Yehowa Yi Ni Ajieɔ yɛ Skul

OBLAHII kɛ oblayei bibii ni ji Yehowa Odasefoi ni jɛ jeŋ fɛɛ lɛ miitsɔ gbɛ̀i srɔtoi anɔ amɛmiijie Nyɔŋmɔ yi yɛ skul, ni amɛfeɔ nakai kɛtsɔ amɛwiemɔi kɛ amɛjeŋba nɔ. Susumɔ niiashikpamɔi komɛi ni haa anaa ekãa ni amɛyɔɔ lɛ ahe okwɛ.

Aha oblayoo fioo ko ni ji Odasefonyo ni jɛ Greece lɛ skul nifeemɔ ni biɔ ni eŋma sane ko ni kɔɔ kɔɔyɔŋ mujiwoo he. Beni epɛi saji amli kɛjɛ Watch Tower Publications Index wolo lɛ mli lɛ, enine shɛ saji ni he yɔɔ sɛɛnamɔ lɛ anɔ kɛjɛ Awake! wolo tɛtrɛɛ lɛ mli, ni beni emuɔ eniŋmaa lɛ naa lɛ, etsɔɔ wolo mli ni ejɛ eŋma esane lɛ. Etsɔɔlɔ lɛ kɛɛ lɛ akɛ, eniŋmaa lɛ fata niŋmaai ni ŋɔɔ fe fɛɛ ni ekane pɛŋ lɛ ahe. Sɛɛ mli lɛ, tsɔɔlɔ lɛ kɛ wolo ni oblayoo nɛɛ ŋma lɛ mli saji yatsu nii yɛ tsɔɔlɔi ahenaabuamɔ ko shishi, ni yibii kpakpai jɛ mli kɛba. Enɛ ha nyɛmi yoo fioo nɛɛ kɛ Awake! ni wieɔ saneyitso ni ji“Teachers—What Would We Do Without Them?” (Eji Tsɔɔlɔi Bɛ Jikulɛ, Mɛni Wɔbaafee?) ni asusu he kɛtsara nɔ yɛ wolo tɛtrɛɛ nɛɛ srɔtoi amli lɛ baha tsɔɔlɔ lɛ. Tsɔɔlɔ lɛ jie Awake! wolo tɛtrɛɛ lɛ yi etsɔɔ klasbii lɛ yɛ sɛɛ mli, ni enɛ ha skulbii lɛ ekomɛi bi koni abaha amɛ ekomɛi. Ehe bahia ni nyɛmi yoo lɛ kɛ woji tɛtrɛbii nɛɛ krokomɛi aba skul koni ekɛbaha amɛ ni amɛkane.

Oblayoo fioo ko ni ji Kristofonyo ni jɛ Afrika maŋ ni ji Benin lɛ mli lɛ hu kɛ nɔnyɛɛ ko ni efɔɔɔ kaa kpe. Taakɛ afɔɔ feemɔ yɛ jɛmɛ lɛ, enanemɛi skulbii lɛ ateŋ mɛi babaoo afɔlɔi fee ekome kɛyatao tsɔɔlɔi ni abaawo amɛ nyɔmɔ koni amɛbaye abua amɛbii lɛ yɛ nibii ni amɛshishinumɔ wa ni amɛkaseɔ yɛ skul lɛ agbɛfaŋ, bɔni afee ni no aha bii nɛɛ aye omanye yɛ kaa ni abaafee lɛ mli. Shi, be ni tsɔɔlɔi lɛ to kɛha skul nɛɛ feemɔ ji daa Hɔɔ leebi. Odasefonyo oblayoo fioo lɛ wie eshi be nɛɛ, akɛ: “Hɔɔ leebi ji be ni asafo muu lɛ fɛɛ kɛyaa shiɛmɔ kutuu. Minyaa be nɛɛ he fe otsi lɛ mli bei krokomɛi fɛɛ, ni misumɔŋ ni mikɛ be nɛɛ atsu nɔ kroko!” Etsɛ ni ji fɔlɔ mɔ kome mɔ kɛ Odasefonyo hu lɛ kpɛlɛ eyiŋkpɛɛ lɛ nɔ, ni ebɔ mɔdɛŋ eyana fɔlɔi lɛ kɛ tsɔɔlɔi lɛ ateŋ mɛi komɛi akɛ aleenɔ amɛaanyɛ amɛtsake be ni ato lɛ lo. Shi, amɛ fɛɛ amɛyakpɛlɛɛɛ enɛ feemɔ nɔ. Oblayoo fioo lɛ kpɛ eyiŋ akɛ ebaaha skul nikasemɔ nɛɛ aŋmɛɛ lɛ mɔ. Yɛ skul lɛ yaa najiaŋ lɛ, eyafataa asafo lɛ he kɛyaa shiɛmɔ daa Hɔɔ. Eklasbii lɛ ye ehe fɛo, ni amɛje enijiaŋ wui koni ekpá shiɛmɔyaa ní ekɛ e-Nyɔŋmɔ lɛ hu afo takoŋ. Amɛsusu akɛ bɔ fɛɛ bɔ ni fee lɛ, eyeŋ omanye yɛ kaa ni abaafee lɛ mli. Shi kɛlɛ, yɛ naagbee lɛ, nakai nikaselɔi akuu ni atsɔɔ amɛ nii lɛ eyayeee omanye yɛ kaa ni afee lɛ mli, shi wɔnyɛmi yoo fioo lɛ ye omanye. Amɛkpá ehe fɛo ni amɛyeɔ lɛ oya. Nɔ ni eskulbii lɛ kɛɔ lɛ agbɛnɛ ji akɛ: “Yaa nɔ osɔmɔ o-Nyɔŋmɔ lɛ.”

Aha oblayoo fioo ko hu ni eye afii 12 ni jɛ Czech Republic lɛ skul nifeemɔ ni biɔ ni ehala wolo ko, ni ebawie he kuku etsɔɔ. Enyɛ wo lɛ hewalɛ koni ekɛ Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ atsu nii. Ekɛ sanebimɔi tamɔ: “Te osusuɔ tɛŋŋ? Namɔ baanyɛ afee gbɔmɔ ni fe mɔ fɛɛ mɔ ni ehi shi pɛŋ?” je ewiemɔ lɛ shishi. Oblayoo fioo lɛ wie mɔ ni Yesu ji, eshihilɛ yɛ shikpɔŋ nɔ kɛ etsɔɔmɔi lɛ ahe. No sɛɛ lɛ, ekɛ etoibolɔi lɛ susu wolo lɛ mli saneyitso ni ji “Eshaifaa he Nikasemɔ” lɛ he. Etsɔɔlɔ lɛ kɛ gbee ni wa wie akɛ: “Enɛ ji nifeemɔ ni hi fe fɛɛ eko ni mibo toi pɛŋ!” ni ekɛ miishɛɛ kpɛlɛ wolo lɛ ekome ni gbekɛyoo lɛ kɛha lɛ lɛ nɔ. Enanemɛi skulbii lɛ ateŋ mɛi komɛi hu bi koni abaha amɛ eko. Enɔ jetsɛremɔ lɛ, oblayoo fioo lɛ baja woji nɛɛ ekomekome 18, ni enɛ ha emii shɛ ehe waa.

Oblahii kɛ oblayei bibii ni tamɔ mɛnɛɛmɛi miiná miishɛɛ babaoo yɛ Yehowa yi ni amɛjieɔ yɛ skul lɛ hewɔ. Eba akɛ, wɔ fɛɛ wɔɔkase ekãa ni amɛjieɔ lɛ kpo yɛ enɛ feemɔ mli lɛ.