Yɛ Galilea Ŋshɔ lɛ Nɔ

SANE ni aŋma yɛ Marko 4:35-41 lɛ tsɔɔ akɛ Yesu kɛ ekaselɔi lɛ bote lɛlɛ ko mli koni amɛfo Galilea Ŋshɔ lɛ. Wɔkaneɔ yɛ jɛmɛ akɛ: “Ni ahum babaoo batswa, ni ŋshɔkei kumɔ wo lɛlɛ lɛ mli, ni eehe eyi. Ni lɛ lɛ eyɛ lɛlɛ lɛ sɛɛgbɛ, ni ekã sune [lɛ] nɔ ewɔ.”

Biɛ pɛ ji he ni atsĩ Hela wiemɔ kɛha “sune” lɛ tã yɛ Biblia lɛ mli. No hewɔ lɛ, woloŋlelɔi leee nɔ̃ diɛŋtsɛ ní wiemɔ nɛɛ ni akɛtsu nii yɛ biɛ lɛ tsɔɔ. Biblia shishitsɔɔlɔi pii tsɔɔ wiemɔ nɛɛ shishi akɛ “sune.” Shi te sune nɛɛ yɔɔ hã tɛŋŋ? Wiemɔ ni Marko kɛtsu nii akɛ sune lɛ tsɔɔ akɛ efata lɛlɛ lɛ mli nibii lɛ ahe. Lɛlɛ ko ní ayana yɛ Galilea Ŋshɔ lɛ naa yɛ afi 1986 mli lɛ ehã ana nɔ ni nakai Hela wiemɔ ni Marko kɛtsu nii lɛ shishinumɔ baanyɛ aji.

Nibii amlipɛimɔ eha ana akɛ abalaai kɛ tablɔi ji nɔ ni akɛkudɔɔ lɛlɛ ní kɛlɛ shɛɔ mitai 8 nɛɛ. Akɛ lɛlɛ nɛɛ yaa wuo, ni gbɛ agbo kã sɛɛ ní akɛ adrã yaa agbo ni tsii toɔ jɛmɛ. Aheɔ ayeɔ akɛ, akɛ lɛlɛ nɛɛ tsu nii kɛjɛ afi 100 D.Ŋ.B. kɛyashi afi 70 Ŋ.B., ni ákɛ etamɔ lɛlɛ henɔ ni Yesu kɛ ekaselɔi lɛ kɛtsu nii lɛ. Shelley Wachsmann ni fata mɛi ni yatsa lɛlɛ nɛɛ he lɛ ŋma wolo ni ji The Sea of Galilee Boat—An Extraordinary 2000 Year Old Discovery. Etsɔɔ akɛ sune ni Yesu kã nɔ ewɔ lɛ ji shia-kɛkotoku ni akɛfɔ̃ɔ lɛlɛ mli koni no aha emli atsii ní ekakpa afã ni ebutu. Wolɛɛnyo ko ni yɔɔ niiashikpamɔ ni jɛ Jaffa ni ehe esa waa yɛ adrã wuoyaa mli lɛ kɛɛ akɛ: “Beni miji oblanyo fioo lɛ, akɛ shia-kɛkotoku kome loo enyɔ shwieɔ lɛji ni mitsuɔ nii yɛ amɛmli yɛ Meditaranea ŋshɔ lɛ nɔ lɛ amli. . . . Akɛ shia-kɛkotokui lɛ shwieɔ lɛlɛ lɛ mli koni eha emli atsii ní ekakpa afã ni ebutu. Shi kɛ́ wɔkɛ shia-kɛkotokui lɛ tsuuu nii lɛ, wɔkɛtoɔ lɛlɛ lɛ shishi yɛ esɛɛ gbɛ. Kɛ́ etɔ mɔ ko lɛ, ewamɔɔ kɛyaa lɛlɛ lɛ shishi ni ekɛ shia-kɛkotoku lɛ eko feɔ sune ni ekãa nɔ ewɔɔ.”

Woloŋlelɔi babaoo heɔ yeɔ akɛ bɔ ni Marko tsɔɔ sane lɛ mli ehã lɛ tsɔɔ akɛ beni ahum lɛ tswaa lɛ, no mli lɛ Yesu kã shia-kɛkotoku ni yɔɔ lɛlɛ lɛ shishi yɛ esɛɛ gbɛ ni ji he ni yɔɔ shweshweeshwe fe fɛɛ lɛ nɔ ewɔ. Nɔ ni ba yɛ sɛɛ mli lɛ ji sane oti ni he hiaa waa shi jeee bɔ ni nakai sune lɛ yɔɔ ha. Yɛ Nyɔŋmɔ yelikɛbuamɔ kɛ ehewalɛ naa lɛ, Yesu hã ahum ni tswaa waa lɛ ŋmɛ dɛmm. Kaselɔi lɛ po bi akɛ: “Namɔ po nɛ, ni kɔɔyɔɔ kɛ ŋshɔ tete boɔ lɛ toi nɛɛ?”