Ani Eji Nyɔŋmɔ loo Adesa?

“MI JI je lɛ mli la lɛ. Mɔ ni nyiɛɔ misɛɛ lɛ, enyiɛŋ duŋ mli gbi ko gbi ko, shi moŋ eeená wala la lɛ.” (Yohane 8:12) Yesu Kristo ji mɔ ni wie wiemɔi nɛɛ. Nuu nilelɔ ko ní hi shi yɛ klɛŋklɛŋ afii 100 lɛ mli lɛ ŋma yɛ ehe akɛ: “Mɔ mli ni aŋɔ ŋaa kɛ nilee jwetrii lɛ fɛɛ atee yɛ lɛ.” (Kolosebii 2:3) Kɛfata he lɛ, Biblia lɛ kɛɔ akɛ: “Enɛ ji naanɔ wala lɛ, ákɛ amɛaaná bo anɔkwa Nyɔŋmɔ koome lɛ, kɛ Yesu Kristo, mɔ ni otsu lɛ lɛ he nilee.” (Yohane 17:3, NW) Ehe miihia ni wɔná Yesu he anɔkwa nilee bɔni afee ni wɔnyɛ wɔtsu wɔmumɔŋ hiamɔ nii ahe nii.

Gbɔmɛi ni yɔɔ jeŋ fɛɛ lɛ ateŋ mɛi babaoo enu Yesu Kristo he sane. Ajeee bɔ ni ená adesai ayinɔsane nɔ hewalɛ eha lɛ he ŋwane. Yɛ anɔkwale mli lɛ, afi nɔ ní asusuɔ akɛ afɔ́ lɛ lɛ nɔ adamɔɔ afeɔ kalanda ni akɛtsuɔ nii yɛ je lɛŋ hei babaoo lɛ. The World Book Encyclopedia lɛ tsɔɔ mli akɛ: “Mɛi babaoo wieɔ bei ni tsɔ nakai afi nɔ ní afɔ́ lɛ lɛ hiɛ lɛ he akɛ B.C. loo before Christ (D.Ŋ.B. loo dani wɔŋmɛnɛŋmɛnɛ beaŋ). Amɛkɛ A.D. loo anno Domini, ní shishi ji yɛ wɔ Nuŋtsɔ lɛ afi lɛ mli (Ŋ.B. loo yɛ wɔŋmɛnɛŋmɛnɛ beaŋ) lɛ tsuɔ nii kɛdamɔɔ shi amɛhaa bei ni nyiɛ afi nɔ ní afɔ́ lɛ lɛ sɛɛ lɛ.”

Shi kɛlɛ, mɛi hiɛ susumɔi ni kɛ amɛhe kpãaa gbee yɛ mɔ ni Yesu ji lɛ he. Mɛi komɛi susuɔ akɛ eji mɔ ko kɛkɛ ní ehé gbɛi yɛ yinɔsane mli. Shi mɛi krokomɛi hu jáa lɛ ákɛ Nyɔŋmɔ Ofe. Hindubii komɛi hu kɛɔ akɛ Hindu nyɔŋmɔ ni ji Krishna ní mɛi babaoo kɛɔ akɛ eji nyɔŋmɔ ko ni ejie ehe kpo yɛ gbɔmɔ su mli lɛ ji Yesu Kristo. Ani Yesu ji gbɔmɔ ko kɛkɛ loo eji mɔ ko ni sa akɛ ajá lɛ? Namɔ eji diɛŋtsɛ? Nɛgbɛ ejɛ? Mɛɛ gbɔmɔ nɛkɛ eji? Ni nɛgbɛ eyɔɔ amrɔ nɛɛ? Taakɛ wɔbaana yɛ sane ni nyiɛ sɛɛ lɛ mli lɛ, wolo ni yɔɔ babaoo kɛɛmɔ yɛ Yesu he lɛ kɛ sanebimɔi nɛɛ ahetooi ni ja haa.