Gbɛfãa Kakadaŋŋ ko He Ba Sɛɛnamɔ

AMANIƐBƆƆ ni jɛ Democratic Republic of Congo nɛɛ kɔɔ yei enyɔ ni ji mɔ kɛ enyɛmi ni kpɛ amɛyiŋ akɛ amɛbaafã gbɛ kakadaŋŋ kɛjɛ maŋ ko ni awuɔ ta yɛ mli lɛ mli kɛya “Okɛ Anunyam Aha Nyɔŋmɔ” Kpokpaa Wulu nɔ Kpee ni abaafee yɛ Lisala lɛ ahe. Yɛ mumɔŋ tsɔsemɔ kɛ Kristofoi anaanyobɔɔ ni amɛkpaa gbɛ akɛ amɛbaaná lɛ sɛɛ lɛ, amɛmiishwe hu akɛ amɛkɛ Yehowa Odasefoi anitsumɔhe nine ni yɔɔ Kinshasa lɛ anajiaŋdamɔlɔi baakpe. Yɛ maŋ ta ni awuɔ yɛ maŋ lɛ mli hewɔ lɛ, afii babaoo ho ní amɛnaaa nyɛmimɛi ni yɔɔ nitsumɔhe nine lɛ ateŋ mɔ ko kwraa, ni no hewɔ lɛ, amɛmiitao koni amɛŋɔ hegbɛ nɛɛ kɛfee nakai.

Nyɛmimɛi yei enyɔ lɛ kɛ lɛlɛ fã gbɛ lɛ kɛjɛ amɛmaŋ ni ji Basankusu lɛ mli kɛtsɔ koo mli kɛ agbɛnɛ faai enyɔ nɔ kɛtee Lisala, ni eji gbɛfãa ni jɛkɛmɔ aaafee kilomitai 300. Amɛkɛ otsii etɛ fã gbɛ lɛ. Akɛni amɛyi enyɔ lɛ fɛɛ kɛ amɛhe ewo be-fɛɛ sɔɔmɔ nitsumɔ lɛ mli, ní amɛteŋ mɔ kome kɛ afii etɛ etsu enɛ ni mɔ kroko lɛ hu kɛ afii 19 efee nakai hewɔ lɛ, amɛŋɔ hegbɛ lɛ koni amɛkɛshiɛ Maŋtsɛyeli lɛ he sanekpakpa lɛ amɛtsɔɔ yɛ amɛgbɛfãa lɛ mli. Amɛkɛ ŋmɛlɛtswai aaafee 110 shiɛ amɛha mɛi ni amɛkɛkpe yɛ gbɛfãa lɛ mli lɛ, ni amɛha dɛhiɛmɔ woji 200 kɛ woji tɛtrɛbii 30.

Beni amɛkɛ lɛlɛ foɔ faa lɛ, amɛtsɔmɔ nuŋshuɔi kɛ baái ni fa babaoo yɛ nakai kpokpaa lɛ nɔ lɛ ateŋ. Amɛnyɛɛɛ faa lɛ nɔ amɛtsɔ gbɛkɛ—ejaakɛ afãaa gbɛ yɛ faa lɛ nɔ kɛ́ je na! Amɛtsɔmɔ hei pii hu ni asraafoi kwɛɔ mɛi anibii amli yɛ jɛmɛ lɛ.

Eyɛ mli akɛ gbɛfãa lɛ jɛkɛ ni eha etɔ amɛ moŋ, shi nyɛmimɛi yei lɛ ná amɛdeŋmegbomɔ lɛ he miishɛɛ. Amɛyi enyɔ lɛ fɛɛ ná hiɛsɔɔ kɛ miishɛɛ babaoo yɛ kpee lɛ ni amɛnyɛ amɛtee yɛ Lisala lɛ hewɔ. Amɛtsuii miishwe anɔkwale lɛ waa diɛŋtsɛ, ni amɛ kɛ nyɛmimɛi hii kɛ yei 7,000 ni ba kpee lɛ ateŋ naanyobɔɔ lɛ wo amɛ hewalɛ. Beni agbe kpee lɛ naa lɛ, amɛtsɔ naagbai ni amɛtsɔ mli kɛba lɛ nɔŋŋ mli kɛtee shia, ni amɛyanina amɛwekui lɛ akɛ amɛyɛ wala mli ni amɛyɛ shweshweeshwe hu.