‘Miyelikɛbuamɔ Jɛɔ Yehowa Ŋɔɔ’

Oshijafoi Ji Amɛ, shi Amɛtsui Nyɔɔ Amɛmli yɛ Yehowa Sɔɔmɔ Mli

KRISTOFONYO yoo ko ni yɔɔ Spain lɛ kɛɛ akɛ: “Eyɛ mli akɛ wɔteŋ mɛi pii boteko gbalashihilɛ mli moŋ, shi wɔyɛ miishɛɛ waa.” Mɛni haa emii shɛɔ ehe lɛ? Etsɔɔ mli akɛ: “Wɔye wɔhe kɛjɛ gbalashihilɛ mli naagbai babaoo ahe, ni enɛ haa wɔnyɛɔ wɔsɔmɔɔ Yehowa ni ji wɔ-Nyɔŋmɔ lɛ kɛmɔɔ shi, ni no haa wɔmii shɛɔ wɔhe.”

Wiemɔi ni tamɔ nɛkɛ lɛ kɛ nɔ ni Nyɔŋmɔ Wiemɔ lɛ kɛɔ yɛ oshijayeli he lɛ kpãa gbee. Beni bɔfo Paulo wieɔ gbalashihilɛ mli saji ahe lɛ, Nyɔŋmɔ mumɔ lɛ tsirɛ lɛ ni ewo ŋaa akɛ: “Oshijafoi kɛ okulafoi lɛ miikɛɛ amɛ akɛ: Ehi ha amɛ kɛji amɛhi shi taakɛ bɔ ni mi hu miyɔɔ nɛɛ lɛ.” Paulo boteee gbalashihilɛ mli. Shi mɛɛ yiŋtoo hewɔ ejie oshijayeli yi lɛ? Etsɔɔ mli akɛ mɔ ni ebote gbalashihilɛ mli lɛ haoɔ ehe yɛ nibii krokomɛi ahe, shi nuu loo yoo ni ji oshija lɛ “haoɔ ehe yɛ Nuŋtsɔ lɛ nii ahewɔ.” (1 Korintobii 7:8, 32-34) Yehowa ní oshijafoi sɔmɔɔ lɛ lɛ ji nɔ̃ titri ni haa amɛnáa miishɛɛ ni amɛtsui nyɔɔ amɛmli hu.

Yiŋtoo ni Woo Yɔɔ Mli Hewɔ ni Mɛi Komɛi Yeɔ Oshija

Ekolɛ Paulo wiemɔi lɛ ashishinumɔ baawa kɛha mɛi ni yɔɔ maji ni amaa gbalashihilɛ kɛ bii afɔmɔ nɔ mi babaoo yɛ jɛmɛ lɛ. Shi kɛlɛ, Yesu Kristo—ní lɛ diɛŋtsɛ lɛ eji oshija shi emii shɛ ehe ni etsui hu nyɔ emli lɛ—ha ale yiŋtoo ni woo yɔɔ mli hewɔ ní Kristofoi komɛi hiɔ shi akɛ oshijafoi lɛ. Ekɛɛ akɛ: “Osaii lɛ ekrokomɛi hu yɛ ni ŋwɛi maŋtsɛyeli lɛ hewɔ amɛ diɛŋtsɛ amɛsa amɛhe. Mɔ ni aaanyɛ mli amɔ lɛ, ha emɔ mli.”—Mateo 19:12.

Yɛ wiemɔi nɛɛ kɛ gbeekpãmɔ naa lɛ, mɛi babaoo eyɔse akɛ oshijayeli haa amɛnáa hegbɛ amɛsɔmɔɔ Nyɔŋmɔ ní nibii ni fɔɔ mɛi ni ebote gbalashihilɛ mli lɛ anaagbamɔ lɛ gbalaaa amɛjwɛŋmɔ. (1 Korintobii 7:35) Kristofoi akpei abɔ ni boteko gbalashihilɛ mli lɛ kɛ miishɛɛ miijá Yehowa, ni mɛi krokomɛi ní amɛyeɔ amɛbuaa lɛ haa amɛnáa miishɛɛ. *

Kristofoi babaoo ni boteko gbalashihilɛ mli lɛ yɔseɔ akɛ jeee mɛi ni ebote gbalashihilɛ mli pɛ náa miishɛɛ, ni nakai nɔŋŋ hu jeee oshijafoi fɛɛ ji mɛi ni náaa miishɛɛ yɛ shihilɛ mli. Mɛi ni ebote gbalashihilɛ mli lɛ ateŋ mɛi komɛi náa miishɛɛ yɛ bei komɛi amli, ni be shɛɔ hu ni amɛbɛ miishɛɛ, ni nakai nɔŋŋ eji yɛ oshijafoi komɛi hu agbɛfaŋ. Yɛ anɔkwale mli lɛ, Biblia lɛ feɔ lɛ faŋŋ akɛ mɛi ni boteɔ gbalashihilɛ mli lɛ kɛ “heloo gbɛfaŋ amanehulu” kpeɔ.—1 Korintobii 7:28.

Oshijayeli yɛ Shihilɛi Komɛi Ahewɔ

Mɛi babaoo yɛ ní shihilɛ ni amɛyɔɔ mli lɛ hewɔ amɛhiɔ shi akɛ oshijafoi, shi ejeee amɛsuɔmɔ naa akɛ amɛhi shi nakai. Ekolɛ, mɔ hesusumɔ kɛ naanyobɔɔ su ni gbalashihilɛ mli hefatalɔi jieɔ lɛ kpo amɛtsɔɔ amɛhe, kɛ bɔ ni amɛdɔɔ amɛhe amɛhaa lɛ feɔ amɛ akɔnɔ. Shi, yɛ mɛi komɛi agbɛfaŋ lɛ, shika he naagbai kɛ saji krokomɛi ni sa akɛ amɛtsu he nii lɛ ji nibii ni tsĩɔ amɛgbalashihilɛ mlibotemɔ naa amrɔ nɛɛ. Kristofoi komɛi—ní amɛteŋ mɛi babaoo ji wɔmumɔŋ nyɛmimɛi yei ni asumɔɔ amɛsane lɛ—kã he amɛji oshijafoi akɛni amɛtswa amɛfai shi akɛ amɛbaabo ŋaawoo ni Biblia lɛ kɛhaa ákɛ abote gbalashihilɛ mli yɛ “Nuŋtsɔ lɛ mli” lɛ toi lɛ hewɔ. (1 Korintobii 7:39)  Amɛfeɔ toiboo kɛtaoɔ gbalashihilɛ mli hefatalɔi kɛjɛɔ Yehowa jálɔi ni ejɔɔ amɛhe nɔ ní abaptisi amɛ hu lɛ ateŋ.

Yɛ bei komɛi amli lɛ, oshijafoi nɛɛ ateŋ mɛi komɛi nuɔ he akɛ amɛhe efee shoo. Beni Kristofonyo yoo oshija ko kpɛlɛ nɔ akɛ nakai enuɔ he lɛ, ewie akɛ: “Wɔle Yehowa mla lɛ, ni wɔsumɔŋ koni wɔfee nɔ ko ni esaŋ Yehowa hiɛ. Kɛ́ wɔná hefatalɔ lɛ, wɔbaasumɔ, shi kɛ́ jeŋnyo ko ni ‘baatao eko aha wɔ’ lɛ, no lɛ ekɔɔɔ he eko shii abɔ ni eeeka nakai feemɔ lɛ, wɔbaaya nɔ wɔhi shi akɛ oshijafoi moŋ. Wɔsumɔɔɔ po akɛ wɔkɛ hii loo yei ni kɛ wɔ bɛ hemɔkɛyeli lɛ mli lɛ abɔ.” Esa akɛ ajie Kristofoi ni tamɔ nɛkɛ lɛ ayi yɛ ŋaawoo ni Biblia lɛ kɛhaa ni amɛkɛtsuɔ nii, kɛ amɛjeŋ hu ni amɛbaa jogbaŋŋ bɔni afee ni amɛsa Yehowa hiɛ ekɔɔɔ he eko nɔ̃ henumɔŋ naagbai ní ekolɛ amɛkɛkpeɔ yɛ nakai feemɔ mli lɛ hewɔ.

Nyɔŋmɔ Yeɔ Ebuaa Babaoo

Yehowa jieɔ ehe kpo akɛ anɔkwafo etsɔɔ mɛi ni yeɔ lɛ anɔkwa yɛ saji tamɔ aŋkroaŋkroi ni sɔmɔɔɔ lɛ lɛ ní akpooɔ ákɛ akɛ amɛ aaabote gbalashihilɛ mli nɛkɛ lɛ amli. Maŋtsɛ David baanyɛ ajɛ lɛ diɛŋtsɛ eniiashikpamɔ mli eye odase akɛ: “Anɔkwafo lɛ, [Yehowa] okɛ ohe tsɔɔ lɛ akɛ mɔ ni yeɔ anɔkwa.” (Lala 18:26, NW) Ni Nyɔŋmɔ woɔ mɛi ni jɛɔ anɔkwayeli mli amɛboɔ lɛ toi lɛ ashi akɛ: “Mishiŋo ni misaa mikwaŋo gbi ko gbi ko.” (Hebribii 13:5) Wɔbaanyɛ wɔkase Yehowa kɛtsɔ Kristofoi oshijafoi fɛɛ—yei kɛ hii, onukpai kɛ gbekɛbii—ni boɔ Nyɔŋmɔ Wiemɔ lɛ toi be fɛɛ be lɛ ayi ní wɔɔjie lɛ nɔ. Kɛfata he lɛ, wɔbaanyɛ wɔsɔle wɔbi Yehowa koni ewaje amɛ ni amɛnyɛ amɛdamɔ naagbai ni amɛkɛkpeɔ lɛ anaa.—Kojolɔi 11:30-40.

Kristofoi oshijafoi babaoo eyɔse akɛ amɛhe ní amɛkɛwoɔ nitsumɔ ni ji Biblia lɛ ní akɛ mɛi kaseɔ lɛ mli vii lɛ haa amɛnáa miishɛɛ yɛ shihilɛ mli. Ákɛ nɔkwɛmɔnɔ lɛ, susumɔ yoo ko ni atsɛ́ɔ lɛ Patricia ni eye aaafee afii 35, ní eji gbɛgbalɔ loo be fɛɛ sanekpakpa jajelɔ ní boteko gbalashihilɛ mli lɛ he okwɛ. Ekɛɛ akɛ: “Eyɛ mli akɛ oshijayeli yɛ emli naagbai moŋ, shi eha miná hegbɛ mibatsɔ daa gbɛgbalɔ. Akɛni miji oshija hewɔ lɛ, minyɛɔ mifeɔ tsakemɔi yɛ mibe he gbɛjianɔtoo lɛ mli be fɛɛ be, ni enɛ yeɔ ebuaa mi ni mináa be babaoo kɛkaseɔ nii. Kɛfata he lɛ, mibale bɔ ni akɛ he fɔ̃ɔ Yehowa nɔ kwraa ahaa, titri lɛ yɛ shihilɛi ni mli wawai amli.”

Niiashikpamɔi ni tamɔ nɛkɛ maa bɔ ni shiwoo ni woɔ mɔ hewalɛ ní Biblia lɛ kɛhaa akɛ: “Gbɛ ní onyiɛ nɔ lɛ, ŋɔɔfɔ̃ Yehowa nɔ, ní oŋɔ ohiɛ ofɔ̃ enɔ, ni eeefee” lɛ ji anɔkwale ha lɛ nɔ mi. (Lala 37:5) Yɛ anɔkwale mli lɛ, wiemɔi ni ajɛ mumɔŋ aŋma ni kɛɔ akɛ: ‘Miyelikɛbuamɔ jɛɔ Yehowa ŋɔɔ’ lɛ baanyɛ ashɛje Yehowa anɔkwa jálɔi ni ji mɛi ni ebote gbalashihilɛ mli kɛ oshijafoi fɛɛ lɛ amii ní ewo amɛ hewalɛ hu.—Lala 121:2.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 9]

“Mɔ ni ewɛɛɛ yoo lɛ, ehaoɔ ehe yɛ Nuŋtsɔ lɛ nii ahewɔ, bɔni afee ni esane asa Nuŋtsɔ lɛ hiɛ.”—1 KORINTOBII 7:32

[Akrabatsa ni yɔɔ baafa 8]

BƆ NI OOOFEE ONÁ OSHIJAYELI HE SƐƐ

Yesu ní hi shi akɛ oshija lɛ kɛɛ akɛ: “Miŋmaa ji akɛ mafee mɔ ni tsu mi lɛ suɔmɔnaa nii, ni magbe enitsumɔ lɛ naa.”—Yohane 4:34.

Filipo biyei ejwɛ ní amɛji oshijafoi lɛ kɛ amɛbe fɛɛ tsu nii ‘kɛgba.’—Bɔfoi lɛ Asaji 21:8, 9.

Kristofoi yei oshijafoi ni jajeɔ Maŋtsɛyeli lɛ he shɛɛ sane lɛ fata ‘yei babaoo ni shiɛɔ sanekpakpa lɛ’ ahe.—Lala 68:12.