Ani Oji “Niiatsɛ yɛ Nyɔŋmɔ Gbɛfaŋ”?

ABƐBUAI ni haa mɔ susuɔ nii ahe ni Yesu Kristo kɛha lɛ ateŋ ekome kɔɔ shikpɔŋtsɛ ko ni yɔɔ nii babaoo he. Shikpɔŋtsɛ lɛ to eyiŋ akɛ ebaabɔ mɔdɛŋ ni emamɔ aboŋoi wujiwuji koni ekɛsaa ehe kɛha ewɔsɛɛ shweshweeshwe shihilɛ. Kɛlɛ, yɛ Yesu abɛbua lɛ mli lɛ, atsɛ nuu lɛ akɛ “kwashia.” (Luka 12:16-21) Biblia shishitsɔɔmɔi pii po kɛ wiemɔ ni ji “buulu” lɛ tsu nii. Mɛni hewɔ abu lɛ fɔ́ ni mli wa tamɔ nɛkɛ?

Ekã shi faŋŋ akɛ nuu niiatsɛ lɛ susuuu Nyɔŋmɔ he beni etoɔ eyiŋ lɛ; ni asaŋ ekɛ anunyam ko kwraa haaa Nyɔŋmɔ yɛ shikpɔŋ lɛ nibaa nii lɛ ahe. (Mateo 5:45) Yɛ no najiaŋ lɛ, eshwã akɛ: “Susuma, oyɛ nii babaoo ni aŋɔtoo afii pii; jɔɔmɔ ohe, ye ni onu, ni otsui anyɔ omli!” Hɛɛ, esusu akɛ nii ni ená kɛjɛ emɔdɛŋbɔi lɛ amli lɛ baabu ehe tamɔ “gbogbo grɔŋŋ.”—Abɛi 18:11.

Beni kaselɔ Yakobo bɔɔ kɔkɔ eshiɔ henɔwomɔ mumɔ ni tamɔ nɛkɛ lɛ, eŋma akɛ: “Belɛ agbɛnɛ nyɛ hu, nyɛ mɛi ní nyɛkɛɔ akɛ: Ŋmɛnɛ loo wɔ́ lɛ wɔɔtee nɛkɛ loo nɛkɛ maŋ nɛŋ, ní wɔyaye afi kome yɛ jɛi, ni wɔɔye jara, ni wɔɔná sɛɛ. Tsɛ nyɛleee wɔ́ sane. Ejaakɛ mɛni ji nyɛwala lɛ? Eji lamɔ ní pueɔ fioo ko, ni kɛ́ fee sɛɛ lɛ elaajeɔ.”—Yakobo 4:13, 14.

Yɛ wiemɔi nɛɛ anaa lɛ, akɛɛ nuu ni yɔɔ Yesu abɛbua lɛ mli lɛ akɛ: “Kwashia, nyɔɔŋ nɛŋ nɔŋŋ lɛ abaabi osusuma shi yɛ odɛŋ; ni nibii ní osaa oto lɛ, namɔ nɔ̃ aaatsɔ?” Taakɛ lamɔ ni laajeɔ ji lɛ, nuu niiatsɛ lɛ nyɛŋ etsu eyiŋtoi lɛ ahe nii dani ebaagbo. Ani wɔyɔse nikasemɔ ni yɔɔ sane nɛɛ mli lɛ? Yesu kɛɛ akɛ: “Nakai mɔ ni bɔɔ jwetri ehaa lɛ diɛŋtsɛ ehe, shi ejeee niiatsɛ yɛ Nyɔŋmɔ gbɛfaŋ lɛ yɔɔ.” Ani oji “niiatsɛ yɛ Nyɔŋmɔ gbɛfaŋ”?