Wala Shihilɛ He Sane

Miyɛ Miishɛɛ Akɛ Mikɛ Mihe Wo Jeŋ Muu Fɛɛ Biblia Mli Tsɔsemɔ Nitsumɔ Lɛ Mli

TAAKƐ ANNA MATHEAKIS GBA

Meele lɛ miishã. Kɛji akɛ meele ni nɔkwɔlɛ ji mitai 171 lɛ shiu lɛ, no lɛ ekɛ mi fɛɛ baaya nu lɛ shishi. Mikɛ ekãa sere kɛbáa miwala yi yɛ ŋshɔkei ni efee hamahama lɛ amli. Gbɛ pɛ ni manyɛ matsɔ nɔ matɛo nu lɛ hiɛ ji ni mamɔ atade ni haa mɔ tɛoɔ nu hiɛ ni yoo ko wo lɛ mli kpɛŋŋ. Misɔle mibi Nyɔŋmɔ koni eha mi hewalɛ kɛ ekãa. No pɛ ji nɔ ni manyɛ mafee.

ENƐ ba mli yɛ afi 1971 mli, ni no mli lɛ miiku misɛɛ kɛmiiya Italy koni miyatsu mimaŋsɛɛ sanekpakpa shiɛmɔ nitsumɔ ni ji etɛ ni aha mi yɛ jɛmɛ lɛ. Nakai meele lɛ butumɔ lɛ ha minibii fɛɛ laaje. Shi nibii ni he hiaa fe fɛɛ ni ji miwala, Kristofoi anyɛmifeemɔ ni suɔmɔ yɔɔ mli, kɛ hegbɛ ni miyɔɔ kɛsɔmɔɔ Yehowa lɛ elaajeee. Nakai sɔɔmɔ lɛ eha mitee shikpɔji wuji etɛ nɔ momo, ni meele lɛ butumɔ lɛ ji oshara kome kɛkɛ ni bafo miishɛɛ shihilɛi babaoo ni miná lɛ mli.

Afɔ́ mi yɛ afi 1922. Miweku lɛ hi Rām Allāh maŋ ni yɔɔ Jerusalem kooyigbɛ aaafee kilomitai 16 lɛ mli. Mifɔlɔi jɛ Crete ŋshɔkpɔ lɛ nɔ, shi atsɔse mitsɛ yɛ Nazareth. Miji nakutsoŋbi yɛ amɛbihii etɛ kɛ biyei enyɔ lɛ ateŋ. Minyɛmi nuu onukpa ni ji enyɔ lɛ ni gbo yɛ Yordan Faa lɛ mli beni amɛskul lɛ etee shisharamɔ lɛ gbele lɛ hao wɔweku lɛ waa. Yɛ oshara nɛɛ sɛɛ lɛ, minyɛ kɛɛ ehiii Rām Allāh maŋ lɛ mli dɔŋŋ, ni no hewɔ lɛ wɔfã kɛtee Athens yɛ Greece, beni miye afii etɛ.

Miweku lɛ Nine Shɛ Biblia Mli Anɔkwale lɛ Nɔ

Beni wɔtee Greece etsɛɛɛ nɔŋŋ lɛ, minyɛmi nuu onukpa ni atsɛɔ lɛ Nikos ni no mli lɛ eye  afii 22 lɛ kɛ Yehowa Odasefoi ni no mli lɛ atsɛɔ amɛ akɛ Biblia Kaselɔi lɛ kpe. Biblia mli nilee ni ekase lɛ ha ená miishɛɛ babaoo kɛ ekãa kpele kɛha Kristofoi asɔɔmɔ nitsumɔ lɛ. Enɛ wo mitsɛ mlila, ni eshwie Nikos kɛjɛ shia. Shi kɛ́ mitsɛ fã gbɛ kɛtee Palestine lɛ, minyɛ awo, minyɛmi yoo lɛ, kɛ mi fataa Nikos he kɛyaa Kristofoi akpeei. Mikaiɔ miishɛɛ ni minyɛ kɛwieɔ nibii ni enu yɛ nakai kpeei lɛ ashishi lɛ lolo. Shi no sɛɛ etsɛɛɛ nɔŋŋ lɛ, kansa hela gbe lɛ beni eye afii 42. Ariadne ni ji minyɛmi yoo lɛ kɛ suɔmɔ kwɛ wɔweku lɛ nɔ yɛ nakai be ni mli wa lɛ mli. Eyɛ mli akɛ eji oblayoo moŋ, shi ebatsɔ tamɔ nyɛ kɛha mi yɛ afii babaoo ni nyiɛ sɛɛ lɛ mli.

Beni mitsɛ yɔɔ Athens lɛ, ekɛ mi yaa Orthodox Sɔlemɔ lɛ, shi beni egbo lɛ, mifɔɔɔ yaa tamɔ mifeɔ tsutsu lɛ. Akɛni mina akɛ sɔlemɔ lɛ mli bii lɛ baaa amɛjeŋ bɔ ni Nyɔŋmɔ taoɔ hewɔ lɛ, mikpa sɔlemɔ lɛ yaa.

Beni mitsɛ gbo lɛ, miná nitsumɔ yɛ nitsumɔhe ni kwɛɔ shika gbɛjianɔtoo nɔ lɛ mli. Shi no mli lɛ, minyɛmi nuu lɛ etu ewala kɛha Maŋtsɛyeli shiɛmɔ nitsumɔ lɛ, ni ekɛ afii babaoo sɔmɔ yɛ Greece. Efã kɛtee Cyprus yɛ afi 1934. No mli lɛ, Yehowa Odasefonyo ko ni abaptisi lɛ bɛ nakai ŋshɔkpɔ lɛ nɔ, no hewɔ lɛ ená hegbɛ akɛ eeeha shiɛmɔ nitsumɔ lɛ ashwere yɛ jɛmɛ. Beni ebote gbalashihilɛ mli lɛ, eŋa Galatia hu kɛ afii babaoo sɔmɔ akɛ be-fɛɛ sɔɔlɔ. * Bei pii lɛ Nikos kɛ Biblia kasemɔ woji wuji kɛ woji tɛtrɛbii majeɔ wɔ, shi wɔfɔɔɔ kanemɔ. Ehi Cyprus kɛyashi egbo.

Miha Biblia Mli Anɔkwale lɛ Tsɔ Minɔ̃

Yɛ afi 1940 lɛ, George Douras ni ji Odasefonyo ko ni yɔɔ ekãa yɛ Athens ni eji Nikos naanyo lɛ basara wɔ, ni efɔ̃ wɔ nine koni wɔbafata kuu bibioo ko he kɛkase Biblia lɛ yɛ eshia lɛ mli. Wɔkɛ miishɛɛ kpɛlɛ ninefɔɔ lɛ nɔ. Etsɛɛɛ nɔŋŋ ni wɔbɔi mɛi krokomɛi nɔ ni wɔkaseɔ lɛ gbaa. Biblia lɛ kasemɔ ha mi kɛ minyɛmi yoo lɛ jɔɔ wɔwala nɔ wɔha Yehowa. Abaptisi Ariadne yɛ afi 1942, ni abaptisi mi yɛ afi 1943.

Beni Jeŋ Ta II lɛ ba naagbee lɛ, Nikos fɔ̃ wɔ nine koni wɔba Cyprus, no hewɔ lɛ wɔshi kɛtee Nicosia yɛ afi 1945. Ateee shi awooo shiɛmɔ nitsumɔ lɛ yɛ Cyprus tamɔ afeɔ yɛ Greece lɛ. Wɔkɛ wɔhe wo shia kɛ shia shiɛmɔ nitsumɔ lɛ kɛ gbɛjegbɛ nɔ odaseyeli nitsumɔ lɛ hu mli.

Afii enyɔ sɛɛ lɛ, ehe bahia ni Ariadne aku esɛɛ kɛya Greece. Ekɛ nuu ko ni ji Yehowa jálɔ lɛ kpe yɛ jɛmɛ ni ekɛ lɛ bote gbalashihilɛ mli, no hewɔ lɛ ehi Athens kwraa. Etsɛɛɛ nɔŋŋ ni mishabi lɛ kɛ minyɛmi yoo lɛ wo mi hewalɛ koni miku misɛɛ kɛba Greece ni mikɛ mihe abawo be-fɛɛ sɔɔmɔ nitsumɔ lɛ mli yɛ maŋtiase lɛ mli. Akɛni gbɛgbamɔ nitsumɔ lɛ ji oti ni ma mihiɛ daa hewɔ lɛ, miku misɛɛ kɛtee Athens ní hiamɔ lɛ da yɛ jɛmɛ lɛ.

Hegbɛi Heei Anaa Gbele Kɛha Mi

Mije gbɛgbamɔ nitsumɔ lɛ shishi yɛ November 1, afi 1947, ni mikɛ ŋmɛlɛtswai 150 tsuɔ shiɛmɔ nitsumɔ lɛ daa nyɔŋ nɔ. Wɔsafo lɛ shikpɔŋkuku lɛ da waa diɛŋtsɛ, no hewɔ lɛ minyiɛɔ babaoo. Shi fɛɛ sɛɛ lɛ minine shɛ jɔɔmɔi babaoo nɔ. Bei pii lɛ polisifoi lɛ mɔmɔɔ Odasefoi fɛɛ ni amɛnaa akɛ amɛkɛ amɛhe miiwo shiɛmɔ nitsumɔ lɛ mli loo amɛmiiya Kristofoi akpeei lɛ, no hewɔ lɛ etsɛɛɛ nɔŋŋ ni amɔ mi hu.

Akɛ sane fɔ̃ minɔ akɛ miitsake mɛi ahemɔkɛyeli, ni eji nɔ ni abuɔ lɛ akɛ tɔmɔ ni yɔɔ hiɛdɔɔ yɛ nakai beaŋ. Awo mi tsuŋ nyɔji enyɔ yɛ Averof Yei Atsuŋwoohe ni yɔɔ Athens lɛ mli.  No mli lɛ Odasefonyo yoo ko yɛ jɛmɛ momo, ni eyɛ mli akɛ awo wɔ tsuŋ moŋ, shi wɔná Kristofoi anaanyobɔɔ ni yɔɔ miishɛɛ ni woɔ mɔ hewalɛ mli ŋɔɔmɔ. Beni ajie mi kɛjɛ tsuŋwoohe lɛ, mikɛ miishɛɛ tsá gbɛgbamɔ nitsumɔ lɛ nɔ. Mɛi ni mikɛ amɛ kase Biblia lɛ yɛ nakai beaŋ lɛ ateŋ mɛi babaoo kã he amɛji Yehowa tsuji anɔkwafoi lolo, ni enɛ haa mináa miishɛɛ babaoo.

Yɛ afi 1949 lɛ, afɔ̃ mi nine koni miya Buu-Mɔɔ Biblia Gilead Skul ni ji 16 ni afee yɛ United States ni akɛtsɔseɔ be-fɛɛ sɔɔlɔi kɛha maŋsɛɛ sanekpakpa shiɛmɔ nitsumɔ lɛ. Mi kɛ miwekumɛi lɛ amii shɛ wɔhe. Mito gbɛjianɔ koni maya majimaji ateŋ kpee ni abaafee yɛ New York City yɛ afi 1950 latsaa be mli lɛ, koni no sɛɛ lɛ maya Gilead.

Beni miyashɛ United States lɛ, miná hegbɛ ni mikɛ nyɔji fioo komɛi sɔmɔ akɛ tsu mli saalɔ yɛ Yehowa Odasefoi ajeŋ fɛɛ nitsumɔhe yitso lɛ ni yɔɔ New York City lɛ. Jɛmɛ tse keŋkeŋ, jɛmɛ yɛ miishɛɛ ni ewoɔ mɔ hewalɛ, ni nyɛmimɛi hii kɛ yei ni mikɛyɔɔ jɛmɛ lɛ ahe yɛ miishɛɛ. Be fɛɛ be ni mikaiɔ nyɔji ekpaa ni miyaye yɛ jɛmɛ lɛ, mináa miishɛɛ. Kɛkɛ ni be bashɛ ni mikɛaaya Gilead Skul lɛ, ni nyɔji ekpaa ni akɛtsu nikasemɔ kɛ nitsɔɔmɔ dɛŋdɛŋ he nii lɛ baho shwiaa. Ákɛ nikaselɔi lɛ, wɔyɔse bɔ ni Ŋmalɛ naa nilee lɛ he yɔɔ sɛɛnamɔ kɛ miishɛɛ lɛ, ni enɛ wo miishɛɛ kɛ shwelɛ ni wɔyɔɔ akɛ wɔɔgba mɛi krokomɛi anɔkwale lɛ mli hewalɛ.

Miklɛŋklɛŋ Maŋsɛɛ Sanekpakpa Shiɛmɔ Nitsumɔ

Yɛ Gilead Skul lɛ, aŋmɛ wɔ gbɛ koni wɔhala mɛi ni wɔbaasumɔ ni amɛfata wɔhe kɛtsu nitsumɔ lɛ dani aha wɔ hei ni wɔbaatsu maŋsɛɛ sanekpakpa shiɛmɔ nitsumɔ lɛ yɛ. Ruth Hemmig (amrɔ nɛɛ Bosshard), ni eji nyɛmi yoo ko ni he esa waa lɛ ji mɔ ni mikɛyatsu nii lɛ. Beni aha mi kɛ Ruth nitsumɔ yɛ Istanbul, Turkey—ni ji maŋ ni kã Asia kɛ Europa teŋ lɛ, wɔná miishɛɛ waa! Wɔle ákɛ akɛ shiɛmɔ nitsumɔ lɛ woko mla shishi yɛ nakai maŋ lɛ mli, shi wɔhe wɔye akɛ Yehowa baaye abua wɔ.

Istanbul ji maŋ ni yɔɔ fɛo ni maji anɔ bii srɔtoi yɔɔ jɛmɛ. Shwapoi bibii babaoo, je lɛŋ niyenii srɔtoi, hei ni akɛ blema nibii toɔ ni jɛmɛ yaa yɔɔ miishɛɛ, kpokpai anɔ hei ni yɔɔ fɛo, kɛ faai amukpo nɔ hei ni yɔɔ fɛo yɛ jɛmɛ. Nɔ ni fe fɛɛ lɛ, wɔnine shɛ mɛi ni miisumɔ koni amɛkase Nyɔŋmɔ he nii yɛ anɔkwale mli lɛ anɔ. Mɛi titri ni yɔɔ Odasefoi akuu bibioo ni yɔɔ Istanbul lɛ mli lɛ ji Armeniabii, Helabii, kɛ Yudafoi. Shi kɛlɛ, maji anɔ bii krokomɛi hu yɛ jɛmɛ, ni no hewɔ lɛ eji nɔ ni sɛɛnamɔ yɔɔ he akɛ aaakase wiemɔi srɔtoi, ni Turkey wiemɔ hu fata he. Maji anɔ bii srɔtoi ni wɔkɛ amɛ kpe ni anɔkwale lɛ he kumai miiye amɛ lɛ ha wɔmli fili wɔ jogbaŋŋ. Mɛnɛɛmɛi ateŋ mɛi babaoo kã he amɛkɛ anɔkwayeli miisɔmɔ Yehowa.

Wɔhe ni eyabaaa nii lɛ, Ruth nyɛɛɛ afee wolo ni haa enyɛɔ ehiɔ maŋ lɛ mli lɛ ehee, ni no hewɔ lɛ ehe bahia ni eshi maŋ lɛ mli. Eyatsa be-fɛɛ sɔɔmɔ nitsumɔ lɛ nɔ yɛ Switzerland. Yɛ afii babaoo ni eho lɛ fɛɛ sɛɛ lɛ, mihiɛ tseɔ enaanyobɔɔ ni yɔɔ miishɛɛ ni woɔ mɔ hewalɛ lɛ lolo.

Mitee Maŋ Kroko Nɔ

Yɛ afi 1963 lɛ, afeee wolo ni haa minyɛɔ mihiɔ Turkey lɛ ehee ahaaa mi. Ewa kɛha mi akɛ mashi nanemɛi Kristofoi ni mina akɛ amɛmiiya amɛhiɛ yɛ mumɔŋ ni amɛmiibɔ mɔdɛŋ kɛmiiye naagbai babaoo anɔ lɛ. Bɔni afee ni enɛ akaje minijiaŋ wui lɛ, miwekumɛi lɛ jɛ mlihilɛ mli  amɛwo mi gbɛ kɛtee New York City koni miya kpee ko ni abaafee yɛ jɛmɛ lɛ. No mli lɛ ahako mi nitsumɔ kroko.

Beni agbe kpee lɛ naa lɛ, aha mi nitsumɔ yɛ Lima, Peru. Mikɛ oblayoo ko ni ji mɔ ni mikɛbaatsu nitsumɔ lɛ shi New York kɛtee he ni wɔbaatsu nii lɛ yɛ lɛ tɛ̃ɛ. Mikase Spain wiemɔ, ni mihi maŋsɛɛ sanekpakpa shiɛlɔi ashia ko ni yɔɔ Yehowa Odasefoi anitsumɔhe nine lɛ gɔŋ nɔ lɛ mli. Eyɛ miishɛɛ waa akɛ aaashiɛ yɛ jɛmɛ ni ale nyɛmimɛi hii kɛ yei ni yɔɔ jɛmɛ lɛ.

Nitsumɔ Kroko kɛ Wiemɔ Kroko

Etsɛɛɛ nɔŋŋ ni gbɔlɛ kɛ hela babɔi miwekumɛi ni yɔɔ Greece lɛ anaa gbamɔ. Shi amɛwooo mi hewalɛ kɔkɔɔkɔ akɛ mikpa be-fɛɛ sɔɔmɔ nitsumɔ lɛ ni mibahi shi taakɛ mɛi fɛɛ hiɔ shi lɛ koni mikɛye mibua amɛ. Shi beni mikɛ be babaoo susu nii ahe ní misɔle lɛ, miyɔse akɛ ebaafee nɔ ni hi akɛ masɔmɔ yɛ he ko ni bɛŋkɛ miweku lɛ. Nyɛmimɛi ni yɔɔ nitsumɔhe nine lɛ jɛ suɔmɔ mli amɛkpɛlɛ nɔ, ni amɛha mi nitsumɔ yɛ Italy, ni miwekumɛi lɛ ha mi shika kɛfã gbɛ kɛba he ni amɛyɔɔ lɛ. Yɛ anɔkwale mli lɛ, shiɛlɔi babaoo ahe miihia yɛ Italy.

Shikome ekoŋŋ lɛ, ehe bahia ni makase wiemɔ hee ko—no ji Italy wiemɔ lɛ. He klɛŋklɛŋ ni aha mi nitsumɔ yɛ ji Foggia maŋ lɛ mli. Sɛɛ mli lɛ ajie mi kɛtee Naples ni ji he ko ni hiamɔ lɛ da waa yɛ lɛ. Shikpɔŋkuku ni akɛha mi ji Posilipo, ni eji hei ni yɔɔ fɛo jogbaŋŋ yɛ Naples lɛ ateŋ ekome. Shikpɔŋkuku lɛ da waa, ni Maŋtsɛyeli shiɛlɔ kome pɛ yɔɔ jɛmɛ. Nitsumɔ lɛ ha miná miishɛɛ jogbaŋŋ, ni Yehowa ye ebua mi ni mije Biblia mli nikasemɔi babaoo ashishi. Yɛ be ni sa mli lɛ, aná asafo ko ni da yɛ nakai akutso lɛ mli.

Yoo ko kɛ ebii ejwɛ fata mɛi klɛŋklɛŋ ni mikɛkase Biblia lɛ ahe. Ekɛ ebiyei enyɔ kã he amɛji Yehowa Odasefoi lolo. Mikɛ gbalashihilɛ mli hefatalɔi komɛi ni yɔɔ biyoo fioo ko hu kase nii. Weku muu lɛ fɛɛ tee amɛhiɛ yɛ anɔkwale lɛ mli, ni amɛkɛ baptisimɔ fee amɛhenɔjɔɔmɔ lɛ he okadi. Amrɔ nɛɛ Yehowa jálɔ anɔkwafo ko kɛ amɛbiyoo lɛ ebote gbalashihilɛ mli, ni amɛkɛ ekomefeemɔ miisɔmɔ Nyɔŋmɔ kɛ ekãa. Be ko beni mikɛ weku ko kɛ emli bii kaseɔ Biblia lɛ, hewalɛ ni Nyɔŋmɔ Wiemɔ lɛ yɔɔ lɛ ha minaa kpɛ mihe. Beni wɔkane ŋmalɛi srɔtoi ni tsɔɔ akɛ Nyɔŋmɔ ekpɛlɛɛɛ amagai ní atsɔɔ amɛnɔ kɛjáa lɛ lɛ nɔ lɛ, nyɛ lɛ emɛɛɛ ni nikasemɔ lɛ aba naagbee po. Amrɔ nɔŋŋ ni efite amagai fɛɛ ni yɔɔ eshia lɛ mli lɛ!

Mina Nɔ̃ yɛ Ŋshɔ Hiɛ

Be fɛɛ be lɛ mikɛ meele fãa gbɛ kɛyaa Italy kɛbaa Greece shii abɔ. Gbɛfãa lɛ yɛ miishɛɛ yɛ bei babaoo mli. Shi gbɛ ko ni mifã yɛ latsaa be mli yɛ afi 1971 lɛ yɛ srɔto. No mli lɛ mikɛ meele ni ji Heleanna lɛ miifã gbɛ kɛmiiba Italy. Yɛ August 28 leebi maŋkpa lɛ, la je yɛ meele lɛ mli nihoomɔ he lɛ. La lɛ naa bawa, ni eha mɛi ni yɔɔ meele lɛ mli lɛ she gbeyei. Nɔ̃ miinyɔ yei anɔ, gbekɛbii miifo, ni hii lɛ miibolɔ amɛmiiwo nitsulɔi ni yɔɔ meele lɛ mli lɛ. Mɛi jo foi kɛyakwɔ lɛji bibii ni mamɔ meele lɛ toigbɛ lɛ. Shi atadei ni haa mɔ tɛoɔ nu hiɛ lɛ fioo pɛ yɔɔ, ni tsɔji ni akɛholeɔ lɛji bibii ni mamɔ meele lɛ toigbɛ lɛ kɛmaa ŋshɔ lɛ hiɛ lɛ tsuuu nii jogbaŋŋ. Mináaa atade ni haa mɔ tɛoɔ nu hiɛ lɛ eko, ni la lɛ hu naa miiwa, no hewɔ lɛ nɔ ni nilee yɔɔ mli ni manyɛ mafee ji ni matu mawo ŋshɔ lɛ mli.

Beni mitu kɛwo ŋshɔ lɛ mli nɔŋŋ ni mina yoo ko ni wo atade ni haa mɔ tɛoɔ nu hiɛ, ní tɛo  ŋshɔ lɛ hiɛ yɛ mimasɛi. Etamɔ nɔ ni enyɛɛɛɛ esere, no hewɔ lɛ mimɔ enine mli ni migbala lɛ kɛjɛ meele ni miihe ashiu lɛ masɛi. Ŋshɔ lɛ miiya nɔ eefee hamahama waa, ni mɔdɛŋ ni mibɔɔ koni matɛo nu lɛ hiɛ lɛ ha etɔ mi bliboo. Etamɔ nɔ ni hiɛnɔkamɔ ko bɛ, shi mitee nɔ mikpa Yehowa fai koni eha mi ekãa, ni enɛ wo mi hewalɛ. Nɔ̃ pɛ ni mikai ji lɛlɛ ni bɔfo Paulo kɛyasha shi lɛ.—Bɔfoi lɛ Asaji, yitso 27.

Mimɔ yoo lɛ mli kɛpele ŋmɛlɛtswai ejwɛ yɛ ŋshɔkei lɛ amli, ni kɛ́ miná hewalɛ lɛ misereɔ, ni mibiɔ Yehowa koni eha mi hewalɛ. Naagbee lɛ mina akɛ lɛlɛ bibioo ko miibɛŋkɛ mi. Ahere miyiwala, shi no mli lɛ yoo lɛ egbo momo. Beni akɛ wɔ ni ji mɛi ni yi ná wala lɛ shɛ maŋ ni ji Bari ni yɔɔ Italy lɛ mli lɛ, akɛ mi tee helatsamɔhe, ni aha mi tsofã. Atsĩ minaa gbii fioo yɛ helatsamɔhe lɛ, ni Odasefoi babaoo basara mi, ni amɛjɛ mlihilɛ mli amɛha mi nɔ fɛɛ nɔ ni he hiaa mi. Kristofoi asuɔmɔ ni amɛjie lɛ kpo lɛ ha mɛi krokomɛi ni yɔɔ helatsamɔhe lɛ anaa kpɛ amɛhe. *

Sɛɛ mli beni mihe wa mi kwraa lɛ, aha mi nitsumɔ yɛ Roma. Aha mi nitsumɔ yɛ shikpɔŋkuku ko ni nitsumɔhei yɔɔ mli ni yɔɔ maŋtiase lɛ teŋ lɛ mli, ni yɛ Yehowa yelikɛbuamɔ naa lɛ mikɛ afii enumɔ tsu nii yɛ jɛmɛ. Mikɛ nɔ ni miihe ashɛ afii 20 tsu shiɛmɔ nitsumɔ lɛ yɛ Italy, ni miná suɔmɔ miha Italybii lɛ.

Miku Misɛɛ Kɛtee He ni Mije Shishi Kɛjɛ lɛ Ekoŋŋ

Beni be shwieɔ mli lɛ, Ariadne kɛ ewu lɛ agbɔmɔtsoŋ hewalɛnamɔ ba shi. Miyɔse akɛ ehe miihia ni mahi he ko ni bɛŋkɛ amɛ, bɔni afee ni manyɛ mafee nɔ ko kɛto nibii fɛɛ ni amɛjɛ amɛsuɔmɔ mli amɛfee amɛha mi lɛ najiaŋ. Yɛ anɔkwale mli lɛ ewa kɛha mi akɛ mashi Italy. Shi nyɛmimɛi ni yɔɔ nitsumɔhe lɛ ŋmɛ mi gbɛ, ni kɛjɛ afi 1985 latsaa be mli kɛbaa nɛɛ lɛ, miitsu gbɛgbamɔ nitsumɔ lɛ yɛ Athens ni ji he ni mije be-fɛɛ sɔɔmɔ nitsumɔ lɛ shishi yɛ lɛ, yɛ afi 1947.

Mishiɛ yɛ misafo lɛ shikpɔŋkuku lɛ mli, ni mibi nyɛmimɛi ni yɔɔ nitsumɔhe nine lɛ koni amɛha mashiɛ hu yɛ shikpɔŋkuku ni nitsumɔhei yɔɔ mli ni yɔɔ maŋ lɛ teŋ lɛ mli lɛ. Mi kɛ nyɛmi yoo ko ni ji gbɛgbalɔ lɛ tsu enɛ afii etɛ. Wɔnyɛ wɔye mɛi ni efɔɔɔ shia hilɛ lɛ odase kɛmɔ shi jogbaŋŋ.

Beni afii lɛ hoɔ lɛ, shwelɛ ni miyɔɔ akɛ masɔmɔ lɛ mli miiwa be fɛɛ be, shi migbɔmɔtsoŋ hewalɛnamɔ miiba shi. Mishabi lɛ etsɔ esɛɛ amrɔ nɛɛ. Ariadne ni etamɔ nyɛ kɛha mi lɛ hu eshwila. Shi beni mitsuɔ be-fɛɛ sɔɔmɔ nitsumɔ lɛ, no mli lɛ miyɛ gbɔmɔtsoŋ hewalɛ kpakpa. Shi nyɛsɛɛ nɛɛ, migbee shi yɛ atrakpoi ni akɛ fɔbitɛi fee lɛ anɔ, ni minejurɔ ku. No sɛɛ lɛ migbee shi ni mihɛ ku. Enɛ ha afee mi opireshɛn ni mihi saa mli bei babaoo. Minyɛɛɛ manyiɛ tamɔ mifeɔ tsutsu lɛ dɔŋŋ. Mikɛ tso nyiɛɔ, ni ja mɔ ko fata mihe dani minyɛɔ mijeɔ kpo. Shi mibɔɔ mɔdɛŋ fɛɛ ni manyɛ, ni miyɛ hiɛnɔkamɔ akɛ maná gbɔmɔtsoŋ hewalɛ bɔ ni sa. Biblia mli tsɔsemɔ nitsumɔ lɛ ni mikɛ mihe woɔ mli yɛ gbɛ bibioo po nɔ lɛ etee nɔ efee miishɛɛ kɛ tsuiwoo jɛɛhe titri kɛha mi.

Kɛ́ mikai afii ni miishɛɛ yɔɔ mli ni miye yɛ be-fɛɛ sɔɔmɔ nitsumɔ lɛ mli lɛ, ehaa mitsui mli yiɔ obɔ kɛ shidaa kɛha Yehowa. Lɛ kɛ egbɛjianɔtoo lɛ fã ni yɔɔ shikpɔŋ lɛ nɔ lɛ etee nɔ amɛkɛ gbɛtsɔɔmɔ kpakpa kɛ yelikɛbuamɔ ni sɛɛnamɔ yɔɔ he eha mi, ni no ye bua mi ni mikɛ minyɛmɔ fɛɛ tsu nii kɛsɔmɔ lɛ lɛ. Nɔ ni mishweɔ yɛ mitsui mli ji akɛ Yehowa awo mi hewalɛ koni maya nɔ masɔmɔ lɛ. Miyɛ nitsumɔ fioo ni minyɛ mitsu yɛ jeŋ muu fɛɛ Biblia mli tsɔsemɔ nitsumɔ ni ekudɔɔ lɛ mli lɛ he miishɛɛ.—Maleaki 3:10.

[Shishigbɛ niŋmai]

[Mfoniri ni yɔɔ baafa 9]

Mi kɛ minyɛmi yoo Ariadne kɛ ewu Michalis, beni mishiɔ kɛyaa Gilead lɛ

[Mfoniri ni yɔɔ baafa 10]

Aha mi kɛ Ruth Hemmig nitsumɔ yɛ Istanbul, Turkey

[Mfoniri ni yɔɔ baafa 11]

Yɛ Italy yɛ 1970 afii lɛ amli

[Mfoniri ni yɔɔ baafa 12]

Mi kɛ minyɛmi yoo Ariadne ŋmɛnɛ