“Hiɛtɛlɔ Leɔ Enanenaa Kwɛmɔ”

HIƐTƐLƆ ji mɔ ko ni kɛ ŋaa tsuɔ nii, ní eyɔɔ jwɛŋmɔ hu, ni eji mɔ ko ni nyɛɔ eŋmɛɔ saji yɛ gbɛ ni ja nɔ, ehiɛ kã shi, ele nii, ehiɛ tserɛɔ lɛ, ni ekɔɔ sane sɛɛ hu. Ejeee shishiulɔ loo mɔ ko ni tsɔ̃ɔ ŋai fɔji. Abɛi 13:16 kɛɔ akɛ: “Hiɛtɛlɔ fɛɛ hiɛtɛlɔ feɔ enii [yɛ] nilee mli.” Hɛɛ, hiɛtɛ̃ɛ ní akɛtsuɔ nii lɛ ji su ko ni asumɔɔ jogbaŋŋ.

Mɛɛ gbɛ nɔ wɔɔtsɔ wɔkɛ hiɛtɛ̃ɛ atsu nii yɛ wɔdaa gbi shihilɛ mli? Mɛɛ gbɛ nɔ su nɛɛ jeɔ kpo yɛ wɔyiŋkpɛi amli, yɛ bɔ ni wɔkɛ mɛi krokomɛi yeɔ haa kɛ bɔ ni wɔfeɔ wɔnii yɛ shihilɛi srɔtoi ni wɔkɛkpeɔ lɛ ahe wɔhaa lɛ amli? Mɛɛ sɛɛ mɛi ni kɛ hiɛtɛ̃ɛ tsuɔ nii lɛ náa? Mɛɛ osharai amɛtsiɔ amɛhe kɛjɛɔ he? Maŋtsɛ Salomo ni hi shi yɛ blema Israel lɛ kɛ sanebimɔi nɛɛ ahetooi diɛŋtsɛ haa taakɛ wɔkaneɔ yɛ Abɛi 14:12-25 lɛ. *

Kɔ Gbɛ ni Nilee Yɔɔ Mli

Yɛ anɔkwale mli lɛ, ákɛ mɔ aaakpɛ eyiŋ yɛ nilee mli ni eye omanye hu yɛ shihilɛ mli lɛ biɔ ní ele ekpakpa kɛ efɔŋ mlikpamɔ. Shi kɛlɛ, Biblia lɛ bɔɔ kɔkɔ akɛ: “Gbɛ ko yɛ ni ja yɛ gbɔmɔ hiɛ; shi enaagbee lɛ gbele gbɛ̀i ni.” (Abɛi 14:12) Enɛ hewɔ lɛ, esa akɛ wɔle srɔtofeemɔ ni yɔɔ nifeemɔi ni ja kɛ nifeemɔi ni etamɔ nɔ ni tɔmɔ ko bɛ he lɛ teŋ. Wiemɔ ni ji “gbele gbɛ̀i” lɛ tsɔɔ akɛ lakamɔ gbɛ̀i nɛɛ fa pii. Susumɔ shihilɛ mli nifeemɔi komɛi ni ebaabi ni wɔkwɛ wɔhe nɔ jogbaŋŋ ni wɔtsi wɔhe kɛjɛ he lɛ ahe okwɛ.

Bei pii lɛ, abuɔ niiatsɛmɛi kɛ mɛi ni ehe gbɛi yɛ je lɛŋ lɛ akɛ mɛi ni bulɛ yɔɔ amɛhe ní sa woo hu. Hiɛyaa ni amɛná yɛ shihilɛ mli kɛ shika babaoo ni amɛyɔɔ lɛ baanyɛ aha mɔ asusu ákɛ gbɛ̀i anɔ ni amɛtsɔɔ amɛfeɔ nii lɛ ja. Shi mɛni abaanyɛ awie yɛ gbɛ̀i anɔ ni aŋkroaŋkroi ni tamɔ nɛkɛ lɛ ateŋ mɛi babaoo tsɔɔ amɛnáa nii loo amɛheɔ gbɛi lɛ ahe? Ani amɛtsɔɔ gbɛ̀i ni ja nɔ be fɛɛ be amɛfeɔ nii, ni asaŋ ani amɛbaa amɛjeŋ jogbaŋŋ? Agbɛnɛ hu, aŋkroaŋkroi komɛi yɛ ni kɛ ekãa ni sa jogbaŋŋ tsuɔ nibii ni amɛheɔ amɛyeɔ yɛ jamɔ ni amɛyɔɔ mli lɛ he lɛ ahe nii. Shi ani nibii ni amɛheɔ amɛyeɔ lɛ anaa ní amɛhiɔ shi yɛ pɛpɛɛpɛ lɛ tsɔɔ akɛ nibii ni amɛheɔ amɛyeɔ lɛ ja?—Romabii 10:2, 3.

Wɔ diɛŋtsɛ hu wɔbaanyɛ wɔlaka wɔhe ní wɔsusu akɛ gbɛ ko ni wɔtaoɔ wɔkɔ lɛ ja. Kɛ́ nibii ni wɔ diɛŋtsɛ wɔsusuɔ akɛ eja lɛ amli wɔjɛɔ wɔkpɛɔ wɔyiŋ lɛ, no lɛ etamɔ nɔ ni wɔmiiha wɔtsui ní lakaa mɔ lɛ miikudɔ wɔ. (Yeremia 17:9) Henilee ni atsɔseko lɛ jogbaŋŋ lɛ hu baanyɛ aha wɔsusu akɛ tɔmɔ ko bɛ gbɛ ni ejaaa lɛ he. Belɛ, mɛni baaye abua wɔ ni wɔkɔ gbɛ ni ja?

Kɛ́ “wɔhenumɔ nii lɛ” baanyɛ “ale ekpakpa kɛ efɔŋ mlikpamɔ” lɛ, no lɛ esa akɛ wɔfee mɛi ni kɛ hiɛdɔɔ kaseɔ Nyɔŋmɔ Wiemɔ lɛ mli anɔkwalei ní mli kwɔlɔ lɛ ákɛ aŋkroaŋkroi. Kɛfata he lɛ, esa akɛ wɔtsɔse wɔhenumɔ nii nɛɛ kɛtsɔ Biblia shishitoo mlai ni ‘wɔkɛaafɔ nitsumɔ’ lɛ nɔ. (Hebribii 5:14) Esa akɛ wɔkwɛ wɔhe nɔ jogbaŋŋ ni wɔkaha gbɛ ko ni wɔsusuɔ akɛ eja lɛ miiha wɔkpalaŋ kɛjɛ ‘gbɛ ni etsa ni kɛ mɔ yaa wala mli’ lɛ nɔ.—Mateo 7:13, 14.

Beni ‘Tsui Werɛ Eho Ehe’

Ani wɔmii baanyɛ ashɛ wɔhe kɛji wɔbɛ jwɛŋmɔŋ toiŋjɔlɛ? Ani ŋmɔlɔ kɛ miishɛɛnamɔ jieɔ dɔlɛ ni hɔ mɔ tsuiŋ lɛ kɛyaa? Ani nilee yɛ mli  akɛ aaanu dãa ni wa loo akɔlɔ tsofai yɛ gbɛ fɔŋ nɔ kɛ yiŋtoo ákɛ akɛmiiba nɔnyɛɛ henumɔi ashi, loo ní abɔ mɔdɛŋ akɛ aaaye henumɔi nɛɛ anɔ kɛtsɔ jeŋba shara ko mli ní akɛ he aaawo lɛ nɔ? Hetoo lɛ ji dabi. Maŋtsɛ nilelɔ lɛ kɛɛ akɛ: “Tsui werɛ hoɔ ehe” yɛ “ŋmɔlɔ mli tete.”—Abɛi 14:13a.

Ŋmɔlɔ baanyɛ atsĩ dɔlɛ ni yɔɔ mɔ mli lɛ nɔ, shi enyɛŋ ejie kɛjɛ emli. Biblia lɛ kɛɔ akɛ: “Nɔ fɛɛ nɔ yɛ ebe ní ato.” Hɛɛ, “yaafo be yɛ, ni ŋmɔlɔ be yɛ; yarafeemɔ be yɛ, ni joo be yɛ.” (Jajelɔ 3:1, 4) Kɛ́ nɔnyɛɛ fɔɔ wɔnáa gbamɔ lɛ, esa akɛ wɔtao gbɛ̀i anɔ ni wɔɔtsɔ wɔye nɔ kunim, ní kɛ́ ebaahi lɛ wɔbi ‘ŋaawoo.’ (Abɛi 24:6) * Ŋmɔlɔ kɛ miishɛɛnamɔ ahe yɛ sɛɛnamɔ, shi amɛhe sɛɛnamɔ faaa tsɔ̃. Beni Salomo bɔɔ kɔkɔ yɛ he ní akɛwoɔ miishɛɛnamɔi ni esaaa lɛ amli kɛ hiɛtserɛ ni ajieɔ fe nine lɛ ahe lɛ, ekɛɛ akɛ: “Miishɛɛ naagbee ji tsuiyeli.”—Abɛi 14:13b.

Mɔ ni Bɛ Hemɔkɛyeli kɛ Mɔ Kpakpa Fɛɛ Amii Shɛɔ Amɛhe yɛ Mɛɛ Gbɛ Nɔ?

Israel maŋtsɛ lɛ tsa nɔ akɛ: “Mɔ ni kpaleɔ yɛ etsui mli [“mɔ ni bɛ hemɔkɛyeli,” NW] lɛ, lɛ diɛŋtsɛ egbɛ̀i lɛ aaashɛ enaa; shi gbɔmɔ kpakpa lɛ, emii aaashɛ ehe yɛ lɛ diɛŋtsɛ emli.” (Abɛi 14:14) Mɔ ni bɛ hemɔkɛyeli kɛ gbɔmɔ kpakpa fɛɛ amii shɛɔ nibii ni jɛɔ amɛnifeemɔi amli kɛbaa lɛ ahe yɛ mɛɛ gbɛ nɔ?

Ejeee mɔ ni bɛ hemɔkɛyeli lɛ he sane ko ákɛ ebaabu ehe akɔntaa eha Nyɔŋmɔ. No hewɔ lɛ, kɛha mɔ ni bɛ hemɔkɛyeli lɛ, sɛɛnamɔ ko bɛ nibii ni sa Yehowa hiɛ ni abaafee lɛ he. (1 Petro 4:3-5) Gbɔmɔ ni tamɔ nɛkɛ lɛ mii shɛɔ ninámɔ sɛɛ ní ediɔ yɛ shihilɛ mli lɛ he. (Lala 144:11-15a) Shi esoro gbɔmɔ kpakpa lɛ, ejaakɛ nɔ ni kã etsui nɔ ji ní efee nibii ni sa Nyɔŋmɔ hiɛ. Ekɛ ehe kpɛtɛɔ Nyɔŋmɔ jalɛ tɛi ni efolɔ eshwie shi lɛ ahe yɛ enifeemɔi fɛɛ amli. Mɔ ni tamɔ nɛkɛ lɛ mii shɛɔ nibii ni jɛɔ enifeemɔi amli kɛbaa lɛ ahe ejaakɛ Yehowa ji e-Nyɔŋmɔ, ni anyɛŋ akɛ nɔ ko ato miishɛɛ ni enáa kɛjɛɔ Ŋwɛi Flooflonyo ní esɔmɔɔ lɛ lɛ mli lɛ he.—Lala 144:15b.

Kaahe ‘Wiemɔ Fɛɛ Wiemɔ Oye’

Beni Salomo tsɔɔ srɔtofeemɔ ni yɔɔ mɔ ni náko jwɛŋmɔ kɛ hiɛtɛlɔ nifeemɔi amli lɛ, ekɛɛ akɛ: “Mɔ ni náko jwɛŋmɔ lɛ, eheɔ wiemɔ fɛɛ wiemɔ eyeɔ; shi hiɛtɛlɔ leɔ enanenaa kwɛmɔ.”  (Abɛi 14:15) Hiɛtɛlɔ hiɛ tserɛɔ lɛ. Jeee nɔ fɛɛ nɔ kɛkɛ ni enuɔ lɛ eheɔ eyeɔ, ni ehaaa mɛi krokomɛi hu akpɛ yiŋ aha lɛ, shi moŋ efamɔɔ enaji yɛ nilee mli. Epɛiɔ anɔkwalei fɛɛ ni yɔɔ saji ni enuɔ lɛ amli lɛ mli, ni enɛ haa ekɛ hiɛshikamɔ feɔ nii.

Ákɛ nɔkwɛmɔnɔ lɛ, susumɔ sanebimɔ ni ji “Ani Nyɔŋmɔ yɛ?” lɛ he okwɛ. Mɔ ni náko jwɛŋmɔ lɛ baakpɛlɛ hetoo ni mɛi babaoo fɔɔ kɛhamɔ loo nɔ ni mɛi ni ale amɛ waa lɛ heɔ amɛyeɔ lɛ nɔ. Nɔ ni tamɔɔɔ nakai lɛ, hiɛtɛlɔ heɔ be ekɛpɛiɔ sane lɛ mli jogbaŋŋ ekwɛɔ. Esusuɔ ŋmalɛi tamɔ Romabii 1:20 kɛ Hebribii 3:4 lɛ ahe jogbaŋŋ. Yɛ saji ni kɔɔ Nyɔŋmɔjamɔ he lɛ, nilelɔ ekpɛlɛɛɛ nɔ fɛɛ nɔ kɛkɛ ní jamɔŋ hiɛnyiɛlɔi kɛɔ lɛ nɔ. Shi moŋ ‘ekaa saji ni akɛɔ akɛ ejɛ mumɔŋ lɛ ekwɛɔ akɛ Nyɔŋmɔ mli ejɛ lo.’—1 Yohane 4:1.

Kwɛ bɔ ni nilee yɔɔ mli ákɛ wɔkɛ ŋaa ni awoɔ wɔ akɛ ‘wɔkahe wiemɔ fɛɛ wiemɔ wɔye’ lɛ aaatsu nii! Mɛi titri ni esa akɛ amɛkɛ ŋaawoo nɛɛ atsu nii ji mɛi ni sɔ̃ kã amɛnɔ akɛ amɛwo mɛi krokomɛi aŋaa yɛ Kristofoi asafo lɛ mli lɛ. Esa akɛ ŋaawolɔ lɛ ale sane ni eba lɛ mli fitsofitso. Esa akɛ ebo mɛi fɛɛ ni sane lɛ kɔɔ amɛhe lɛ atoi jogbaŋŋ, ni epɛi sane lɛ mli fitsofitso koni ekɛna emli anɔkwalei lɛ fɛɛ, bɔni afee ni ŋaawoo ni ekɛbaaha lɛ afee nɔ ni hi jogbaŋŋ, shi jeee nɔ ni edamɔ afã kome pɛ wiemɔi anɔ ekɛha.—Abɛi 18:13; 29:20.

“Mɔ ni Tsɔɔ Ŋai Fɔji lɛ, Anyɛ̃ɔ Lɛ”

Beni Israel maŋtsɛ lɛ tsɔɔ srɔtofeemɔ kroko ni yɔɔ nilelɔ kɛ kwashia teŋ lɛ, ekɛɛ akɛ: “Nilelɔ sheɔ ehe gbeyei, ni ejeɔ efɔŋ he; shi kwashia feɔ kakampuu ni ekɛ ehiɛ fɔ̃ɔ ehe nɔ. Mɔ ni mli etsɛɛɛ fumɔ lɛ, eyeɔ kwashiai asane, ni mɔ ni tsɔ̃ɔ ŋai fɔji lɛ, anyɛ̃ɔ lɛ.”—Abɛi 14:16, 17.

Nilelɔ tsiɔ ehe kɛjɛɔ gbɛ fɔŋ ni eeekɔ lɛ he yɛ nibii gbohii ni jɛɔ mli kɛbaa lɛ hewɔ. No hewɔ lɛ, eleɔ ehe nɔkwɛmɔ, ni ehiɛ sɔɔ ŋaawoi fɛɛ ni akɛhaa lɛ ní baaha etsi ehe kɛjɛ efɔŋfeemɔ he lɛ. Kwashia susuuu nibii gbohii ni baanyɛ ajɛ egbɛ fɔŋ lɛ mli aba lɛ ahe. Akɛni kwashia kɛ ehe fɔ̃ɔ ehe nɔ hewɔ lɛ, ekɛ henɔwomɔ kpooɔ ŋaawoi ní mɛi kɛhaa lɛ lɛ. Akɛni gbɔmɔ ni tamɔ nɛkɛ lɛ feɔ kakampuu loo emli etsɛɛɛ fumɔ hewɔ lɛ, eyeɔ kwashiai asane.

Wiemɔ diɛŋtsɛ ni atsɔɔ shishi akɛ “mɔ ni tsɔ̃ɔ ŋai fɔji” lɛ hiɛ shishinumɔi srɔtoi enyɔ. Kɛ́ aawie nifeemɔi kpakpai ahe ni akɛ wiemɔ nɛɛ tsu nii yɛ mli lɛ, anyɛɔ akɛdamɔɔ shi kɛhaa sanesɛɛkɔmɔ loo hiɛshikamɔ. (Abɛi 1:4; 2:11; 3:21) Shi kɛ́ akɛtsu nii yɛ nifeemɔi gbohii agbɛfaŋ lɛ, nakai wiemɔ lɛ baanyɛ atsɔɔ susumɔi gbohii loo ŋai fɔji.—Lala 37:7; Abɛi 12:2; 24:8.

Kɛ́ wiemɔ diɛŋtsɛ ni akɛtsu nii lɛ kɔɔ “mɔ ni tsɔ̃ɔ ŋai fɔji” he lɛ, no lɛ ewaaa akɛ aaanu nɔ hewɔ ni anyɛ̃ɔ lɛ lɛ shishi. Shi kɛ́ nifeemɔ kpakpa he awieɔ ni akɛ nakai wiemɔ lɛ tsu nii lɛ, no lɛ te aaafee tɛŋŋ ní aaanyɛ̃ mɔ ko ni kɔɔ sane sɛɛ loo ekɛ hiɛshikamɔ tsuɔ nii lɛ hu? Ojogbaŋŋ, ani ejeee anɔkwale akɛ mɛi ni nyɛɛɛ sane sɛɛ akɔ lɛ baanyɛ aná nyɛ̃ɛ kɛha mɔ ni kɔɔ sane sɛɛ lɛ? Ákɛ nɔkwɛmɔnɔ lɛ, mɛi ni yɔɔ je lɛŋ lɛ nyɛ̃ɔ mɛi ni kɛ amɛjwɛŋmɔŋ nyɛmɔi tsuɔ nii ní ‘amɛtsiɔ amɛhe kɛjɛɔ je lɛ he’ lɛ. (Yohane 15:19) Ayeɔ Kristofoi oblahii kɛ oblayei ni kɛ hiɛshikamɔ tsuɔ nii kɛdamɔɔ tipɛŋfoi anɔnyɛɛ ni esaaa lɛ naa bɔni afee ni amɛtsi amɛhe kɛjɛ jeŋba gbohii ahe lɛ ahe fɛo. Eji anɔkwale hu akɛ, je nɛɛ ní yɔɔ Satan Abonsam kudɔmɔ shishi lɛ nyɛ̃ɔ anɔkwa jálɔi.—1 Yohane 5:19.

“Mɛi Fɔji Kotoɔ” Amɛ

Srɔtofeemɔ kroko hu yɛ nilelɔi loo hiɛtɛlɔi kɛ mɛi ni náko jwɛŋmɔ lɛ ateŋ. “Mɛi ni náko jwɛŋmɔ lɛ agboshinii ji buulufeemɔ; shi hiɛtɛlɔi lɛ, akɛ nilee fimɔɔ amɛ akekere.” (Abɛi 14:18) Akɛni mɛi ni náko jwɛŋmɔ lɛ kɔɔɔ sane sɛɛ hewɔ lɛ, amɛfeɔ buului anii. Enɛ batsɔɔ amɛgboshinii. Nɔ ni tamɔɔɔ nakai lɛ, nilee haa hiɛtɛlɔi ahiɛ baa nyam taakɛ akekere woɔ maŋtsɛ hiɛ nyam lɛ.

Maŋtsɛ nilelɔ lɛ kɛɛ akɛ: “Mɛi fɔji kotoɔ mɛi kpakpai, ni efɔŋfeelɔi kotoɔ shi yɛ jalɔi agbói anaa.” (Abɛi 14:19) Yɛ gbɛ kroko nɔ lɛ, mɛi kpakpai baaye efɔŋfeelɔi anɔ kunim. Susumɔ bɔ ni Nyɔŋmɔ webii ni yɔɔ ŋmɛnɛ lɛ ayi faa kɛ bɔ ni amɛshihilɛ yaa hiɛ ehaa lɛ he okwɛ. Jɔɔmɔi ni Yehowa nɛɔ eshwieɔ etsuji anɔ nɛɛ ní mɛi ni teɔ shi woɔ amɛ lɛ naa lɛ baanyɛ amɛteŋ mɛi komɛi anɔ koni ‘amɛkoto’ Yehowa mfonirifeemɔŋ ŋwɛi yoo ní damɔ shi kɛha Kristofoi ni afɔ amɛ  mu lɛ ateŋ shwɛɛnii ni yɔɔ shikpɔŋ nɔ lɛ. Kɛ́ esɛɛ etsɛ aahu lɛ, yɛ Harmagedon lɛ abaanyɛ nɛkɛ shitee-kɛwolɔi nɛɛ anɔ koni amɛkpɛlɛ anɔkwale ni eji akɛ Yehowa asafo lɛ fã ni yɔɔ shikpɔŋ nɔ lɛ feɔ fã ni yɔɔ ŋwɛi lɛ he mfoniri lɛ nɔ.—Yesaia 60:1, 14; Galatabii 6:16; Kpojiemɔ 16:14, 16.

‘Amanenalɔi ní Aaana Amɛ Mɔbɔ’

Beni Salomo wieɔ nɔ ko ni ekpa shi ena yɛ adesai anifeemɔi ahe lɛ he lɛ, ekɛɛ akɛ: “Ohiafo lɛ, enaanyo tete nyɛ̃ɔ lɛ; shi niiatsɛ lɛ, esuɔlɔi fa.” (Abɛi 14:20) Kwɛ bɔ ni enɛ ji anɔkwale ha yɛ adesai ni yeee emuu lɛ agbɛfaŋ! Akɛni amɛsusuɔ amɛ pɛ amɛhe hewɔ lɛ, amɛsumɔɔ niiatsɛ sane fe ohiafo. Eyɛ mli akɛ niiatsɛ nanemɛi fa moŋ, shi taakɛ bɔ ni nii ni eyɔɔ lɛ hiɛ nyɛɔ ekpatãa trukaa lɛ, nakai nɔŋŋ enanemɛi lɛ shiɔ lɛ trukaa. Belɛ, ani esaaa akɛ wɔtsiɔ wɔhe kɛjɛɔ naanyobɔɔ ni adamɔɔ shika ni mɔ yɔɔ loo yiteŋ muluwoo nɔ akɛ mɔ náa lɛ he?

Ni kɛji wɔpɛi wɔmli wɔkwɛ ní wɔna akɛ wɔsumɔɔ ni wɔsa mɛi ni yɔɔ nii lɛ ahiɛ, shi wɔbuuu mɛi ni bɛ nɔ ko lɛ hu? Esa akɛ wɔkadi akɛ Biblia lɛ buɔ hiɛaŋkwɛmɔ ni tamɔ nɛkɛ lɛ fɔ. Ekɛɔ akɛ: “Mɔ ni gbeɔ enaanyo he guɔ lɛ, efee esha; shi mɔ ni naa amanenalɔi amɔbɔ lɛ, ajɔɔ lɛ.”—Abɛi 14:21.

Esa akɛ wɔsusu mɛi ni eyaje shihilɛi ni mli wawai amli lɛ ahe. (Yakobo 1:27) Mɛɛ gbɛ nɔ wɔɔtsɔ wɔfee enɛ? Kɛtsɔ “je nɛŋ nii” tamɔ shika, niyenii, wɔɔhe, kɛ atade ní wɔkɛaaduro amɛ kɛ miishɛɛ kpo hu ni wɔɔjie yɛ amɛhe lɛ nɔ. (1 Yohane 3:17) Ajɔɔ mɔ ni naa mɛi ni tamɔ nɛkɛ lɛ amɔbɔ lɛ, ejaakɛ “nɔhamɔ mli yɛ jɔɔmɔ fe hemɔ.”—Bɔfoi lɛ Asaji 20:35.

Te Hiɛtɛlɔi kɛ Kwashiai Anaagbee Baa lɛ Ehaa Tɛŋŋ?

Anɔkwale ni yɔɔ wiemɔ ni ji “nɔ ni gbɔmɔ dũɔ lɛ, no nɔŋŋ ebaakpa hu” lɛ mli lɛ jeɔ kpo yɛ hiɛtɛlɔ kɛ kwashia fɛɛ gbɛfaŋ. (Galatabii 6:7) Hiɛtɛlɔ feɔ nibii kpakpai; ni kwashia tsɔ̃ɔ ŋai fɔji. Maŋtsɛ nilelɔ lɛ bi akɛ: “Ani mɛi ni tsɔ̃ɔ ŋaa fɔŋ lɛ, jeee tɔ̃ amɛtɔ̃ɔ lɛ?” Hetoo lɛ ji hɛɛ; “[amɛ]kpalaŋɔ.” (An American Translation) “Shi mɛi ni tsɔ̃ɔ ŋaa kpakpa lɛ anɔ ji mɔbɔnalɛ kɛ anɔkwale.” (Abɛi 14:22) Nyɔŋmɔ naa mɛi ni feɔ ekpakpa lɛ amɔbɔ, ni mɛi hu náa amɛhe miishɛɛ.

Beni Salomo tsɔɔ akɛ nii ni atsuɔ kɛ hiɛdɔɔ ji nɔ ni haa mɔ yeɔ omanye, ni ákɛ wiemɔ babaoo ni nitsumɔ fataaa he lɛ haa mɔ nine nyɛɔ shi lɛ, ekɛɛ akɛ: “Deŋmegbomɔ fɛɛ lɛ sɛɛnamɔ yɛ mli; shi naabu folo wiemɔ lɛ, ohia kɛkɛ yɔɔ mli.” (Abɛi 14:23) Anɔkwale ni yɔɔ sane nɛɛ mli lɛ kɔɔ mɔdɛŋbɔɔ ni wɔkɛwoɔ Nyɔŋmɔjamɔ nifeemɔi amli lɛ hu he. Sɛɛnamɔ yɛ́ mɔdɛŋbɔɔ babaoo ni wɔkɛwoɔ Kristofoi ashiɛmɔ nitsumɔ lɛ mli lɛ he, ejaakɛ no haa mɛi babaoo anine shɛɔ Nyɔŋmɔ Wiemɔ lɛ mli anɔkwalei ni hereɔ mɔ yiwala lɛ anɔ. Anɔkwayeli mli ni wɔjɛɔ wɔtsuɔ teokrase nitsumɔi fɛɛ ni akɛwoɔ wɔdɛŋ lɛ ahe nii lɛ haa wɔmii shɛɔ wɔhe, ni wɔtsui nyɔɔ wɔmli hu.

Abɛi 14:24 kɛɔ akɛ: “Nilelɔi anii lɛ, amɛ akekere ni; shi kwashiai abuulufeemɔ lɛ, buulufeemɔ nɔŋŋ ni.” Wiemɔ nɛɛ baanyɛ atsɔɔ akɛ ŋaalee ni nilelɔi bɔɔ mɔdɛŋ koni amɛná lɛ bafeɔ amɛgboshinii, ni ebafeɔ akekere kɛhaa amɛ loo ewoɔ amɛhiɛ nyam. Shi kwashiai náaa amɛbuulufeemɔ lɛ he sɛɛ ko. Taakɛ wolo ko ni akɛpɛiɔ saji amli tsɔɔ lɛ, abaanyɛ anu abɛ nɛɛ shishi yɛ gbɛ kroko nɔ ákɛ etsɔɔ akɛ “ninámɔ woɔ mɛi ni kɛtsuɔ nii jogbaŋŋ lɛ ahiɛ nyam . . . [shi] yɛ kwashiai agbɛfaŋ lɛ, amɛnáaa nɔ ko kɛjɛɛɛ amɛbuulufeemɔ lɛ mli.” Ekɔɔɔ he eko bɔ ni sane lɛ ji lɛ, nilelɔi anaagbee hi kwraa fe kwashiai anɔ̃.

Israel maŋtsɛ lɛ kɛɛ akɛ: “Anɔkwa odasefonyo hereɔ susumai ayiwala; shi kutumpɔfo lɛ, amale sane etãa.” (Abɛi 14:25) Eyɛ mli akɛ wiemɔi nɛɛ baa mli nakai yɛ saneyeli mli moŋ, shi susumɔ bɔ ni ekɔɔ wɔshiɛmɔ nitsumɔ lɛ hu he ehaa lɛ he okwɛ. Wɔ Maŋtsɛyeli shiɛmɔ kɛ kaselɔfeemɔ nitsumɔ lɛ biɔ ni wɔye anɔkwalei ni yɔɔ Nyɔŋmɔ Wiemɔ lɛ mli lɛ ahe odase wɔtsɔɔ. Odaseyeli nɛɛ kpɔ̃ɔ aŋkroaŋkroi ni hiɛ tsui ni ja lɛ kɛjɛɔ apasa jamɔ mli, ni ehereɔ mɛi ayiwala hu. Kɛ́ wɔha wɔhiɛ hi wɔhe nɔ kɛ wɔtsɔɔmɔ lɛ hu nɔ lɛ, no lɛ wɔbaahere wɔ diɛŋtsɛ kɛ mɛi ni boɔ wɔ toi lɛ fɛɛ yiwala. (1 Timoteo 4:16) Yɛ be mli ni wɔyaa nɔ wɔfeɔ enɛ lɛ, nyɛhaa wɔhiɛ ahia wɔhe nɔ, ni wɔkɛ hiɛtɛ̃ɛ atsua nii yɛ wɔshihilɛ mli nifeemɔi fɛɛ amli.

[Shishigbɛ niŋmai]

[Mfoniri ni yɔɔ baafa 18]

Kɛ́ wɔbaanyɛ wɔkpá ekpakpa kɛ efɔŋ mli lɛ, no lɛ ebaabi ni wɔkɛ hiɛdɔɔ akase anɔkwalei ni mli kwɔlɔ lɛ

[Mfoniri ni yɔɔ baafa 18]

Ani heloonaa nibii ni adiɔ sɛɛ yɛ shihilɛ mli lɛ haa mɔ tsui nyɔɔ emli diɛŋtsɛ?