Sanebimɔi ni Jɛ Kanelɔi Adɛŋ

Mɛni nɔ adamɔɔ awieɔ akɛ wiemɔi tamɔ “mɔ hu ni lɛ ekome eyɔɔ naanɔ shihilɛ ni gbele bɛ mli,” kɛ “mɔ ni gbɔmɔ ko gbɔmɔ ko enako lɛ dã, ni enyɛŋ lɛ ena hu lɛ” kɔɔ Yesu he, shi jeee Yehowa Nyɔŋmɔ he lɛ?

Bɔfo Paulo ŋma akɛ: “Nɔ ni hewalɛ nɔyelɔ kome ni ajɔɔ lɛ, maŋtsɛmɛi amaŋtsɛ kɛ nuŋtsɔmɛi anuŋtsɔ lɛ aaatsɔ yɛ lɛ diɛŋtsɛ ebe mli lɛ, mɔ hu ni lɛ ekome eyɔɔ naanɔ shihilɛ ni gbele bɛ mli, ni ehiɔ la ni anyɛŋ abɛŋkɛ mli lɛ, mɔ ni gbɔmɔ ko gbɔmɔ ko enako lɛ dã, ni enyɛŋ lɛ ena hu lɛ.”—1 Timoteo 6:15, 16.

Biblia mli saji ahe wielɔi biɔ akɛ: ‘Te aaafee tɛŋŋ ni akɛ wiemɔi tamɔ “mɔ hu ni lɛ ekome eyɔɔ naanɔ shihilɛ ni gbele bɛ mli,” “hewalɛ nɔyelɔ kome,” kɛ mɔ ni “gbɔmɔ ko gbɔmɔ ko enako lɛ dã, ni enyɛŋ lɛ ena hu lɛ,” atsu nii kɛkɔ mɔ kroko he fe Nyɔŋmɔ Ofe lɛ?’ Eji anɔkwale akɛ abaanyɛ akɛ nakai wiemɔi lɛ atsu nii kɛtsɔɔ bɔ ni Yehowa ji ha lɛ mli. Shi kɛlɛ, wiemɔi ni tsɔ 1 Timoteo 6:15, 16 lɛ hiɛ lɛ tsɔɔ akɛ Paulo miiwie Yesu he diɛŋtsɛ.

Paulo tsĩ ‘wɔ-Nuŋtsɔ Yesu Kristo puemɔ lɛ’ tã yɛ kuku 14 lɛ naagbee gbɛ. (1 Timoteo 6:14) Enɛ hewɔ lɛ, beni Paulo ŋma yɛ kuku 15 lɛ akɛ ‘nɔ ni hewalɛ nɔyelɔ kome ni ajɔɔ lɛ aaatsɔ yɛ lɛ diɛŋtsɛ ebe loo epuemɔ lɛ mli lɛ,’ no mli lɛ eewie Yesu puemɔ lɛ he, shi jeee Yehowa Nyɔŋmɔ he. Belɛ namɔ ji “hewalɛ nɔyelɔ kome” lɛ? Etamɔ nɔ ni shishinumɔ yɛ mli akɛ aaamu sane naa akɛ Hewalɛ Nɔyelɔ ni Paulo wie ehe lɛ ji Yesu. Mɛni hewɔ? Sane ni Paulo ŋma kɛtsɔ hiɛ lɛ tsɔɔ akɛ ekɛ Yesu miito adesai nɔyelɔi ahe. Taakɛ Paulo ŋma lɛ, Yesu ji “[adesai] maŋtsɛmɛi amaŋtsɛ kɛ [adesai] nuŋtsɔmɛi anuŋtsɔ” lɛɛlɛŋ. * Hɛɛ, kɛ́ akɛ Yesu to adesai anɔyelɔi ahe lɛ, lɛ ji ‘Hewalɛ Nɔyelɔ kome’ pɛ lɛ. Akɛ “nɔyeli kɛ anunyam kɛ maŋtsɛyeli” eha Yesu, “koni majimaji kɛ asafoi kɛ wiemɔi lɛ fɛɛ asɔmɔ lɛ.” (Daniel 7:14) Adesa nɔyelɔ ko kwraa bɛ ni baakɛɛ akɛ eyɛ nakai hegbɛ lɛ!

Ni wiemɔ ni ji “mɔ hu ni lɛ ekome eyɔɔ naanɔ shihilɛ ni gbele bɛ mli” lɛ hu? Shikome ekoŋŋ lɛ, Paulo miitsɔɔ srɔtofeemɔ ni yɔɔ Yesu kɛ adesai maŋtsɛmɛi ateŋ. Shikpɔŋ lɛ nɔ nɔyelɔ ko kwraa bɛ ni baanyɛ akɛɛ akɛ aha lɛ naanɔ shihilɛ ni gbele bɛ mli, shi Yesu baanyɛ awie nakai. Paulo ŋma akɛ: “Wɔle akɛ, ní atée Kristo shi kɛjɛ gbohii ateŋ nɛɛ, egboŋ dɔŋŋ; gbele yeŋ enɔ nuŋtsɔ dɔŋŋ.” (Romabii 6:9) Enɛ hewɔ lɛ, Yesu ji mɔ klɛŋklɛŋ ni awie ehe yɛ Biblia lɛ mli akɛ enine shɛ naanɔ shihilɛ ni gbele bɛ mli lɛ nɔ akɛ nikeenii. Yɛ anɔkwale mli lɛ, beni Paulo ŋmaa ewolo lɛ, no mli lɛ Yesu pɛ ji mɔ ni aha lɛ wala ni anyɛɛɛ akpata hiɛ dɔŋŋ lɛ.

Esa akɛ wɔha ehi wɔjwɛŋmɔ mli hu akɛ akɛni Yesu hu yɛ naanɔ shihilɛ ni gbele bɛ mli dɔŋŋ mli beni Paulo ŋmaa nakai wiemɔi lɛ hewɔ lɛ, ebaafee nɔ ni ejaaa akɛ Paulo aaakɛɛ akɛ Yehowa Nyɔŋmɔ pɛ ji mɔ ni yɔɔ naanɔ shihilɛ ni gbele bɛ mli lɛ mli. Shi Paulo baanyɛ ekɛ Yesu ato shikpɔŋ lɛ nɔ nɔyelɔi ahe ni ekɛɛ akɛ, Yesu pɛ ji mɔ ni yɔɔ naanɔ shihilɛ ni gbele bɛ mli lɛ mli.

Agbɛnɛ hu, eji anɔkwale ni kã shi faŋŋ akɛ abaanyɛ awie Yesu he yɛ eshitee kɛmiiya ŋwɛi lɛ sɛɛ lɛ akɛ “mɔ ni gbɔmɔ ko gbɔmɔ ko enako lɛ dã, ni enyɛŋ lɛ ena hu lɛ.” Eji anɔkwale akɛ, Yesu kaselɔi ni afɔ amɛ mu lɛ baana lɛ yɛ amɛgbele kɛ amɛshitee kɛmiiya ŋwɛi akɛ mumɔŋ bɔɔ nii lɛ sɛɛ. (Yohane 17:24) Shi adesa ko kwraa bɛ shikpɔŋ lɛ nɔ ni baana Yesu yɛ enunyam lɛ mli. Enɛ hewɔ lɛ, abaanyɛ awie yɛ anɔkwale mli akɛ, kɛjɛ beni atée Yesu shi kɛtee ŋwɛi nɛɛ, “gbɔmɔ ko gbɔmɔ ko” enako Yesu diɛŋtsɛ dã.

Eji anɔkwale akɛ, ebaanyɛ efee tamɔ nɔ ni nii amli tsɔɔmɔi ni yɔɔ 1 Timoteo 6:15, 16 lɛ mli lɛ kɔɔ Nyɔŋmɔ he kɛji akane klɛŋklɛŋ kwraa lɛ. Shi wiemɔi ni Paulo wie kɛtsɔ hiɛ—kɛ odaseyelii ni yɔɔ ŋmalɛi krokomɛi amli lɛ—tsɔɔ akɛ Paulo miiwie Yesu he.

[Shishigbɛ niŋmaa]