‘Miyelikɛbuamɔ Jɛɔ Yehowa Ŋɔɔ’

Wekui ni Nyɔŋmɔ He Nilee Etswa Amɛ Ema Shi

“BERLIN WALL” (Berlin Gbogbo) lɛ. Nɛkɛ ji bɔ ni gbalashihilɛ mli hefatalɔi komɛi ni yɔɔ Argentina lɛ tsɛ́ɔ gbogbo diɛŋtsɛ ni amɛha atswa kɛja amɛshia lɛ mli enyɔ lɛ! Béi ni bakã amɛteŋ lɛ ehiii saamɔ; no ji akɛ amɛkɛ amɛhe yeee kwraa.

Dɔlɛ sane ji akɛ, jeee hefatalɔi nɛɛ pɛ naa amɛhe yɛ shihilɛ ni tamɔ nɛkɛ mli. Béi ni mli wa, anɔkwa ni ayeee gbalashihilɛ mli hefatalɔ, kɛ nyɛ̃ɛ ni naa wa miiya nɔ eefite wekui babaoo. Enɛ ji dɔlɛ sane, ejaakɛ ewooo Nyɔŋmɔ ni to weku gbɛjianɔtoo lɛ shishi lɛ hiɛ nyam. (1 Mose 1:27, 28; 2:23, 24) Akɛni weku lɛ ji nikeenii ni jɛ Nyɔŋmɔ ŋɔɔ hewɔ lɛ, kulɛ no mli ji he ni sa jogbaŋŋ akɛ ajie suɔmɔ ni mli kwɔ kpo atsɔɔ he yɛ. (Rut 1:9) Kɛji weku lɛ mli bii ateŋ mɔ fɛɛ mɔ tsu sɔ̃i ni Nyɔŋmɔ kɛfɔ̃ enɔ lɛ ahe nii lɛ, no baaha amɛwo Yehowa hiɛ nyam, ni amɛkɛ amɛhe baahi shi yɛ miishɛɛ mli. *

Akɛni Nyɔŋmɔ ji mɔ ni to weku gbɛjianɔtoo lɛ shishi hewɔ lɛ, esa akɛ wɔha susumɔi ni wɔhiɛ yɛ bɔ ni sa akɛ weku mli bii ahi shi aha lɛ he lɛ kɛ enɔ̃ lɛ akpã gbee. Anaa ŋaawoi kpakpai babaoo ni baaha wekui aye omanye, titri lɛ be mli ni naagbai ete shi lɛ yɛ e-Wiemɔ lɛ mli. Biblia lɛ wieɔ sɔ̃ ni kã wumɛi anɔ lɛ he akɛ: “[E]sa akɛ wumɛi hu asumɔ amɛ diɛŋtsɛ amɛŋamɛi, tamɔ amɛ diɛŋtsɛ amɛgbɔmɔtsei.” Kɛji wu lɛ tsu taomɔ nii nɛɛ he nii lɛ, no haa ŋa lɛ náa he miishɛɛ akɛ eeejie ‘bulɛ ni mli kwɔ kpo etsɔɔ ewu lɛ.’—Efesobii 5:25-29, 33.

Beni Paulo wieɔ bɔ ni esa akɛ fɔlɔi kɛ amɛbii ahi shi aha lɛ he lɛ, eŋma akɛ: “Tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ Nuŋtsɔ [Yehowa, NW] lɛ tsɔsemɔ kɛ ŋaawoo lɛ mli.” (Efesobii 6:4) Ŋaawoo nɛɛ kɛ nitsumɔ haa anɔkwa miishɛɛ baa weku lɛ mli, ni no haa efeɔ mlɛo kɛhaa gbekɛbii lɛ hu akɛ amɛaabo amɛfɔlɔi atoi.—Efesobii 6:1.

Nɔ ni wɔsusu he nɛɛ ji ŋaawoi kpakpai ni Biblia lɛ kɛhaa yɛ weku shihilɛ he lɛ he nɔkwɛmɔnii komɛi. Ŋaawoi nɛɛ kɛ nitsumɔ eha miishɛɛ eba wekui babaoo amli. Ákɛ nɔkwɛmɔnɔ lɛ, susumɔ hefatalɔi ni yɔɔ Argentina ni wɔtsĩ amɛtã kɛtsɔ hiɛ lɛ ahe okwɛ. Beni amɛkɛ Yehowa Odasefoi ekase Biblia lɛ nyɔji etɛ sɛɛ lɛ, amɛkɛ emli ŋaawoi ni nilee yɔɔ mli lɛ bɔi nitsumɔ yɛ amɛgbalashihilɛ lɛ mli. Amɛmia amɛhiɛ waa koni amɛkɛ amɛhe afɔ sanegbaa, ní amɛjie mɔ hesusumɔ kpo amɛtsɔɔ amɛhe, ní agbɛnɛ hu amɛkɛ amɛtɔmɔi afafaa amɛhe. (Abɛi 15:22; 1 Petro 3:7; 4:8) Amɛkase bɔ ni amɛaafee amɛye mlifu nɔ kɛ bɔ ni amɛaatsi amɛbɛŋkɛ Nyɔŋmɔ hu kɛha edɛŋ yelikɛbuamɔ be mli ni nibii miihe afite kwraa. (Kolosebii 3:19) No sɛɛ etsɛɛɛ kɛkɛ ni “Berlin Gbogbo” lɛ kumɔ shwie shi!

Nyɔŋmɔ Baanyɛ Etswa Weku Ema Shi

Nyɔŋmɔ shishitoo mlai lɛ ni aaakase ní akɛtsu nii hu lɛ baanyɛ etswa weku lɛ ema shi koni enyɛ edamɔ nɔnyɛɛi anaa. Enɛ feemɔ he miihia waa, ejaakɛ agba afɔ̃ shi akɛ weku gbɛjianɔtoo lɛ kɛ tutuamɔ ni naa wa waa baakpe yɛ wɔgbii nɛɛ amli. Paulo gba jeŋba fitemɔ kɛ adesai aweku ni baaya nɔ emli agbála yɛ wɔbei nɛɛ amli lɛ ahe sane efɔ̃ shi. Ewie akɛ, nɔ ni baaha ayɔse “naagbee gbii lɛ” ji anɔkwa ni ayeee, ‘mɛi ahedɔɔ su’ ni abɛ́ kɛ fɔlɔi anɔ toigbele, ni etsɔɔ mli hu akɛ, abaana sui nɛɛ yɛ “mɛi ni hiɛ Nyɔŋmɔ jamɔ su” lɛ po ateŋ.—2 Timoteo 3:1-5.

 Mɔdɛŋ ni wɔɔbɔ koni wɔsa Nyɔŋmɔ hiɛ lɛ baanyɛ aye abua wɔ koni wɔye sui gbohii nɛɛ ni fiteɔ weku lɛ anɔ. Wekui pii ena akɛ Nyɔŋmɔ dɛŋ yelikɛbuamɔ he miihia amɛ koni amɛnyɛ amɛdamɔ naagbai babaoo ni amɛkɛkpeɔ lɛ anaa. Kɛji weku lɛ mli bii lɛ miisumɔ ni wekukpaa kpakpa ni kã amɛ kɛ Nyɔŋmɔ teŋ lɛ ahi shi daa lɛ, no lɛ nɔ ni he hiaa fe fɛɛ ji ní amɛkɛ Biblia mli shishitoo mlai atsu nii, ní agbɛnɛ hu amɛyɔse akɛ, “kɛ́ jeee Yehowa maa tsu lɛ, no lɛ yakatswaa mɛi ni maa lɛ gboɔ he deŋme.” (Lala 127:1) Nyɔŋmɔ ni akɛyeɔ klɛŋklɛŋ gbɛhe yɛ weku lɛ mli lɛ ji nɔ titri ni kɛ miishɛɛ baa weku shihilɛ mli.—Efesobii 3:14, 15.

Nuu ko ni atsɛ́ɔ lɛ Dennis ni jɛ Hawaii lɛ bana bɔ ni enɛ ji anɔkwale ha. Eyɛ mli akɛ etsɛ́ɔ ehe Kristofonyo moŋ, shi mɛi ajɛmɔ kɛ nɔmɔ sɔŋŋ eshwɛ lɛ. Beni éshi asraafoi anitsumɔ mli sɛɛ lɛ, ebatsɔ mɔ ko ni mli fũɔ oyayaayai ní yitsoŋ wa hu. Ekaiɔ akɛ: “Onaa kɛ onaa nɛɛ nɔŋŋ lɛ mikɛ mɔ ko miinɔ. Nɔ ni baajɛ mli aba minɔ lɛ kɔɔɔ mihe eko, ni misheee gbele hu gbeyei. Jɛmɔ wiemɔi ni mli wawai ni mikɛtsuɔ nii kɛ nɔmɔi lɛ tee nɔ be saŋŋ. Miŋa ni ji Yehowa Odasefonyo lɛ wo mi hewalɛ koni makase Biblia lɛ.”

Dennis te shi ewo mɔdɛŋ fɛɛ ni eŋa lɛ bɔɔ lɛ. Shi kɛlɛ, Kristofoi ajeŋba kpakpa ni eŋa lɛ jieɔ lɛ kpo lɛ ba esubaŋi gbohii lɛ ashi. Sɛɛ mli lɛ, Dennis kɛ eŋa kɛ ebii lɛ fɛɛ tee Kristofoi akpeei lɛ eko shishi. No sɛɛ lɛ, akɛ Dennis bɔi Biblia lɛ kasemɔ, ni etee ehiɛ oyayaayai. Ebafɔ̃ɔ tawa shɛremɔ ní ekɛ ehe ewo mli afii 28 sɔŋŋ nɛ lɛ, ni ekɛ enanemɛi ni kɛ amɛhe woɔ nifeemɔi ni ebɔɔ mɔdɛŋ koni etsi ehe kɛjɛ he nɛɛ amli lɛ kpá bɔɔ. Be mli ni Dennis daa Yehowa shi lɛ, ewie akɛ: “Miweku lɛ shihilɛ tee hiɛ jogbaŋŋ. Mikɛ miweku lɛ yaa kpeei kɛ shiɛmɔ kutuu. Mibii enyɔ lɛ sheee mi gbeyei dɔŋŋ, ejaakɛ minyɛ miye mimli ni fũɔ oya lɛ nɔ, ni mikpá jɛmɔ wiemɔi ni mli wawai lɛ kɛ nitsumɔ. Wɔnyɛɔ wɔkɛ wɔhe gbaa sane agbɛnɛ, ni wɔnáa Biblia mli saji ni wɔgbaa lɛ ahe miishɛɛ waa. Kɛ́ jeee Biblia mli anɔkwalei ni mikase lɛ kulɛ, be nɛ mibɛ wala mli; ejaakɛ no mli lɛ, etsɛɛɛ ni mimli fũɔ.”

Kɛji wekui tsu nii waa kɛfee Yehowa suɔmɔnaa nii lɛ, no baaha amɛná miishɛɛ. Niiashikpamɔ tsɔɔ akɛ kɛji weku mli bii ateŋ mɔ kome po kɛ Biblia mli shishitoo mlai tsu nii lɛ, ehaa shihilɛi lɛ bafeɔ nɔ ni hi fe nɔ ni amɛteŋ mɔ ko kwraa kɛtsuuu nii. Kristofoi aweku ni aaatswa ama shi lɛ biɔ nilee kɛ mɔdɛŋbɔɔ babaoo, ni eheɔ be hu. Shi, wekui ni tamɔ nɛkɛ lɛ amli bii náa nɔmimaa akɛ Yehowa baajɔɔ mɔdɛŋ fɛɛ ni amɛbɔɔ kɛtswaa amɛwekui lɛ amɛmaa shi lɛ nɔ jogbaŋŋ, ni ebaaha amɛye omanye. Kɛkɛ lɛ, taakɛ ebalɛ yɛ lalatsɛ lɛ gbɛfaŋ lɛ, amɛ hu amɛbaanyɛ amɛkɛɛ akɛ: ‘Miyelikɛbuamɔ jɛɔ Yehowa ŋɔɔ.’—Lala 121:2.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 9]

Nyɔŋmɔ “ji wekui fɛɛ ni yɔɔ ŋwɛi kɛ shikpɔŋ lɛ atsɛ.”—EFESOBII 3:15, NW

[Akrabatsa ni yɔɔ baafa 8]

YEHOWA BUƆ WEKU GBƐJIANƆTOO LƐ WAA

“Nyɔŋmɔ jɔɔ amɛ, ni Nyɔŋmɔ kɛɛ amɛ akɛ: Nyɛfɔa ni nyɛyi afáa ni nyɛyia shikpɔŋ lɛ nɔ obɔ.”—1 Mose 1:28.

“Ajɔɔ mɔ fɛɛ mɔ ni sheɔ Yehowa . . . lɛ! Oŋa aaatamɔ weiŋtso ni woɔ yibii yɛ owe lɛ.”—Lala 128:1, 3.