Anɔkwa Tsɔɔmɔi Nɛgbɛ Obaanyɛ Oná Kɛjɛ?

NUU ko ni jɛ Tibet lɛ miiha nɔ ko kokroo ko ni ehiɛ yɛ edɛŋ ní aŋmala sɔlemɔi srɔtoi yɛ nɔ lɛ miibɔle ehe. Eheɔ eyeɔ akɛ, shii abɔ ni ebɔleɔ nakai nii lɛ ni tsɔɔ shii abɔ ni ekɛtĩɔ esɔlemɔ lɛ mli. Áto tsu bibioo ko ni yɔɔ shia wulu ko mli yɛ India lɛ hu kɛha jamɔŋ nifeemɔ ko ni atsɛ́ɔ lɛ puja—akɛ tsofa-kɛŋma, fɔfɔii kɛ nibii krokomɛi shãa afɔle ahaa nyɔŋmɔi kɛ nyɔŋmɔyei ahe amagai yɛ nifeemɔ nɛɛ mli. Ni yɛ Italy maŋ ni yɔɔ shɔŋŋ lɛ hu mli lɛ, yoo ko ni hiɛ ashinaoi ni akɛsɔleɔ yakula shi yɛ Yesu nyɛ Maria he amaga ko ni yɔɔ sɔlemɔtsu ni awula mli haŋtsii ko mli lɛ hiɛ esɔle.

Ekolɛ bo diɛŋtsɛ hu oyɔse bɔ ni jamɔ ená mɛi ashihilɛ nɔ hewalɛ eha lɛ jogbaŋŋ. Wolo ni ji The World’s Religions—Understanding the Living Faiths lɛ tsɔɔ mli akɛ: “Jamɔ . . . etee nɔ etsu gbɛfaŋnɔ titri ko he nii yɛ adesai ni jɛ jeŋ fɛɛ lɛ ashihilɛ mli, ni ekã he eefee nakai.” John Bowker ŋma yɛ ewolo ni ji God—A Brief History lɛ mli akɛ: “Nyɔŋmɔ mli hemɔkɛyeli ni anáa lɛ etee nɔ etsu gbɛfaŋnɔ ko he nii yɛ adesai ashihilɛ mli, ni bei pii lɛ, hemɔkɛyeli nɛɛ kɔɔ jeŋ muu lɛ fɛɛ kudɔmɔ kɛ ebɔɔ lɛ he. Enɛ ji anɔkwale yɛ maji po ni jeɔ gbɛ amɛkuɔ amɛhiɛ amɛshwieɔ Nyɔŋmɔjamɔ nɔ lɛ ahe.”

Yɛ anɔkwale mli lɛ, jamɔ ená mɛi akpekpei abɔ ashihilɛ nɔ hewalɛ waa. Ani enɛ jeee odaseyeli diɛŋtsɛ ni tsɔɔ akɛ adesai yɛ mumɔŋ hiamɔ nii kɛ shwelɛ ko ni esa akɛ atsu he nii? Adesai anifeemɔ he nilelɔ kpanaa ni atsɛ́ɔ lɛ Dr. Carl G. Jung wie bɔ ni ofe ko ni aaajá lɛ he hiaa adesai ha lɛ he yɛ ewolo ni ji The Undiscovered Self lɛ mli, ni ekɛɛ akɛ: “Abaanyɛ ana hiamɔ nii nɛɛ yɛ adesai ni hi shi yɛ bei ni eho lɛ amli fɛɛ lɛ ahe.”

 Shi kɛlɛ, mɛi babaoo heee Nyɔŋmɔ nɔ amɛyeee, ni asaŋ amɛbɛ jamɔ he miishɛɛ. Yiŋtoo titri hewɔ ni mɛi komɛi jeɔ shihilɛ mli ni Nyɔŋmɔ yɔɔ lɛ he ŋwane loo amɛkɛɔ akɛ ebɛ lɛ ji akɛ, jamɔi ni amɛyɔɔ mli lɛ nyɛɛɛ atsu amɛmumɔŋ hiamɔ nii ahe nii. Átsɔɔ jamɔ shishi akɛ eji “he ni atuɔ ahaa susumɔ ko he nitsumɔ; anɔkwayeli loo toiboo ni afeɔ kɛmɔɔ shi; hiɛmiamɔ ni akɛtsuɔ nii jogbaŋŋ; suɔmɔ mli ni ajɛɔ atuɔ he kwraa ahaa nyɔŋmɔ ko.” Yɛ shishinumɔ nɛɛ naa lɛ, etamɔ nɔ ni mɔ fɛɛ mɔ kɛ ehe ewo jamɔŋ nifeemɔ ko mli yɛ eshihilɛ mli. Ni mɛi ni heee Nyɔŋmɔ nɔ amɛyeee lɛ po ashihilɛ tsɔɔ nakai.

Mɔdɛŋ ni adesai bɔɔ koni amɛtsu amɛmumɔŋ hiamɔ nii ahe nii lɛ eha amɛka jamɔi srɔtoi amɛkwɛ yɛ afii akpei abɔ ni amɛkɛhi shi lɛ fɛɛ amli. Enɛ ji nɔ ni kɛ jamɔ mli tsɔɔmɔi srɔtoi babaoo ni egbɛ eshwã je lɛŋ fɛɛ lɛ ba. Ákɛ nɔkwɛmɔnɔ lɛ, eyɛ mli akɛ etamɔ nɔ ni jamɔi fɛɛ fĩɔ hemɔkɛyeli ni ayɔɔ akɛ ofe ko yɛ lɛ sɛɛ moŋ, shi amɛhiɛ susumɔi srɔtoi yɛ mɔ ni nakai ofe lɛ ji lɛ he. Jamɔi babaoo maa bɔ ni yiwalaheremɔ loo kpɔmɔ he hiaa ha lɛ hu nɔ mi. Shi esoro nibii ni amɛtsɔɔ yɛ nɔ ni yiwalaheremɔ ji kɛ gbɛ nɔ ni mɔ aaatsɔ enine ashɛ nɔ lɛ ahe. Te wɔɔfee tɛŋŋ wɔyoo anɔkwa tsɔɔmɔi ni saa Nyɔŋmɔ hiɛ yɛ tsɔɔmɔi srɔtoi babaoo ni yɔɔ nɛɛ ateŋ?