Wala Shihilɛ He Sane

Miŋmɛ Mitsui Shi Akɛ Kristo Tabilɔ

TAAKƐ YURII KAPTOLA GBA

“Kpaako miná nɔmimaa akɛ ohemɔkɛyeli fá babaoo!” Nakai wiemɔ lɛ jɛ mɔ ko—ni eji Soviet asraafonyo nukpa—ni mikpaaa gbɛ akɛ ebaawie nakai lɛ naa, ni eji wiemɔ ni wo mi hewalɛ yɛ be ni sa jogbaŋŋ mli. No mli lɛ áwo mi tsuŋ ni baaye afii babaoo, ni mítsɔ hiɛ momo mikɛ ekãa esɔle kɛbi Yehowa dɛŋ yelikɛbuamɔ. No mli lɛ mikɛ shihilɛ ko ni mli wa ni sɛɛ tsɛɔ lɛ miikpe, ni ebaabi koni maŋmɛ mitsui shi ni mafĩ shi hu.

AFƆ́ mi yɛ October 19, afi 1962, ni mida yɛ Ukraine anaigbɛ. Yɛ nakai afi lɛ nɔ nɔŋŋ lɛ, mitsɛ ni atsɛ́ɔ lɛ hu akɛ Yurii lɛ kɛ Yehowa Odasefoi bɔi sanegbaa. Etsɛɛɛ ni ebatsɔ klɛŋklɛŋ Yehowa jálɔ yɛ wɔkrowa lɛ. Maŋ onukpai ni teɔ shi woɔ Yehowa Odasefoi lɛ na akɛ etsuɔ ejamɔŋ nifeemɔi lɛ ahe nii.

Ni kɛlɛ, wɔkutsoŋbii lɛ ateŋ mɛi babaoo kɛ bulɛ haa mifɔlɔi yɛ Kristofoi asui ni amɛyɔɔ kɛ bɔ ni amɛsusuɔ mɛi krokomɛi ahe amɛhaa lɛ hu hewɔ. Mifɔlɔi kɛ hegbɛi srɔtoi fɛɛ tsu nii ni amɛkɛdu suɔmɔ kɛha Nyɔŋmɔ amɛwo mi kɛ minyɛmimɛi yei etɛ lɛ amli kɛjɛ wɔgbekɛbiiashi tɔ̃ɔ, ni enɛ ji nɔ ni ye ebua mi ni mikɛdamɔ naagbai babaoo ni mikɛkpe yɛ skul lɛ naa. Naagba ko ni tamɔ nɛkɛ lɛ ba beni abi koni nikaselɔi lɛ fɛɛ atsɛ tsitsinaa-tsɛɛ nii ni baaha ayɔse amɛ akɛ Lenin’s October Children kuu lɛ mli bii lɛ. Ákɛ Kristofonyo ni kɛ ehe wooo maŋkwramɔŋ saji amli lɛ, mitsɛɛɛ tsitsinaa-tsɛɛ nii lɛ, ni yɛ no hewɔ lɛ, mibafee mɔ ni yɔɔ srɔto kwraa yɛ amɛteŋ.—Yohane 6:15; 17:16.

Sɛɛ mli beni miye aaafee afii nɛɛhu lɛ, abi koni nikaselɔi lɛ fɛɛ kɛ amɛhe awo Komunist  oblahii kɛ oblayei akuu ni atsɛ́ɔ lɛ Young Pioneers lɛ mli. Gbi ko lɛ, akɛ wɔklasbii lɛ tee skul yale lɛ mli koni ayaje nifeemɔ ni akɛheɔ mɛi awoɔ kuu lɛ mli lɛ shishi. Mishe enɛ feemɔ gbeyei, ejaakɛ mile akɛ abaaye mihe fɛo, ni abaawie mihiɛ nyanyaanya. Mɔ fɛɛ mɔ kɛ Pioneer kuu lɛ he mama kuku hee tsuru ni eyɔɔ lɛ jɛ shĩa kɛba, ja mikome too pɛ, ni nikaselɔi ni amɛyi fá babaoo lɛ to sɛrɛnɛɛ kɛdamɔ skul nɔkwɛlɔ lɛ, tsɔɔlɔi lɛ, kɛ skulbii ni yɔɔ onukpai aklas lɛ mli lɛ ahiɛ. Beni akɛɛ mɛi ni yɔɔ onukpai aklas lɛ mli lɛ akɛ amɛkɛ mamai kukuji lɛ abafimɔ wɔkuɛi lɛ, mima miyi shi kɛkwɛ shikpɔŋ, kɛ yiŋtoo lɛ akɛ mɔ ko mɔ ko enaŋ mi.

Ayawo Mi Tsuŋ yɛ Hei Srɔtoi ni Yɔɔ Shɔŋŋ

Beni miye afii 18 lɛ, ayawo mi tsuŋ afii etɛ yɛ maŋkwramɔŋ saji ni mikɛ mihe wooo mli lɛ hewɔ. (Yesaia 2:4) Misɔmɔ akɛ gboklɛfonyo yɛ klɛŋklɛŋ afi lɛ mli yɛ Trudovoye, yɛ Ukraine Kpokpaa ni ji Vinnitskaya lɛ mli. Beni miyɔɔ jɛmɛ lɛ, mikɛ Yehowa Odasefoi aaafee 30 kpe. Akɛni nɔkwɛlɔi lɛ sumɔɔɔ ni wɔkɛ wɔhe gbaa sane hewɔ lɛ, ajara wɔmli enyɔnyɔɔnyɔ ni aha wɔ nitsumɔ yɛ hei srɔtoi.

Yɛ August afi 1982 lɛ, akɛ mi kɛ Eduard—ni eji Odasefonyo kroko lɛ—wo oketeke ni akɛholeɔ gboklɛfoi lɛ mli kɛtee Ural Gɔji ni yɔɔ kooyigbɛ lɛ anɔ, ni gboklɛfoi krokomɛi hu fata wɔhe. Wɔkɛ gbii kpaanyɔ ŋmɛ wɔtsui shi, ejaakɛ wɔyi ní fa babaoo lɛ ha oketeke lɛ mli badɔ waa, ni nakai ebalɛ aahu kɛyashi wɔyashɛ Solikamsk Tsuŋwoohe ni yɔɔ Permskaya Kpokpaa lɛ nɔ lɛ. Akɛ mi yawo gboklɛfoi atsũ ko mli, ni akɛ Eduard yawo ekroko mli. Otsii enyɔ sɛɛ lɛ, akɛ mi tee kooyigbɛ shɔŋŋ yɛ Vels, yɛ Krasnovishersky kpokpaa lɛ nɔ.

Wɔtsɔne lɛ yashɛ nyɔɔŋteŋ, ni no mli lɛ duŋ ewo waa diɛŋtsɛ. Yɛ duŋ ni ewo nɛɛ fɛɛ sɛɛ lɛ, asraafonyo nukpa ko fã koni wɔkuu lɛ kɛ lɛlɛ afo faa ko. Wɔnaaa faa lɛ, ni wɔnaaa lɛlɛ lɛ hu! Ni kɛlɛ, wɔkɛ wɔniji tatara shi aahu kɛyashi wɔna lɛlɛ ko trukaa, ni eyɛ mli akɛ wɔtsui fã moŋ, shi wɔmia wɔhiɛ kɛfo faa lɛ shweshweeshwe. Beni wɔyaje faa lɛ sɛɛ lɛ, wɔnyiɛ kɛtee kane ko ni ekpɛ yɛ gɔŋ ko ni bɛŋkɛ lɛ nɔ lɛ he, ni wɔna ni ashi buui fioo komɛi yɛ jɛmɛ. Jɛmɛ baafee wɔshĩa hee. Mikɛ gboklɛfoi krokomɛi ni amɛyibɔ miihe ashɛ 30 lɛ hi buu wulu ko mli. Wɔmia wɔhiɛ yɛ fɛ̃ibe lɛ mli, ejaakɛ bei komɛi lɛ jeŋ jɔɔ ŋanii kɛyashɛɔ Celsius digrii 40 ni baa shi fe zɛro, ni buu lɛ mli hilɛ bɛ mlɛo. Gboklɛfoi lɛ anitsumɔ titri ji tsei afolɔmɔ, shi mitsu nii ákɛ mɔ ni maa asesei ehaa gboklɛfoi lɛ.

Akɛ Mumɔŋ Niyenii Ba Nsara ni Etse Ehe Banee ní Wɔyɔɔ Mli lɛ Mli

Mikome too pɛ ji Odasefonyo ni yɔɔ nakai shihilɛhe lɛ; ni kɛlɛ, Yehowa kwaaa mi. Gbi ko lɛ, minyɛ ní no mli lɛ eyɔɔ Ukraine anaigbɛ lolo lɛ kɛ nɔ ko ni efimɔ ewo nii amli lɛ maje mi. Beni bulɔi lɛ ateŋ mɔ kome gbele naa lɛ, nɔ̃ klɛŋklɛŋ ni ena ji Biblia bibioo ko. Ekɔ ni ebɔi mli gbelemɔ oyayaayai. Mibɔ mɔdɛŋ koni masusu nɔ ni mawie he koni akashɔ̃ mumɔŋ jwetri nɛɛ kɛjɛ midɛŋ. Trukaa kɛkɛ ni bulɔ lɛ bi akɛ, “Mɛni nɛ?” Dani masusu hetoo ni mikɛaaha lɛ he lɛ, polisifonyo nukpa ko ni damɔ wɔmasɛi lɛ here nɔ akɛ: “Oo! Wiemɔ komekomei ashishitsɔɔmɔ wolo ni.” Mikɛɛɛ nɔ ko nɔ ko. (Jajelɔ 3:7) Gboklɛfoi akwɛlɔ nukpa lɛ kwɛ nibii krokomɛi ni fata nɔ ni akɛba lɛ he lɛ mli, kɛkɛ ni ekɛ nomɛi kɛ Biblia ni misumɔɔ waa lɛ ha mi. Eŋɔɔ minaa aahu akɛ mijie ŋkatiɛ ni yɔɔ minibii lɛ amli lɛ eko miha lɛ. Nɛkɛ nibii ni minine shɛ nɔ nɛɛ ha minu he akɛ Yehowa hiɛ kpako minɔ. Eye ebua mi babaoo, ni etsu mimumɔŋ hiamɔ nii lɛ ahe nii.—Hebribii 13:5.

Mishiɛ ni Mifɔ̃ɔɔ

Nyɔji fioo komɛi asɛɛ lɛ, minaa kpɛ mihe beni nyɛmi nuu Kristofonyo ko ni awo lɛ tsuŋ yɛ he ko ni kɛ mi teŋ jɛkɛmɔ aaashɛ kilomitai 400 lɛ ŋma mi wolo lɛ. Ekɛɛ mi ní mitao nuu ko ni jie miishɛɛ kpo ni ekolɛ eyɔɔ nsara ni miyɔɔ mli lɛ mli. Nilee bɛ mli akɛ aaaŋma wolo ni mɛi fɛɛ aaanyɛ akane, ejaakɛ aheɔ wɔwoji ni wɔŋmalaa lɛ ni akwɛɔ mli. Efeee mi naakpɛɛ beni gboklɛfoi akwɛlɔi nukpai lɛ ateŋ mɔ kome tsɛ́ mi kɛtee ɔfis  ni eyɔɔ mli lɛ ni ekɛ hiɛdɔɔ bɔ mi kɔkɔ akɛ mikashiɛ lɛ. No sɛɛ lɛ, efã mi koni mikɛ miwaonaa gbɛi awo wolo ko shishi kɛtsɔɔ akɛ mikɛ mɛi krokomɛi egbaŋ mihemɔkɛyeli lɛ he sane dɔŋŋ. Mikɛɛ lɛ akɛ, akɛni mɔ fɛɛ mɔ le momo akɛ Yehowa Odasefonyo ji mi hewɔ lɛ, minaaa nɔ hewɔ ni esa akɛ mikɛ miwaonaa gbɛi awo sane ni tamɔ nɛkɛ shishi. Mitsĩ tã akɛ gboklɛfoi krokomɛi miitao koni amɛle nɔ hewɔ ni awo mi tsuŋ lɛ. Mɛni makɛɛ amɛ? (Bɔfoi lɛ Asaji 4:20) Gboklɛfoi akwɛlɔ nukpa lɛ yɔse akɛ enyɛŋ ewo mihe gbeyei, no hewɔ lɛ ekpɛ eyiŋ akɛ ebaajie mi kɛya he kroko. Akɛ mi tee nsara kroko mli.

Ajie mi kɛtee Vaya akrowa ní kɛ he ni miyɔɔ lɛ teŋ jɛkɛmɔ ji kilomitai 200 lɛ mli. Mɛi ni kwɛɔ minɔ yɛ jɛmɛ lɛ kɛ bulɛ ha mi yɛ bɔ ni mikpɛɔ miyiŋ yɛ saji ahe akɛ Kristofonyo lɛ hewɔ, ni amɛha mi nitsumɔ ni jeee asraafoi anitsumɔ ni—klɛŋklɛŋ lɛ, ákɛ kapintɛfonyo, kɛ no sɛɛ lɛ ákɛ mɔ ni sáa sarawa hewalɛ he nibii. Shi naagbai yɛ nitsumɔi nɛɛ ahe. Be ko lɛ, akɛɛ mi koni miyakɔlɔ minitsumɔ dadei lɛ koni mikɛya akrowa lɛŋ hiɛtserɛjiemɔhe lɛ. Beni miyashɛ jɛmɛ ní asraafoi ni yɔɔ hiɛtserɛjiemɔhe lɛ na mi lɛ, amɛná miishɛɛ waa. No mli lɛ, amɛnyɛɛɛ amɛsu kanei ni asuɔ kɛyeɔ asraafoi anitsumɔ he okadii ahe samai lɛ koni etsu nii jogbaŋŋ. Amɛmiitao ni maye mabua amɛ kɛsaa nibii nɛɛ akɛni amɛmiito gbɛjianɔ kɛha daa afi Red Army Day gbijurɔyeli lɛ hewɔ. Beni mikɛ sɔlemɔ susu nɔ ni mafee lɛ he migbe naa lɛ, mikɛɛ amɛ akɛ minyɛŋ matsu nitsumɔ ni tamɔ nɛkɛ. Mikɛ minitsumɔ dadei lɛ ha amɛ ni mishi mitee. Ayabɔ nɔ ni mifee nɛɛ he amaniɛ atsɔɔ nitsumɔ nɔkwɛlɔ lɛ sɛɛmɔ lɛ, ni nɔ ni fee mi naakpɛɛ ji akɛ ebo mihe saji ni akɛɔ lɛ lɛ toi, ni ehere nɔ akɛ: “Mibuɔ lɛ yɛ nɔ ni efee nɛɛ hewɔ. Eji nuu ni kɛ shishitoo mlai tsuɔ nii.”

Nɔ ni Tamɔ Hewalɛwoo Ko

Afii etɛ pɛpɛɛpɛ sɛɛ yɛ June 8, afi 1984 lɛ, ajie mi yɛ tsuŋwoo mli. Beni miku misɛɛ kɛtee Ukraine lɛ, ehe bahia ni maha asraafoi lɛ ale akɛ miji mɔ ko ni awo lɛ tsuŋ pɛŋ. Maŋ onukpai lɛ kɛɛ mi akɛ abaaye misane ekoŋŋ yɛ nyɔji ekpaa mli, ni enɛ hewɔ lɛ ebaafee nɔ ni hi akɛ mashi kpokpaa lɛ nɔ kwraa kɛya moŋ. No hewɔ lɛ, mishi Ukraine, ni yɛ naagbee lɛ miyaná nitsumɔ yɛ Latvia. Minyɛ́ mikɛ Odasefoi akuu bibioo ko ni yɔɔ maŋtiase ni ji Riga lɛ mli kɛ ehewɔ maji lɛ amli lɛ fee ekome kɛshiɛ ni mikɛ amɛ tee kpeei. Shi yɛ afi kome pɛ sɛɛ lɛ, atsɛ́ mi ekoŋŋ kɛha asraafoi anitsumɔ. Beni miyɔɔ ɔfis ni aheɔ mɛi yɛ lɛ, mikɛɛ asraafonyo lɛ akɛ, be ko ni eho lɛ, mikpoo asraafoi anitsumɔ. Ekɛ bolɔmɔ here mi nɔ akɛ: “Ani ole nɔ ni ofeɔ lɛ jogbaŋŋ? Ha wɔkwɛ nɔ ni obaakɛɛ asraafonyo nukpa lɛ!”

Ekɛ mi tee ŋwɛitsu ko nɔ, ni asraafonyo nukpa lɛ tá okpɔlɔ kakadaŋŋ ko he yɛ jɛmɛ. Beni migbaa lɛ nɔ ni ji miyiŋkpɛɛ yɛ sane lɛ he lɛ, ebo mi toi jogbaŋŋ, ni ekɛɛ mi akɛ esa akɛ masusu miyiŋkpɛɛ lɛ he ekoŋŋ dani mikɛ ajinafoi akuu ni heɔ mɛi amɛwoɔ asraafoi anitsumɔ lɛ mli lɛ akpe. Beni wɔshiɔ asraafonyo nukpa lɛ ɔfis lɛ, asraafonyo ni kã mihiɛ nyanyaanya kɛtsɔ hiɛ lɛ kɛ heshibaa kɛɛ mi akɛ: “Kpaako miná nɔmimaa akɛ ohemɔkɛyeli fá babaoo!” Beni miyapue yɛ asraafoi ajinafoi akuu lɛ hiɛ lɛ, misaa  mitsĩ tã ekoŋŋ akɛ mikɛ mihe wooo asraafoi anitsumɔ mli, ni amɛha mitee dã.

Yɛ nakai be lɛ mli lɛ, mihi gbɛfalɔi awɔɔhe ko. Gbi ko gbɛkɛ lɛ, minu ni mɔ ko miitswa mishinaa lɛ blɛoo. Migbele shinaa lɛ, ni mina nuu ko ni wo kootu, ni ehiɛ baagi bibioo ko. Ejie ehe shi etsɔɔ mi akɛ: “Miji Maŋ Hebuu Nitsumɔhe lɛ mlinyo. Mile akɛ oná naagbai, ni yɛ no hewɔ lɛ, abaayaye osane yɛ saneyelihe.” Miha hetoo akɛ: “Hɛɛ, eji anɔkwale.” Nuu lɛ tee nɔ ekɛɛ akɛ: “Wɔbaanyɛ wɔye wɔbua bo kɛ́ okpɛlɛ nɔ akɛ okɛ wɔ baafee ekome.” Mikɛɛ akɛ: “Dabi, nakai feemɔ ehiŋ. Maya nɔ mahiɛ mihemɔkɛyelii lɛ mli kpɛŋŋ ákɛ Kristofonyo.” Ebɔɔɔ mɔdɛŋ akɛ eeekɔne miyiŋ dɔŋŋ, ni eshi mi etee.

Asaa Ayawo Mi Tsuŋ, Shi Mikpaaa Shiɛmɔ

Yɛ August 26, afi 1986 lɛ, National Court of Riga lɛ kojo mi akɛ mahi tsuŋ afii ejwɛ, ni abaanyɛ minɔ kɛtsu nii, no hewɔ lɛ, akɛ mi tee Riga Central Prison lɛ. Amɛkɛ mi kɛ gboklɛfoi krokomɛi 40 wo gboklɛfoi atsu ko ni mli da lɛ mli, ni mibɔ mɔdɛŋ akɛ mashiɛ matsɔɔ mɔ fɛɛ mɔ ni yɔɔ nakai tsũ lɛ mli. Mɛi komɛi kɛɔ akɛ amɛheɔ Nyɔŋmɔ nɔ amɛyeɔ; shi mɛi krokomɛi hu ŋmɔɔ mi kɛkɛ. Nɔ ni miyɔse ji akɛ, abua hii lɛ anaa kuikui, ni yɛ otsii enyɔ sɛɛ lɛ nɛkɛ kui srɔtoi nɛɛ ahiɛnyiɛlɔi lɛ kɛɛ mi akɛ aŋmɛɛɛ mi gbɛ akɛ mishiɛ, ejaakɛ mikɛ amɛmlai ni amɛkɛ amɛnaabu jajeɔ amɛtsɔɔ lɛ tsuuu nii. Mitsɔɔ mli miha amɛ akɛ no nɔŋŋ hewɔ awo mi tsuŋ lɛ—esoro mlai ni mihiɔ shi yɛ naa.

Mitee nɔ mikɛ hiɛshikamɔ shiɛ, ni beni mina mɛi komɛi ni yɔɔ jamɔ he miishɛɛ lɛ, minyɛ mikɛ amɛteŋ mɛi ejwɛ kase Biblia lɛ. Kɛ nikasemɔ lɛ miiya nɔ lɛ, amɛŋmalaa Biblia mli shishijee tsɔɔmɔi lɛ amɛwoɔ wolo bibioo ko mli. Yɛ nyɔji fioo komɛi asɛɛ lɛ, akɛ mi tee nsara ni abuɔ mɛi ahe waa yɛ jɛmɛ lɛ mli, yɛ Valmiera maŋ lɛ mli, ni mitsu nii yɛ jɛmɛ akɛ sarawa hewalɛ he nibii asaalɔ. Minyɛ́ mikɛ sarawa hewalɛ he nibii asaalɔ kroko kase Biblia lɛ yɛ jɛmɛ, ni afii ejwɛ sɛɛ lɛ, ebatsɔ Yehowa Odasefonyo.

Yɛ March 24, afi 1988 lɛ, ajie mi kɛjɛ nsara ni abuɔ mɛi ahe waa yɛ mli lɛ mli kɛtee nsara ko ni bɛŋkɛ jɛmɛ lɛ mli. Enɛ bafee jɔɔmɔ wulu diɛŋtsɛ, ejaakɛ eha miná heyeli babaoo. Aha mitsu nii yɛ hei srɔtoi ni amaa tsu yɛ, ni mitaoɔ hegbɛi be fɛɛ be koni mikɛshiɛ. Bei pii lɛ, mishiɔ nsara lɛ mli ni miyashiɛɔ aahu kɛyashiɔ gbɛkɛ tuu, shi mináaa naagba kɔkɔɔkɔ kɛ́ miku misɛɛ kɛtee nsara lɛ mli.

Yehowa jɔɔ mimɔdɛŋbɔi lɛ anɔ. Odasefoi fioo komɛi yɛ kpokpaa lɛ nɔ, shi Odasefonyo kome pɛ yɔɔ maŋ lɛ diɛŋtsɛ mli, lɛ ji Vilma Krūmin̗a—nyɛmi yoo nukpa ko. Mifata Nyɛmiyoo Krūmin̗a he, ni wɔkɛ oblahii kɛ oblayei babaoo bɔi Biblia mli nikasemɔ feemɔ. Bei komɛi lɛ, nyɛmimɛi hii kɛ yei fãa gbɛ kɛjɛɔ Riga kɛbaa amɛbashiɛɔ, ni daa gbɛgbalɔi komɛi po jɛɔ Leningrad (amrɔ nɛɛ St. Petersburg) amɛbaa. Yɛ Yehowa dɛŋ yelikɛbuamɔ naa lɛ, wɔje Biblia mli nikasemɔi babaoo ashishi, ni etsɛɛɛ ni mikɛ mihe wo gbɛgbamɔ nitsumɔ lɛ mli, ni mikɛ ŋmɛlɛtswai 90 tsu nii daa nyɔŋ nɔ yɛ shiɛmɔ nitsumɔ lɛ mli.

Yɛ April 7, afi 1990 lɛ, asaa ato gbɛjianɔ koni akwɛ misane lɛ mli ekoŋŋ yɛ People’s Court ni yɔɔ Valmiera lɛ. Beni abɔi sane lɛ yeli lɛ, miyoo mlalelɔ ni kɛ toigbalamɔ haa lɛ. Eji oblanyo ko ni mikɛ lɛ egba Biblia mli sane pɛŋ! Eyoo mi, ni efee ehiɛ ŋmɔlɔŋmɔlɔ, shi ekɛɛɛ nɔ ko. Mikaiɔ nɔ ni kojolɔ lɛ kɛɛ mi yɛ saneyeli gbi lɛ nɔ lɛ lolo, akɛ: “Yurii, yiŋ ni akpɛ afii ejwɛ ni ho lɛ akɛ awo bo tsuŋ lɛ damɔɔɔ mla nɔ. Kulɛ esaaa akɛ amɛbuɔ bo fɔ́.” Shi kome too lɛ, miye mihe!

Kristo Tabilɔ

Yɛ June afi 1990 lɛ, ehe bahia ni maha aŋma migbɛi yɛ mɛi ahemɔ ɔfis lɛ mli shikome ekoŋŋ bɔni afee ni maná hegbɛ kɛhi Riga maŋ lɛ mli. Mibote ɔfis ní afii ejwɛ ni ho lɛ mikɛɛ asraafonyo nukpa lɛ yɛ mli akɛ mitsuŋ asraafoi anitsumɔ lɛ nɔŋŋ mli, ni okpɔlɔ kakadaŋŋ lɛ ma jɛmɛ nakai nɔŋŋ. Shi agbɛnɛ ete shi eŋa mi, ni eta  midɛ, ni ekɛɛ akɛ: “Eji hiɛgbeji asane akɛ enɛɛmɛi fɛɛ ba onɔ. Edɔ mi akɛ ebalɛ nakai.”

Miha hetoo akɛ: “Miji Kristo tabilɔ, ni esa akɛ matsu nitsumɔ ni akɛwo midɛŋ lɛ he nii. Kɛtsɔ yelikɛbuamɔ ni oooná kɛjɛ Biblia lɛ mli lɛ nɔ lɛ, bo hu obaanyɛ oná nɔ ni Kristo ewo esɛɛnyiɛlɔi lɛ ashi akɛ amɛbaaná mli ŋɔɔmɔ lɛ eko—no ji miishɛɛ shihilɛ kɛ wɔsɛɛ naanɔ wala.” (2 Timoteo 2:3, 4) Asraafonyo nukpa lɛ here nɔ akɛ: “Etsɛko tsɔ̃ ni mihe Biblia ko, ni amrɔ nɛɛ mikaneɔ.” Mihiɛ wolo ni ji Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ * lɛ. Migbele saneyitso ni gbaa naagbee gbii lɛ ahe okadi lɛ he sane lɛ, ni mitsɔɔ lɛ bɔ ni Biblia mli gbalɛ lɛ kɔɔ wɔbe nɛɛ he ehaa. Akɛni asraafonyo nukpa lɛ nya he waa diɛŋtsɛ hewɔ lɛ, esaa eta midɛ ekoŋŋ ni ekɛɛ mi akɛ minitsumɔ lɛ aya nɔ jogbaŋŋ.

Yɛ nɛkɛ be nɛɛ mli lɛ, ŋmɔji lɛ egba futaa diɛŋtsɛ bɔ ni sa kpamɔ yɛ Latvia. (Yohane 4:35) Yɛ afi 1991 lɛ, mibɔi sɔɔmɔ akɛ asafoŋ onukpa. No mli lɛ, asafoŋ onukpai enyɔ ni ahala pɛ yɔɔ maŋ muu lɛ fɛɛ mli! Afi kome sɛɛ lɛ, aja asafo kome pɛ ni yɔɔ Latvia lɛ mli enyɔ—Latvia wiemɔ nɔ̃ kome kɛ Russia wiemɔ nɔ̃ kome. Miná hegbɛ akɛ mikɛ asafo ni wieɔ Russia wiemɔ lɛ aaasɔmɔ. Asafo lɛ shwere oyayaayai aahu akɛ, no sɛɛ afi lɛ, aja asafo ni miyɔɔ mli lɛ mli etɛ! Kɛ misusu nɔ ni tee nɔ lɛ he lɛ, ebafeɔ faŋŋ akɛ Yehowa diɛŋtsɛ miikudɔ etooi lɛ kɛmiiba esafo lɛ mli.

Yɛ afi 1998 lɛ, ahala mi koni misɔmɔ akɛ gbɛgbalɔ krɛdɛɛ yɛ Jelgava ni ji maŋ ko ni kɛ Riga wuoyi-anaigbɛ jɛkɛmɔ ji kilomitai 40 lɛ. Nakai afi lɛ nɔŋŋ lɛ, miji mɔ klɛŋklɛŋ ni jɛ Latvia ni afɔ̃ lɛ nine kɛtee Sɔɔmɔ Tsɔsemɔ Skul ni afeɔ yɛ Russia wiemɔ mli yɛ Solnechnoye ni bɛŋkɛ St. Petersburg yɛ Russia lɛ. Beni miyɔɔ Sɔɔmɔ Tsɔsemɔ Skul lɛ, mibale bɔ ni ehe hiaa ni majie suɔmɔ kpo matsɔɔ mɛi bɔni afee ni maye omanye yɛ sɔɔmɔ nitsumɔ lɛ mli. Minya suɔmɔ kɛ mɔ he susumɔ ni Betel weku lɛ kɛ skul tsɔɔlɔi lɛ jie lɛ kpo amɛtsɔɔ wɔ lɛ he waa fe nibii ni atsɔɔ wɔ yɛ skul lɛ mli lɛ fɛɛ.

Tsakemɔ wulu kroko hu ba mishihilɛ mli yɛ afi 2001 beni mikɛ Karina ni ji Kristofonyo yoo ko ni he yɔɔ fɛo lɛ bote gbalashihilɛ mli lɛ. Karina bafata mihe yɛ be-fɛɛ sɔɔmɔ krɛdɛɛ lɛ mli, ni efeɔ hewalɛwoo kɛhaa mi kɛ́ mina akɛ miŋa ejɛ shiɛmɔ eeba ni ená miishɛɛ waa lɛ. Yɛ anɔkwale mli lɛ, sɔɔmɔ ni akɛhaa Yehowa lɛ haa anáa miishɛɛ babaoo. Shihilɛi ni mli wawai ni tee nɔ yɛ Komunist nɔyeli lɛ mli lɛ ha mina bɔ ni ehe hiaa akɛ mikɛ mihe afɔ̃ enɔ kwraa. Kɛ mɔ ko miisumɔ koni eha ekɛ Yehowa teŋ naanyobɔɔ lɛ aya nɔ ni efi enɔyeli lɛ sɛɛ lɛ, belɛ enɛ da kwraa fe afɔlei fɛɛ ni mɔ lɛ shãa lɛ. Yelikɛbuamɔ ni mikɛhaa mɛi krokomɛi koni amɛkase Yehowa he nii lɛ eha miná yiŋtoo yɛ mishihilɛ mli. Eji woo kpele kɛha mi akɛ masɔmɔ Yehowa “taakɛ Yesu Kristo tabilɔ kpakpa ko.”—2 Timoteo 2:3.

[Shishigbɛ niŋmaa]

[Mfoniri ni yɔɔ baafa 10]

Anyɛ minɔ koni matsu nii afii ejwɛ ni awo mi tsuŋ yɛ Riga Central Prison

[Mfoniri ni yɔɔ baafa 12]

Mi kɛ Karina miitsu nii yɛ shiɛmɔ nitsumɔ lɛ mli