Sanebimɔi ni Jɛ Kanelɔi Adɛŋ

Mɛni hewɔ agbeee David kɛ Batsheba yɛ gbãla ni amɛfite lɛ hewɔ, shi moŋ aha amɛbinuu abifao lɛ gbo lɛ?

Mose mla lɛ kɛɔ akɛ: “Kɛji ana nuu ko ni kɛ yoo ko ni ji mɔ ko ŋa kã shi lɛ, no lɛ amɛyi enyɔ lɛ fɛɛ amɛgboi, nuu lɛ ni kɛ yoo lɛ kã shi lɛ kɛ yoo lɛ fɛɛ; ni ojie mɔ fɔŋ lɛ kɛjɛ Israel.” (5 Mose 22:22) Eji Yehowa Nyɔŋmɔ ŋmɛ gbɛ ni adesai kojolɔi ye sane ni kɔɔ David kɛ Batsheba eshafeemɔ lɛ he lɛ yɛ Mla lɛ naa kulɛ, abaagbe gbalafitelɔi enyɔ nɛɛ. Akɛni adesai kojolɔi enaaa tsuiaŋ hewɔ lɛ, odaseyelii ni maa nɔ mi akɛ efɔŋfeelɔi lɛ kɛ amɛhe ewo nifeemɔ ni tamɔ nakai mli lɛ anɔ amɛdamɔɔ amɛkojoɔ. Gbalafitemɔ he toigbalamɔ ji gbele. Ahaaa Israel kojolɔi hegbɛ koni amɛha mɔ ko ni kɛ ehe ewo nakai eshafeemɔ lɛ mli lɛ aye ehe.

Ákɛ mɔ ni tamɔɔɔ adesai kojolɔi lɛ, anɔkwa Nyɔŋmɔ lɛ nyɛɔ enaa tsuiaŋ ni ekɛ eshai keɔ kɛ́ ena akɛ ehe miihia ni efee nakai. Akɛni Yehowa kɛ David ní he yɔɔ sane lɛ mli lɛ efee Maŋtsɛyeli he kpaŋmɔ hewɔ lɛ, E-kpɛ eyiŋ akɛ lɛ diɛŋtsɛ ebaatsu sane lɛ he nii yɛ gbɛ kroko nɔ. (2 Samuel 7:12-16) “Shikpɔŋ fɛɛ nɔ kojolɔ lɛ” yɛ hegbɛ akɛ ekpɛɔ eyiŋ akɛ ebaafee nakai.—1 Mose 18:25.

Beni Yehowa pɛi David tsui mli ekwɛ lɛ, mɛni ena? Lala 51 lɛ yiteŋgbɛ niŋmaa (ni anaa yɛ klɛŋklɛŋ kukuji enyɔ lɛ amli yɛ Ga Biblia lɛ mli) lɛ kɛɔ akɛ, lala nɛɛ haa anaa bɔ ni David nu he eha “beni etee Batsheba ŋɔɔ ni gbalɔ Natan ba eŋɔɔ lɛ.” Lala 51:3-6 kɛɔ akɛ: “Naa mi mɔbɔ, Nyɔŋmɔ, yɛ omlihilɛ naa; yɛ omusuŋtsɔlɛ falɛ naa lɛ, gbee minɔtɔmɔi lɛ! Ju mihe kwraa kɛjɛ minɔ̃sha lɛ mli, ní otsuu mihe kɛjɛ mihe esha lɛ mli! Ejaakɛ minɔtɔmɔi lɛ, mi diɛŋtsɛ mile, ni mihe esha lɛ yɛ mihiɛ daa. Bo okometoo mifee esha mishi, ni mifee efɔŋ yɛ ohiɛ.” Ekolɛ Yehowa bu David he ni eshwa kɛjɛ etsuiŋ tɔ̃ɔ nɛɛ akɛ nifeemɔ ni tsɔɔ akɛ etsake etsui diɛŋtsɛ, ni no hewɔ lɛ E-na akɛ ehe miihia ni ejie mɔbɔnalɛ kpo etsɔɔ efɔŋfeelɔi enyɔ lɛ. Kɛfata he lɛ, David diɛŋtsɛ ji mɔ ko hu ni naa mɔbɔ, ni Yehowa naa mɛi ni naa mɔbɔ lɛ amɔbɔ. (1 Samuel 24:4-7; Mateo 5:7; Yakobo 2:13) No hewɔ lɛ, beni David kpɛlɛ etɔmɔ lɛ nɔ lɛ, Natan kɛɛ lɛ akɛ: “Yehowa hu etsi ohe esha lɛ ehã sɛɛ; ogboŋ!”—2 Samuel 12:13.

Nibii komɛi yɛ ni jɛ David kɛ Batsheba eshafeemɔ lɛ mli kɛba ní nomɛi lɛ amɛyeee amɛhe kɛjɛɛɛ he. Natan kɛɛ David akɛ: “Gbii abɔ ni okɛ nɔ ni ofee nɛɛ eha Yehowa henyɛlɔi lɛ ená hegbɛ pii ni amɛkɛaabɔ musu hewɔ lɛ, bi lɛ hu ni afɔ́ ahao lɛ gbo eeegbo!” Yɛ gbii kpawo ní David kɛhi ŋmaa ni ekɛye awerɛho yɛ amɛbi ni he yeɔ lɛ hewɔ lɛ fɛɛ sɛɛ lɛ, gbekɛ lɛ gbo.—2 Samuel 12:14-18.

Ewa kɛha mɛikomɛi akɛ amɛaanu nɔ hewɔ ni esa akɛ gbekɛ lɛ agbo lɛ shishi, ejaakɛ 5 Mose 24:16 lɛ kɛɔ akɛ: “Bii hu, akagbe amɛ yɛ amɛtsɛmɛi ahewɔ.” Shi esa akɛ wɔkai akɛ eji adesai kojolɔi ni ye sane lɛ kulɛ, gbekɛ ni ahiɛ lɛ hɔ lɛ kɛ efɔlɔi lɛ fɛɛ ahiɛ baakpata. Ekolɛ David binuu ní gbo lɛ hu ha ena bɔ ni Yehowa náaa esha ni ekɛ Batsheba fee lɛ he miishɛɛ kwraa ha lɛ jogbaŋŋ. Wɔbaanyɛ wɔná nɔmimaa akɛ Yehowa tsu sane lɛ he nii yɛ jalɛ gbɛ nɔ, ejaakɛ “egbɛ̀i lɛ hi pɛpɛɛpɛ!”—2 Samuel 22:31.

[Mfoniri ni yɔɔ baafa 31]

David jie lɛ kpo akɛ etsake etsui diɛŋtsɛ