Anɔkwafoi Haa Ajieɔ Yehowa Yi
Maŋtsɛyeli Jajelɔi Bɔ Amaniɛ
Anɔkwafoi Haa Ajieɔ Yehowa Yi
ALE Yehowa Odasefoi—gbekɛbii kɛ onukpai fɛɛ—yɛ je lɛŋ fɛɛ akɛ amɛyeɔ anɔkwa. Susumɔ nɔkwɛmɔnii ni jɛ maji etɛ komɛi ni kɛ amɛteŋ jɛkɛ waa lɛ mli lɛ ahe okwɛ.
Gbi ko beni Olusola ní eye afii 17, ni yɔɔ Nigeria lɛ jɛ skul kɛmiiya shia lɛ, ena shika kotoku ko kã shikpɔŋ. Gbekɛ yoo lɛ kɔ ni ekɛyaha skul nɔkwɛlɔ lɛ, ni skul nɔkwɛlɔ lɛ kane, ni fɛɛ feɔ naira 6,200 (aaafee U.S. dɔlai 45). Skul nɔkwɛlɔ lɛ kɛ shika kotoku lɛ yaha tsɔɔlɔ ní shika kotoku elaaje lɛ. Akɛni tsɔɔlɔ lɛ hiɛ sɔ enɛ hewɔ lɛ, eke Olusola naira 1,000 (aaafee U.S. dɔlai 7), ni ekɛɛ lɛ akɛ ekɛyawo eskul nyɔmɔ ni ehiɛ lɛ. Beni nikaselɔi krokomɛi lɛ ná le sane nɛɛ lɛ, amɛye Olusola he fɛo. Otsii komɛi asɛɛ lɛ, nikaselɔ ko kɛɛ akɛ aju eshika, no hewɔ lɛ akɛɛ tsɔɔlɔi lɛ koni amɛkwɛ nikaselɔi lɛ fɛɛ anibii amli. Tsɔɔlɔ lɛ kɛɛ Olusola akɛ, “daamɔ biɛ. Mile akɛ ákɛ Yehowa Odasefoi lɛ ateŋ mɔ kome lɛ, onyɛŋ oju.” Ana shika lɛ yɛ gbekɛbii hii enyɔ komɛi ni ye Olusola he fɛo lɛ adɛŋ, ni agbala amɛtoi waa diɛŋtsɛ. Olusola ŋma akɛ: “Eŋɔɔ minaa jogbaŋŋ akɛ ale mi akɛ Yehowa Odasefoi lɛ ateŋ mɔ ko ni ejuŋ kɔkɔɔkɔ, ni enɛ kɛ yijiemɔ haa Yehowa.”
Gbi ko beni Marcelo, ni ji Argentinanyo lɛ shiɔ shia lɛ, ena baagi ko kã he ko ni kɛ eshia lɛ sɛɛgbɛ shinaa lɛ naa jɛkɛɛɛ. Ewo baagi lɛ kɛbote eshia lɛ mli, ni ekɛ eŋa gbele naa kɛ henɔkwɛmɔ. Nɔ ni fee amɛ naakpɛɛ waa ji akɛ, amɛna shika babaoo, woji ni akɛheɔ nii, kɛ woji babaoo ni akɛjieɔ shika, ní akɛ waonaa gbɛi ewo shishi yɛ mli, ni shika falɛ ni yɔɔ eko nɔ ji peso akpe toi akpe. Amɛna tɛlifoŋ nɔmba yɛ nihemɔ wolo ko ni yɔɔ mli lɛ nɔ. Amɛtswa nɔtsɛ lɛ ni amɛkɛ lɛ to gbɛjianɔ koni eba he ni Marcelo tsuɔ nii yɛ lɛ koni amɛkɛ ebaagi lɛ kɛ emli nibii lɛ aha lɛ. Beni nɔtsɛ lɛ bashɛ shi lɛ, etamɔ mɔ ko ni ehao. Nitsumɔtsɛ lɛ kɛɛ lɛ akɛ ená tsui, ejaakɛ Marcelo ji Yehowa Odasefoi lɛ ateŋ mɔ kome. Nɔtsɛ lɛ ha Marcelo peso 20 pɛ, (aaafee U.S. dɔlai 6) ni ekɛjwere lɛ yɛ baagi lɛ ni ena eha lɛ lɛ hewɔ. Jweremɔ nɔ̃ nɛɛ ha nitsumɔtsɛ lɛ mli fu, ejaakɛ ehiɛ sɔ Marcelo anɔkwayeli lɛ jogbaŋŋ diɛŋtsɛ. Enɛ ha Marcelo ná hegbɛ ni ekɛtsɔɔ lɛ mli akɛ, ákɛ Yehowa Odasefoi lɛ ateŋ mɔ kome lɛ, eesumɔ ni eye anɔkwa be fɛɛ be.
Niiashikpamɔ ni nyiɛ sɛɛ nɛɛ jɛ Kyrgyzstan. Rinat, ni ji gbekɛ nuu ni eye afii ekpaa lɛ na awula ko ni yɔɔ amɛmasɛi lɛ shika kotoku. Som 1,100 (aaafee U.S. dɔlai 25) ji nɔ ni yɔɔ shika kotoku lɛ mli. Beni Rinat kɛ shika kotoku ni laaje lɛ yaha awula lɛ, awula lɛ kane shika lɛ ni eyakɛɛ Rinat mami akɛ som 200 elaaje yɛ shika lɛ mli. Rinat kɛɛ akɛ jeee lɛ ji mɔ ni kɔ shika lɛ. Kɛkɛ ni amɛ fɛɛ amɛyiŋ kɛtee koni amɛyatao shika ni elaaje lɛ, ni amɛyana enɛ yɛ he ni ayana shika kotoku lɛ yɛ lɛ. Awula lɛ naa kpɛ ehe. Eda Rinat kɛ emami shi, klɛŋklɛŋ lɛ akɛni ekɛ shika ni laaje lɛ ku sɛɛ baha lɛ, kɛ agbɛnɛ yɛ Kristofoi atsɔsemɔ ni akɛha gbekɛ nuu lɛ hewɔ.