Sanebimɔi ni Jɛ Kanelɔi Adɛŋ

Mose Wolo ni Ji Enumɔ 14:21 lɛ kaneɔ akɛ: “Nyɛkayea nɔ ko ni lɛ diɛŋtsɛ egbo.” Ani enɛ teɔ shi ewoɔ 3 Mose 11:40 lɛ ni kaneɔ akɛ: “Mɔ ni yeɔ egbonyo lɛ eko lɛ, efɔ etadei lɛ ahe, ni ehe tseee kɛyashi gbɛkɛ” lɛ?

Ŋmalɛi kukuji enyɔ nɛɛ eteee shi kɛwooo amɛhe. Klɛŋklɛŋ ŋmalɛ lɛ tĩ kooloo ni egbo momo, ekolɛ nɔ ni kooloi awuiyelɔi gbe lɛ lɛ yeli ni agu lɛ mli. (2 Mose 22:31; 3 Mose 22:8) Ŋmalɛ ni ji enyɔ lɛ tsɔɔ nɔ ni Israelnyo ko baanyɛ afee kɛji akɛ ekolɛ ejeee gbɛ ni ekũ nakai mla lɛ mli.

Anɔkwale ni eji akɛ Mla lɛ egu nɔ ko feemɔ lɛ etsɔɔɔ akɛ atɔ̃ŋ nɔ yɛ be ko mli. Ákɛ nɔkwɛmɔnɔ lɛ, awo mlai ashi juu, gbɔmɔgbee, amale odaseyeli, kɛ ekrokomɛi. Yɛ nakai beaŋ nɔŋŋ lɛ, atsɔɔ toigbalamɔi ni esa akɛ akɛha mɛi ni kũɔ nakai mlai ni Nyɔŋmɔ kɛha lɛ amli lɛ. Nakai toigbalamɔi lɛ ha mɛi kɛ mlai lɛ tsu nii, ni eha ana hiɛdɔɔ ni yɔɔ he.

Mɔ ko ni yeɔ kooloo ko ní egbo momo lɛ he tseee yɛ Yehowa hiɛ, ni esa akɛ mɔ lɛ atsɔ gbɛ kpakpa ni atsɔɔ nɔ akɛtsuɔ he lɛ nɔ atsuu ehe. Kɛji akɛ mɔ lɛ kpoo akɛ ebaatsuu ehe yɛ gbɛ kpakpa nɔ lɛ, no lɛ ‘esɔ̃ kã enɔ.’—3 Mose 17:15, 16.