“Awa Lɛ Yi yɛ Ehemɔkɛyeli lɛ Hewɔ”

MƐI ni yɔɔ Italy kooyigbɛ maŋ ni atsɛ́ɔ lɛ Cernobbio lɛ mli lɛ saa shwɛmɔhe ko ni yɔɔ jɛmɛ lɛ afã ko koni akɛkai mɛi ni gboi yɛ bulɛ ni ajieee lɛ kpo atsɔɔɔ mla naa hegbɛ ni amɛyɔɔ lɛ hewɔ lɛ. Mɛi ni afee taoi koni akɛkai amɛ nɛɛ ateŋ mɔ kome ji Narciso Riet. Afɔ́ Riet yɛ Germany, ni efɔlɔi jɛ Italy, ni ebatsɔ Yehowa Odasefonyo yɛ afi 1930 afii lɛ amli. Beni Hitler yeɔ nɔ yɛ Germany lɛ, awa Yehowa Odasefoi ayi akɛni amɛkpoo akɛ amɛkɛ woo ni sa Yehowa ni ji anɔkwa Nyɔŋmɔ lɛ aaaha Hitler lɛ hewɔ.

Beni Gestapo ni ji polisifoi ni tsuɔ nii yɛ teemɔŋ lɛ yɔse akɛ Riet fata mɛi ni kɛ Buu-Mɔɔ woji tɛtrɛbii lɛ baa yiwalɛ ŋsara lɛ mli ahe lɛ, ejo foi kɛtee Cernobbio. Jɛmɛ ji he ni abi lɛ koni etsɔɔ Buu-Mɔɔ lɛ shishi kɛya Italy wiemɔ mli ni eja eha enanemɛi heyelilɔi lɛ. Aná ále nii ni ekɛ ekãa babaoo tsuɔ nɛɛ. Nazi polisifonyo nukpa ko kɛ ewebii jwa kɛbote Riet shia lɛ mli, ni amɛyamɔ lɛ, ni amɛloo Bibliai enyɔ kɛ majemɔ woji fioo komɛi ni amɛna lɛ kɛtee ákɛ nibii ni tsɔɔ akɛ “etɔ̃ mla”! Awo Riet foi kɛtee Germany, ni ayawo lɛ tsuŋ yɛ Dachau yiwalɛ ŋsara lɛ mli, ni agbe lɛ etsɛɛɛ tsɔ ni Jeŋ Ta II lɛ ba naagbee. Niŋmaa ni yɔɔ tao ni yɔɔ Cernobbio ni akɛkaiɔ lɛ lɛ nɔ lɛ kaneɔ akɛ: “Awa lɛ yi yɛ ehemɔkɛyeli lɛ hewɔ.”

Narciso Riet kɛ Odasefoi ohai abɔ krokomɛi ni Nazibii wa amɛ yi lɛ ahemɔkɛyeli lɛ woɔ Kristofoi ni yɔɔ ŋmɛnɛ lɛ hewalɛ koni amɛya nɔ amɛye Yehowa ni ji Mɔ pɛ ni esa akɛ amɛkɛ jamɔ aha lɛ yɛ jeŋ muu lɛ fɛɛ lɛ anɔkwa. (Kpojiemɔ 4:11) Yesu kɛɛ akɛ: “Ajɔɔ mɛi ni jalɛ hewɔ ni awaa amɛ yi lɛ.” Nyɔŋmɔ baakai amɛnitsumɔi lɛ, ni ebaajɔɔ amɛ yɛ ekãa ni amɛjie lɛ kpo lɛ hewɔ.—Mateo 5:10; Hebribii 6:10.