Yaa Nɔ Oba Ojeŋ Jogbaŋŋ

BƆFO Petro wo hewalɛ akɛ: “Ni nyɛba nyɛjeŋ jogbaŋŋ yɛ jeŋmajiaŋbii lɛ ateŋ.” (1 Petro 2:12) Hela wiemɔ ni atsɔɔ shishi akɛ “jogbaŋŋ” lɛ kɔɔ nɔ ko “ni yɔɔ fɛo, ni yɔɔ nyam, ni sa woo, ni nɔ bɛ” he. Yɛ wɔgbii nɛɛ amli lɛ, ekolɛ ebaafee tamɔ nɔ ni nilee bɛ mli akɛ aaakpa jeŋba ni yɔɔ nyam loo nɔ ni sa woo gbɛ kɛaajɛ adesai adɛŋ. Shi yɛ fɛɛ mli lɛ, Yehowa webii ni yɔɔ ŋmɛnɛ lɛ enyɛ amɛkɛ Petro hewalɛwoo wiemɔ lɛ etsu nii yɛ omanyeyeli mli. Yɛ anɔkwale mli lɛ, ale amɛ yɛ je lɛŋ fɛɛ akɛ mɛi ni yɔɔ jeŋba kpakpa.

Enɛ bafeɔ nɔ ni sa kadimɔ waa kɛji akɛ wɔsusu kaai kɛ naagbai ni wɔkɛkpeɔ yɛ “jaramɔ bei” nɛɛ amli lɛ ahe lɛ. (2 Timoteo 3:1) Kaai ji wɔdaa gbi shihilɛ lɛ fã, ni shi ni ateɔ awoɔ Kristofoi ashihilɛ gbɛ lɛ ebu. Kɛfata he lɛ, eyɛ mli akɛ kaai lɛ ekomɛi asɛɛ etsɛɛɛ moŋ, shi ekomɛi yaa nɔ ni amɛsɛɛ efooo, ni amɛmli po yaa nɔ ewoɔ wu. Shi kɛlɛ, bɔfo Paulo wo ŋaa akɛ: “Nyɛkahaa ekpakpafeemɔ miitɔa wɔ, ejaakɛ kɛ́ wɔnijiaŋ ejeee wui lɛ, wɔbaakpa hu yɛ be ni sa mli.” (Galatabii 6:9) Mɛɛ gbɛ nɔ po wɔbaanyɛ wɔtsɔ wɔba wɔjeŋ jogbaŋŋ, ní wɔya nɔ wɔfee enɛ yɛ kaai ni haoɔ mɔ kɛ naagbai ni sɛɛ efooo ni wɔkɛkpeɔ lɛ fɛɛ sɛɛ?

Nibii ni Baaye Abua Wɔ Koni Wɔba Wɔjeŋ Jogbaŋŋ

Eka shi faŋŋ akɛ jeŋba “ni yɔɔ nyam, ni sa woo, ni nɔ bɛ” lɛ kɔɔ mligbɛ gbɔmɔ, ni ji tsui lɛ mli su lɛ he. No hewɔ lɛ, jeŋ ni aaaya nɔ aba jogbaŋŋ yɛ kaai kɛ naagbai fɛɛ asɛɛ lɛ jeee nifeemɔ ko ni baa trukaa kɛkɛ, shi moŋ eji nɔ ko ni jɛɔ Biblia mli shishitoo mlai lɛ ni akɛtsuɔ nii daa yɛ shihilɛi fɛɛ mli lɛ mli baa. Mɛɛ nibii komɛi baanyɛ aye abua yɛ enɛ gbɛfaŋ? Susumɔ nɔ ni nyiɛ sɛɛ nɛɛ he okwɛ.

Ná Kristo jwɛŋmɔ lɛ eko. Ebiɔ heshibaa dani anyɛ adamɔ shihilɛ ko ni etamɔ nɔ ni ehiii lɛ naa. Ebaawa akɛ mɔ ko ni wóɔ ehe nɔ lɛ aaanyɛ adamɔ niseniianii anaa. Shi Yesu ‘ba ehe shi ni ebo toi kɛtee gbele mli.’ (Filipibii 2:5, 8) Kɛ́ wɔkase lɛ lɛ, ‘wɔnijiaŋ ejeŋ wui’ yɛ sɔɔmɔ ni wɔsɔmɔɔ Nyɔŋmɔ lɛ mli. (Hebribii 12:2, 3) Okɛ heshibaa afee toiboo, kɛtsɔ osuɔmɔ mli ni ooojɛ ni okɛ mɛi ni nyiɛɔ hiɛ yɛ osafo lɛ mli lɛ aaafee ekome lɛ nɔ. (Hebribii 13:17) Buu mɛi krokomɛi akɛ ‘amɛfe’ bo, ni okɛ nibii ni amɛnyãa he lɛ aye onɔ̃ lɛ hiɛ.—Filipibii 2:3, 4.

Kaimɔ akɛ Yehowa sumɔɔ bo. Esa akɛ wɔyiŋ atsɔ akɛ Yehowa ‘ji mɛi ni taoɔ esɛɛ gbɛ lɛ anyɔmɔwolɔ.’ (Hebribii 11:6) Esusuɔ wɔhe yɛ anɔkwale mli, ni eesumɔ ni wɔná naanɔ wala. (1 Timoteo 2:4; 1 Petro 5:7) Kaimɔ ni wɔɔkai akɛ nɔ ko nyɛŋ afite suɔmɔ ni Nyɔŋmɔ yɔɔ kɛha wɔ lɛ baaye abua wɔ koni wɔya nɔ wɔba wɔjeŋ jogbaŋŋ yɛ kaa mli.—Romabii 8:38, 39.

Okɛ ohe afɔ̃ Yehowa nɔ kwraa. He ni akɛfɔ̃ɔ Yehowa nɔ lɛ he miihia, titri lɛ kɛ́ etamɔ nɔ ni kaai lɛ asɛɛ efooo loo amɛwoɔ wala he gbeyei lɛ. Esa akɛ wɔná hekɛnɔfɔɔ kwraa akɛ Yehowa eŋmɛŋ gbɛ koni ‘aka wɔ fe bɔ ni wɔɔnyɛ,’  ni ákɛ ‘ebaaje gbɛ eha wɔ koni wɔje mli’ be fɛɛ be. (1 Korintobii 10:13) Kɛ́ wɔkɛ wɔhe fɔ̃ Yehowa nɔ lɛ, wɔbaanyɛ wɔná ekãa kɛdamɔ gbele he hegbeyeiwoo po naa.—2 Korintobii 1:8, 9.

Hiɛmɔ sɔlemɔ mli daa. Sɔlemɔ ni ajɛɔ tsuiŋ asɔleɔ lɛ he miihia. (Romabii 12:12) Sɔlemɔ ni jɛ tsuiŋ lɛ ji gbɛ̀i ni wɔtsɔɔ nɔ wɔbɛŋkɛɔ Yehowa kpaakpa lɛ ateŋ ekome. (Yakobo 4:8) Wɔ diɛŋtsɛ wɔniiashikpamɔ haa wɔyɔseɔ akɛ “kɛji wɔba nɔ ko . . . lɛ, eboɔ wɔ toi.” (1 Yohane 5:14) Kɛ́ Yehowa ŋmɛ gbɛ koni wɔkaa lɛ aya nɔ ákɛ wɔnɔkwayeli lɛ he kaa lɛ, wɔsɔleɔ wɔbiɔ lɛ koni eye ebua wɔ ní wɔdamɔ naa. (Luka 22:41-43) Sɔlemɔ haa wɔnuɔ he akɛ jeee wɔ kome pɛ wɔyɔɔ, shi Yehowa yɛ wɔmasɛi, ni ebaaha wɔye kunim be fɛɛ be.—Romabii 8:31, 37.

Nitsumɔi Kpakpai—‘Ehaa Anáa Yijiemɔ kɛ Woo’

Kristofoi fɛɛ ‘yeɔ ŋkɔmɔ yɛ kaai srɔtoi amli’ yɛ be kɛ beaŋ. Shi kɛlɛ, esaaa akɛ ‘wɔhaa ekpakpafeemɔ miitɔ’ wɔ. Kɛ́ oyaje nɔnyɛɛ mli lɛ, ha nilee ni oyɔɔ akɛ yɛ naagbee mli lɛ onɔkwayeli lɛ baaha oná “yijiemɔ kɛ woo kɛ anunyam” lɛ awo bo hewalɛ. (1 Petro 1:6, 7) Okɛ nibii fɛɛ ni Yehowa kɛhaa koni ekɛwo ohemɔkɛyeli lɛ mli hewalɛ lɛ atsu nii jogbaŋŋ kɛmɔ shi. Kɛ́ yelikɛbuamɔ he miihia bo lɛ, yaa mɛi ni sɔmɔɔ akɛ nɔkwɛlɔi, tsɔɔlɔi, kɛ ŋaawolɔi yɛ Kristofoi asafo lɛ mli lɛ aŋɔɔ. (Bɔfoi lɛ Asaji 20:28) Yaa asafoŋ kpeei fɛɛ ní haa ‘wɔhiɛ dɔɔ suɔmɔ kɛ nitsumɔi kpakpai ahe lɛ’ daa. (Hebribii 10:24) Gbɛjianɔ ni oooto kɛha Biblia lɛ kanemɔ kɛ bo diɛŋtsɛ onikasemɔ ni ooofee daa lɛ baaye abua bo koni ohiɛ ahi ohe nɔ ni ohe awa yɛ mumɔŋ; nakai nɔŋŋ hu ohe ni okɛaawo Kristofoi ashiɛmɔ nitsumɔ lɛ mli daa lɛ hu baaha ohe awa yɛ mumɔŋ.—Lala 1:1-3; Mateo 24:14.

Babaoo ni onuɔ Yehowa suɔmɔ kɛ ekwɛmɔ he lɛ, babaoo hu ni obaasumɔ koni ‘ohiɛ adɔ nitsumɔi kpakpai’ ahe ji no. (Tito 2:14) Kaimɔ akɛ, “mɔ ni hiɛɔ mli kɛyawulaa shi lɛ, lɛ aaahere eyiwala.” (Mateo 24:13) Hɛɛ, tswaa ofai shi akɛ ‘obaaya nɔ oba ojeŋ jogbaŋŋ’!

[Wiemɔ ni akɔ ni akɛmiitsu nii ni yɔɔ baafa 29]

Esa akɛ wɔná hekɛnɔfɔɔ kwraa akɛ Yehowa eŋmɛŋ gbɛ koni ‘aka wɔ fe bɔ ni wɔɔnyɛ,’ ni ákɛ ‘ebaaje gbɛ eha wɔ koni wɔje mli’ be fɛɛ be

[Mfonirii ni yɔɔ baafa 30]

Wɔdekã fɛɛ ni wɔkɛaatsu teokrase nitsumɔi lɛ baanyɛ asaa wɔ koni wɔnyɛ wɔkpee kaai anaa