Wɔbaanyɛ Wɔdamɔ Kaa Fɛɛ Kaa Naa!

ANI okɛ kaa ko miikpe yɛ oshihilɛ mli amrɔ nɛɛ? Ani onuɔ he akɛ ohiɛnɔkamɔ etã, ni ákɛ onyɛŋ odamɔ naa yɛ omanyeyeli mli? Ani onuɔ he yɛ bei komɛi amli po akɛ bo pɛ okɛ naagba ni eba onɔ lɛ kpeɔ, ni ákɛ enaa tsabaa bɛ? Kɛ́ nakai ji sane lɛ, no lɛ ná tsui! Biblia lɛ maa nɔ mi kɛhaa wɔ akɛ Nyɔŋmɔ baanyɛ eye ebua wɔ koni wɔdamɔ kaa fɛɛ kaa ni wɔkɛkpeɔ lɛ naa.

Biblia lɛ tsɔɔ akɛ Nyɔŋmɔ tsuji “[baa]gbee kaai srɔtoi pii amli.” (Yakobo 1:2) Kadimɔ wiemɔ ni ji “srɔtoi pii” (Hela poi·kiʹlos) lɛ jogbaŋŋ. Taakɛ akɛtsu nii yɛ blema lɛ, Hela wiemɔ lɛ shishinumɔ diɛŋtsɛ tsɔɔ “srɔtoi babaoo” loo “sui srɔtoi abɔ,” ni enɛ maa “kaai srɔtoi” ni baanyɛ aba wɔnɔ lɛ anɔ mi. No hewɔ lɛ, kɛ́ wɔɔwie he yɛ gbɛ ko nɔ lɛ, “kaai srɔtoi pii” lɛ baa yɛ sui srɔtoi abɔ mli. Shi kɛlɛ, Yehowa yeɔ ebuaa wɔ bɔni afee ni wɔnyɛ wɔdamɔ kaai nɛɛ eko fɛɛ eko naa. Mɛni hewɔ wɔyɔɔ nɔmimaa yɛ enɛ he lɛ?

“Nyɔŋmɔ Duromɔ Nii Srɔtoi Lɛ”

Bɔfo Petro tsɔɔ akɛ Kristofoi ‘yeɔ ŋkɔmɔ yɛ kaai srɔtoi amli.’ (1 Petro 1:6) Sɛɛ mli lɛ, ewie yɛ ewolo ni akɛ mumɔ kanya lɛ ní eŋma lɛ mli akɛ, “Nyɔŋmɔ duromɔ nii” lɛ yɛ “srɔtoi.” (1 Petro 4:10) Wiemɔ ni ji “srɔtoi” ni atsĩ tã yɛ ŋmalɛ nɛɛ mli lɛ shishinumɔ tamɔ Hela wiemɔ diɛŋtsɛ ni akɛtsu nii ni wɔtsĩ tã kɛtsɔ hiɛ lɛ nɔŋŋ. Beni Biblia he nilelɔ ko wieɔ wiemɔ nɛɛ he lɛ, ekɛɛ akɛ: “Eji susumɔ ko ni yɔɔ naakpɛɛ waa. . . . Wiemɔ ni ji poikilos ní akɛtsɔɔ Nyɔŋmɔ duromɔ [loo duromɔ nii] lɛ mli lɛ tsɔɔ akɛ shihilɛ ko bɛ ni adesai kɛkpeɔ ní Nyɔŋmɔ duromɔ lɛ nyɛŋ naa adamɔ.” Etee nɔ ekɛɛ akɛ: “Shihilɛ ko loo naagba loo oshara loo hiamɔ shihilɛ ko kwraa bɛ ní Nyɔŋmɔ duromɔ nii lɛ nyɛŋ naa adamɔ ni etsu he nii yɛ omanyeyeli mli hu. Naagba ko kwraa bɛ shihilɛ mli ni Nyɔŋmɔ duromɔ lɛ bɛ enaa tsabaa. Wiemɔ poikilos ní shishinumɔ yɔɔ faŋŋ lɛ gbalaa wɔjwɛŋmɔ kɛyaa Nyɔŋmɔ duromɔ nii srɔtoi, ní yɛ anɔkwale mli lɛ efa bɔ ni baanyɛ aye abua wɔ ni wɔdamɔ shihilɛ fɛɛ shihilɛ naa lɛ anɔ tɛ̃ɛ.”

Duromɔ Keenii ní Akɛdamɔɔ Kaai Anaa

Taakɛ Petro tsɔɔ lɛ, gbɛ kome ni Nyɔŋmɔ kɛ eduromɔ nii lɛ haa ji kɛtsɔ aŋkroaŋkroi ni feɔ Kristofoi asafo lɛ nɔ. (1 Petro 4:11) Nyɔŋmɔ tsuji lɛ ateŋ mɔ fɛɛ mɔ yɛ mumɔŋ duromɔ keenii loo nyɛmɔi komɛi ní baanyɛ afee hewalɛwoo nɔ̃ kɛha mɛi ni kɛ kaai kpeɔ lɛ. (Romabii 12:6-8) Ákɛ nɔkwɛmɔnɔ lɛ, asafo lɛ mlibii lɛ ateŋ mɛi komɛi ahe esa jogbaŋŋ ákɛ Biblia tsɔɔlɔi. Amɛwiemɔi ni nilee yɔɔ mli lɛ kanyaa mɛi krokomɛi ni ewoɔ amɛ hewalɛ koni amɛto amɛtsui shi. (Nehemia 8:1-4, 8, 12) Mɛi krokomɛi hu fɔɔ mɛi ni yelikɛbuamɔ he ehia amɛ lɛ asaramɔ be fɛɛ be yɛ amɛshiai amli. Saramɔi ni tamɔ nɛkɛ lɛ yafeɔ bei ni akɛwoɔ mɛi nɛɛ hewalɛ koni “amɛtsɛ́ amɛtsuii amɛŋmɛ amɛmli.” (Kolosebii 2:2) Kɛ́ nɔkwɛlɔi tsu saramɔi ni tamɔ nɛkɛ ní woɔ mɔ hemɔkeyeli mli hewalɛ lɛ ahe nii lɛ, amɛduroɔ mɛi nɛɛ mumɔŋ nikeenii. (Yohane 21:16) Ale mɛi krokomɛi hu ni yɔɔ asafo lɛ mli yɛ bɔ ni  amɛjieɔ miishɛɛ kpo yɛ amɛnanemɛi heyelilɔi ní kaai ni amɛkɛkpeɔ lɛ eha amɛhao lɛ ahe, kɛ agbɛnɛ hu yɛ bɔ ni amɛkɛ mɛi ni ehao nɛɛ yeɔ yɛ musuŋtsɔlɛ kɛ mlihilɛ mli lɛ ahewɔ. (Bɔfoi lɛ Asaji 4:36; Romabii 12:10; Kolosebii 3:10) Musuŋtsɔlɛ ni nyɛmimɛi hii kɛ yei ni tamɔ nɛkɛ lɛ jieɔ lɛ kpo kɛ yelikɛbuamɔ diɛŋtsɛ ni amɛkɛhaa lɛ ji Nyɔŋmɔ duromɔ nii lɛ ateŋ “ekome” loo gbɛ kome ni sa kadimɔ waa ni Nyɔŋmɔ tsɔɔ nɔ ejieɔ eduromɔ lɛ kpo.—Abɛi 12:25; 17:17.

“Miishɛjemɔ Fɛɛ Nyɔŋmɔ Lɛ”

Nɔ ni fe fɛɛ lɛ, Yehowa shɛjeɔ mɔ mii. Lɛ ji “miishɛjemɔ fɛɛ Nyɔŋmɔ lɛ, mɔ ni shɛjeɔ wɔmii yɛ wɔmanehului lɛ fɛɛ mli” lɛ. (2 Korintobii 1:3, 4) Nyɔŋmɔ Wiemɔ ni ajɛ mumɔŋ aŋma lɛ kɛ hewalɛwoo ni emumɔ krɔŋkrɔŋ lɛ kɛhaa lɛ ji gbɛ̀i titrii ni Yehowa tsɔɔ nɔ ehaa wɔsɔlemɔi ni wɔkɛbiɔ edɛŋ yelikɛbuamɔ lɛ ahetoo. (Yesaia 30:18, 21; Luka 11:13; Yohane 14:16) Shiwoo ní ajɛ mumɔŋ akanya bɔfo Paulo ni ekɛha lɛ baanyɛ ashɛje wɔmii. Eŋma akɛ: “Anɔkwafo ji Nyɔŋmɔ, mɔ ni haŋ aka nyɛ fe bɔ ni nyɛaanyɛ, shi moŋ ekɛ kaa lɛ nɔŋŋ aaaje gbɛ aha nyɛ ní nyɛje mli hu, koni nyɛnyɛ mli nyɛmɔ.”—1 Korintobii 10:13.

Hɛɛ, ekɔɔɔ he eko kaa ni wɔkɛkpeɔ lɛ “henɔ” loo bɔ ni eji ha, wɔnine baanyɛ ashɛ Nyɔŋmɔ duromɔ nii lɛ “henɔ” ko ni baaye abua wɔ ni wɔdamɔ naa lɛ nɔ be fɛɛ be. (Yakobo 1:17) Yelikɛbuamɔ ni sa ni Yehowa kɛhaa etsuji yɛ ebe naa—ekɔɔɔ he eko bɔ ni kaai loo naagbai ni amɛkɛkpeɔ lɛ amli wawai ha—lɛ ji nibii ni yeɔ “Nyɔŋmɔ nilee ní fá babaoo lɛ” ahe odase lɛ ateŋ ekome kɛkɛ. (Efesobii 3:10) Ani enɛ jeee anɔkwale?

[Mfoniri ni yɔɔ baafa 31]

Yehowa yeɔ ebuaa wɔ ni wɔdamɔɔ kaai ni wɔkɛkpeɔ lɛ anaa