“Mɛi ni Kɛ Lɛji Nyiɛɔ Ŋshɔ Hiɛ”

AKƐ akɔɔble efee lɛlɛ kudɔlɔ ko ni miibɔ mɔdɛŋ koni ekudɔ elɛlɛ kɛtsɔ ahum ko mli he amaga ama Gloucester lɛjiadaamɔhe ni yɔɔ Massachusetts yɛ U.S.A. lɛ hiɛ. Afee amaga nɛɛ koni akɛkai Gloucester wolɛi akpei abɔ ni ale akɛ amɛgboi yɛ ŋshɔ mli lɛ. Nɔ ni aŋma yɛ kpoku ní amaga lɛ ma nɔ lɛ he ji wiemɔi ni jeɔ kpo yɛ Lala 107:23, 24 ní kaneɔ akɛ: “Mɛi ni kɛ lɛji nyiɛɔ ŋshɔ hiɛ, ní amɛyatsuɔ nii yɛ nui wuji lɛ ahiɛ lɛ, amɛ amɛnaa Yehowa nitsumɔi lɛ kɛ enaakpɛɛ nii lɛ yɛ ŋshɔ bui lɛ amli.”

Wuoyaa yɛ Atlantik ŋshɔ ní ewo loo jogbaŋŋ lɛ mli lɛ ji nitsumɔ ko ni yɔɔ oshara waa. Hii ni jɛ Gloucester ní amrɔ nɛɛ emlibii lɛ ayifalɛ shɛɔ 30,000 ni ale akɛ amɛwala ŋmɛɛ amɛ yɛ afii ni eho lɛ amli beni amɛyaa wuo lɛ ayifalɛ shɛɔ 5,368.

Amɛkaimɔ he saji fioo ní aŋma lɛ kaneɔ akɛ: “Ahumii ní naa wawai kɛ kɔɔyɔɔ ni naa wa ni tswaa kɛjɛɔ kooyi bokagbɛ ní haa ŋshɔkei lɛ feɔ hamahama lɛ hã amɛteŋ mɛi komɛi nyɔnyɔi. Mɛi krokomɛi hu gboi yɛ be mli ni lɛji bibii ni amɛ pɛ amɛyɔɔ mli lɛ kpalaŋ kɛjɛ lɛlɛ wulu ni bajie amɛ yɛ hei ni amɛhɛɔ yɛ lɛ. Meelei komɛi hu kɛ amɛhe kpe yɛ ahumii amli, ni amɛshiu musuŋshãa. Meelei wuji hu tswia lɛji nɛɛ ekomɛi ní baje amɛgbɛ nɔ lɛ amɛwo ŋshɔŋ.”

Amaga ní ashɔ̃ ní akɛkaiɔ wolɛi ni gboi nɛɛ haa anaa tɔlɛ ni yɔɔ amɛnitsumɔ lɛ mli kɛ osharai hu ni wolɛi kɛkpe yɛ afii ohai abɔ lɛ amli. Susumɔ bɔ ni mɛi fo amɛwumɛi, amɛtsɛmɛi, amɛnyɛmimɛi hii, kɛ amɛbii ni gboi yɛ wuoyaa mli lɛ kɛtsɔɔ bɔ ni amɛhiɛnɔkamɔ etã lɛ he okwɛ. Ni kɛlɛ, Yehowa Nyɔŋmɔ hiɛ kpaaa okulafoi, awusãi, kɛ mɛi ni gboi yɛ ŋshɔ hiɛ lɛ anɔ kɔkɔɔkɔ. Beni bɔfo Yohane wieɔ nifeemɔ ko ni baaya nɔ wɔsɛɛ lɛ he lɛ, ekɛɛ akɛ: “Ni ŋshɔ jie gbohii ni yɔɔ emli lɛ eha, ni gbele kɛ gbohiiaje jie gbohii ni yɔɔ amɛmli lɛ amɛha.” (Kpojiemɔ 20:13) Kɛ́ atée mɛi ni kɛ “lɛji nyiɛɔ ŋshɔ hiɛ” ní gboiɔ lɛ ashi lɛ, amɛbaana “Yehowa nitsumɔi” ni yɔɔ naakpɛɛ lɛ diɛŋtsɛ.