Sanebimɔi ni Jɛ Kanelɔi Adɛŋ

Mɛni hewɔ Paulo ŋma yɛ Kristofonyo ŋa he akɛ: “Aaahere eyiwala kɛaatsɔ biiafɔmɔ nɔ” lɛ?—1 Timoteo 2:15.

Mɛni ji nɔ ni nɛkɛ ŋmalɛ kuku nɛɛ mli saji jieɔ lɛ kpo yɛ nɔ ni Paulo tsɔɔ lɛ he? No mli lɛ mumɔ lɛ miikanya lɛ, ni ekɛ ŋaawoo miiha yɛ nitsumɔ ni esa akɛ Kristofonyo yoo atsu yɛ asafo lɛ mli lɛ he. Eŋma akɛ: “Yei hu, amɛkɛ atade ni sa kɛ hiɛ ni gboɔ nɔ̃ kɛ jwɛŋmɔ ni sa awula amɛhe, jeee kɛ yigbɔɔ loo shika loo adiagbai loo atade ni jara wa, shi moŋ kɛ nitsumɔi kpakpai ni sa yei ni tsɔɔ amɛhe akɛ Nyɔŋmɔ jálɔi lɛ.” (1 Timoteo 2:9, 10) Paulo miiwo enyɛmimɛi yei Kristofoi lɛ aŋaa koni amɛkɛ hiɛ ni gboɔ nɔ̃ afee nii, ni amɛŋmɛ pɛpɛɛpɛ yɛ nibii ni amɛkɛbaawula amɛhe lɛ amli, ní amɛkɛ nitsumɔi kpakpai “awula” amɛhe.

No sɛɛ lɛ, Paulo tsɔɔ yitsoyeli he gbɛjianɔ ni ato yɛ asafo lɛ mli lɛ mli akɛ: “Mihaaa yoo hegbɛ akɛ etsɔɔ nii aloo eye nuu nɔ, shi moŋ efee dioo.” (1 Timoteo 2:12; 1 Korintobii 11:3) Etsɔɔ nɔ ni adamɔ nɔ ato gbɛjianɔ nɛɛ mli akɛ, Satan lakaaa Adam, shi Hawa moŋ ji mɔ ni “alaka, ni ebote nɔtɔmɔ mli.” Te aaafee tɛŋŋ abu Kristofonyo yoo he koni ekatɔ̃ tamɔ bɔ ni Hawa tɔ̃ lɛ? Paulo ha hetoo akɛ: “Shi aaahere eyiwala kɛaatsɔ biiafɔmɔ nɔ, kɛji amɛhi shi yɛ hemɔkɛyeli kɛ suɔmɔ kɛ hetsemɔ kɛ jwɛŋmɔ hu ni sa mli lɛ.” (1 Timoteo 2:14, 15) Mɛni Paulo kɛ nɛkɛ wiemɔi nɛɛ tsɔɔ?

Wiemɔ shishitsɔɔlɔi komɛi awiemɔ tsɔɔ akɛ yoo yiwalaheremɔ damɔ bii ni eeefɔ lɛ nɔ. Ákɛ nɔkwɛmɔnɔ lɛ, Today’s English Version lɛ kɛɔ akɛ: “Abaahere yoo yiwala kɛtsɔ bii ni eeefɔ lɛ nɔ.” Shi kɛlɛ, Paulo wiemɔi lɛ ashishitsɔɔmɔ ni tamɔ nɛkɛ lɛ ejaaa. Ŋmalɛi babaoo tsɔɔ akɛ kɛ́ aaahere mɔ ko yiwala lɛ, belɛ esa akɛ mɔ lɛ aná ale Yehowa, ni ehé Yesu nɔ eye, ní ená emli hemɔkɛyeli, ní ekɛ nitsumɔi ajie hemɔkɛyeli ni eyɔɔ lɛ kpo etsɔɔ. (Yohane 17:3; Bɔfoi lɛ Asaji 16:30, 31; Romabii 10:10; Yakobo 2:26) Kɛfata he lɛ, Paulo etsɔɔɔ ákɛ aama nɔ mi aaha yei heyelilɔi lɛ akɛ amɛbaafɔ shweshweeshwe. Yei efɔ shweshweeshwe, ni enɛ kɔɔɔ he eko kɛ́ amɛji heyelilɔi loo amɛjeee heyelilɔi. Ni mɔbɔ sane ji akɛ, mɛi komɛi egboi yɛ be mli ni amɛfɔ́ɔ lɛ, ekɔɔɔ he eko kɛ́ amɛji heyelilɔi loo amɛjeee heyelilɔi.—1 Mose 35:16-18.

Ŋaawoo kroko hu ni kɔɔ yei ahe ni Paulo kɛha yɛ nakai wolo lɛ nɔŋŋ mli lɛ yeɔ ebuaa wɔ koni wɔnu nɔ ni etsɔɔ lɛ shishi. Ekɛ kɔkɔbɔɔ ko ha yei okulafoi ni darako, ni ‘feɔ hejɔ̃, ni kpaa shi yɛ shiai, ni jeee hejɔ̃lɔi kɛkɛ amɛtsɔmɔɔ, shi amɛwiewieɔ mɛi ahe hu, ni amɛjeɔ shi, amɛwieɔ nii ni ejaaa’ lɛ. Mɛɛ ŋaawoo Paulo kɛha? Etee nɔ ekɛɛ akɛ: “No hewɔ lɛ miisumɔ akɛ yei okulafoi ni darako lɛ agbã, ní amɛfɔ bii, ní amɛye amɛwe nɔ, ní amɛkaha henyɛlɔ lɛ miiná sane ko ekɛmiijɛ́ mɛi.”—1 Timoteo 5:13, 14.

Paulo tsĩ nitsumɔ ni he yɔɔ sɛɛnamɔ ni yei tsuɔ yɛ weku gbɛjianɔtoo lɛ mli lɛ tã. Yɛ be mli ni yoo yaa nɔ ‘ehiɔ shi yɛ hemɔkɛyeli kɛ suɔmɔ kɛ hetsemɔ kɛ jwɛŋmɔ hu ni sa mli,’ ni etsuɔ nitsumɔi tamɔ, ‘biiafɔmɔ kɛ shiakwɛmɔ’ he nii lɛ, ehaŋ ekɛ ehe awo jeŋba ko ni etswaaa mɔ emaaa shi lɛ mli. Abaabaa emumɔŋ shidaamɔ lɛ yi loo ‘abaabu he.’ (1 Timoteo 2:15) Gbɛ ni tamɔ nɛkɛ ni yei babaoo ni darako lɛ kɛaatsu nii lɛ baaye ebua amɛ koni amɛkwa Satan ŋaatsɔi lɛ.

Wiemɔi ni Paulo kɛha Timoteo lɛ kaiɔ wɔ fɛɛ, ni ji hii kɛ yei lɛ koni wɔkɛ wɔhe awo nitsumɔ ni he yɔɔ sɛɛnamɔ mli. Nyɔŋmɔ Wiemɔ lɛ woɔ Kristofoi fɛɛ aŋaa akɛ: “Nyɛkwɛa bɔ ni nyɛaafee ní nyɛkɛ hiɛtɛjemɔ anyiɛ, jeee tamɔ mɛi ni leee nii, shi moŋ tamɔ nilelɔi.”—Efesobii 5:15.