Yehowa Shiŋ Bo Gbi ko Gbi Ko

NO MLI lɛ, Kristofoi ni yɔɔ Yudea lɛ kɛ shitee-kɛwoo ni mli wa miikpe, ni esa akɛ amɛwu amɛshi susumɔ hu ní mɛi ni yɔɔ amɛkpokpai anɔ lɛ hiɛ yɛ ninámɔ he lɛ. Bɔfo Paulo tsɛ́ shiwoo ní Yehowa kɛha Israelbii lɛ beni amɛboteɔ Shiwoo Shikpɔŋ lɛ nɔ lɛ mli wiemɔi ayisɛɛ ni ekɛwo amɛ hewalɛ. Paulo ŋma akɛ: “Mishiŋo ni misaa mikwaŋo gbi ko gbi ko.” (Hebribii 13:5; 5 Mose 31:6) Ŋwanejee ko bɛ he akɛ shiwoo nɛɛ waje Hebribii Kristofoi ni hi shi yɛ klɛŋklɛŋ afii 100 lɛ mli lɛ.

Esa akɛ nakai shiwoo lɛ nɔŋŋ awaje wɔ hu koni wɔdamɔ “jaramɔ bei” ní wɔyɔɔ mli nɛɛ amli haomɔi lɛ anaa. (2 Timoteo 3:1) Kɛ́ wɔkɛ wɔhe fɔ̃ Yehowa nɔ, ni wɔkɛ wɔnifeemɔ tsɔɔ akɛ wɔyɛ hekɛnɔfɔɔ yɛ emli lɛ, no lɛ ebaawaje wɔ yɛ shihilɛ ni mli wawai lɛ po amli. Bɔni afee ni wɔna akɛ Yehowa yeɔ eshiwoo nɛɛ nɔ lɛ, nyɛhaa wɔkɛ mɔ nitsumɔ ní jeɔ edɛŋ trukaa lɛ afea he nɔkwɛmɔnɔ wɔkwɛa.

Shihilɛ ní Tsakeɔ Trukaa Naadaamɔ

Mɛi ni náaa nitsumɔ atsu lɛ ayifalɛ miiya hiɛ yɛ jeŋ fɛɛ. Taakɛ wolo tɛtrɛɛ ko ni afee yɛ Poland lɛ tsɔɔ lɛ, abuɔ nitsumɔ ni anáaa atsu lɛ akɛ “efata shihilɛ kɛ shika he naagbai ni mli wawai ahe.” Maji ni nitsumɔhe wuji fa yɛ jɛmɛ lɛ po yeee amɛhe yɛ naagba nɛɛ he. Ákɛ nɔkwɛmɔnɔ lɛ, beni shɛɔ afi 2004 lɛ, no mli lɛ maji ni yɔɔ Organization for Economic Cooperation and Development kuu lɛ mli lɛ amlibii ní náaa nitsumɔ amɛtsu lɛ ayifalɛ “etee hiɛ kɛteke akpekpei 32, ni tsɔɔ akɛ mɛi ni náaa nii amɛtsu yɛ nakai afi lɛ nɔ lɛ ayi fa kwraa fe mɛi ni náaa nɔ ko amɛtsu beni shika he naagba wulu ni ale lɛ akɛ Great Depression ni te shi yɛ afi 1930 afii lɛ amli ní no haaa mɛi aná nii amɛtsu lɛ tete.” Central Statistical Office (Nitsumɔhe ni Kɛ Nibii Ahe Akɔntaabuu Haa) ní yɔɔ Poland lɛ tsɔɔ akɛ beni shɛɔ December afi 2003 lɛ, no mli lɛ mɛi akpekpei etɛ bɛ nitsumɔ, ni yibɔ nɛɛ feɔ “mɛi ni edara ni baanyɛ atsu nii lɛ amli 100 mlijaa 18.” Wolo ko tsɔɔ mli akɛ, mɛi diji ni yɔɔ South Africa ni náaa nii atsu lɛ ayifalɛ tee hiɛ kɛyashɛ 100 mlijaa 47.8 yɛ afi 2002 mli!

Mɛi anitsumɔ ní jeɔ amɛdɛŋ trukaa kɛ mɛi ni ashwieɔ kɛjɛɔ nitsumɔ mli ní akpaaa gbɛ lɛ miihao mɛi diɛŋtsɛ, ni Yehowa tsuji hu fata he. “Be kɛ nibii ni aleee ni baa trukaa” lɛ baa mɔ fɛɛ mɔ nɔ. (Jajelɔ 9:11, NW) Kɛ́ shihilɛ ni tamɔ nakai banina wɔ lɛ, ekolɛ taakɛ lalatsɛ David wie lɛ, wɔ hu wɔbaawie akɛ: “Mitsui mli haomɔi lɛ fa.” (Lala 25:17) Ani obaanyɛ odamɔ shihilɛi ni  mli wawai tamɔ nakai anaa? Naagbai nɛɛ baanyɛ agba ohenumɔ naa, ni eha ohao yɛ mumɔŋ kɛ agbɛnɛ hu yɛ shihilɛ mli. Kɛ́ onitsumɔ je odɛŋ lɛ, ani obaanyɛ obadamɔ onaji anɔ ekoŋŋ taakɛ oyɔɔ tsutsu lɛ?

Henumɔŋ Naagbai Anaadaamɔ

Janusz Wietrzyński ni ji jwɛŋmɔ he nilelɔ lɛ tsɔɔ mli akɛ, “mɛi titri ní kɛ́ amɛnitsumɔ je amɛdɛŋ ní ehaoɔ amɛ waa ji hii,” ejaakɛ abuɔ amɛ akɛ mɛi ni sɔ̃ kã amɛnɔ akɛ amɛkwɛ amɛweku lɛ. Nilelɔ nɛɛ tsɔɔ mli akɛ kɛ́ nuu nitsumɔ je edɛŋ lɛ, no baanyɛ aha ejie “henumɔi komɛi ni esaaa kwraa akpo,” ni enɛ baaje shishi kɛ mlifu, ni sɛɛ mli lɛ ebaanu he akɛ anyɛŋ nɔ ko afee yɛ eshihilɛ lɛ he, ni no baaha enijiaŋ aje wui. Kɛ́ ashwie tsɛ ko kɛjɛ nitsumɔ mli lɛ, no baanyɛ aha eba bulɛ ni eyɔɔ kɛha ehe lɛ shi, ni enɛ baaha ekɛ “eweku lɛ” abɔi “bémɔ.”

Beni Adam ni ji Kristofonyo kɛ tsɛ ni yɔɔ bii enyɔ lɛ tsɔɔ bɔ ni enu he eha beni enitsumɔ je edɛŋ lɛ mli lɛ, ekɛɛ akɛ: “Nɔ ko fioo nɔŋŋ lɛ, mimli efũ; ni nɔ fɛɛ nɔ kwraa woɔ mimli la. Lamɔi ni milaa maŋkɛ̃ lɛ po kɔɔ nitsumɔ he, kɛ bɔ ni mafee makwɛ mibii lɛ kɛ miŋa ní lɛ hu ashwie lɛ trukaa yɛ nitsumɔ mli lɛ.” Beni Ryszard kɛ Mariola ni ji gbalashihilɛ mli hefatalɔi ni yɔɔ bi kome lɛ anitsumɔ fite lɛ, no mli lɛ amɛyafa shika babaoo yɛ shikatoohe ní esa akɛ amɛyawo nyɔmɔ. Ŋa lɛ tsɔɔ mli akɛ: “Enɛ tee nɔ ehao mi, ejaakɛ mihe nilee kɛɔ mi akɛ kulɛ esaaa akɛ wɔyafaa nakai shika lɛ. No mli lɛ, minuɔ he akɛ fɛɛ jɛ mi.” Kɛ́ wɔyaje shihilɛ ni tamɔ nakai mli lɛ, nɔ ko bibioo baanyɛ aha wɔmli afũ, wɔfee yeyeeye loo wɔmli awo la ní ehiii nɔ ko feemɔ. Belɛ, mɛɛ gbɛ nɔ wɔɔtsɔ wɔkudɔ henumɔi ní ehiii ni baanyɛ ate shi yɛ wɔmli lɛ?

Biblia lɛ kɛ gbɛ ni aaatsɔ nɔ aya nɔ ajie su kpakpa kpo he ŋaawoo ni hi jogbaŋŋ haa. Bɔfo Paulo wo ŋaa akɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsĩa nyɛtutɔmɔi lɛ atã yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!” (Filipibii 4:6, 7) Kɛ́ wɔsɔle wɔha Yehowa lɛ, wɔnáa “Nyɔŋmɔ hejɔlɛ” lɛ ni ji jwɛŋmɔŋ toiŋjɔlɛ ní wɔnáa yɛ hemɔkɛyeli ni wɔyɔɔ yɛ emli lɛ hewɔ lɛ. Adam ŋa Irena tsɔɔ mli akɛ: “Kɛ́ wɔmiisɔle lɛ, wɔtsĩɔ wɔnaagbai lɛ kɛ bɔ ni wɔhaŋ wɔshihilɛ afee haŋtsii lɛ atã wɔtsɔɔ Yehowa. Miwu ní no mli lɛ be fɛɛ be lɛ efee yeyeeye lɛ bɔi he numɔ akɛ wɔbaaná naagba lɛ naa tsabaa.”

Kɛ́ onitsumɔ je odɛŋ trukaa lɛ, no hu haa onáa hegbɛ koni okɛ ŋaawoo ni Yesu Kristo kɛha yɛ Gɔŋ nɔ Shiɛmɔ lɛ mli lɛ atsu nii. Ewie akɛ: “Nyɛkafea yeyeeye yɛ nyɛwala hewɔ, nɔ ni nyɛaaye kɛ nɔ ni nyɛaanu, aloo nyɛgbɔmɔtso lɛ hewɔ, nɔ ni nyɛaawo. . . . Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he aha nyɛ.” (Mateo 6:25, 33) Ryszard kɛ eŋa Mariola kɛ ŋaawoo nɛɛ tsu nii yɛ amɛhenumɔŋ naagbai lɛ ahe nitsumɔ mli. Mariola kɛɛ akɛ: “Miwu shɛjeɔ mimii be fɛɛ be, ni emaa nɔ mi kɛhaa mi akɛ Yehowa kwaŋ wɔ.” Ewu hu kɛfata he akɛ: “Ekome ní wɔfeɔ kɛsɔleɔ daa lɛ eha wɔtsi wɔbɛŋkɛ Nyɔŋmɔ kpaakpa, ni wɔfee ekome hu, ni no eha wɔná miishɛjemɔ ni he hiaa wɔ lɛ.”

Nyɔŋmɔ mumɔ krɔŋkrɔŋ lɛ hu baaye abua wɔ koni wɔnyɛ wɔdamɔ wɔnaagbai lɛ anaa. Mumɔ krɔŋkrɔŋ lɛ baanyɛ aha wɔná henɔyeli ni ji su ní baaye abua wɔ koni wɔŋmɛ wɔtsui shi lɛ. (Galatabii 5:22, 23) Ekolɛ wɔnáŋ enɛ feemɔ mlɛo, shi wɔbaanyɛ wɔtsu he nii ejaakɛ Yesu wo shi akɛ, ‘nyɛ-Tsɛ ni yɔɔ ŋwɛi lɛ baaŋɔ mumɔ krɔŋkrɔŋ lɛ eha mɛi ni biɔ lɛ lɛ.’—Luka 11:13; 1 Yohane 5:14, 15.

 Kaaku Ohiɛ Oshwie Omumɔŋ Hiamɔ Nii Anɔ

Nitsumɔ mli ni ashwieɔ mɔ kɛjɛɔ trukaa lɛ baanyɛ agba Kristofonyo ni yɔɔ mumɔŋ shidaamɔ kpakpa lɛ po naa yɛ shishijee mli, shi esaaa akɛ naagba ni tamɔ nakai haa wɔkuɔ wɔhiɛ wɔshwieɔ wɔmumɔŋ hiamɔ nii anɔ. Ákɛ nɔkwɛmɔnɔ lɛ, susumɔ Mose, mɔ ni beni eye afii 40 lɛ eshihilɛ fɛɛ tsake beni eŋmɛɛ odehei ahegbɛ ni eyɔɔ lɛ ní eyatsɔ tookwɛlɔ ni ji nitsumɔ ko ni Mizraimbii ebuuu kwraa lɛ he okwɛ. (1 Mose 46: 34) Ehe bahia ni Mose atsake ehe ewo shihilɛ mli ni eyaje lɛ mli. Afii 40 ni nyiɛ sɛɛ ba lɛ mli lɛ, Mose ŋmɛ gbɛ ni Yehowa tsɔse lɛ ni esaa lɛ kɛha nitsumɔi krokomɛi ni akɛbaawo edɛŋ lɛ atsumɔ. (2 Mose 2:11-22; Bɔfoi lɛ Asaji 7:29, 30; Hebribii 11:24-26) Shihilɛ ni mli wa ni Mose kɛkpe lɛ fɛɛ sɛɛ lɛ, etee nɔ eha ehiɛ hi emumɔŋ hiamɔ nii anɔ, ni ejɛ etsui mli ekpɛlɛ tsɔsemɔ ni Yehowa kɛha lɛ lɛ nɔ. Ekaba kɔkɔɔkɔ akɛ shihilɛi ni ehiii ní wɔkɛkpeɔ lɛ baaha wɔku wɔhiɛ wɔshwie wɔmumɔŋ hiamɔ nii anɔ!

Eyɛ mli akɛ nitsumɔ ni jeɔ mɔ dɛŋ trukaa lɛ nyɛɔ ehao mɔ waa moŋ, shi beni wɔkɛ shihilɛ ni tamɔ nakai ekpe ji be ni hi jogbaŋŋ ní wɔkɛaaha tsakpaa ni kã wɔkɛ Yehowa Nyɔŋmɔ kɛ ewebii ateŋ lɛ mli awa. Adam ní atsĩ etã kɛtsɔ hiɛ lɛ yɔse enɛ. Ewie akɛ: “Beni mi kɛ miŋa fɛɛ nitsumɔ fite lɛ, ebaaa wɔjwɛŋmɔ mli kɔkɔɔkɔ akɛ wɔɔfɔ̃ɔ Kristofoi akpeeiyaa loo ní wɔɔtse be ni wɔkɛtsuɔ sanekpakpa jajemɔ nitsumɔ lɛ nɔ. Nakai jwɛŋmɔ ni wɔyanáaa lɛ ye bua wɔ ni wɔhaooo wɔhe tuutu yɛ bɔ ni wɔshihilɛ baaji aha wɔsɛɛ lɛ he.” Beni Ryszard jieɔ susumɔ ni tamɔ nakai nɔŋŋ kpo lɛ, ekɛɛ akɛ: “Kɛ́ jeee kpeei ní wɔyaa kɛ shiɛmɔ nitsumɔ lɛ ní wɔkɛ wɔhe woɔ mli kulɛ, wɔnyɛŋ wɔdamɔ naagba lɛ naa; kulɛ ekã shi faŋŋ akɛ jwɛŋmɔ sɔŋŋ haŋ wɔnyɛ wɔhe nɔ ko kwraa wɔfee. Nyɔŋmɔ he saji ni wɔkɛ mɛi krokomɛi gbaa lɛ hu woɔ wɔ hewalɛ, ejaakɛ sanegbai ni tamɔ nakai lɛ haa  wɔsusuɔ amɛhiamɔ nii ahe, ni no haaa wɔye wɔtsui yɛ wɔnɔ̃ lɛ he.”—Filipibii 2:4.

Hɛɛ, yɛ nɔ najiaŋ ni oooye otsui yɛ nitsumɔ ní onáaa otsu lɛ he lɛ, bɔɔ mɔdɛŋ ni okɛ be ni oná lɛ atsu nii ni okɛ ohe awo mumɔŋ nibii tamɔ nikasemɔ ni bo diɛŋtsɛ ooofee, asafoŋ nitsumɔi ni okɛ ohe aaawo mli aloo osɔɔmɔ nitsumɔ lɛ ní ooolɛɛ mli lɛ nɛkɛ. Kɛ́ eba lɛ nakai lɛ, yɛ nɔ najiaŋ ni ooohi shi ní otsuuu nɔ ko lɛ, ‘obaateke nɔ yɛ Nuŋtsɔ lɛ nitsumɔ lɛ mli,’—no baaha bo kɛ aŋkroaŋkroi ni hiɛ tsui kpakpa ni boɔ Maŋtsɛyeli lɛ he shɛɛ sane ni oshiɛɔ lɛ toi lɛ fɛɛ aná miishɛɛ.—1 Korintobii 15:58.

Tsu Oweku lɛ Heloonaa Hiamɔ Nii Ahe Nii

Shi kɛlɛ, mumɔŋ niyenii haaa mɔ atɔ ní hɔmɔ yeee lɛ. Esa akɛ wɔha shishitoo mla ní kɛɔ akɛ: “Shi kɛ́ mɔ ko kwɛɛɛ lɛ diɛŋtsɛ emɛi, titri lɛ lɛ diɛŋtsɛ eshiabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ” lɛ ahi wɔjwɛŋmɔ mli. (1 Timoteo 5:8) Adam wie akɛ: “Eyɛ mli akɛ nyɛmimɛi ni yɔɔ asafo lɛ mli lɛ jɛɔ amɛsuɔmɔ mli amɛyeɔ amɛbuaa wɔ kɛ heloonaa nii moŋ, shi akɛ Kristofoi lɛ, sɔ̃ kã wɔnɔ akɛ wɔtao nitsumɔ wɔtsu.” Eyɛ mli akɛ wɔbaanyɛ wɔkɛ wɔhe afɔ̃ Yehowa kɛ ewebii lɛ anɔ kɛha yelikɛbuamɔ moŋ, shi esaaa akɛ wɔhiɛ kpaa nɔ kɔkɔɔkɔ akɛ ehe miihia ni wɔbɔ mɔdɛŋ koni wɔtao nitsumɔ.

Mɛni esa akɛ ofee? Adam tsɔɔ mli akɛ: “Kaaata shi anyagba ní oomɛ koni Nyɔŋmɔ afee naakpɛɛ nii yɛ ogbɛfaŋ. Kɛ́ ootao nitsumɔ lɛ, kaashashao shi akɛ oooha ale akɛ oji Yehowa Odasefonyo. Bei pii lɛ, nitsumɔtsɛmɛi náa he miishɛɛ ákɛ amɛaale enɛ.” Ryszard woɔ ŋaa akɛ: “Ha mɛi fɛɛ ni ole lɛ aná ale akɛ ootao nitsumɔ, be fɛɛ be lɛ, yaakwɛ akɛ nitsumɔhe ni taoɔ nitsumɔ haa mɛi lɛ baaná nɔ ko aha bo ni otsu lo, kanemɔ adafitswai ni kɔɔ nitsulɔi ní aatao ahé awo nitsumɔ mli lɛ ahe saji tamɔ: ‘Aatao yoo ko ní ebakwɛ kpajelɔ’; loo ‘Aatao mɔ ko ní ebakpa ŋmɔshi nii yɛ be kukuoo mli’ ní jeɔ kpo yɛ adafitswaa woji amli lɛ. Yaa nɔ otao! Kaahala niiaŋ fe nine, ni kɛ́ eba lɛ akɛ nitsumɔ ni obaaná lɛ baa shi kwraa fe nɔ ni okpaa gbɛ po lɛ, bo lɛ tsu.”

Hɛɛ, ‘Yehowa ji oyelikɛbualɔ.’ ‘Eshiŋo ni esaa ekwaŋo gbi ko gbi ko.’ (Hebribii 13:5, 6) Esaaa akɛ ofeɔ yeyeeye fe nine. Lalatsɛ David ŋma akɛ: “Gbɛ ní onyiɛ nɔ lɛ, ŋɔɔfɔ̃ Yehowa nɔ, ní oŋɔ ohiɛ ofɔ̃ enɔ, ni eeefee.” (Lala 37:5) ‘Gbɛ ní wɔnyiɛ nɔ lɛ ní wɔɔŋɔfɔ̃ Yehowa nɔ’ lɛ biɔ ni wɔkɛ wɔhe afɔ̃ enɔ, ni wɔfee nii yɛ gbɛ ní ekpɛlɛɔ nɔ lɛ naa ekɔɔɔ he eko kɛ́ wɔkɛ shihilɛ ni ehiii po kpe.

Adam kɛ Irena bɔ amɛhewɔ mɔdɛŋ amɛtao nɔ ko amɛtsu kɛkwɛ amɛhe, ni nɔ ni amɛtsuɔ ji akɛ amɛtsumɔɔ mɛi asamfɛji ahe kɛ atrakpoi anɔ amɛhaa amɛ, ni agbɛnɛ hu jeee nɔ fɛɛ nɔ ní amɛaana kɛkɛ amɛhéɔ, shi moŋ amɛkɛ hiɛshikamɔ héɔ nii. Amɛyaa nitsumɔhe ní taoɔ nitsumɔ haa mɛi lɛ aŋɔɔ daa ákɛ amɛaaná nitsumɔ amɛha amɛ lo. Irena wie akɛ: “Be fɛɛ be ní ebaahia wɔ lɛ, wɔnine shɛɔ yelikɛbuamɔ nɔ.” Ewu hu kɛfata he akɛ: “Niiashikpamɔ ni wɔná lɛ tsɔɔ akɛ, saji ni wɔtsĩɔ tã yɛ wɔsɔlemɔi amli lɛ jeee nibii diɛŋtsɛ ni kɛ Nyɔŋmɔ suɔmɔnaa nii kpãa gbee. Enɛ eha wɔle akɛ esaaa akɛ wɔkɛ wɔhe fɔ̃ɔ wɔdiɛŋtsɛ wɔnilee nɔ, shi moŋ esa akɛ wɔkɛ wɔhe afɔ̃ enilee lɛ nɔ. Ehi jogbaŋŋ akɛ wɔɔŋmɛ wɔtsui shi ni wɔkwɛ bɔ ni Nyɔŋmɔ baatsu saji ahe nii eha.”—Yakobo 1:4.

Ryszard kɛ Mariola kɛ amɛhe wo nitsumɔi bibii komɛi atsumɔ mli, ni yɛ nakai bei amli nɔŋŋ lɛ amɛkɛ amɛhe wo odaseyeli nitsumɔ lɛ mli yɛ hei ni hiamɔ lɛ da yɛ. Ryszard wie akɛ: “Be mli ni wɔbɛ nɔ ni wɔbaaye lɛ, wɔnáa nitsumɔ ni sa wɔtsuɔ. Wɔkpooɔ nitsumɔi ni nyɔmɔwoo lɛ hi shi ehaŋ wɔnyɛ wɔtsu teokrase gbɛnaa nii ní jwere wɔnɔ lɛ ahe nii lɛ. Wɔmiisumɔ ni wɔmɛ Yehowa.” Gbalashihilɛ mli hefatalɔi nɛɛ heɔ amɛyeɔ akɛ Yehowa kɛ ehe wo saji amli, ni no ha amɛyaná tsũ ko ni jara baa shi amɛhai, ni yɛ naagbee lɛ, Ryszard yaná nitsumɔ.

Eyɛ dɔlɛ akɛ mɔ nitsumɔ aaaje edɛŋ, shi mɛni hewɔ kɛ́ wɔkɛ shihilɛ ni tamɔ nakai kpe lɛ, wɔŋɔɔɔ lɛ akɛ eji hegbɛ ni wɔna ni wɔkɛaana akɛ Yehowa shiŋ wɔ gbi ko gbi ko? Yehowa tsuɔ wɔhiamɔ nii lɛ ahe nii ehaa wɔ. (1 Petro 5:6, 7) Etsɔ gbalɔ Yesaia nɔ ewo shi akɛ: “Kaakwɛkwɛɛ ohe, shi mi ji o-Nyɔŋmɔ lɛ! Mawajeo, ni maye mabuao.” (Yesaia 41:10) Kaaŋmɛ gbɛ kɔkɔɔkɔ ni shihilɛ ko ni okpaaa gbɛ, ní nitsumɔ ni jeɔ mɔdɛŋ trukaa hu fata he lɛ ha onijiaŋ miije wui. Feemɔ bɔ ni obaanyɛ ni oshi nɔ ni eshwɛ lɛ owo Yehowa dɛŋ. Mɛɛ Yehowa, ‘yɛ dioofeemɔ mli.’ (Yaafo 3:26) Kɛ́ ofee nakai lɛ, ebaajɔɔ bo babaoo.—Yeremia 17:7.

[Mfoniri ni yɔɔ baafa 9]

Okɛ nakai be lɛ atsu mumɔŋ nibii ahe nii

[Mfonirii ni yɔɔ baafa 10]

Kasemɔ bɔ ni akɛ hiɛshikamɔ héɔ nii, ni kaahala nitsumɔ mli fe nine kɛ́ ootao eko