Nɔ ni Haa Mɔ Tsui Nyɔɔ Emli lɛ Taomɔ
Nɔ ni Haa Mɔ Tsui Nyɔɔ Emli lɛ Taomɔ
ALBERT ji gbalashihilɛ mli hefatalɔ ni yɔɔ miishɛɛ, ni yɔɔ bii enyɔ ni esumɔɔ amɛsane. Shi kɛlɛ enu he akɛ eshwɛ lɛ nɔ ko yɛ eshihilɛ mli. Beni ekɛ mɔdɛŋbɔɔ taoɔ nitsumɔ etsu lɛ, ekɛ ehe wo maŋkwramɔŋ saji amli ni efĩ kwasafoŋ nɔyeli sɛɛ. Ebatsɔ Komunist maŋkwramɔŋ kuu ni yɔɔ maŋ lɛ mli lɛ mlinyo ni yɔɔ ekãa waa po.
Shi kɛlɛ, etsɛɛɛ ni hekɛnɔfɔɔ ni Albert yɔɔ yɛ Komunist nɔyeli lɛ mli lɛ laaje kwraa. Ekɛ maŋkwramɔŋ saji fo takoŋ, ni ekɛ edekã fɛɛ kwɛ eweku lɛ. Ekɛ miishɛɛ ni eweku lɛ aaaná lɛ fee oti ni ma ehiɛ yɛ eshihilɛ mli. Shi kɛlɛ, Albert nu he akɛ efee shwɛm lolo; etsui enyɔɔɔ emli lolo.
Jeee Albert kome too pɛ yɔɔ shihilɛ ni tamɔ nɛkɛ mli. Adesai akpekpei abɔ eka susumɔi, jeŋ nileei kɛ jamɔi srɔtoi babaoo amɛkwɛ akɛ amɛbaaná shihilɛ kpakpa ko lo. Ato kuu ko ni etse ehe lɛ shishi yɛ Ablotsiri maji lɛ amli yɛ afi 1960 afii lɛ amli, ni amɛtse atua amɛshi jeŋba kɛ shihilɛ mli nifeemɔi ni yɔɔ lɛ. Oblahii kɛ oblayei titri ji mɛi ni tsɔ tsofai ni tsakeɔ bɔ ni mɔ susuɔ nii ahe ehaa, kɛ mɛi ni akɛɛ atsɛɔ amɛ kuu lɛ mli tsɔɔlɔi lɛ kɛ emli osɔfonukpai lɛ anilee ní amɛkɛtsu nii lɛ anɔ amɛtao miishɛɛnamɔ kɛ yiŋtoo ni yɔɔ shihilɛ sɛɛ. Shi kɛlɛ, kuu nɛɛ mli bii haaa aná miishɛɛ diɛŋtsɛ. Yɛ no najiaŋ lɛ, eha oblahii kɛ oblayei kɛ amɛhe wo jeŋba shara mli ni amɛkɛ tsofai tsu nii yɛ gbɛ fɔŋ nɔ, ni enɛ ha jeŋba fitemɔ mli bawo wu.
Yɛ afii ohai abɔ ni eho lɛ amli lɛ, mɛi babaoo etao miishɛɛnamɔ kɛtsɔ ninámɔ, hewalɛ, loo wolokasemɔ nɔ. Shi yɛ naagbee lɛ, enɛɛmɛi haa amɛnine nyɛɔ shi. Yesu kɛɛ akɛ: “Jeee gbɔmɔ nii Luka 12:15) Nɔ ni jɛɔ ninámɔ ni akɛ faishitswaa tiuɔ sɛɛ lɛ mli kɛbaa moŋ ji miishɛɛ ní anáaa. Biblia lɛ kɛɔ akɛ: “Mɛi ni taoɔ nii pii aná lɛ gbeeɔ kaa kɛ tsɔne kɛ kwashiai akɔnɔi pii ni fiteɔ mɔ ní tsiɔ mɛi ewoɔ hiɛkpatamɔ kɛ laajemɔ mli lɛ amli. Ejaakɛ nibii fɔji fɛɛ ashishifã ji shika suɔmɔ ní mɛi komɛi di sɛɛ . . . ni amɛkɛ piŋmɔi babaoo egbulɔ amɛhe lɛ.”—1 Timoteo 6:9, 10.
ni ená ni eteke nɔ lɛ mli ewala yɔɔ.” (Belɛ, te mɔ aaafee tɛŋŋ ená tsui ni nyɔɔ mɔ mli kɛ yiŋtoo yɛ shihilɛ mli lɛ? Ani eji nifeemɔ ko ni akaa akwɛɔ, tamɔ nɔ ni aatsɛ̃ nɔ ko nyɛkɛsiɔɔ ko gãi yɛ duŋ mli? Miishɛɛ sane ji akɛ, jeee nakai ji bɔ ni sane lɛ ji. Taakɛ wɔbaana yɛ sane ni nyiɛ sɛɛ lɛ mli lɛ, abaanyɛ aná tsui ni nyɔɔ mɔ mli kɛtsɔ hiamɔ nii ko ni sa jogbaŋŋ ni haa esoroɔ adesai, ní aaatsu he nii lɛ nɔ.
[Mfoniri ni yɔɔ baafa 3]
Ani ninámɔ, hewalɛ, loo wolokasemɔ baaye abua bo ni otsui anyɔ omli?