Ani Okɛ Oweku lɛ Mlibii Gbaa Sane?
Ani Okɛ Oweku lɛ Mlibii Gbaa Sane?
POLAND adafitswaa wolo ni ji Polityka lɛ bɔ amaniɛ akɛ: “Bɔ ni wɔkɛ wɔsuɔlɔi gbaa sane wɔhaa lɛ miiba shi kwraa.” Yɛ United States lɛ, akɔntaabuu tsɔɔ akɛ gbalashihilɛ mli hefatalɔi kɛ minitii ekpaa pɛ gbaa sane ni sɛɛnamɔ yɔɔ he yɛ gbi kome mli. Nilelɔi komɛi susuɔ akɛ gbala mligbalamɔi kɛ gbalamlitsemɔi fɛɛ amlijaa fã jɛ sane ní afɔɔɔ gbaa nɛɛ hewɔ.
Ni sanegbaa ni yaa nɔ yɛ fɔlɔi kɛ bii ateŋ lɛ hu? Adafitswaa wolo ni atsɛ yisɛɛ kɛtsɔ hiɛ lɛ tsɔɔ akɛ, yɛ shihilɛi babaoo amli lɛ, “enɛ jeee sanegbaa, shi moŋ eji sanebimɔi tamɔ: Te nibii tee nɔ tɛŋŋ yɛ skul? Te onanemɛi lɛ hu yɔɔ tɛŋŋ?” Wolo lɛ bi akɛ: “Te aaafee tɛŋŋ ni enɛ aaaha wɔbii lɛ akase bɔ ni amɛaafee amɛná naanyobɔɔ ni henumɔ yɔɔ mli lɛ?”
Akɛni sanegbaa sui kpakpai ni aaaná lɛ baaa yɛ heniianaa hewɔ lɛ, mɛɛ gbɛ nɔ wɔɔtsɔ wɔha nyɛmɔ ni wɔyɔɔ akɛ wɔkɛaagba sane lɛ aya hiɛ? Kaselɔ ni ji Kristofonyo Yakobo kɛ ŋaawoo kpakpa haa wɔ akɛ: “Mɔ fɛɛ mɔ he afee oya kɛ ninumɔ, ehumi shi kɛ wiemɔ, ehumi shi kɛ mlifu.” (Yakobo 1:19) Hɛɛ, bɔni afee ni wɔgba sane ni tswaa mɔ emaa shi lɛ, esa akɛ wɔbo mɛi atoi jogbaŋŋ kɛ́ amɛmiiwie, ni esaaa akɛ wɔkɛ oyaiyeli folɔɔ sanegbaa lɛ mli loo ni wɔkɛ oyaiyeli aaamu sane naa. Kwa wiemɔ kɛ mɔ shimɔ, ejaakɛ nakai feemɔ baanyɛ atsĩ sanegbaa naa yɛ gbɛ ni waaa nɔ. Kɛfata he lɛ, Yesu kɛ sanebimɔi tsu nii yɛ ŋaalee mli, jeee ni ekɛnyɛ mɛi anɔ koni amɛwie, shi moŋ koni ekɛle nɔ ni yɔɔ etoibolɔi lɛ atsui mli koni ekɛwaje ekomefeemɔ ni yɔɔ amɛteŋ lɛ.—Abɛi 20:5; Mateo 16:13-17; 17:24-27.
Shishitoo mlai kpakpai ni yɔɔ Biblia lɛ mli lɛ tsɔɔ bo akɛ esa akɛ bo klɛŋklɛŋ okɛ hegbɛ lɛ atsu nii ni okɛ osuɔlɔi lɛ agba sane. Enɛ baanyɛ ekɛ wekukpaa ni miishɛɛ yɔɔ mli ní abaanya he afii babaoo—yɛ wala shihilɛ bei fɛɛ po mli lɛ aba.