Suɔmɔ Mla Ní Akɛwo Tsui Mli
Suɔmɔ Mla Ní Akɛwo Tsui Mli
“Maŋɔ mimla lɛ mawo amɛmli ni maŋma yɛ amɛtsui nɔ!”—Yeremia 31:33.
1, 2. (a) Mɛni he wɔbaasusu agbɛnɛ? (b) Beni maŋ lɛ yɔɔ Sinai Gɔŋ lɛ shishi lɛ, mɛɛ gbɛ nɔ Yehowa tsɔ eha amɛna ákɛ eyɛ amɛteŋ?
WƆKASE yɛ nikasemɔi enyɔ ni tsɔ hiɛ lɛ amli ákɛ beni Mose kpeleke shi kɛjɛ Sinai Gɔŋ lɛ nɔ lɛ, no mli lɛ Nyɔŋmɔ anunyam lɛ miikpɛ́ yɛ ehiɛ. Wɔsusu hiɛhaanɔ ni Mose kɛhà ehiɛ lɛ hu he. Agbɛnɛ nyɛhaa wɔsusua sane ko ni kɛ saji nɛɛ yɔɔ tsakpãa ní he yɔɔ sɛɛnamɔ kɛha Kristofoi ni yɔɔ ŋmɛnɛ lɛ he wɔkwɛa.
2 Beni Mose tee gɔŋ lɛ nɔ lɛ, Yehowa kɛ gbɛtsɔɔmɔi ha lɛ. Israelbii ní ebua amɛhe naa yɛ Sinai Gɔŋ lɛ shishi lɛ na okadi ko ní tsɔɔ akɛ Nyɔŋmɔ yɛ amɛteŋ, ni eji okadi ko ní haa ŋmiŋmi mɔɔ mɔ. Bɔ ni eba lɛ ji akɛ, “nugbɔshiimɔi kɛ sarawa gbalamɔi kɛ atatu kpii ba gɔŋ lɛ nɔ, kɛ tɛtɛrɛmantɛrɛ gbee ni naa wa naakpa; ni maŋ lɛ fɛɛ ni yɔɔ ŋsara lɛŋ lɛ he kpokpo. . . . Ni Sinai gɔŋ muu lɛ fɛɛ miije lasũ, ejaakɛ Yehowa ekpeleke shi kɛba nɔ yɛ la mli; ni elasũ lɛ fãa kɛyaa ŋwɛi tamɔ flɔnɔɔ mli lasũ, ni gɔŋ muu lɛ fɛɛ miihoso naakpa.”—2 Mose 19:16-18.
3. Mɛɛ gbɛ nɔ Yehowa tsɔ ekɛ Kitãi Nyɔŋma lɛ hã Israelbii lɛ, ni mɛni amɛyɔse?
3 Yehowa tsɔ ŋwɛibɔfo ko nɔ ekɛ maŋ lɛ wie, ni ekɛ mlai ní abale lɛ akɛ Kitãi Nyɔŋma lɛ hã amɛ. (2 Mose 20:1-17) No hewɔ lɛ, ŋwanejee ko bɛ he akɛ Ofe lɛ ji mɔ ni kɛ mlai nɛɛ hã. Yehowa ŋmala nakai mlai lɛ yɛ tɛi tɛtrɛbii anɔ—tɛi nɛɛ ji nɔ ni Mose ŋɔ etswia shi beni ena Israelbii lɛ miijá tsinabi amaga lɛ. Yehowa ŋmala kitãi nɛɛ ekoŋŋ yɛ tɛi tɛtrɛbii anɔ. Ni beni Mose kɛ tɛi tɛtrɛbii nɛɛ kpeleke shi kɛjɛ gɔŋ lɛ nɔ lɛ, no mli lɛ ehiɛ miikpɛ́. Maŋ muu lɛ fɛɛ yɔse bɔ ni nakai mlai lɛ ahe hiaa waa hã.—2 Mose 32:15-19; 34:1, 4, 29, 30.
4. Kitãi Nyɔŋma lɛ ahe yɛ sɛɛnamɔ babaoo yɛ mɛɛ gbɛ nɔ?
4 Aŋɔ tɛi tɛtrɛbii ní aŋmala Kitãi Nyɔŋma lɛ yɛ nɔ lɛ ato kpaŋmɔ adeka ni yɔɔ kpeebuu lɛ He Krɔŋkrɔŋ Fe Fɛɛ lɛ mli, ni sɛɛ mli lɛ akɛ adeka nɛɛ yato sɔlemɔwe lɛ He Krɔŋkrɔŋ Fe Fɛɛ lɛ. Mlai ni yɔɔ tɛi tɛtrɛbii lɛ anɔ lɛ wieɔ shishitoo mlai titrii ní yɔɔ Mose Mla kpaŋmɔ lɛ mli lɛ ahe, ni mlai nɛɛ tsɔɔ gbɛ nɔ ní Nyɔŋmɔ baatsɔ eye maŋ lɛ nɔ. Mlai lɛ haa anaa akɛ Yehowa kɛ mɛi pɔtɛɛi komɛi ní ehala miiye.
5. Mlai ní Nyɔŋmɔ kɛha Israelbii lɛ jieɔ suɔmɔ ni eyɔɔ lɛ kpo yɛ mɛɛ gbɛ̀i anɔ?
5 Nakai mlai lɛ haa aleɔ nibii pii yɛ Yehowa he, ni titri lɛ, ehaa anaa suɔmɔ ni eyɔɔ kɛha ewebii. Kwɛ bɔ ni nakai mlai lɛ ahe ba sɛɛnamɔ kɛha mɛi ni kɛtsu nii lɛ! Nilelɔ ko tsɔɔ mli akɛ Kitãi Nyɔŋma lɛ anɔ kwɔlɔ kwraa fe jeŋba he mlai srɔtoi ní adesai efee lɛ. Beni Yehowa wieɔ Mose Mla muu lɛ fɛɛ he lɛ, ekɛɛ akɛ: “Kɛji nyɛaabo migbee toi ní nyɛye mikpaŋmɔ lɛ nɔ lɛ, no lɛ nyɛaatsɔ mi diɛŋtsɛ minɔ̃ yɛ maji fɛɛ ateŋ; ejaakɛ shikpɔŋ lɛ fɛɛ lɛ minɔ̃ŋ. Shi nyɛ lɛ, nyɛaatsɔ osɔfoi amaŋtsɛyeli kɛ maŋ krɔŋkrɔŋ nyɛha mi.”—2 Mose 19:5, 6.
Mla ni Aŋma yɛ Tsui Nɔ
6. Mɛɛ mla ana akɛ ehe yɛ sɛɛnamɔ kwraa fe mlai ní aŋmala yɛ tɛi anɔ lɛ?
6 Hɛɛ, nakai mlai ni Nyɔŋmɔ kɛha lɛ ahe yɛ sɛɛnamɔ babaoo. Shi ani ole akɛ Kristofoi ni afɔ amɛ mu lɛ yɛ nɔ ko ni he yɔɔ sɛɛnamɔ kwraa fe mlai ni aŋmala yɛ tɛi anɔ lɛ? Yehowa gba akɛ ekɛ mɛi komɛi baafee kpaŋmɔ hee, ni ákɛ ebaasoro no yɛ Mla kpaŋmɔ ní ekɛ Israel maŋ lɛ fee lɛ he. Ewie akɛ: “Maŋɔ mimla lɛ mawo amɛmli ni maŋma yɛ amɛtsui nɔ.” (Yeremia 31:31-34) Yesu ni ji kpaŋmɔ hee lɛ Teŋdamɔlɔ lɛ diɛŋtsɛ ŋmalaaa mlai eshwieee shi ehaaa esɛɛnyiɛlɔi lɛ. Shi moŋ etsɔ ewiemɔi kɛ enifeemɔi anɔ edũ Yehowa mla lɛ ewo ekaselɔi lɛ ajwɛŋmɔ kɛ amɛtsui amli.
7. Namɛi klɛŋklɛŋ akɛ “Kristo mla” lɛ hã, ni namɛi hu bakpɛlɛ mla nɛɛ nɔ yɛ sɛɛ mli?
7 Atsɛ́ɔ mla nɛɛ akɛ “Kristo mla.” Mɛi klɛŋklɛŋ ní aŋɔ aha ji mumɔŋ maŋ ni ji “Nyɔŋmɔ Israel,” shi jeee heloonaa Israel ni ji Yakob seshibii lɛ. (Galatabii 6:2, 16; Romabii 2:28, 29) Kristofoi ní akɛ mumɔ efɔ amɛ mu lɛ ji Nyɔŋmɔ Israel lɛ. Sɛɛ mli lɛ, “asafo babaoo” ní jɛ jeŋmaŋ fɛɛ jeŋmaŋ, ní sumɔɔ akɛ amɛsɔmɔ Yehowa bafata amɛhe. (Kpojiemɔ 7:9, 10; Zakaria 8:23) Ákɛ ‘tooikuu kome’ ní yɔɔ “kwɛlɔ kome” lɛ, kui enyɔ lɛ fɛɛ kpɛlɛ “Kristo mla” lɛ nɔ, ni amɛhaa ekudɔɔ amɛ yɛ amɛnifeemɔi fɛɛ amli.—Yohane 10:16.
8. Mɛɛ srɔtofeemɔ yɔɔ Mose Mla lɛ kɛ Kristo mla lɛ teŋ?
8 Ákɛ mɛi ni tamɔɔɔ heloonaa Israelbii ni amɛbajeɔ Mose Mla shishi yɛ fɔmɔ naa lɛ, Kristofoi diɛŋtsɛ halaa akɛ amɛkɛ Kristo mla lɛ baatsu nii, ni nibii tamɔ mɔ hewolo nɔ su loo maŋ nɔ ní ejɛ baaa sane lɛ mli kwraa. Amɛkaseɔ Yehowa kɛ egbɛ̀i lɛ ahe nii, ni amɛsumɔɔ koni amɛfee esuɔmɔnaa nii. Jeee akɛni Nyɔŋmɔ nyɛɔ egbalaa mɛi ni efeee toiboo amɛhaaa lɛ lɛ atoi hewɔ Kristofoi ni afɔ amɛ mu lɛ boɔ lɛ toi; ni asaŋ jeee akɛni amɛnuɔ he akɛ eji sɔ̃ ni kã amɛnɔ hu hewɔ amɛfeɔ nakai, shi moŋ amɛfeɔ nakai akɛni Nyɔŋmɔ mla lɛ yɛ “amɛmli” loo kɛ́ wɔɔkɛɛ lɛ, aŋmala yɛ “amɛtsui” nɔ lɛ hewɔ. Nɔ ko ni he hiaa waa, ní kanyaa mɔ waa diɛŋtsɛ hu ji nɔ ni hãa amɛfeɔ toiboo amɛhaa Nyɔŋmɔ, ni akɛni aŋmala emlai lɛ yɛ tooi krokomɛi lɛ hu atsui nɔ hewɔ lɛ, amɛ hu amɛfeɔ toiboo amɛhaa lɛ yɛ nakai yiŋtoo nɔŋŋ hewɔ.
Mlai ní Ajɛ Suɔmɔ Mli Afee
9. Mɛɛ gbɛ nɔ Yesu tsɔ etsɔɔ akɛ suɔmɔ ji agugu ní yɔɔ Yehowa mlai lɛ fɛɛ amli?
9 Abaanyɛ akɛ wiemɔ kome atsɔɔ agugu ni yɔɔ Yehowa mlai kɛ egbɛtsɔɔmɔi lɛ fɛɛ amli lɛ mli, ni no ji: suɔmɔ. Su nɛɛ ebafee su ko ni he hiaa waa ní jieɔ kpo yɛ anɔkwa jamɔ mli be fɛɛ be, ni ebaaya nɔ efee nakai. Beni abi Yesu nɔ ni ji mla lɛ mli kitã wulu lɛ, eha hetoo akɛ: “Suɔmɔ Nuŋtsɔ, o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.” Ni nɔ ni nyiɛ sɛɛ ji akɛ: “Suɔmɔ onaanyo tamɔ bɔ ni osumɔɔ bo diɛŋtsɛ ohe.” Kɛkɛ ni ekɛfata he akɛ: “Kitai enyɔ nɛɛ mla lɛ kɛ gbalɔi lɛ fɛɛ tsotsoro.” (Mateo 22:35-40) No hewɔ lɛ, Yesu tsɔɔ akɛ jeee Mla lɛ ní Kitãi Nyɔŋma lɛ fata he lɛ kɛkɛ ajɛ suɔmɔ mli afee, shi moŋ suɔmɔ mli hu ajɛ aŋmala Hebri Ŋmalɛi lɛ fɛɛ.
10. Te wɔfeɔ tɛŋŋ wɔleɔ akɛ suɔmɔ ji agugu ni yɔɔ Kristo mla lɛ mli?
10 Ani suɔmɔ ní aaaná aha Nyɔŋmɔ kɛ naanyo gbɔmɔ ji agugu hu ni yɔɔ mla ni yɔɔ Kristofoi atsui mli lɛ mli? Nakai eji! Kristo mla lɛ biɔ ní ajɛ suɔmɔ mli asumɔ Nyɔŋmɔ, ni nɔ ni fata he ji kitã hee ákɛ Kristofoi ajie suɔmɔ ni hãa mɔ kɛ ehe shãa afɔle kpo amɛtsɔɔ amɛhe. Esa akɛ amɛsumɔ amɛhe taakɛ Yesu sumɔ ekaselɔi lɛ ní ejɛ esuɔmɔ mli ekɛ ewala fɔ̃ shi eha amɛ lɛ. Etsɔɔ ekaselɔi lɛ koni amɛsumɔ Nyɔŋmɔ ní amɛsumɔsumɔɔ amɛhe hu taakɛ esumɔ amɛ lɛ. Su titri ní sa kadimɔ waa ni akɛkadiɔ anɔkwa Kristofoi ji suɔmɔ ní amɛjieɔ lɛ kpo amɛtsɔɔ amɛhe lɛ. (Yohane 13:34, 35; 15:12, 13) Yesu fã amɛ ní amɛsumɔ amɛhenyɛlɔi tete.—Mateo 5:44.
11. Yesu tsɔɔ akɛ esumɔɔ Nyɔŋmɔ kɛ adesai aweku lɛ yɛ mɛɛ gbɛ nɔ?
11 Yesu fee nɔkwɛmɔnɔ kpakpa yɛ suɔmɔ kpojiemɔ mli. Beni eyɔɔ ŋwɛi ákɛ mumɔŋ bɔɔ nɔ̃ ni yɔɔ hewalɛ lɛ, ekpɛlɛ hegbɛ ni akɛha lɛ koni eha e-Tsɛ suɔmɔnaa nifeemɔ ashwere yɛ shikpɔŋ nɔ lɛ nɔ. Yɛ ewala ni ekɛfɔ̃ shi bɔni afee ni mɛi krokomɛi anine anyɛ ashɛ naanɔ wala nɔ lɛ sɛɛ lɛ, etsɔɔ mɛi hu bɔ ni esa akɛ amɛhi shi amɛha. Eba ehe shi, emli jɔ, ni esusu mɛi ahe, ni asaŋ eye ebua mɛi ní jatsui fe amɛ ní amɛhao lɛ. Eduro mɛi “naanɔ wala wiemɔ,” ni ekɛ mɔdɛŋbɔɔ babaoo ye ebua mɛi ni amɛbale Yehowa.—Yohane 6:68.
12. Mɛni hewɔ abaanyɛ akɛɛ akɛ anyɛŋ agbála suɔmɔ ní anáa ahaa Nyɔŋmɔ kɛ naanyo gbɔmɔ lɛ teŋ lɛ?
12 Yɛ anɔkwale mli lɛ, anyɛŋ agbála suɔmɔ ní anáa ahaa Nyɔŋmɔ kɛ naanyo gbɔmɔ lɛ teŋ. Bɔfo Yohane kɛɛ akɛ: “Suɔmɔ lɛ Nyɔŋmɔ mli ejɛ . . . Kɛji mɔ ko kɛɛ akɛ: Miisumɔ Nyɔŋmɔ, ni enyɛ̃ɔ lɛ diɛŋtsɛ enyɛmi lɛ, amalelɔ ji lɛ. Ejaakɛ mɔ ni sumɔɔɔ lɛ diɛŋtsɛ enyɛmi ni enaa lɛ lɛ, Nyɔŋmɔ ni enaaa lɛ lɛ, te aaafee tɛŋŋ ni eeenyɛ lɛ esumɔŋ?” (1 Yohane 4:7, 20) Suɔmɔ jɛ Yehowa mli, ni eji suɔmɔ hu. Suɔmɔ kanyaa enifeemɔi fɛɛ. Wɔjieɔ suɔmɔ kpo akɛni abɔ wɔ yɛ esubaŋ nɔ lɛ hewɔ. (1 Mose 1:27) Wɔtsɔɔ suɔmɔ kpo ní wɔjieɔ wɔtsɔɔ wɔnanemɛi adesai lɛ nɔ wɔtsɔɔ akɛ wɔsumɔɔ Nyɔŋmɔ.
Toiboo Tsɔɔ Suɔmɔ ní Ayɔɔ
13. Kɛ́ wɔɔná suɔmɔ wɔha Nyɔŋmɔ lɛ, no lɛ mɛni esa akɛ wɔfee klɛŋklɛŋ?
13 Te wɔɔfee tɛŋŋ wɔsumɔ Nyɔŋmɔ ní wɔnaaa lɛ lɛ? Nɔ ni he hiaa waa ní esa akɛ wɔfee klɛŋklɛŋ ji ní wɔle lɛ. Wɔnyɛŋ wɔjie suɔmɔ ni pɛsɛmkunya bɛ mli kpo wɔtsɔɔ mɔ ko ní wɔleee lɛ loo ní wɔná hekɛnɔfɔɔ yɛ nakai mɔ lɛ mli. No hewɔ lɛ, Nyɔŋmɔ Wiemɔ lɛ woɔ wɔ hewalɛ koni wɔtsɔ Biblia lɛ kasemɔ, sɔlemɔ, kɛ mɛi ni le Nyɔŋmɔ momo ní amɛsumɔɔ lɛ lɛ anɔ wɔbale lɛ. (Lala 1:1, 2; Filipibii 4:6; Hebribii 10:25) Sanekpakpai ejwɛ lɛ ahe yɛ sɛɛnamɔ waa ejaakɛ ehaa wɔnaa bɔ ni Yehowa yɔɔ hã taakɛ eje kpo yɛ Yesu Kristo wala shihilɛ kɛ esɔɔmɔ nitsumɔ lɛ mli lɛ. Yehowa ní wɔbaleɔ lɛ kɛ hiɛsɔɔ kpo ní wɔjieɔ yɛ suɔmɔ kpo ní ejie etsɔɔ wɔ lɛ he lɛ hãa wɔnáa he miishɛɛ babaoo ákɛ wɔɔbo lɛ toi ni wɔkase esui lɛ hu. Hɛɛ, suɔmɔ ni wɔɔná wɔha Nyɔŋmɔ lɛ biɔ toiboo.
14. Mɛni hewɔ abaanyɛ akɛɛ akɛ Nyɔŋmɔ mlai lɛ anɔyeli waaa lɛ?
14 Wɔle nibii ni aŋkroaŋkroi ní wɔsumɔɔ amɛ sane lɛ sumɔɔ kɛ nibii ní amɛhiɔ hu, ni wɔhiɔ shi yɛ nibii nɛɛ anaa. Wɔsumɔɔɔ ni wɔfeɔ nɔ ko ní esaaa mɛi ni wɔsumɔɔ amɛsane lɛ ahiɛ. Bɔfo Yohane ŋma akɛ: “Ejaakɛ enɛ ji Nyɔŋmɔ suɔmɔ lɛ, akɛ wɔye ekitãi lɛ anɔ; ni ekitãi lɛ waaa.” (1 Yohane 5:3) Ekitãi lɛ anɔyeli waaa, ni efaaa hu. Suɔmɔ kudɔɔ wɔnifeemɔi. Ehe ehiaaa ni wɔkase mlai babaoo koni nomɛi akudɔ wɔnifeemɔi; suɔmɔ ni wɔyɔɔ kɛha Nyɔŋmɔ lɛ kudɔɔ wɔ. Kɛ́ wɔsumɔɔ Nyɔŋmɔ lɛ, no lɛ wɔbaaná esuɔmɔnaa nifeemɔ he miishɛɛ. Kɛ́ wɔfee Nyɔŋmɔ suɔmɔnaa nii lɛ, wɔnáa ehiɛ duromɔ, ni enɛ he baa sɛɛnamɔ kɛhaa wɔ, ni asaŋ gbɛtsɔɔmɔi fɛɛ ni ekɛhaa lɛ yɛ kɛha wɔhilɛ-kɛhamɔ hewɔ.—Yesaia 48:17.
15. Mɛni baatsirɛ wɔ koni wɔkase Yehowa? Tsɔɔmɔ mli.
15 Suɔmɔ ni wɔyɔɔ kɛha Nyɔŋmɔ lɛ tsirɛɔ wɔ koni wɔkase sui ni eyɔɔ lɛ. Kɛ́ wɔsumɔɔ aŋkro ko sane lɛ, esubaŋ feɔ wɔ fɛo, ni wɔbɔɔ mɔdɛŋ koni wɔfee wɔnii tamɔ lɛ. Susumɔ wekukpaa ni kã Yehowa kɛ Yesu teŋ lɛ he okwɛ. Amɛkɛ nɔ ni fe afii akpekpei abɔ ehi ŋwɛi. Amɛyɛ suɔmɔ ni mli kwɔ ní pɛsɛmkunya bɛ mli kɛha amɛhe. Yesu feɔ enii tamɔ e-Tsɛ ni yɔɔ ŋwɛi lɛ aahu akɛ enyɛ ekɛɛ ekaselɔi lɛ akɛ: “Mɔ ni ena mi lɛ, ena tsɛ lɛ.” (Yohane 14:9) Yɛ be mli ní wɔnáa Yehowa kɛ e-Bi lɛ he nilee, ní wɔnáa hiɛsɔɔ kɛhaa amɛ lɛ, no tsirɛɔ wɔ koni wɔfee wɔnii tamɔ amɛ. Suɔmɔ ní wɔyɔɔ kɛha Yehowa kɛ yelikɛbuamɔ hu ní emumɔ krɔŋkrɔŋ lɛ kɛhaa wɔ lɛ baaye abua wɔ ni “[wɔ] jie gbɔmɔ momo lɛ kɛ enitsumɔi lɛ wɔshwie, ni [wɔ] wo gbɔmɔ hee” lɛ.—Kolosebii 3:9, 10; Galatabii 5:22, 23.
Nifeemɔ ni Tsɔɔ ákɛ Ayɛ Suɔmɔ
16. Wɔtsɔɔ shiɛmɔ kɛ nitsɔɔmɔ nitsumɔ ni wɔkɛ wɔhe woɔ mli lɛ nɔ wɔtsɔɔ akɛ wɔyɛ suɔmɔ kɛha Nyɔŋmɔ kɛ wɔnanemɛi adesai yɛ mɛɛ gbɛ nɔ?
16 Ákɛ Kristofoi lɛ, suɔmɔ ni wɔyɔɔ kɛha Nyɔŋmɔ kɛ wɔnanemɛi adesai lɛ kanyaa wɔ ni wɔkɛ wɔhe woɔ Maŋtsɛyeli shiɛmɔ kɛ kaselɔfeemɔ nitsumɔ lɛ mli. Enɛ ní wɔfeɔ lɛ haa wɔnáa Yehowa Nyɔŋmɔ ní “sumɔɔ akɛ ehere gbɔmɛi fɛɛ yiwala, koni amɛshɛ anɔkwale lɛ lee mli” lɛ hiɛ duromɔ. (1 Timoteo 2:3, 4) No hewɔ lɛ, wɔmli baanyɛ afili wɔ yɛ mɛi krokomɛi ni wɔyeɔ wɔbuaa amɛ koni aŋmala Kristo mla lɛ yɛ amɛtsui nɔ lɛ he. Ni wɔmii hu shɛɔ wɔhe jogbaŋŋ kɛ́ wɔna akɛ amɛmiitsake amɛsubaŋ ní amɛmiijie Yehowa Nyɔŋmɔ sui lɛ akpo lɛ. (2 Korintobii 3:18) Yɛ anɔkwale mli lɛ, nikeenii ni fe fɛɛ ní wɔbaanyɛ wɔkɛduro mɛi ji ní wɔɔye wɔbua amɛ ní amɛbale Nyɔŋmɔ. Mɛi ni sumɔɔ akɛ amɛkɛ Yehowa abɔ naanyo lɛ baanyɛ amɛkɛ lɛ abɔ kɛya naanɔ.
17. Mɛni hewɔ nilee yɔɔ mli ákɛ wɔɔná suɔmɔ wɔha Nyɔŋmɔ kɛ wɔnanemɛi adesai moŋ fe nɔ ni wɔɔná suɔmɔ wɔha heloonaa nibii lɛ?
17 Mɛi buɔ heloonaa nii waa yɛ jeŋ ni wɔ yɔɔ mli nɛɛ mli, ni amɛyaa nɔ amɛsumɔɔ enɛɛmɛi po. Ni kɛlɛ, heloonaa nibii ní mɔ yɔɔ lɛ ehiii shi kɛyaaa naanɔ. Abaanyɛ abaju loo ehiɛ baanyɛ akpata. (Mateo 6:19) Biblia lɛ bɔɔ kɔkɔ wɔ akɛ: “Je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yohane 2:16, 17) Hɛɛ, Yehowa baahi shi kɛya naanɔ, ni nakai nɔŋŋ ebaaba lɛ yɛ mɛi ni sumɔɔ lɛ ní amɛsɔmɔɔ lɛ hu lɛ agbɛfaŋ. Belɛ, ani nilee bɛ mli ákɛ wɔɔná suɔmɔ wɔha Nyɔŋmɔ kɛ wɔnanemɛi adesai moŋ fe nɔ ni wɔɔfee nakai yɛ heloonaa nii ní hiɔ shi be kukuoo lɛ gbɛfaŋ?
18. Sanekpakpa jajelɔ ko jie suɔmɔ ní hãa akɛ he shãa afɔle kpo yɛ mɛɛ gbɛ nɔ?
18 Mɛi ni jieɔ suɔmɔ kpo lɛ kɛ yijiemɔ bahaa Yehowa. Susumɔ Sonia ni ji maŋsɛɛ sanekpakpa jajelɔ ni yɔɔ Senegal lɛ he okwɛ. Ekɛ yoo ko ni atsɛ́ɔ lɛ Heidi, ní wu ní heee yeee lɛ hã ená AIDS muawai ni ji HIV lɛ eko lɛ kase Biblia lɛ. Abaptisi Heidi yɛ ewu gbele sɛɛ, shi etsɛɛɛ ni AIDS hela lɛ hã ayatsĩ enaa yɛ helatsamɔhe. Sonia tsɔɔ mli akɛ: “Mɛi ni tsuɔ nii yɛ helatsamɔhe lɛ kɛ yelikɛbuamɔ fɛɛ ní amɛbaanyɛ amɛkɛha lɛ hã, shi nitsulɔi lɛ ayi faaa. Afɔ̃ nine atsɛ́ nyɛmimɛi ni yɔɔ asafo lɛ mli koni amɛbaye amɛbua kɛkwɛ Heidi yɛ helatsamɔhe lɛ. Gbi ni ji enyɔ lɛ gbɛkɛ mli lɛ, miŋmɛ saa yɛ esaatso lɛ masɛi, ni miye mibua kɛkwɛ lɛ kɛyashi egbo. Datrɛfonyo ni kwɛɔ lɛ lɛ kɛɛ akɛ: ‘Naagba agbo ní wɔyɔɔ yɛ biɛ ji akɛ, bei pii lɛ, wekumɛi ní kɛ amɛwekunyo ní AIDS emɔ lɛ lɛ baa biɛ lɛ po kpooɔ lɛ amɛfɔ̃ɔ wɔnɔ ní amɛtsɔɔɔ biɛ kɛhooo. Mɛni hewɔ okɛ ohe wo nifeemɔ ni yɔɔ oshara tamɔ nɛkɛ mli, eyɛ mli akɛ ejeee owekunyo loo omaŋnyo, ni asaŋ esoro ehewolonɔ su hu yɛ onɔ̃ lɛ he?’ Migbála mli mitsɔɔ lɛ akɛ, kɛha mi lɛ, Heidi ji minyɛmiyoo diɛŋtsɛ, ni wɔsumɔɔ wɔhe waa oookɛɛ wɔjɛ musu kome mli. Miná he miishɛɛ waa ákɛ makwɛ minyɛmi ní mibale lɛ nɛɛ.” Duromɔ naa lɛ, Sonia kɛ nɔ fɔŋ ko ekpeee yɛ suɔmɔ mli ni ejɛ ekwɛ Heidi lɛ mli.
19. Akɛni wɔyɔɔ Nyɔŋmɔ mla lɛ yɛ wɔtsui amli hewɔ lɛ, mɛni esa akɛ wɔfee?
19 Ayɛ mɛi babaoo yɛ Yehowa tsuji ateŋ ní jieɔ suɔmɔ ní hãa akɛ he shãa afɔle kpo. Mla ní aŋma ko bɛ ni hãa ayɔseɔ Nyɔŋmɔ webii ŋmɛnɛ. Yɛ no najiaŋ lɛ, wɔnaa akɛ ŋmalɛ ni yɔɔ Hebribii 8:10 lɛ miiba mli. Wɔkaneɔ yɛ jɛmɛ akɛ: “Enɛ ji kpaŋmɔ ni mikɛ Israel we lɛ baakpaŋ yɛ nakai gbii lɛ asɛɛ lɛ, Nuŋtsɔ [Yehowa] lɛ kɛɛ: Mikɛ mimlai aaawo amɛjwɛŋmɔ mli, ni maŋma mawo amɛtsui mli, ni matsɔ amɛ-Nyɔŋmɔ, ni amɛ hu amɛaatsɔ mimaŋ.” Eba akɛ wɔmii aaashɛ mla ní Yehowa eŋmala yɛ wɔtsui nɔ lɛ he be fɛɛ be, ni wɔkɛ hegbɛi fɛɛ ní wɔɔná lɛ hu atsu nii kɛjie suɔmɔ kpo.
20. Mɛni hewɔ Kristo mla lɛ ji gboshinii ko ní anyɛŋ akɛ shika ahé lɛ?
20 Kwɛ miishɛɛ ni eji ákɛ wɔɔfata nyɛmimɛi ni yɔɔ jeŋ fɛɛ ní jieɔ suɔmɔ ni tamɔ nɛkɛ kpo lɛ ahe kɛsɔmɔ Nyɔŋmɔ. Mɛi ni aŋmala Kristo mla lɛ yɛ amɛtsui anɔ lɛ yɛ gboshinii ko ni anyɛŋ akɛ shika ahé yɛ jeŋ ni ajieee suɔmɔ kpo yɛ mli nɛɛ mli. Yehowa jieɔ suɔmɔ kpo etsɔɔ amɛ, ni nyɛmimɛi asuɔmɔ ní mli wa ni yɔɔ amɛteŋ lɛ hu hãa amɛmii shɛɔ amɛhe. “Kwɛ bɔ ni ehi, bɔ ni eyɔɔ fɛo, kɛ́ nyɛmimɛi fee ekome kɛhi shi lɛ!” Eyɛ mli akɛ Yehowa Odasefoi yɛ maji srɔtoi pii anɔ, ni amɛwieɔ wiemɔi srɔtoi, ni esoro amɛkusum nifeemɔi hu moŋ, shi jamɔ efee amɛ ekome, ni nɔ ko kwraa bɛ ni kɛ ekome ní amɛyɔɔ lɛ yeɔ egbɔ. Ekomefeemɔ nɛɛ hãa amɛnáa Yehowa hiɛ duromɔ. Lalatsɛ lɛ ŋma akɛ: “Yehowa ewo shi akɛ jɔɔmɔ kɛ wala baahi jɛi [mɛi ni suɔmɔ efee amɛ ekome lɛ ateŋ] kɛyashi naanɔ.”—Lala 133:1-3, NW.
Ani Obaanyɛ Oha Hetoo?
• Kitãi Nyɔŋma lɛ ahe yɛ sɛɛnamɔ yɛ mɛɛ gbɛ nɔ?
• Mɛni ji mla ni aŋmala yɛ tsui nɔ lɛ?
• Mɛɛ gbɛfaŋnɔ suɔmɔ tsuɔ yɛ “Kristo mla” lɛ mli?
• Mɛɛ gbɛ̀i anɔ wɔbaanyɛ wɔtsɔ wɔjie suɔmɔ kpo wɔtsɔɔ Nyɔŋmɔ kɛ wɔnanemɛi adesai?
[Nikasemɔ lɛ he Sanebimɔi]
[Mfoniri ni yɔɔ baafa 25]
Aha Israelbii lɛ mlai ní aŋmala yɛ tɛi tɛtrɛbii anɔ
[Mfonirii ni yɔɔ baafa 26]
Aŋmala Nyɔŋmɔ mla lɛ yɛ Kristofoi atsui mli
[Mfoniri ni yɔɔ baafa 28]
Sonia kɛ gbekɛyoo fioo ni jɛ Senegal lɛ shá mfoniri nɛɛ yɛ kpokpaa wulu nɔ kpee ní afee yɛ afi 2004 lɛ shishi
3