“Amɛŋmɛɛɛ Saji Ahe Kɛsaaa”

YESU KRISTO kɛɛ ekaselɔi lɛ akɛ: “Ajɔɔ nyɛ, kɛji ajɛ́ nyɛ ni awa nyɛ yi ni amale awie nyɛhe efɔŋ fɛɛ efɔŋ yɛ mihewɔ lɛ.” (Mateo 5:11) Yehowa Odasefoi ni yɔɔ ŋmɛnɛ lɛ yɛ miishɛɛ ejaakɛ “amɛjɛɛɛ je lɛ mli,” ni asaŋ amɛkɛ amɛhe wooo maŋkwramɔŋ saji amli, shi moŋ amɛyeɔ Nyɔŋmɔ anɔkwa yɛ shihilɛ fɛɛ shihilɛ mli, ni amɛkɛ enɛ feemɔ tsɔɔ akɛ amɛnyiɛɔ Kristo tsɔɔmɔi kɛ nɔkwɛmɔnɔ kpakpa ni efee efɔ̃ shi lɛ asɛɛ.—Yohane 17:14; Mateo 4:8-10.

Toomas Paul ni ji Luther jamɔ he nilelɔ kɛ Biblia shishitsɔɔlɔ hu lɛ wie bɔ ni Yehowa Odasefoi ni hi shi yɛ tsutsu Soviet Union kɛ mɛi ni yɔɔ Estonia lɛ eŋmɛɛɛ saji ahe kɛsaaa lɛ he yɛ ewolo ni ji Kirik keset küla (Sɔlemɔ ni Yɔɔ Akrowa lɛ Mli) lɛ mli akɛ: “Mɛi fioo pɛ le nɔ ni tee nɔ leebi maaŋkpa yɛ April 1 afi 1951 lɛ he sane ko. Afã ta koni ashwie Yehowa Odasefoi kɛ mɛi fɛɛ ni kɛ amɛ bɔɔ lɛ kɛya Siberia, ni mɛi ni amɔmɔ ni ashwie amɛ lɛ ayifalɛ ji 279 . . . Akɛɛ amɛ akɛ kɛ́ amɛsumɔɔɔ ni ashwieɔ amɛ loo awoɔ amɛ tsuŋ lɛ, no lɛ amɛkɛ amɛnine awo wolo ko ni akɛha amɛ lɛ shishi kɛtsɔɔ akɛ amɛkwá amɛhemɔkɛyeli lɛ. . . . Kɛ́ mɛi ni amɔmɔ ní ashwie amɛ lɛ fata he lɛ, mɛi fɛɛ ni amɔmɔ amɛ awo tsuŋ lɛ ayifalɛ ji 353, ni kɛ́ hooo lɛ amɛteŋ mɛi 171 kɛ asafoi ni amɛyɔɔ mli lɛ bɔɔ shi amɛjeee nyɛmimɛi. Beni ashwie amɛ kɛtee Siberia po lɛ, amɛŋmɛɛɛ saji ahe kɛsaaa. . . . Mɛi enyɔoo ko pɛ abaaná yɛ [Estonia Luther] Sɔlemɔ lɛ mlibii lɛ ateŋ ní yɔɔ hemɔkɛyeli tamɔ Yehowa Odasefoi.”

Yehowa Odasefoi ni yɔɔ jeŋ fɛɛ lɛ kɛ amɛhe fɔ̃ɔ Nyɔŋmɔ nɔ kɛha yelikɛbuamɔ koni amɛnyɛ amɛya nɔ amɛye lɛ anɔkwa ni amɛbo lɛ toi yɛ yiwaai ni baaba amɛnɔ lɛ fɛɛ sɛɛ. Amɛmli filiɔ amɛ akɛni amɛle akɛ abaawo amɛ nyɔmɔ babaoo yɛ anɔkwa ni amɛyeɔ lɛ hewɔ lɛ hewɔ.—Mateo 5:12.