Ani Oyeɔ Anɔkwa Yɛ Nɔ Fɛɛ Nɔ Mli?
Ani Oyeɔ Anɔkwa Yɛ Nɔ Fɛɛ Nɔ Mli?
“Mɔ ni yeɔ nɔ ko bibioo mli anɔkwa lɛ, eyeɔ babaoo hu mli anɔkwa.”—LUKA 16:10.
1. Mɛni ji gbɛ̀i ni Yehowa jieɔ ehe kpo akɛ anɔkwafo lɛ ateŋ ekome?
ANI okadi nɔ ni baa hɔ̃ɔŋ ni tso ko haa lɛ nɔ beni hulu lɛ wóɔ ehe nɔ lɛ? Nɔ ni baa ji akɛ, hɔ̃ɔŋ lɛ yaa nɔ etsakeɔ eshikamɔ be fɛɛ be! Bei pii lɛ, mɔdɛŋ ni adesai bɔɔ kɛ shiwoi ni amɛhaa lɛ tsakeɔ tamɔ hɔ̃ɔŋ. Ákɛ mɔ ni tamɔɔɔ adesai lɛ, Yehowa Nyɔŋmɔ tsakeee. Beni kaselɔ Yakobo wieɔ Yehowa he akɛ “lai atsɛ lɛ,” ekɛɛ akɛ: “Mɔ mli ni su tsakemɔ kɛ tsɔ̃mɔ susuma [loo, “hɔ̃ɔŋ ni tsakeɔ,”NW] ko bɛ lɛ.” (Yakobo 1:17) Yehowa tsakeee, ni anyɛɔ akɛ he fɔ̃ɔ enɔ yɛ nibii bibii kwraa lɛ po amli. “Anɔkwa Mawu” ji lɛ.—5 Mose 32:4.
2. (a) Mɛni hewɔ esa akɛ wɔpɛi wɔ diɛŋtsɛ wɔmli wɔkwɛ akɛ wɔyeɔ anɔkwa lo lɛ? (b) Mɛɛ sanebimɔi ni kɔɔ anɔkwayeli he wɔbaasusu he?
2 Te Nyɔŋmɔ buɔ ejálɔi ni yeɔ anɔkwa lɛ ehaa tɛŋŋ? Ebuɔ amɛ taakɛ David bu amɛ lɛ pɛpɛɛpɛ, mɔ ni wie yɛ amɛhe akɛ: “Mihiŋmɛii aaakã shikpɔŋ lɛ nɔ anɔkwafoi lɛ ahe, koni amɛkɛ mi ahi shi; mɔ ni nyiɛɔ gbɛ ni ja nɔ lɛ, lɛ ji mɔ ni aaasɔmɔ mi.” (Lala 101:6) Hɛɛ, Yehowa náa anɔkwa ní etsuji yeɔ lɛ he miishɛɛ. Yiŋtoo kpakpa ko hewɔ lɛ, bɔfo Paulo ŋma akɛ: “[Nɔ] ni ataoɔ yɛ tsuji nukpai lɛ adɛŋ ji akɛ, ana amɛteŋ mɔ fɛɛ mɔ akɛ anɔkwafo.” (1 Korintobii 4:2) Mɛni anɔkwa ni aaaye lɛ biɔ? Mɛɛ shihilɛ mli nifeemɔi amli ebiɔ ni wɔye anɔkwa? Mɛɛ sɛɛ ‘mɛi ni nyiɛɔ gbɛ ni ja nɔ’ lɛ náa?
Nɔ ni Anɔkwa ní Aaaye lɛ Tsɔɔ
3. Mɛni baaha ana akɛ wɔyeɔ anɔkwa?
3 Hebribii 3:5 kɛɔ akɛ: ‘Mose ye anɔkwa ákɛ sɔɔlɔ.’ Mɛni ha gbalɔ Mose bafee anɔkwafo? Beni atoɔ kpeebuu lɛ he gbɛjianɔ ní amaa lɛ, “Mose fee bɔ ni Yehowa fã lɛ fɛɛ, nakai efee.” (2 Mose 40: 16) Ákɛ Yehowa jálɔi lɛ, wɔtsɔɔ toiboo ni wɔfeɔ kɛsɔmɔɔ lɛ lɛ nɔ wɔtsɔɔ akɛ wɔyeɔ anɔkwa. Nɔ ni fata enɛ he ji Yehowa ni wɔɔya nɔ wɔsɔmɔ lɛ yɛ anɔkwale mli, be mli ni wɔkɛ kaai loo amanehului ni mli wawai kpeɔ lɛ. Shi kɛlɛ, kaai ni mli wawai anaa ni wɔdamɔɔ yɛ omanyeyeli mli lɛ jeee nɔ titri ni tsɔɔ akɛ wɔyeɔ anɔkwa. Yesu Kristo wie akɛ: “Mɔ ni yeɔ nɔ ko bibioo mli anɔkwa lɛ, eyeɔ babaoo hu mli anɔkwa; ni mɔ ni yeee nɔ ko bibioo mli anɔkwa lɛ, eyeee babaoo hu mli anɔkwa.” (Luka 16:10) Esa akɛ wɔye anɔkwa yɛ saji ni abuɔ akɛ amɛhe ehiaaa tsɔ lɛ po amli.
4, 5. Mɛni “nɔ ko bibioo” mli anɔkwa ni wɔɔye lɛ baaha ana?
4 Yɛ yiŋtoi enyɔ komɛi ahewɔ lɛ, ehe miihia ni wɔfee toiboo be fɛɛ be yɛ “nɔ ko bibioo” mli. Klɛŋklɛŋ lɛ, nakai ni wɔfeɔ lɛ haa anaa bɔ ni wɔbuɔ jeŋ muu fɛɛ maŋtsɛ ni Yehowa ji lɛ wɔhaa. Susumɔ sane ni akɛka klɛŋklɛŋ adesai enyɔ ni ji Adam kɛ Hawa anɔkwayeli akwɛ lɛ he okwɛ. Sane ni akɛfɔ̃ amɛhiɛ lɛ jeee taomɔ nii ni he nitsumɔ wa ni kɛ jatsu bafɔ̃ amɛnɔ. Be mli ni amɛyɔɔ hegbɛ akɛ amɛyeɔ niyenii fɛɛ ni yɔɔ Eden trom lɛ mli lɛ eko lɛ, abi koni amɛkaye tso kome pɛ ni ji “ekpakpa kɛ efɔŋ lee tso lɛ” nɔ yibii lɛ eko. (1 Mose 2:16, 17) Kulɛ anɔkwa ni klɛŋklɛŋ adesai enyɔ lɛ aaaye kɛtsɔ nakai kitã ni he nitsumɔ waaa lɛ nɔ ní amɛaaye lɛ baatsɔɔ akɛ amɛfiɔ Yehowa nɔyeli lɛ sɛɛ. Yehowa gbɛtsɔɔmɔi lɛ ni wɔkɛaatsu nii yɛ wɔdaa gbi shihilɛ mli lɛ baatsɔɔ akɛ wɔfiɔ jeŋ muu fɛɛ maŋtsɛ ni Yehowa ji lɛ sɛɛ.
5 Nɔ ni ji enyɔ lɛ, bɔ ni wɔfeɔ wɔnii wɔhaa yɛ “nɔ ko bibioo” he lɛ tsɔɔ bɔ ni wɔbaafee wɔnii wɔha yɛ “nii babaoo hu” ni ji saji ni mli wawai ni wɔkɛaakpe lɛ ahe. Yɛ enɛ gbɛfaŋ lɛ, susumɔ nɔ ni ba Daniel kɛ enanemɛi Hebribii anɔkwafoi etɛ ni ji Hanania, Mishael, kɛ Azaria anɔ lɛ he okwɛ. Aŋɔ amɛ nom kɛtee Babilon yɛ afi 607 D.Ŋ.B. Akɛ anɔkwafoi ejwɛ nɛɛ ní amɛdarako ní ekolɛ amɛji oblahii bibii lɛ tee Maŋtsɛ Nebukadnezar we lɛ. Jɛmɛ ji he ni ato ‘akɛ aha amɛ amɛdaa ŋmaa kɛjɛ maŋtsɛ lɛ diɛŋtsɛ niyenii kɛ ewein ní enuɔ lɛ mli; ní alɛ̀ amɛ afii etɛ, ní no sɛɛ ní amɛbadamɔ maŋtsɛ lɛ hiɛ.’—Daniel 1:3-5.
6. Mɛɛ kaa Daniel kɛ enanemɛi Hebribii etɛ lɛ kɛkpe yɛ Babilon maŋtsɛwe lɛ?
6 Shi kɛlɛ, Babilon maŋtsɛ lɛ okpɔlɔ nɔ niyenii lɛ bafee kaa kɛha Hebribii oblahii ejwɛ lɛ. Ekolɛ, niyenii ni Mose Mla lɛ guɔ eyeli lɛ ekomɛi fata maŋtsɛ okpɔlɔ nɔ niyenii ni ŋɔɔŋɔi lɛ ahe. (5 Mose 14:3-20) Ekolɛ, afɔseee kooloi ni agbeɔ kɛhoɔ nii lɛ alá ashwieee shi jogbaŋŋ, ni looi ni tamɔ nɛkɛ ni amɛaaye lɛ baaha amɛku Nyɔŋmɔ Mla mli. (5 Mose 12:23-25) Eeenyɛ eba lɛ hu akɛ, ajɔɔ niyenii lɛ anɔ ahaa wɔji, taakɛ wɔŋjalɔi ni yɔɔ Babilon lɛ fɔɔ feemɔ dani amɛyeɔ nii kutuu lɛ.
7. Mɛni toiboo ni Daniel kɛ enanemɛi etɛ lɛ fee lɛ tsɔɔ?
7 Ŋwanejee ko bɛ he akɛ odehei ni yɔɔ Babilon maŋtsɛwe lɛ kɛ hiɛdɔɔ susuuu niyenii ni mɔ tsĩɔ ehe naa akɛ eeeye lɛ he. Shi kɛlɛ, Daniel kɛ enanemɛi lɛ tswa amɛfai shi yɛ amɛtsui mli akɛ, amɛyeŋ niyenii ni Nyɔŋmɔ Mla ni ekɛha Israel lɛ egu eyeli lɛ eko ní amɛkɛwo amɛhe muji. Enɛ ji sane ko ni kɔɔ anɔkwa ni amɛyeɔ Nyɔŋmɔ lɛ he. No hewɔ lɛ, amɛbi koni aha amɛ shwiebaa kɛ nu akɛ amɛ niyenii, ni afee nakai aha amɛ. (Daniel 1:9-14) Ekolɛ mɛi komɛi ni yɔɔ ŋmɛnɛ lɛ baabu nɔ ni oblahii ejwɛ lɛ fee lɛ akɛ nɔ ko ni he ehiaaa. Shi kɛlɛ, toiboo ni amɛfee amɛha Nyɔŋmɔ lɛ tsɔɔ mɔ ni sɛɛ amɛfiɔ yɛ sane ni kɔɔ jeŋ muu fɛɛ maŋtsɛ ni Yehowa ji lɛ mli.
8. (a) Mɛɛ anɔkwayeli he kaa ni mli wa Hebribii etɛ lɛ kɛkpe? (b) Mɛni jɛ kaa lɛ mli kɛba, ni mɛni nɔ mi enɛ maa?
8 Anɔkwa ni Daniel nanemɛi etɛ lɛ ye yɛ nibii bibii ni ekolɛ abuuu akɛ amɛhe hiaa lɛ mli lɛ ye bua amɛ ni amɛnyɛ amɛdamɔ kaa ni mli wa ko naa. Gbelemɔ o-Biblia lɛ kɛya Daniel yitso 3, koni bo diɛŋtsɛ okane bɔ ni abu Hebribii etɛ lɛ gbele fɔ yɛ shika amaga ni Maŋtsɛ Nebukadnezar fee kɛma shi lɛ ní amɛkpoo akɛ amɛaajá lɛ hewɔ. Beni akɛ amɛ yadamɔ maŋtsɛ lɛ hiɛ lɛ, amɛkɛ ekãa ha ale amɛfai shi ní amɛtswa lɛ, amɛkɛɛ akɛ: “Kɛji nakai lɛ, wɔ-Nyɔŋmɔ lɛ ní wɔsɔmɔɔ lɛ aaanyɛ ajie wɔ yɛ la kɛ flɔnɔɔ ní tsoɔ grigri lɛ mli, ni eeejie wɔ yɛ odɛŋ, maŋtsɛ. Shi kɛ́ jeee nakai hu lɛ, maŋtsɛ, ná ole akɛ wɔsɔmɔŋ onyɔŋmɔi lɛ, ni wɔjáŋ shika amaga ní okɛma shi lɛ.” (Daniel 3:17, 18) Ani Yehowa jie amɛ? Bulɔi ni shɛrɛ amɛ ashwie flɔnɔɔ lɛ mli lɛ ahiɛ kpatã, shi Hebribii anɔkwafoi lɛ je kpo hiɛkãlɔi ní amɛ he ko kwraa eshãko! Anɔkwa ní no mli lɛ amɛyeɔ yɛ nibii bibii amli lɛ ye ebua amɛ ni amɛye anɔkwa yɛ nakai kaa ni mli wa lɛ mli. Ani enɛ emaaa bɔ ni ehe hiaa akɛ wɔɔye anɔkwa yɛ nibii bibii amli lɛ nɔ mi?
Anɔkwayeli yɛ “Kutumpɔo Mamona” kɛ Nitsumɔ Mli
9. Mɛni he Yesu wieɔ beni ewie sane ni yɔɔ Luka 16:10 lɛ?
9 Dani Yesu aaatsĩ shishitoo mla ni kɛɔ akɛ mɔ ni yeɔ nɔ ko bibioo mli anɔkwa lɛ, eyeɔ nii babaoo hu mli anɔkwa lɛ tã lɛ, ewo etoibolɔi lɛ aŋaa akɛ: “Nyɛŋɔa kutumpɔo mamona lɛ eko nyɛfea shieŋtsɛmɛi nyɛhaa nyɛhe, koni, beni nyɛbɛ nɔ ko dɔŋŋ lɛ, ni amɛhere nyɛ yɛ naanɔ buui lɛ amli.” Kɛkɛ ni ewie anɔkwa ni aaaye yɛ nɔ ko bibioo mli lɛ he. Yesu tee nɔ ewie akɛ: “No hewɔ lɛ, kɛ́ nyɛyeko kutumpɔo mamona lɛ po mli anɔkwa lɛ, nɔ ni ji anɔkwa lɛ, namɔ aaatuu no awo nyɛdɛŋ? . . . Wenuu ko nyɛŋ nuŋtsɔmɛi enyɔ asɔmɔ; ejaakɛ ekolɛ eeenyɛ̃ mɔ kome ni eeesumɔ mɔ kroko lɛ, aloo eeekpɛtɛ mɔ kome he, ni eeegbe mɔ kroko lɛ he guɔ. Nyɛnyɛŋ Nyɔŋmɔ kɛ mamona nyɛsɔmɔ.”—Luka 16:9-13.
10. Mɛɛ gbɛ nɔ wɔɔtsɔ wɔye anɔkwa yɛ “kutumpɔo mamona” lɛ kɛ nitsumɔ mli?
10 Taakɛ sane ni Yesu wieɔ he dani etsĩ nɔ ni aŋma yɛ Luka 16:10 lɛ tã lɛ tsɔɔ lɛ, “kutumpɔo mamona” ni ji ninámɔ loo nii ni wɔyɔɔ lɛ ní wɔɔye anɔkwa yɛ ekɛ nitsumɔ mli lɛ ji nɔ̃ titri he ni ewieɔ yɛ nakai be lɛ mli lɛ. Atsɛ́ɔ nibii nɛɛ ní shika ji emli nɔ̃ titri lɛ akɛ kutumpɔo mamona, akɛni adesai ni yeee emuu ji mɛi ni kwɛɔ nɔ lɛ hewɔ. Kɛfata he lɛ, ní mɔ aaashwe akɛ ená nii babaoo lɛ baanyɛ aha ekɛ ehe awo nifeemɔi gbohii amli. Wɔtsɔɔ akɛ wɔyeɔ anɔkwa kɛ́ wɔkɛ nii ni wɔyɔɔ lɛ tsu nii yɛ nilee mli. Yɛ nɔ najiaŋ ni wɔkɛaatsu nii yɛ pɛsɛmkunya gbɛ nɔ lɛ, wɔbaasumɔ ni wɔkɛtsu nii koni wɔkɛha Maŋtsɛyeli lɛ he nibii aya hiɛ, ni wɔkɛye wɔbua mɛi ni ehia amɛ lɛ hu. Kɛji akɛ wɔye anɔkwa yɛ nɛkɛ gbɛ nɔ lɛ, wɔbatsɔmɔɔ Yehowa Nyɔŋmɔ kɛ Yesu Kristo ni ji mɛi ni yɔɔ ‘naanɔ buui lɛ’ ananemɛi. Amɛbaahere wɔ amɛwo shihilɛhei nɛɛ, ni amɛbaaduro wɔ naanɔ wala yɛ ŋwɛi loo yɛ Paradeiso mli yɛ shikpɔŋ lɛ nɔ.
11. Mɛni hewɔ esaaa akɛ wɔshashaoɔ shi akɛ wɔɔha shiatsɛmɛi lɛ ale akɛ, wɔkpɛlɛɔ tooyeli ni ahaa kɛfĩɔ jeŋ muu fɛɛ nitsumɔ ni Yehowa Odasefoi tsuɔ lɛ sɛɛ lɛ?
11 Agbɛnɛ hu, susumɔ hegbɛ ni wɔhaa mɛi náa yɛ be mli ni wɔshiɛɔ Maŋtsɛyeli lɛ he sanekpakpa lɛ ní wɔhaa amɛ Biblia loo woji ni akɛkaseɔ Biblia, ní wɔgbálaa mli wɔhaa amɛ akɛ wɔkpɛlɛɔ oniatsumɔ ní akɛfĩɔ jeŋ muu fɛɛ nitsumɔ ni Yehowa webii tsuɔ lɛ sɛɛ lɛ he okwɛ. Ani enɛ jeee hegbɛ ni wɔhaa amɛ koni amɛkɛ nibii ni amɛyɔɔ lɛ atsu nii yɛ nilee mli? Eyɛ mli akɛ sane ni yɔɔ Luka 16:10 lɛ kɔɔ bɔ ni akɛ heloonaa nibii tsuɔ nii ahaa lɛ he titri moŋ, shi anɔkwale ni yɔɔ nakai sane lɛ mli lɛ kɔɔ shihilɛ mli nifeemɔi krokomɛi hu ahe.
Anɔkwayeli He Miihia Diɛŋtsɛ
12, 13. Mɛɛ nifeemɔi amli nɛkɛ wɔbaanyɛ wɔye anɔkwa yɛ?
12 Bɔfo Paulo ŋma akɛ: “Wɔhiɛ kã nɔ akɛ wɔyɛ henilee kpakpa, ni wɔmiitao akɛ wɔba wɔjeŋ fɛfɛo yɛ nii fɛɛ mli.” (Hebribii 13:18) Ekã shi faŋŋ akɛ saji fɛɛ ni kɔɔ shika he lɛ fata “nii fɛɛ” ní awieɔ he lɛ ahe. Wɔjɛɔ anɔkwayeli mli wɔwoɔ wɔnyɔji kɛ too srɔtoi fɛɛ yɛ be naa. Mɛni hewɔ? Wɔfeɔ nakai yɛ wɔhenilee kɛ titri lɛ, suɔmɔ ni wɔyɔɔ kɛha Nyɔŋmɔ kɛ toiboo ni wɔfeɔ wɔhaa egbɛtsɔɔmɔi lɛ ahewɔ. (Romabii 13:5, 6) Kɛ́ wɔna mɔ ko nɔ ko kã shi ni jeee wɔnɔ lɛ, mɛni wɔfeɔ? Wɔbɔɔ mɔdɛŋ wɔtaoɔ nɔtsɛ ni wɔkɛ enii yahãa lɛ. Kɛ́ wɔgbala mli wɔtsɔɔ nɔ hewɔ ni wɔkɛ nɔtsɛ nii yaha lɛ lɛ, kwɛ odaseyeli ni hi jogbaŋŋ ni enɛ aaaji!
13 Anɔkwa ni wɔɔye yɛ nibii fɛɛ mli lɛ biɔ koni wɔye anɔkwa yɛ he ni wɔtsuɔ nii yɛ lɛ hu. Bɔ ni esa akɛ wɔtsu nii wɔha ní wɔfeɔ nakai pɛpɛɛpɛ lɛ gbalaa mɛi ajwɛŋmɔ kɛbaa Nyɔŋmɔ ni wɔjáa lɛ lɛ nɔ. “Wɔjuuu” nitsumɔ be kɛfee nɔ kroko, ni wɔfeee anihao hu yɛ nitsumɔ mli. Yɛ no najiaŋ lɛ, wɔtsuɔ nii waa tamɔ wɔmiitsu wɔmiiha Yehowa. (Efesobii 4:28; Kolosebii 3:23) Akɔntaabuu tsɔɔ akɛ, yɛ Europa maŋ ko mli lɛ, nitsulɔi ní kɛ woji yatsɔɔ amɛ nitsumɔtsɛmɛi akɛ amɛdatrɛfoi kɛɛ aha amɛjɔɔ amɛhe fioo yɛ shia yɛ amɛhe ni yeɔ hewɔ lɛ amlijaa etɛ mli ekome tsɔɔ gbɛ fɔŋ nɔ amɛnine shɛɔ woji nɛɛ anɔ. Nyɔŋmɔ tsuji anɔkwafoi taooo nɔ ko kɛjieee amɛnaa koni amɛkaya nitsumɔ. Yɛ bei komɛi amli lɛ, anɔkwa ni Yehowa Odasefoi yeɔ kɛ bɔ ni amɛtsuɔ nii waa amɛhaa lɛ haa nitsumɔtsɛmɛi holeɔ amɛnɔ yɛ amɛnitsumɔi amli.—Abɛi 10:4.
Anɔkwayeli yɛ wɔ-Kristofoi Ashiɛmɔ Nitsumɔ lɛ Mli
14, 15. Mɛɛ gbɛ̀i komɛi anɔ wɔɔtsɔ wɔtsɔɔ akɛ wɔyeɔ anɔkwa yɛ Kristofoi ashiɛmɔ nitsumɔ lɛ mli?
14 Mɛɛ gbɛ nɔ wɔtsɔɔ wɔyeɔ anɔkwa yɛ shiɛmɔ nitsumɔ ni akɛwo wɔdɛŋ lɛ mli? Biblia lɛ kɛɔ akɛ: “[Nyɛhaa] wɔkɛ yijiemɔ afɔle abahaa Nyɔŋmɔ daa; no ji naabui ní jajeɔ egbɛi lɛ ayibii lɛ.” (Hebribii 13:15) Gbɛ titri ni wɔtsɔɔ nɔ wɔyeɔ anɔkwa yɛ shiɛmɔ nitsumɔ lɛ mli ji wɔhe ni wɔkɛaawo mli daa. Mɛni hewɔ esa ni wɔha nyɔŋ ko aho ni wɔyeee Yehowa kɛ eyiŋtoi ahe odase wɔtsɔɔɔ mɔ ko? Wɔhe ni wɔkɛwoɔ shiɛmɔ nitsumɔ lɛ mli daa lɛ yeɔ ebuaa wɔ hu ni hesaai ni wɔyɔɔ lɛ yaa hiɛ, ni wɔnitsumɔ lɛ hu mɔɔ shi.
15 Nifeemɔ kroko ní wɔɔtsɔ nɔ wɔtsɔɔ akɛ wɔyeɔ anɔkwa yɛ wɔshiɛmɔ nitsumɔ lɛ mli ji ŋaawoi ni akɛhaa yɛ Buu-Mɔɔ kɛ Wɔ Maŋtsɛyeli Sɔɔmɔ lɛ amli lɛ ní wɔkɛaatsu nii. Kɛ́ wɔsaa wɔhe ni wɔkɛ shiɛmɔ wiemɔi ni akɛha loo ekrokomɛi ni abaanyɛ akɛtsu nii lɛ tsu nii lɛ, ani wɔnaaa akɛ ehaa wɔsɔɔmɔ nitsumɔ lɛ woɔ yibii babaoo? Kɛ́ mɔ ko jie miishɛɛ kpo yɛ Maŋtsɛyeli sanekpakpa lɛ he lɛ, ani wɔkuɔ wɔsɛɛ wɔyasara nakai mɔ lɛ ekoŋŋ yɛ be kukuoo mli? Ni shia Biblia mli nikasemɔi ni wɔkɛ mɛi ni yɔɔ wiemɔ lɛ he miishɛɛ lɛ jeɔ shishi lɛ hu? Ani nikaselɔi lɛ nyɛɔ amɛkɛ amɛhe fɔ̃ɔ wɔnɔ yɛ efeemɔ mli, ni wɔkɛ amɛ yafeɔ nikasemɔ lɛ daa yɛ anɔkwayeli mli? Kɛ́ wɔye anɔkwa yɛ shiɛmɔ nitsumɔ lɛ mli lɛ, no baanyɛ aha ahere wɔ kɛ mɛi ni boɔ wɔ toi lɛ fɛɛ yiwala.—1 Timoteo 4:15, 16.
Ní Wɔɔya Nɔ Wɔhi Shi akɛ Mɛi ni Jɛɛɛ Je lɛ Mli
16, 17. Mɛɛ gbɛ̀i anɔ wɔɔtsɔ wɔtsɔɔ akɛ wɔjɛɛɛ je lɛ mli?
16 Beni Yesu sɔleɔ ehaa Nyɔŋmɔ lɛ, ewie ekaselɔi lɛ ahe akɛ: “Miŋɔ owiemɔ lɛ miha amɛ, ni je lɛ miinyɛ̃ amɛ, ejaakɛ amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ. Mibiii akɛ ojie amɛ kɛjɛ je lɛ mli, shi moŋ akɛ obu amɛhe yɛ efɔŋ lɛ mli. Amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ.” (Yohane 17:14-16) Ekolɛ wɔkɛ shiŋŋfeemɔ kɛ faishitswaa baatsi wɔhe kɛjɛ je lɛ he yɛ saji ni yɔɔ hiɛdɔɔ tamɔ wɔhe ni wɔkɛwooo maŋ saji amli, jamɔŋ gbijurɔyelii, kusum nifeemɔi kɛ jeŋba shara amli nɛkɛ lɛ amli. Ni yɛ nibii bibii agbɛfaŋ hu? Ani ekolɛ je lɛŋ nifeemɔi komɛi miiná wɔnɔ hewalɛ ní wɔleee? Ákɛ nɔkwɛmɔnɔ lɛ, kɛ wɔkwɛɛɛ wɔhe nɔ jogbaŋŋ lɛ, no lɛ ewaŋ kwraa akɛ wɔɔsaa wɔhe yɛ gbɛ ni bulɛ bɛ mli ni asaŋ ebɛ hiŋmɛi nɔ hu lɛ nɔ! Anɔkwa ni wɔɔye yɛ atadewoo kɛ hesaamɔ mli lɛ biɔ ni wɔkɛ “hiɛ ni gboɔ nɔ̃ kɛ jwɛŋmɔ ni sa” asaa wɔhe. (1 Timoteo 2:9, 10) Hɛɛ, “wɔtooo mɔ ko mɔ ko pampi yɛ nɔ ko nɔ ko mli, koni akagbe sɔɔmɔ lɛ he guɔ; shi moŋ, nɔ fɛɛ nɔ mli lɛ wɔkɛ wɔhe tsɔɔ akɛ Nyɔŋmɔ sɔɔlɔi.”—2 Korintobii 6:3, 4.
17 Akɛni wɔmiisumɔ ni wɔkɛ woo aha Yehowa hewɔ lɛ, wɔsaa wɔhe jogbaŋŋ kɛyaa asafoŋ kpeei ashishi. Yiŋtoo nɛɛ nɔŋŋ hewɔ wɔsaa wɔhe kɛyaa kpeei bibii kɛ kpeei wuji ashishi hu lɛ. Esa akɛ wɔ atadei lɛ afee nɔ ni sa ni yɔɔ hiŋmɛi nɔ. Enɛ bafeɔ odaseyeli kɛhaa mɛi ni naa wɔ lɛ. Ŋwɛibɔfoi lɛ po naa nitsumɔ ni wɔtsuɔ lɛ, taakɛ amɛna Paulo kɛ enanemɛi Kristofoi lɛ anitsumɔ lɛ. (1 Korintobii 4:9) Yɛ anɔkwale mli lɛ, esa akɛ wɔwo atadei ni yɔɔ hiŋmɛi nɔ be fɛɛ be. Kɛha mɛi komɛi lɛ, anɔkwa ni ayeɔ yɛ atadewoo mli lɛ he ehiaaa tsɔ̃, shi yɛ Nyɔŋmɔ hiɛ lɛ, eji nɔ ko ni he hiaa.
Sɛɛnamɔi ni Jɛɔ Anɔkwayeli Mli Kɛbaa
18, 19. Mɛɛ sɛɛnamɔi jɛɔ anɔkwayeli mli kɛbaa?
18 Awieɔ anɔkwa Kristofoi ahe akɛ amɛji “Nyɔŋmɔ duromɔ nii srɔtoi lɛ anɔkwɛlɔi kpakpai.” Ni no hewɔ lɛ, ‘hewalɛ ni Nyɔŋmɔ duroɔ amɛ lɛ mli amɛjɛɔ’ amɛsɔmɔɔ. (1 Petro 4:10, 11) Kɛfata he lɛ, ákɛ tsuji lɛ, atuu nibii komɛi ni jeee wɔdiɛŋtsɛ wɔ nɔ̃ awo wɔdɛŋ, ni nomɛi ji Nyɔŋmɔ duromɔ nii ní shiɛmɔ nitsumɔ lɛ hu fata he lɛ. Wɔtsɔɔ wɔhe ni wɔkɛfɔ̃ɔ hewalɛ ni Nyɔŋmɔ kɛhaa, ni ji “hewalɛ ní fá kɛteke nɔ” lɛ nɔ wɔtsɔɔ akɛ wɔji tsuji kpakpai. (2 Korintobii 4:7) Kwɛ bɔ ni enɛ feemɔ sáa wɔ jogbaŋŋ ehaa koni wɔnyɛ wɔdamɔ kaa fɛɛ kaa ni wɔkɛaakpe wɔsɛɛ lɛ naa!
19 Lalatsɛ lɛ lá akɛ: “Nyɛsumɔa Yehowa, nyɛ mɛi fɛɛ ni nyɛ ji emɛi krɔŋkrɔŋi lɛ! Yehowa báa anɔkwafoi lɛ ayi.” (Lala 31:24) Nyɛhaa wɔtswaa wɔfai shi akɛ wɔbaaye anɔkwa, ni wɔna nɔmimaa akɛ Yehowa “ji gbɔmɛi fɛɛ ayiwalaherelɔ, titri lɛ mɛi ni heɔ yeɔ [loo, “anɔkwafoi,” NW] lɛ.”—1 Timoteo 4:10.
Ani Okaiɔ?
• Mɛni hewɔ esa akɛ wɔye “nɔ ko bibioo mli anɔkwa” lɛ?
• Mɛɛ gbɛ nɔ wɔɔtsɔ wɔɔtsɔɔ akɛ wɔyeɔ anɔkwa
yɛ saji ni kɔɔ anɔkwayeli he lɛ amli?
yɛ shiɛmɔ nitsumɔ lɛ mli?
yɛ wɔhe ni wɔtsiɔ kɛjɛɔ je lɛ he lɛ mli?
[Nikasemɔ lɛ he Sanebimɔi]
[Mfoniri ni yɔɔ baafa 26]
Mɔ ni yeɔ nɔ ko bibioo mli anɔkwa lɛ, eyeɔ babaoo hu mli anɔkwa
[Mfoniri ni yɔɔ baafa 29]
‘Nyɛbaa nyɛjeŋ fɛfɛo yɛ nii fɛɛ mli’
[Mfoniri ni yɔɔ baafa 29]
Wɔhe ni wɔɔsaa jogbaŋŋ kɛha shiɛmɔ nitsumɔ lɛ ji gbɛ ni hi jogbaŋŋ ni wɔɔtsɔ nɔ wɔtsɔɔ akɛ wɔyeɔ anɔkwa
[Mfoniri ni yɔɔ baafa 30]
Ha otadewoo kɛ ohesaamɔ afee nɔ ni yɔɔ hiŋmɛi nɔ