Hiɛ Sɔ Biblia lɛ He Miishɛɛ ní Ayɔɔ Lɛ

MARIANNA ní eye afii 18 lɛ ji Yehowa Odasefoi ni yɔɔ Italia wuoyigbɛ lɛ ateŋ mɔ kome, ni eshwɛ nɔ ni shɛɛɛ afi ní ebaagbe nɔtsamɔ skul naa. Ekɛ Odasefoi oblahii kɛ oblayei krokomɛi yaa skul kometoo lɛ nɔŋŋ.

Marianna ŋma akɛ: “Afii fioo komɛi nɛ ni wɔteaŋ mɛi komɛi bɔi Biblia mli ŋmalɛ ni ahala kɛha gbi lɛ kanemɔ kɛjɛ Ŋmalɛi lɛ Amli ni Wɔɔkwɛ Daa wolo bibioo lɛ mli kɛ́ wɔba shwane hejɔɔmɔ. He ni wɔnyɛɔ wɔfeɔ enɛ yɛ pɛ ji abalanaa ni yɔɔ tsu ni tsɔɔlɔi lɛ kpeeɔ yɛ mli lɛ masɛi lɛ nɔ. Jɛmɛ ejɔɔɔ tsɔ. Tsɔɔlɔi lɛ ateŋ mɛi babaoo naa wɔ kɛ́ amɛmiiho, ni amɛteŋ mɛi komɛi waa kɛdamɔɔ shi amɛkwɛɔ nɔ ni wɔfeɔ lɛ. Bei pii lɛ, enɛ hãa wɔnáa hegbɛ wɔhãa saji ni amɛbiɔ lɛ ahetoo. Kɛ́ hooo kwraa lɛ, daa gbi lɛ, tsɔɔlɔ kome waa edamɔɔ shi ni ebiɔ wɔ sane. Amɛteŋ mɛi babaoo mɛɔ ni amɛboɔ Biblia mli ŋmalɛ ni wɔsusuɔ he lɛ toi, ni amɛhiɛ sɔɔ miishɛɛ ní wɔ ni ji Odasefoi lɛ yɔɔ yɛ Nyɔŋmɔjamɔ nifeemɔi ahe lɛ he. Be ko lɛ, tsɔɔlɔ nukpa lɛ sɛɛkwɛlɔ lɛ fɔ̃ wɔ nine koni wɔbasusu wɔ ŋmalɛ lɛ he yɛ tsũ ni tsɔɔlɔi lɛ kpeeɔ yɛ mli lɛ mli.

“Beni mitsɔɔlɔ lɛ na he ni agbɛnɛ wɔsusuɔ ŋmalɛ lɛ he yɛ lɛ, ebi tsɔɔlɔ nukpa lɛ kɛji abaanyɛ aŋmɛ wɔ gbɛ ni wɔfee enɛ yɛ skultsũi lɛ ateŋ ekome ní bolɔmɔ bɛ jɛmɛ lɛ mli. Tsɔɔlɔ nukpa lɛ ŋmɛ wɔ gbɛ, ni enɛ ha mitsɔɔlɔ lɛ jie wɔyi yɛ klas muu lɛ fɛɛ hiɛ yɛ nɔkwɛmɔnɔ kpakpa ni wɔfeɔ lɛ hewɔ. Wɔ fɛɛ wɔyɛ miishɛɛ babaoo yɛ hegbɛ kpele ni Yehowa kɛha wɔ nɛɛ hewɔ.”