Sanebimɔi ni Jɛ Kanelɔi Adɛŋ

Mɛni naakpɛɛ la ni bei komɛi lɛ atsɛ́ɔ lɛ Shekina ni pue yɛ Blema Israel kpeebuu lɛ kɛ agbɛnɛ sɔlemɔwe lɛ a-He Krɔŋkrɔŋ Fe Fɛɛ lɛ damɔ shi kɛha?

Yehowa ni ji Tsɛ ni yɔɔ suɔmɔ kɛ ewebii a-Hebulɔ lɛ hã Israelbii lɛ na faŋŋ akɛ eyɛ amɛteŋ diɛŋtsɛ. Gbɛ kome ni etsɔ nɔ efee enɛ ji kɛtsɔ atatu ko ni kpɛ́ɔ ní ehaa ebapueɔ yɛ ejamɔhe lɛ nɔ.

Nakai la ni kpɛ́ɔ haŋŋ lɛ tsɔɔ akɛ Yehowa yɛ amɛteŋ, tsɛbelɛ amɛkɛ amɛhiŋmɛi enaaa lɛ. La nɛɛ pue yɛ He Krɔŋkrɔŋ Fe Fɛɛ ni yɔɔ kpeebuu lɛ kɛ agbɛnɛ sɔlemɔwe ni Salomo ma lɛ amli. Nakai naakpɛɛ la lɛ etsɔɔɔ akɛ Yehowa diɛŋtsɛ yɛ amɛteŋ ní amɛmiina lɛ. Tsũ ni adesai ma nyɛŋ ato Nyɔŋmɔ. (2 Kronika 6:18; Bɔfoi lɛ Asaji 17:24) Nɛkɛ la ni kpɛ́ɔ yɛ naakpɛɛ gbɛ nɔ yɛ Nyɔŋmɔ sɔlemɔwe lɛ baanyɛ ahã osɔfonukpa lɛ kɛ Israelbii lɛ aná nɔmimaa akɛ Yehowa miibu amɛhe, ni ákɛ ebaatsu amɛhiamɔ nii ahe nii eha amɛ.

Gbɛi ní akɛtsɛ́ la nɛɛ yɛ Aramaik wiemɔ mli beni áŋma Biblia lɛ agbe naa sɛɛ ji Shekina (shekhi·nahʹ), ni wiemɔ nɛɛ shishi ji “nɔ ko ni hiɔ he ko” loo “shihilɛhe.” Eyɛ mli akɛ wiemɔ nɛɛ ejeee kpo yɛ Biblia lɛ mli moŋ, shi akɛtsu nii yɛ Targum srɔtoi ni ji Hebri Ŋmalɛi lɛ ni atsɔɔ shishi kɛtee Aramaik wiemɔ mli lɛ amli.

Beni Yehowa kɛ kpeebuu lɛ maa he gbɛtsɔɔmɔi haa Mose lɛ, ekɛɛ lɛ akɛ: “Oŋɔ kpatamɔ sɛ̃i lɛ obu adeka lɛ naa; ni adeka lɛ oŋɔ odaseyeli nɔ̃ ni mibahao lɛ owo mli. Ni jɛi mikɛo aaakpe yɛ, ni majɛ kpatamɔ sɛ̃i lɛ nɔ, kɛ kerubim enyɔ lɛ ni yɔɔ odaseyeli adeka lɛ nɔ lɛ teŋ mikɛo aaawie.” (2 Mose 25:21, 22) Adeka ní akɛ shika tsuru ehà he fɛɛ ní yɔɔ He Krɔŋkrɔŋ Fe Fɛɛ lɛ he awieɔ yɛ biɛ lɛ. Kerubim enyɔ yɛ Adeka lɛ naa nɔ̃ lɛ nɔ.

Nɛgbɛ ji he ni Yehowa baawie kɛjɛ? Etsɔɔ Mose beni ekɛɛ lɛ akɛ: “Mibapue yɛ atatu mli yɛ kpatamɔ sɛ̃i lɛ nɔ” lɛ. (3 Mose 16:2) Atatu lɛ sɛŋɔ shi yɛ kɔɔyɔɔŋ yɛ kerubim enyɔ ni akɛ shika tsuru fee lɛ teŋ, yɛ Adeka krɔŋkrɔŋ lɛ nɔ. Biblia lɛ etsɔɔɔ bɔ ni nakai atatu lɛ kɛ shikpɔŋ jɛkɛ hã loo bɔ ni ekɛ kerubim enyɔ lɛ ateŋ jɛkɛ hã.

Atatu nɛɛ kpɛ́ɔ He Krɔŋkrɔŋ Fe Fɛɛ lɛ. Yɛ anɔkwale mli lɛ, no pɛ ji kane ni kpɛ́ɔ yɛ tsu nɛɛ mli. Kane nɛɛ yeɔ ebuaa osɔfonukpa lɛ ni enaa nakai sɛɛtsũ lɛ mli fɛɛ beni eboteɔ jɛmɛ yɛ Kpatamɔ Gbi lɛ nɔ lɛ. Eyadamɔɔ Yehowa hiɛ.

Ani la ni kpɛ́ɔ yɛ naakpɛɛ gbɛ nɔ nɛɛ hiɛ shishinumɔ ko kɛha Kristofoi? Bɔfo Yohane na maŋ ko ni “nyɔɔŋ bɛ jɛi” yɛ ninaa ko mli. Nakai maŋ lɛ ji Yerusalem Hee lɛ, ni emli bii lɛ ji Kristofoi ni afɔ amɛ mu ní atée amɛ shi koni amɛkɛ Yesu ayaye maŋtsɛ lɛ. Jeee hulu loo nyɔŋtsere kpɛ́ɔ nakai okadifeemɔ maŋ lɛ mli. Yehowa Nyɔŋmɔ anunyam lɛ kpɛ́ɔ eshwieɔ asafo nɛɛ nɔ tɛ̃ɛ, taakɛ bɔ ni atatu ni atsɛ́ɔ lɛ Shekina lɛ hu kpɛ He Krɔŋkrɔŋ Fe Fɛɛ lɛ. Agbɛnɛ hu, Toobi lɛ ni ji Yesu Kristo ji “la” ni kpɛ́ɔ yɛ nakai maŋ lɛ mli. Nakai maŋ lɛ hu kpɛ́ɔ mumɔŋ la ni tsoɔ yɛ mli lɛ ehaa mɛi ni akpɔ̃ amɛ kɛjɛ jeŋmaji fɛɛ amli lɛ, ni etsɔɔ amɛ gbɛ.—Kpojiemɔ 21:22-25.

Akɛni Yehowa jálɔi anine shɛɔ jɔɔmɔi babaoo nɔ kɛjɛɔ Nyɔŋmɔ ŋɔɔ hewɔ lɛ, amɛbaanyɛ amɛná nɔmimaa akɛ Yehowa ji amɛ-Kwɛlɔ ni buɔ amɛhe kɛ amɛ-Tsɛ hu ni yɔɔ suɔmɔ.