Anɔkwa Tsɔɔmɔi ní Saa Nyɔŋmɔ Hiɛ

DANI adesai ni yɔɔ shikpɔŋ nɔ lɛ aaale tsɔɔmɔi ni ji anɔkwale ní saa Nyɔŋmɔ hiɛ lɛ, ehe miihia ni etsɔɔ amɛ nɔ ni esusumɔi ji. Ni esa akɛ eha adesai fɛɛ ale esusumɔi nɛɛ hu. Mɛɛ gbɛ nɔ adesai aaatsɔ amɛbale nɔ̃ tsɔɔmɔi, jamɔ kɛ jeŋba ni Nyɔŋmɔ kpɛlɛɔ nɔ? Ani Nyɔŋmɔ eha ale saji ni tamɔ enɛɛmɛi? Kɛ́ nakai ni lɛ, belɛ mɛɛ gbɛ nɔ etsɔ efee nakai?

Ani adesai ni wala sɛɛ kɛɛɛ lɛ ateŋ mɔ ko yɛ ni baanyɛ ekɛ shɛɛ sane ayaha mɛi fɛɛ ni yɔɔ je lɛŋ lɛ, ní no hewɔ lɛ Nyɔŋmɔ kɛ lɛ atsu nii akɛ enaawielɔ? Dabi. Shi kɛlɛ, wolo ko ni aŋma ni nine baanyɛ ashɛ nɔ be fɛɛ be lɛ baanyɛ atsu yiŋtoo nɛɛ he nii. Kɛ́ nakai ni lɛ, ani efeŋ nɔ ni hi jogbaŋŋ akɛ Nyɔŋmɔ baatsɔ wolo ko nɔ eha wɔnine ashɛ nibii ni etaoɔ akɛ wɔle lɛ anɔ? Biblia lɛ ji woji ni etsɛ waa ni amɛmli saji kɛɔ akɛ Nyɔŋmɔ ni ŋma lɛ ateŋ ekome. Mɛi ni ŋma lɛ ateŋ mɔ kome kɛɛ akɛ: “Ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ.” (2 Timoteo 3:16) Ha wɔsusu Biblia lɛ he jogbaŋŋ wɔkwɛ akɛ no mli anáa anɔkwa tsɔɔmɔi kɛjɛɔ lo.

Mɛɛ Be Aŋma?

Biblia lɛ ji Nyɔŋmɔjamɔ he woji titrii ni etsɛ fe fɛɛ lɛ ateŋ ekome. Aŋma eklɛŋklɛŋ fã lɛ mli saji ashwie shi aaafee afii 3,500 ni eho nɛ. Agbe wolo nɛɛ ŋmaa naa yɛ afi 98 Ŋ.B. * Eyɛ mli akɛ hii 40 ni ŋma Biblia lɛ, ni amɛkɛ afii 1,600 ŋma moŋ, shi saji ni amɛŋmala yɛ mli lɛ kɛ amɛhe kpãa gbee. Nɔ̃ hewɔ ji akɛ, wolo nɛɛ Ŋmalɔ diɛŋtsɛ ji Nyɔŋmɔ.

Biblia lɛ ji wolo ni aja ní atsɔɔ shishi hu fe woji fɛɛ ni afee pɛŋ yɛ yinɔsane mli. Daa afi lɛ, ajaa Biblia muu lɛ loo efãi komɛi ni naa shɛɔ akpekpei 60 sɔŋŋ. Átsɔɔ Biblia muu lɛ loo efãi komɛi ashishi kɛtee wiemɔi ni fa fe 2,300 mli. Adesai ni yɔɔ jeŋ fɛɛ lɛ amli 100 mlijaa 90 yɛ Biblia muu lɛ  eko loo kɛ́ hooo lɛ efã ko yɛ amɛ diɛŋtsɛ amɛmaŋ wiemɔ mli. Gbɔmɛi ni jɛ maji srɔtoi anɔ, mɛi ni hiɛ hewolo nɔ sui srɔtoi kɛ mɛi ni wieɔ wiemɔi srɔtoi lɛ fɛɛ kɛ wolo nɛɛ tsuɔ nii yɛ srɔtofeemɔ ni yɔɔ amɛteŋ lɛ fɛɛ sɛɛ.

Te Ato Emli Saji lɛ Ahe Gbɛjianɔ Aha Tɛŋŋ?

Kɛ́ oyɛ Biblia lɛ eko lɛ, no lɛ gbelemɔ koni okwɛ bɔ ni ato emli saji lɛ ahe gbɛjianɔ aha. * Klɛŋklɛŋ kwraa lɛ, gbelemɔ kɛya baafa ni tsɔɔ saji ni yɔɔ mli lɛ. Kɛ́ ogbele Bibliai pii amli lɛ, anaa baafa nɛɛ klɛŋklɛŋ, ni ato Biblia mli woji srɔtoi lɛ fɛɛ anaa yɛ amɛgbɛii anaa, ni atsɔɔ baafa ni abaanyɛ ana emli eko fɛɛ eko yɛ lɛ hu yɛ nakai baafa lɛ. Obaana akɛ woji srɔtoi ni abua naa ní esoro eko fɛɛ eko gbɛi ni feɔ Biblia lɛ. Atsɛ́ɔ emli klɛŋklɛŋ wolo lɛ akɛ Mose Klɛŋklɛŋ Wolo, ni naagbee wolo lɛ gbɛi ji Kpojiemɔ. Abua woji ni yɔɔ mli lɛ anaa awo fãi enyɔ mli. Akɛni aŋma klɛŋklɛŋ woji 39 lɛ mli kpotoo yɛ Hebri wiemɔ mli hewɔ lɛ, atsɛ́ɔ fã nɛɛ akɛ Hebri Ŋmalɛi lɛ. Aŋma woji 27 ni eshwɛ lɛ yɛ Hela wiemɔ mli, ni ale fã nɛɛ hu akɛ Hela Ŋmalɛi lɛ. Mɛi komɛi tsɛ́ɔ fãi enyɔ nɛɛ akɛ Kpaŋmɔ Momo lɛ kɛ Kpaŋmɔ Hee lɛ.

Bɔni afee ni Biblia lɛ mli saji ataomɔ afee nɔ ni yɔɔ mlɛo lɛ, ato emli saji lɛ ahe gbɛjianɔ awo yitsei kɛ kukuji amli. Kɛ́ atsɛ́ ŋmalɛ ko yɛ wolo tɛtrɛɛ nɛɛ mli lɛ, klɛŋklɛŋ nɔmba ni aŋma kɛtsa Biblia mli wolo lɛ nɔ lɛ tsɔɔ wolo lɛ yitso, ni nɔmba ni nyiɛ sɛɛ lɛ hu tsɔɔ ekuku lɛ. Ákɛ nɔkwɛmɔnɔ lɛ, ŋmalɛ ni ji “2 Timoteo 3:16” lɛ shishi ji Timoteo Wolo ni Ji Enyɔ, yitso 3, kuku 16. Kwɛmɔ akɛ obaanyɛ ona nakai kuku lɛ yɛ Biblia lɛ mli lo.

Ani okpɛlɛɛɛ nɔ akɛ Biblia lɛ ní aaakane daa lɛ ji gbɛ ni hi fe fɛɛ ni aaatsɔ nɔ ale emli saji jogbaŋŋ? Mɛi komɛi eyoo akɛ Hela Ŋmalɛi ní Mateo wolo lɛ jeɔ shishi lɛ ní aaakane klɛŋklɛŋ lɛ yeɔ ebuaa waa. Kɛ́ okaneɔ yitsei etɛ kɛmɔ yitsei enumɔ daa gbi lɛ, no baaha onyɛ ogbe Biblia muu lɛ fɛɛ kanemɔ naa yɛ afi kome mli. Shi te ooofee tɛŋŋ oná nɔmimaa akɛ nibii ni okaneɔ yɛ Biblia lɛ mli lɛ jɛ Nyɔŋmɔ diɛŋtsɛ ŋɔɔ?

Ani Obaanyɛ Okɛ Ohe Afɔ̃ Biblia lɛ Nɔ?

Ani wolo ni Nyɔŋmɔ ŋma eha gbɔmɛi fɛɛ lɛ nyɛŋ ekɛ ŋaawoi ni be hooo ni akɛtsuɔ daa gbi shihilɛ he nii aha? Biblia lɛ haa anuɔ bɔ ni adesai asu yɔɔ ha lɛ shishi jogbaŋŋ, ni anaa enɛ yɛ adesai ni hi shi yɛ yinɔi fɛɛ ni eho lɛ amli lɛ ahe, ni shishitoo mlai ni ekɛhaa lɛ ahe yɛ sɛɛnamɔ ŋmɛnɛ hu taakɛ amɛji yɛ be ni aŋma lɛ mli lɛ. Abaanyɛ ana sɛɛnamɔ nɛɛ yɛ gbɛ ni waaa kwraa nɔ yɛ wiemɔ ni ale jogbaŋŋ ni Yesu Kristo ni ji Kristojamɔ Shishitolɔ lɛ ha lɛ mli. Aŋma enɛ he sane yɛ Mateo yitso 5 kɛyashi yitso 7 lɛ. Wiemɔ ni eha nɛɛ ni ale lɛ akɛ Gɔŋ nɔ Shiɛmɔ lɛ tsɔɔ wɔ bɔ ni aaafee aná anɔkwa miishɛɛ, bɔ ni asaa béi ahaa, bɔ ni asɔleɔ, bɔ ni esa akɛ abu heloonaa hiamɔ nii aha, kɛ nibii krokomɛi babaoo. Taakɛ anaa yɛ wiemɔ ni aha nɛɛ mli kɛ agbɛnɛ hu yɛ Biblia lɛ mli saji krokomɛi amli lɛ, Biblia lɛ feɔ nibii ni esa akɛ wɔfee kɛ nɔ ni esa akɛ wɔkpoo bɔni afee ni wɔsa Nyɔŋmɔ hiɛ ní wɔshihilɛ aya hiɛ hu lɛ faŋŋ.

Yiŋtoo kroko hu hewɔ ni obaanyɛ okɛ ohe afɔ̃ Biblia lɛ nɔ ji akɛ, nibii ni kɔɔ jeŋnilee he ní wolo ni etsɛ nɛɛ wieɔ he lɛ ja pɛpɛɛpɛ. Ákɛ nɔkwɛmɔnɔ lɛ, tsutsu ko beni mɛi babaoo heɔ yeɔ akɛ shikpɔŋ lɛ yɛ tɛtɛrɛɛ lɛ beebe ni Biblia lɛ wie “shikpɔŋ lɛ yiteŋ ati” loo, kokroo lɛ he. * (Yesaia 40:22) Ni nɔ ni fe afii 3,000 dani jeŋnilelɔ kpanaa ni atsɛ́ɔ lɛ Owula Isaac Newton batsɔɔ akɛ nigbalamɔ hewalɛ ji nɔ ni haa shibɔlemɔ ŋulamii lɛ tsotsoroɔ shi yɛ ŋwɛiniiaŋ lɛ, no mli lɛ Biblia lɛ ejɛ mra ewie akɛ ‘shikpɔŋ lɛ tsotsoro shi, shi jeee yɛ nɔ ko nɔ.’ (Hiob 26:7) Susumɔ lalafoo  wiemɔi ni aŋma aaafee afii 3,000 nɛ ní tsɔɔ bɔ ni feɔ ni nu ní nɛɔ shwieɔ shi lɛ kuɔ sɛɛ eyaa ŋwɛi ní esaa enɛɔ eshwieɔ shi ekoŋŋ lɛ he okwɛ. Ekɛɔ akɛ: “Faai fɛɛ hoɔ kɛyaa ŋshɔŋ, kɛlɛ ŋshɔ yiii: he ni faai lɛ hoɔ kɛyaa lɛ, jɛi nɔŋŋ amɛhoɔ kɛyaa ekoŋŋ.” (Jajelɔ 1:7) Hɛɛ, Bɔlɔ ni fee jeŋ muu lɛ, lɛ nɔŋŋ ji Biblia lɛ Ŋmalɔ lɛ.

Bɔ ni Biblia lɛ ja ha kɛ́ eewie yinɔsane he lɛ fĩɔ anɔkwale ni eji akɛ Nyɔŋmɔ ni ŋma lɛ sɛɛ. Saji ni Biblia lɛ wieɔ he lɛ jeee adesãi. Etsĩɔ be pɔtɛɛ mli ni saji lɛ ba, hei ni eba yɛ kɛ mɛi ni he yɔɔ mli lɛ hu agbɛii atã. Ákɛ nɔkwɛmɔnɔ lɛ, Luka 3:1 lɛ tsĩɔ sane ko ni ba mli diɛŋtsɛ yɛ “Kaisare Tiberio maŋtsɛyeli afi ni ji nyɔŋma kɛ enumɔ lɛ mli, beni Pontio Pilato yeɔ amralo yɛ Yudea, ni Herode yeɔ tetrarke yɛ Galilea” lɛ tã.

Eyɛ mli akɛ be fɛɛ be ní blema yinɔsaneŋmalɔi aaawie maŋtsɛmɛi ahe lɛ, kunimii srɔtoi ni amɛye kɛ sui kpakpai ni amɛjie lɛ kpo lɛ pɛ ahe amaniɛ amɛbɔɔ moŋ, shi Biblia ŋmalɔi lɛ yeɔ anɔkwa, ni amɛwieɔ amɛ diɛŋtsɛ amɛtɔmɔi po ahe yɛ faŋŋ mli. Ákɛ nɔkwɛmɔnɔ lɛ, Israel Maŋtsɛ David wie yɛ faŋŋ mli akɛ: “Mifee esha kple akɛ mifee enɛ; . . . miye kwashiai asane naakpa!” Akɛ tɔmɔ nɛɛ eteee, shi moŋ aŋma yɛ faŋŋ mli yɛ Biblia lɛ mli. (2 Samuel 24:10) Ni Biblia ŋmalɔ ni ji Mose hu wie bɔ ni eyajieee hekɛnɔfɔɔ kpo yɛ anɔkwa Nyɔŋmɔ lɛ mli yɛ sane ko ni ba lɛ mli lɛ he.—4 Mose 20:12.

Odaseyeli kroko hu yɛ ni tsɔɔ akɛ Nyɔŋmɔ ni ŋma Biblia lɛ. No ji gbalɛi loo saji ni atsɔ hiɛ aŋma afɔ̃ shi ni baa mli anɔkwale lɛ. Gbalɛi nɛɛ ateŋ ekomɛi kɔɔ Yesu Kristo he. Ákɛ nɔkwɛmɔnɔ lɛ, nɔ ni fe afii 700 dani abaafɔ́ Yesu ni ji Mɔ ni Awo Shi yɛ ehe nɛɛ, Hebri Ŋmalɛi lɛ tsɔ hiɛ egba fɔ̃ shi akɛ maŋ ni ji “Betlehem yɛ Yudea” lɛ mli abaafɔ́ lɛ yɛ.—Mateo 2:1-6; Mika 5:1.

Susumɔ nɔkwɛmɔnɔ kroko hu he okwɛ. Biblia lɛ kɛɔ yɛ 2 Timoteo 3:1-5 lɛ akɛ: “Naagbee gbii lɛ anɔ lɛ jaramɔ bei baaba. Ejaakɛ gbɔmɛi aaatsɔmɔ hesuɔlɔi, shika suɔlɔi, shwãlɔi, hewolɔi, musubɔlɔi, fɔlɔi anɔ toigbolɔi, trumui, mɛi ni he tseee, mɛi ni edɔɔɔ mɔ he, kpaŋmɔ mlikulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ, mɛi ni hiɛ Nyɔŋmɔ jamɔ su, shi amɛkwa emli hewalɛ lɛ.” Ani enɛɛmɛi jeee sui diɛŋtsɛ ni wɔnaa yɛ gbɔmɛi babaoo ahe ŋmɛnɛ? Nɔ ni fe afii 1,900 sɔŋŋ eho kɛjɛ be ni aŋma wiemɔi nɛɛ yɛ afi 65 Ŋ.B. lɛ!

Mɛni Biblia lɛ Tsɔɔ Wɔ?

Be mli ni okaneɔ Biblia lɛ, obaayɔse akɛ mɔ ko ni le nii jogbaŋŋ ji mɔ ni ŋma. Biblia lɛ kɛ sanebimɔi tamɔ: Nyɔŋmɔ—namɔ ni? Ani Abonsam yɛ lɛɛlɛŋ? Yesu Kristo—namɔ ni? Mɛni hewɔ adesai naa nɔ̃? Mɛni baa mɛi anɔ kɛ́ amɛgboi? kɛ ekrokomɛi ahetooi ni haa mɔ tsui nyɔɔ emli haa. Kɛ́ obi ni mɛi aha saji nɛɛ ahetoo lɛ, esoro nɔ ni mɔ fɛɛ mɔ baakɛɛ, akɛni esoro mɔ nɛ hemɔkɛyeli kɛ kusum ni ekpɛlɛɔ nɔ yɛ mɔ kroko nɔ̃ lɛ he lɛ hewɔ. Shi Biblia lɛ jieɔ anɔkwalei ni kɔɔ saji nɛɛ kɛ ekrokomɛi babaoo ahe lɛ akpo. Kɛfata he lɛ, kɛ́ aawie subaŋ kɛ bɔ ni esa ákɛ akɛ adesai krokomɛi kɛ mɛi ni hiɛ nɔyeli hegbɛi aye aha lɛ ahe lɛ, gbɛtsɔɔmɔ ni Biblia lɛ kɛhaa lɛ ji nɔ ni hi fe fɛɛ. *

Mɛni Biblia lɛ tsɔɔ yɛ yiŋtoo hewɔ ni Nyɔŋmɔ bɔ shikpɔŋ kɛ adesai lɛ he? Ewoɔ shi akɛ: “Eshwɛ fioo kɛkɛ ni mɔ fɔŋ lɛ bɛ dɔŋŋ . . . Shi mɛi ni he jɔ lɛ, shikpɔŋ lɛ aaatsɔ̃ amɛnɔ̃, ni amɛmii aaashɛ amɛhe yɛ hejɔlɛ babaoo mli.” (Lala 37:10, 11) “Nyɔŋmɔ diɛŋtsɛ kɛ amɛ [adesai] aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (Kpojiemɔ 21:3, 4) “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.”—Lala 37:29.

Biblia lɛ egba hu akɛ etsɛŋ ni tai, awuiyeli, yiwalɛ nifeemɔ kɛ efɔŋfeemɔ fɛɛ sɛɛ baafo. Helai, gbɔlɛ, kɛ gbele ehiŋ shi dɔŋŋ. Ákɛ abaahi shi kɛya naanɔ yɛ paradeiso shikpɔŋ nɔ lɛ baaba mli anɔkwale. Mɛɛ gbɛkpamɔi ni yɔɔ miishɛɛ po enɛɛmɛi ji nɛkɛ! Ni kwɛ bɔ ni enɛɛmɛi fɛɛ yeɔ suɔmɔ ni Nyɔŋmɔ yɔɔ kɛha adesai lɛ he odase!

Mɛni Esa akɛ Ofee?

Biblia lɛ ji nikeenii ko ni yɔɔ naakpɛɛ ni jɛ Bɔlɔ  lɛ ŋɔɔ. Te esa akɛ obu wolo nɛɛ oha tɛŋŋ? Nuu ko ni ji Hindunyo lɛ heɔ eyeɔ akɛ, kɛji wolo ko ni jɛ Nyɔŋmɔ ŋɔɔ lɛ he baanyɛ aba sɛɛnamɔ kɛha adesai fɛɛ lɛ, no lɛ esa akɛ efee wolo ni aŋma yɛ be ni hiŋmɛigbelemɔ je shishi lɛ mli tɔ̃ɔ. Beni ebayoo akɛ Biblia lɛ fãi komɛi yɛ momo dani aŋma Hindubii awolo ni etsɛ fe fɛɛ ni atsɛ́ɔ lɛ Vedas lɛ, enɛ tsirɛ lɛ ni ekane Biblia lɛ kɛpɛi emli saji lɛ amli ekwɛ. * Nilelɔ kpanaa ko ni jɛ United States lɛ hu bayoo bɔ ni ehe hiaa akɛ mɔ aaakane wolo ni aja fe je lɛŋ woji fɛɛ nɛɛ dani mɔ lɛ amu sane naa yɛ nɔ̃ wolo ni eji lɛ he.

Kɛji okane Biblia lɛ ní okɛ tsɔɔmɔi ni yɔɔ mli lɛ tsu nii lɛ, obaaná he sɛɛ babaoo. Biblia lɛ kɛɔ akɛ: “Ajɔɔ gbɔmɔ ni . . . Yehowa mla lɛ he emii shɛɔ yɛ, ni emla lɛ he nɔŋŋ ejwɛŋɔ shwane kɛ nyɔɔŋ! Etamɔ tso ni atɛo yɛ faai atoi, ni woɔ eyibii yɛ ebe lɛ mli, ni eyibaai kpɔŋ, ni nɔ fɛɛ nɔ ni efeɔ lɛ shwereɔ.” * (Lala 1:1-3) Biblia lɛ ní oookase kɛ emli saji lɛ anɔ ni ooojwɛŋ lɛ baaha oná miishɛɛ, ejaakɛ enɛ feemɔ nɔ oootsɔ otsu omumɔŋ hiamɔ nii lɛ ahe nii. (Mateo 5:3) Biblia lɛ baatsɔɔ bo bɔ ni ooofee oná shihilɛ kpakpa kɛ gbɛ ni oootsɔ nɔ odamɔ naagbai anaa jogbaŋŋ. Hɛɛ, “[Nyɔŋmɔ mlai ni yɔɔ Biblia lɛ mli] amɛnɔyeli lɛ, nyɔmɔwoo kpele yɛ mli.” (Lala 19:12) Kɛfata he lɛ, hekɛnɔfɔɔ ni oooná yɛ Nyɔŋmɔ shiwoi lɛ amli lɛ baaha oná jɔɔmɔi babaoo amrɔ nɛɛ, ni ebaaha oná wɔsɛɛ shihilɛ he hiɛnɔkamɔ kpakpa hu.

Biblia lɛ woɔ wɔ hewalɛ akɛ: “Nyɛshwea wiemɔ lɛ mli fufɔ krɔŋŋ lɛ tamɔ fufɔbii ní afɔ́ bianɛ.” (1 Petro 2:2) Abifao nyɛŋ ahi shi kɛ́ eyeee fufɔ, ni ekɛ hiɛdɔɔ biɔ ni atsu ehiamɔ nii nɛɛ he nii. Nakai nɔŋŋ wɔ hu Nyɔŋmɔ he nilee he hiaa wɔ ní wɔnyɛ wɔhi shi. No hewɔ lɛ, ‘ná shwelɛ’ loo suɔmɔ ni mli wa oha e-Wiemɔ lɛ. Biblia lɛ ji wolo mli ní anaa anɔkwa tsɔɔmɔi ni jɛ Nyɔŋmɔ ŋɔɔ lɛ yɛ. Ha efee oti ni ma ohiɛ akɛ obaakase wolo nɛɛ daa. Yehowa Odasefoi ni yɔɔ he ni oyɔɔ lɛ baaná he miishɛɛ akɛ amɛaaye amɛbua bo koni oná nii ni oookase nɛɛ he sɛɛ jogbaŋŋ. Wɔkɛ miishɛɛ miibi ní otao amɛ sɛɛ gbɛ. Ni kɛ́ oosumɔ hu lɛ, obaanyɛ oŋma kɛyaha mɛi ni fee wolo tɛtrɛɛ nɛɛ.

[Shishigbɛ niŋmai]

[Mfoniri ni yɔɔ baafa 7]

‘Ná shwelɛ’ oha Nyɔŋmɔ Wiemɔ lɛ. Kasemɔ Biblia lɛ daa

[He ni Mfoniri ni yɔɔ baafa 5 lɛ Jɛ]

NASA photo