso ni ji “Nɛgbɛ Gbohii lɛ Yɔɔ?” lɛ he miishɛɛ waa. No ji sanebimɔ tuuntu ni yɔɔ ejwɛŋmɔ mli lɛ. Etee eyabo maŋshiɛmɔ lɛ toi, ni ená anɔkwa miishɛjemɔ kɛjɛ Biblia lɛ mli. Ekase akɛ gbohii lɛ enaaa nɔ̃. Yɛ nɔ najiaŋ ni gbohii lɛ, ni Owen fata he lɛ aaana nɔ̃ yɛ hɛl la mli loo ni Nyɔŋmɔ aaaŋɔ amɛ ni amɛyatsɔmɔ bɔfoi yɛ ŋwɛi lɛ, amɛmiimɛ yɛ gbohiiabui lɛ amli kɛyashi beni akɛ amɛ baaba wala mli ekoŋŋ yɛ gbohiiashitee lɛ mli.—Jajelɔ 9:5, 10; Ezekiel 18:4.

Ani oshara ko eba oweku lɛ nɔ trukaa? Ani oosusu he ni osuɔlɔi ni egboi lɛ yɔɔ amrɔ nɛɛ kɛ nyɛ́ ni eeenyɛ eba akɛ obaana amɛ ekoŋŋ lɛ he taakɛ Owen tsɛ ji lɛ? Kɛ́ nakai ni lɛ, wɔmiifɔ bo nine ni osusu nɔ ni Biblia lɛ yaa nɔ etsɔɔ lolo yɛ gbohiiashitee lɛ he lɛ he. Ekolɛ oyiŋ feɔ bo kɔshikɔshi akɛ: ‘Mɛɛ be abaatee gbohii lɛ ashi? Namɛi tuuntu abaatee amɛ shi lɛ?’ Ofainɛ kanemɔ sanebimɔi nɛɛ kɛ ekrokomɛi ni fata he lɛ ahe saji ni abaasusu he lɛ yɛ nikasemɔi ni nyiɛ sɛɛ lɛ amli.

[Shishigbɛ niŋmaa]

[Mfoniri ni yɔɔ baafa 5]

Elia kpa Yehowa fai koni etee gbekɛ lɛ shi

[Mfoniri ni yɔɔ baafa 5]

Yehowa kɛ Elisha tsu nii ni ekɛtee Shunamyoo lɛ binuu lɛ shi

[Mfoniri ni yɔɔ baafa 6]

Yesu tée Nain yoo okulafo lɛ binuu lɛ shi

[Mfoniri ni yɔɔ baafa 7]

Gbohiiashitee lɛ baaha wekumɛi kɛ amɛsuɔlɔi akpe ekoŋŋ