Okadii Ashishinumɔ Ji Sane ni Hiɛdɔɔ Yɔɔ He!

“Klɛŋklɛŋ lɛ, misusu akɛ wɔbinuu Andreas yitso miigba lɛ kɛkɛ. Shi enyɛɛɛ eye nii jogbaŋŋ, ni atiridii gbonyo ko hu mɔ lɛ. Eyitsogbamɔ lɛ mli bawa, ni enɛ ha mihao. Beni miwu ba shĩa lɛ, wɔkɛ Andreas tee datrɛfonyo ni kwɛɔ lɛ lɛ ŋɔɔ. Datrɛfonyo lɛ kwɛ Andreas hela lɛ he okadii lɛ ni amrɔ nɔŋŋ lɛ, eha akɛ lɛ tee helatsamɔhe lɛ. Hela ni yeɔ lɛ lɛ fe yitsogbamɔ folo ko kɛkɛ. Andreas miiye hela ko ni mɔɔ jwɛŋmɔ kɛ sɛɛ wú lɛ. Afee lɛ tsofa, ni etsɛɛɛ ni ená hewalɛ ekoŋŋ.”—Gertrud ni eji nyɛ ko ni yɔɔ Germany.

EKOLƐ fɔlɔi babaoo ená Gertrud niiashikpamɔ lɛ eko pɛŋ. Amɛyɔseɔ okadii ni tsɔɔ akɛ ekolɛ amɛbi ko bɛ hewalɛ lɛ. Eyɛ mli akɛ jeee hela fɛɛ hela mli wa moŋ, shi kɛ́ fɔlɔi ku amɛhiɛ amɛshwie okadii ni tsɔɔ akɛ amɛbii lɛ ahe miiye lɛ anɔ lɛ, nɔ̃ gbonyo baanyɛ ajɛ mli kɛba. Okadii lɛ ní ayɔseɔ ní atsuɔ amɛhe nii jogbaŋŋ lɛ baanyɛ atsake shihilɛ lɛ hiɛ kwraa. Eji sane ni hiɛdɔɔ yɔɔ he.

Enɛ kɔɔɔ gbɔmɔtsoŋ hewalɛnamɔ he saji pɛ ahe. Nɔkwɛmɔnɔ ko ni maa enɛ nɔ mi ji ŋshɔŋ shikpɔŋhosomɔ oshara ni ba yɛ December afi 2004 yɛ hei ni bɛŋkɛ India Ŋshɔ lɛ. Nitsumɔhei ni yɔɔ hei tamɔ Australia kɛ Hawaii lɛ kpá shi amɛna akɛ shikpɔŋhosomɔ ni naa wa baaba yɛ Sumatra kooyigbɛ, ni amɛna oshara ni baanyɛ ajɛ mli kɛba yɛ no sɛɛ lɛ hu. Kɛlɛ, gbɛ ko kwraa bɛ ni abaanyɛ atsɔ nɔ abɔ mɛi ni yɔɔ hei ni oshara nɛɛ baaba yɛ lɛ kɔkɔ, loo ní aha amɛtsu kɔkɔbɔɔ ní akɛha lɛ he nii. Enɛ hewɔ lɛ, mɛi ni fa fe 220,000 sɔŋŋ awala ŋmɛɛ amɛ.

Okadii ni He Hiaa Fe Fɛɛ

Beni Yesu Kristo yɔɔ shikpɔŋ nɔ lɛ, etsɔɔ etoibolɔi lɛ nikasemɔ ko ni kɔɔ bɔ ni ayɔseɔ okadii ahaa ní atsuɔ amɛhe nii pɛpɛɛpɛ lɛ he. No mli lɛ, eewie nɔ ko ni he hiaa waa he. Biblia lɛ bɔɔ amaniɛ akɛ: “Farisifoi kɛ Sadukifoi lɛ baka lɛ, amɛbi lɛ akɛ etsɔɔ amɛ ŋwɛi okadi ko. Shi ehere nɔ ekɛɛ amɛ akɛ: Gbɛkɛ mli lɛ nyɛkɛɔ akɛ: Jeŋ baatse, ejaakɛ ŋwɛi etsu. Ni leebi lɛ nyɛkɛɔ akɛ: Ŋmɛnɛ nugbɔ baanɛ; ejaakɛ ŋwɛi etsu ni ehiɛ ehà. Osatofoi, nyɛle ŋwɛi hiɛ nibii amlibuu, shi yinɔi lɛ ahe okadii lɛ nyɛnyɛɛɛ nyɛbu lo?”—Mateo 16:1-3.

 “Yinɔi lɛ ahe okadii lɛ” atã ni Yesu tsĩ lɛ tsɔɔ akɛ kulɛ esa akɛ etoibolɔi lɛ ni ji klɛŋklɛŋ afii 100 lɛ mli Yudafoi lɛ ale akɛ bei ni amɛyɔɔ mli lɛ ji be ni esa ákɛ akɛ hehiamɔ afee nii. Etsɛŋ ni abaakpata Yudafoi anibii agbɛjianɔtoo lɛ hiɛ, ni enɛ baasa amɛ fɛɛ amɛhe. Beni eshwɛ gbii fioo ni Yesu baagbo lɛ, ekɛ ekaselɔi lɛ wie okadi kroko he—ba ni eba lɛ he okadi lɛ. Nɔ ni ekɛɛ yɛ nakai be lɛ mli lɛ he yɛ sɛɛnamɔ waa kɛha mɔ fɛɛ mɔ ŋmɛnɛ.