Ani Mɔ Ko Baanyɛ Atsake Jeŋ Shihilɛ Lɛɛlɛŋ?

“Ohiafoi kɛɔ wɔ akɛ toiŋjɔlɛ kɛ shweshweeshwe shihilɛ he miihia amɛ fe nɔ fɛɛ nɔ—ni agbɛnɛ hu koni aha amɛná hegbɛi ni amɛkɛha amɛshihilɛ aya hiɛ. Amɛmiisumɔ ni amɛná maŋ kɛ majimaji ateŋ gbɛjianɔtoi ni sa jogbaŋŋ bɔni afee ni hewalɛ ni maji ni yɔɔ nii kɛ nitsumɔhei ni yɔɔ nii lɛ yɔɔ lɛ akatsĩ mɔdɛŋ ni amɛbɔɔ lɛ naa.”

NƐKƐ ji bɔ ni majimaji ateŋ nitsumɔhe ko ni kɛ yelikɛbuamɔ haa mɛi ni eyaje fimɔ mli lɛ anɔkwɛlɔ ko tsɔɔ hiɛnɔkamɔi kɛ gbɛkpamɔi ni ohiafoi yɔɔ lɛ mli eha. Yɛ anɔkwale mli lɛ, ewiemɔi lɛ tsɔɔ nɔ ni mɛi fɛɛ ni ena amanehulu kɛ mɛi ni aye amɛ sane ni ejaaa ni yɔɔ je lɛŋ lɛ baasumɔ ni amɛná lɛ mli jogbaŋŋ. Amɛ fɛɛ amɛmiisumɔ ni amɛná jeŋ ni toiŋjɔlɛ diɛŋtsɛ kɛ shweshweeshwe shihilɛ yɔɔ mli. Ani abaaná jeŋ ni tamɔ nakai gbi ko? Ani mɔ ko yɛ  nyɛmɔ kɛ hewalɛ lɛɛlɛŋ ni ebaanyɛ ekɛtsake jeŋ ni yeee jalɛ sane kwraa nɛɛ?

Mɔdɛŋ ni Abɔɔ ní Akɛtsake Nibii

Mɛi babaoo ebɔ mɔdɛŋ akɛ amɛkɛ tsakemɔ aba. Ákɛ nɔkwɛmɔnɔ lɛ, Florence Nightingale, ni eji England yoo ni hi shi yɛ afi 1800 afii lɛ amli lɛ kɛ ewala shihilɛ fɛɛ tsu nii bɔni afee ni eha helatsɛmɛi aná kwɛmɔ kpakpa yɛ gbɛ ni yɔɔ falefale nɔ. Yɛ egbii lɛ amli—dani akɛ tsofai ni gbeɔ muawai aaatsu nii—lɛ, no mli lɛ helatsɛmɛi akwɛmɔ bɛ tamɔ bɔ ni wɔnaa lɛ ŋmɛnɛ lɛ. Wolo ko wie akɛ, “Helatsɛmɛi akwɛlɔi leee woloŋ, amɛhe bɛ falefale, ni ale amɛ akɛ mɛi ni tɔɔ dãa kɛ mɛi ni kɛ amɛhe woɔ jeŋba shara mli.” Ani Florence Nightingale ye omanye yɛ mɔdɛŋ ni ebɔ akɛ etsake gbɛ ni atsɔɔ nɔ akwɛɔ helatsɛmɛi ahaa lɛ mli? Hɛɛ, eye omanye. Nakai nɔŋŋ mɛi babaoo ni amɛsusuɔ mɛi ahe ni amɛfeee pɛsɛmkunya hu lɛ eye omanye yɛ shihilɛ mli nibii babaoo ahiɛyaa amli—nikanemɔ kɛ niŋmaa, wolokasemɔ, tsofafeemɔ, tsũmaa, gbɛjianɔi ni atoɔ kɛha mɛi alɛɛ, kɛ́ wɔɔtsĩ fioo komɛi pɛ atã. Nɔ ni ejɛ mli kɛba ji akɛ áha ohiafoi akpekpei abɔ ashihilɛ etee hiɛ yɛ gbɛ ni sa kadimɔ nɔ.

Shi kɛlɛ, wɔnyɛŋ wɔku wɔhiɛ wɔfɔ shihilɛ ni mli wa ni akɛkpeɔ diɛŋtsɛ nɛɛ nɔ: Tawuu, awuiyeli, hela, hɔmɔ, kɛ osharai krokomɛi eha gbɔmɛi akpekpei ohai abɔ kã he amɛmiiná nɔ lolo. Ireland nitsumɔhe ni kɛ yelikɛbuamɔ haa, ni ji Concern lɛ wie akɛ: “Ohia gbeɔ mɛi 30,000 daa gbi.” Ni nyɔŋyeli po ni ji nifeemɔ ni mɛi babaoo ni sumɔɔ ni amɛtsake nifeemɔi ahiɛ lɛ taoɔ akɛ amɛgu yɛ afii ohai abɔ ni eho lɛ amli lɛ miiya nɔ waa lolo. Disposable People—New Slavery in the Global Economy wolo lɛ kɛɛ akɛ: “Nyɔ́ji ni yɔɔ ŋmɛnɛ lɛ ayi fa kwraa fe mɛi ni ahé kɛjɛ Afrika akɛ nyɔ́ji kɛfo Atlantic Ŋshɔ lɛ.”

Mɛni eha mɔdɛŋ ni mɛi bɔɔ koni amɛkɛ tsakemɔ aba kwraa, ni amɛha ehi shi daa hu lɛ efee efolo lɛ? Ani ejɛ hewalɛ ni niiatsɛmɛi kɛ nɔyelɔi yɔɔ ni amɛkɛtsuɔ nii yɛ gbɛ ni ejaaa nɔ lɛ, aloo nɔ ko ni fe nakai fata he?

Nibii ni Haaa Anyɛ Akɛ Tsakemɔi Aba

Nyɔŋmɔ Wiemɔ lɛ tsɔɔ akɛ Satan Abonsam ji mɔ titri ni haaa mɔdɛŋ ni adesai bɔɔ koni amɛha aye jalɛ sane diɛŋtsɛ yɛ je lɛ mli lɛ aye omanye lɛ. Bɔfo Yohane kɛɔ wɔ akɛ “jeŋ muu lɛ fɛɛ kã mɔ fɔŋ lɛ mli.” (1 Yohane 5:19) Yɛ anɔkwale mli lɛ, amrɔ nɛɛ Satan ‘miishishiu jeŋ muu lɛ fɛɛ.’ (Kpojiemɔ 12:9) Abaaya nɔ afee efɔŋ ashi mɛi, ni aye amɛ sane ni ejaaa kɛyashi beni abaajie hewalɛ fɔŋ ni Satan náa yɛ mɛi anɔ lɛ. Mɛni kɛ shihilɛ ni ehiii kwraa nɛɛ ba?

Akɛ shikpɔŋ ni ato he gbɛjianɔ koni etsɔ adesai aweku muu lɛ fɛɛ paradeiso shĩa ni yeɔ emuu lɛ duro wɔklɛŋklɛŋ fɔlɔi ni ji Adam kɛ Hawa—ni eji jeŋ ko ni ‘hi naakpa.’ (1 Mose 1:31) Mɛni ha nibii tsake? Satan ji mɔ ni fee. Etswa hegbɛ ni Nyɔŋmɔ yɔɔ akɛ ehaa hii kɛ yei mlai ni esa akɛ amɛhi shi yɛ naa lɛ mpoa. Etsɔ ŋaa gbɛ nɔ ewie akɛ gbɛ ni Nyɔŋmɔ tsɔɔ nɔ eyeɔ nɔ lɛ ejaaa. Elaka Adam kɛ Hawa koni amɛhala akɛ amɛbaatse amɛhe bɔni afee ni amɛ diɛŋtsɛ amɛkpɛ amɛyiŋ yɛ nɔ ni ja kɛ nɔ ni ejaaa he. (1 Mose 3:1-6) Enɛ kɛ gbɛtsii nii ni ji enyɔ ni haaa adesa anyɛ ekɛ jeŋ ni yeɔ jalɛ sane diɛŋtsɛ aba lɛ ba—no ji esha kɛ emuu ni ayeee.—Romabii 5:12.

 Mɛni Hewɔ Aŋmɛ Enɛ Gbɛ?

Ekolɛ mɛi komɛi baabi akɛ: ‘Shi mɛni hewɔ Nyɔŋmɔ ŋmɛ gbɛ ni esha kɛ emuu ni ayeee je shishi lɛ? Mɛni hewɔ ekɛ ehewalɛ ni teke nɔ lɛ tsuuu nii koni ekɛkpata atuatselɔi lɛ ahiɛ ni eje shihilɛ lɛ shishi ekoŋŋ lɛ?’ Etamɔ nɔ ni enɛ ji naagba lɛ he nitsumɔ yɛ gbɛ ni yɔɔ mlɛo nɔ. Shi kɛlɛ, hewalɛ ni akɛaatsu nii yɛ gbɛ ni tamɔ nɛkɛ nɔ lɛ teeɔ sanebimɔi ni hiɛdɔɔ yɔɔ mli lɛ ashi. Ani ejeee anɔkwale akɛ hewalɛ ni akɛtsuɔ nii yɛ gbɛ fɔŋ nɔ lɛ ji nibii titrii ni haa ohiafoi kɛ mɛi ni awaa amɛyi lɛ naa nɔ yɛ je lɛŋ lɛ ateŋ ekome? Kɛji akɛ nɔyelɔ yiwalɔ ko kɛ ehewalɛ tsu nii ni ekɛkpata mɔ fɛɛ mɔ ni kɛ esusumɔi kpãaa gbee lɛ hiɛ lɛ, ani ehaŋ mɛi ni hiɛ tsui kpakpa lɛ ayiŋ afee amɛ kɔshikɔshi?

Bɔni afee ni Nyɔŋmɔ ama nɔ mi eha mɛi ni hiɛ tsui kpakpa lɛ akɛ E-jeee nɔyelɔ ni kɛ ehewalɛ tsuɔ nii yɛ gbɛ fɔŋ nɔ lɛ, ehala akɛ ebaaŋmɛ Satan kɛ adesai atuatselɔi lɛ agbɛ ni amɛfee nii ni Nyɔŋmɔ mlai kɛ eshishitoo mlai kudɔɔɔ amɛ—yɛ be fioo ko pɛ mli. Be ní akɛŋmɛ gbɛ lɛ baatsɔɔ faŋŋ akɛ gbɛ ni Nyɔŋmɔ tsɔɔ nɔ eyeɔ nɔ lɛ ji gbɛ pɛ ni ja. Enɛ baatsɔɔ faŋŋ akɛ naatsii fɛɛ naatsii ní ekɛbaa wɔnɔ lɛ yɛ kɛha wɔhilɛ-kɛhamɔ. Yɛ anɔkwale mli lɛ, nibii gbohii ni ejɛ Nyɔŋmɔ nɔyeli lɛ hiɛ atua ni atse lɛ mli kɛba lɛ etsɔɔ momo akɛ naatsii ní ekɛbaa wɔnɔ lɛ yɛ kɛha wɔhilɛ-kɛhamɔ. Ni amɛtsɔɔ faŋŋ akɛ eja gbɛ jogbaŋŋ akɛ Nyɔŋmɔ kɛ ehewalɛ kpeteŋkpele lɛ aaatsu nii bɔni afee ni ekɛfo efɔŋfeemɔi fɛɛ asɛɛ kɛ́ eesumɔ ni efee nakai. Enɛ feemɔ etsɛŋ kwraa.—1 Mose 18:23-32; 5 Mose 32:4; Lala 37:9, 10, 38.

Dani Nyɔŋmɔ aaatsu enɛ he nii lɛ, wɔyɛ gbɛjianɔtoo ko ni yeee jalɛ sane mli, ni ‘wɔ fɛɛ wɔdɔmɔɔ ŋtsɔi ni wɔkɔ̃mɔɔ.’ (Romabii 8:22) Yɛ nɔ fɛɛ nɔ ni wɔbaafee ni wɔkɛtsake nibii fɛɛ sɛɛ lɛ, wɔnyɛŋ wɔkpata Satan hiɛ, ni wɔnyɛŋ wɔjie emuu diɛŋtsɛ ni ayeee ni ji nɔ titri ni kɛ nɔnaai fɛɛ ni wɔkɛkpeɔ lɛ baa lɛ hu kɛya kwraa. Wɔnyɛŋ wɔsaa nibii ni ejɛ esha ni wɔná kɛjɛ Adam ŋɔɔ lɛ mli kɛba lɛ kɔkɔɔkɔ.—Lala 49:7-9.

Yesu Kristo Kɛ Tsakemɔ ni Baahi Shi Daa Baaba

Ani enɛ tsɔɔ akɛ anyɛŋ afee nɔ ko kwraa yɛ shihilɛ lɛ he? Ekã shi faŋŋ akɛ dabi. Akɛ hegbɛ ewo mɔ ko ni yɔɔ hewalɛ kwraa fe adesa lɛ dɛŋ koni ekɛ tsakemɔ ni baahi shi daa aba. Namɔ ji nɛkɛ mɔ nɛɛ? Lɛ ji Yesu Kristo. Awie ehe yɛ Biblia lɛ mli akɛ Nyɔŋmɔ Lumɔ ni baahere adesai aweku lɛ yiwala.—Bɔfoi lɛ Asaji 5:31.

Amrɔ nɛɛ eemɛ ni “be” ni Nyɔŋmɔ eto lɛ ashɛ dani efee nii. (Kpojiemɔ 11:18) Mɛni pɔtɛɛ ebaafee? Ekɛ “nibii fɛɛ agbɛjianɔtoo be lɛ ni Nyɔŋmɔ ewie he yɛ egbalɔi krɔŋkrɔŋi lɛ anaa kɛjɛ teteete lɛ” baaba. (Bɔfoi lɛ Asaji 3:21) Ákɛ nɔkwɛmɔnɔ lɛ, Yesu ‘baajie ohiafoi ni bolɔɔ lɛ, kɛ nɔnalɔ ni bɛ bualɔ lɛ. Eeekpɔ̃ amɛsusuma kɛaajɛ fĩfĩamɔ kɛ yiwalɛ mli.’ (Lala 72:12-16) Nyɔŋmɔ ewo shi akɛ ebaatsɔ Yesu Kristo nɔ eha ‘tai asɛɛ afo kɛya shikpɔŋ lɛ naagbeehei lɛ.’ (Lala 46:10) Ewo shi akɛ: “Maŋbii [ni baahi shikpɔŋ ni eha enɔ etse lɛ nɔ] lɛ ateŋ mɔ ko ekɛɛŋ akɛ: Migbɔjɔ!” Abaatsa shwilafoi, toimulɔi, obubuafoi—mɛi fɛɛ ni hela yeɔ amɛ lɛ—ni abaaha amɛná gbɔmɔtsoŋ hewalɛ ni yeɔ emuu. (Yesaia 33:24; 35:5, 6; Kpojiemɔ 21:3, 4) Mɛi po ni egboi jeeŋmɔ lɛ baaná enɛ he sɛɛ. Ewo shi akɛ ekɛ mɛi ni ayeee amɛ jalɛ sane kɛ mɛi ni awa amɛyi ní amɛgboi lɛ baaba wala mli ekoŋŋ.—Yohane 5:28, 29.

Tsakemɔ ni Yesu Kristo kɛbaaba lɛ jeee nɔ ni yeee emuu ni baahi shi be fioo ko. Ebaajie nibii fɛɛ ni haaa anyɛ aná jeŋ ni yeɔ jalɛ sane diɛŋtsɛ lɛ kɛya kwraa. Ebaajie esha kɛ emuu ni ayeee kɛya, ni ebaakpata Satan Abonsam kɛ mɛi fɛɛ ni diɔ etuatsemɔ gbɛ lɛ sɛɛ lɛ ahiɛ. (Kpojiemɔ 19:19, 20; 20:1-3, 10) Piŋmɔ kɛ amanehulu ni Nyɔŋmɔ eŋmɛ gbɛ ni ehi shi be fioo ko lɛ “eteŋ shi nɔ ni ji shii enyɔ.” (Nahum 1:9) Enɛ ji nɔ ni yɔɔ Yesu jwɛŋmɔ mli beni etsɔɔ wɔ ni wɔsɔle ni Nyɔŋmɔ Maŋtsɛyeli lɛ aba, ni afee Nyɔŋmɔ suɔmɔnaa nii ‘yɛ shikpɔŋ lɛ nɔ, taakɛ afeɔ yɛ ŋwɛi lɛ.’—Mateo 6:10.

Ekolɛ obaawie kɛte shi owo akɛ: ‘Shi ani jeee Yesu diɛŋtsɛ wie akɛ “ohiafoi lɛ kɛ wɔ yɛ daa” lɛ? Ani enɛ etsɔɔɔ akɛ jalɛ sane ni ayeee kɛ ohia baahi shi daa nɛɛ?’ (Mateo 26:11) Hɛɛ, Yesu wie akɛ  ohiafoi baahi shi daa. Shi kɛlɛ, wiemɔi ni ewie kɛtsɔ hiɛ kɛ nɔ ni ewie kɛnyiɛ sɛɛ lɛ, kɛ shiwoi ni yɔɔ Nyɔŋmɔ Wiemɔ lɛ mli lɛ tsɔɔ akɛ nɔ ni ewie lɛ shishi ji akɛ, ohiafoi kɛ wɔ baahi shi daa nɛɛ bei abɔ ni nibii agbɛjianɔtoo nɛɛ kã he eyɔɔ shihilɛ mli lolo nɛɛ. Ele akɛ adesa ko kwraa nyɛŋ ajie ohia kɛ jalɛ sane ni ayeee kɛjɛ je lɛ mli kɔkɔɔkɔ. Ele hu akɛ lɛ ji mɔ ni baanyɛ ajie enɛɛmɛi fɛɛ kɛjɛ je lɛ mli. Etsɛŋ ni ekɛ nibii agbɛjianɔtoo hee kwraa baaba—“ŋwɛi hee kɛ shikpɔŋ hee” ní piŋmɔ, hela, ohia, kɛ gbele ehiŋ mli dɔŋŋ.—2 Petro 3:13; Kpojiemɔ 21:1.

‘Nyɛhiɛ Akakpaa Ejurɔfeemɔ Nɔ’

Ani enɛ tsɔɔ akɛ sɛɛnamɔ bɛ he akɛ wɔɔfee bɔ fɛɛ bɔ ni wɔɔnyɛ ni wɔkɛye wɔbua mɛi krokomɛi? Dabi kwraa. Biblia lɛ woɔ wɔ hewalɛ ni wɔye wɔbua mɛi krokomɛi kɛji akɛ amɛkɛ kaai kɛ shihilɛi ni haoɔ mɔ kpe lɛ. Maŋtsɛ Salomo ni hi shi yɛ blema lɛ ŋma akɛ: “Mɛi ni sa ejurɔfeemɔ lɛ, kaakama amɛ, kɛji efeemɔ yɛ odɛŋ hewalɛ mli lɛ.” (Abɛi 3:27) Bɔfo Paulo woɔ wɔ hewalɛ akɛ: “Ejurɔfeemɔ kɛ nikee lɛ, nyɛhiɛ akakpaa nɔ.”—Hebribii 13:16.

Yesu Kristo diɛŋtsɛ wo wɔ hewalɛ ni wɔfee bɔ fɛɛ bɔ ni wɔɔnyɛ koni wɔye wɔbua mɛi krokomɛi. Egba abɛbua ko ni kɔɔ Samarianyo ko ni yanina nuu ko ní ayi lɛ, ní atswa lɛ ojo lɛ he. Yesu wie akɛ Samarianyo lɛ ‘musuŋ tsɔ lɛ,’ ni ekɛ lɛ diɛŋtsɛ enibii fĩmɔ nuu ni ayi lɛ lɛ pilamɔi lɛ anɔ, koni ekɛye ebua lɛ ni ená hewalɛ ekoŋŋ yɛ tutuamɔ ni atutua lɛ lɛ hewɔ. (Luka 10:29-37) Samarianyo ni jie musuŋtsɔlɛ kpo nɛɛ tsakeee je lɛ shihilɛ, shi kɛlɛ ekɛ tsakemɔ wulu ko ba mɔ kroko shihilɛ mli. Wɔ hu wɔbaanyɛ wɔfee nakai nɔŋŋ.

Shi kɛlɛ, Yesu Kristo baanyɛ afee babaoo fe aŋkroaŋkroi ni eeeye ebua amɛ kɛkɛ. Ebaanyɛ ekɛ tsakemɔ diɛŋtsɛ aba, ni etsɛŋ kwraa ni ebaafee nakai. Kɛ́ efee nakai lɛ, mɛi ni ena nɔ̃ yɛ ŋmɛnɛŋmɛnɛ shihilɛi ni jalɛ sane bɛ mli nɛɛ mli lɛ ashihilɛi baaya hiɛ ni amɛbaaná toiŋjɔlɛ kɛ shweshweeshwe shihilɛ diɛŋtsɛ.—Lala 4:9; 37:10, 11.

Be mli ni wɔmɛɔ ni enɛ aba mli lɛ, nyɛhaa wɔfea nɔ fɛɛ nɔ ni wɔɔnyɛ koni ‘wɔfee’ mɛi fɛɛ ni jeŋ nɛɛ eye amɛ sane ni ejaaa lɛ “ejurɔ,” yɛ mumɔŋ kɛ heloonaa fɛɛ.—Galatabii 6:10.

[Mfonirii ni yɔɔ baafa 5]

Florence Nightingale tsake gbɛ ni atsɔɔ nɔ akwɛɔ helatsɛmɛi ahaa lɛ kwraa

[He ni Sane lɛ Jɛ]

Courtesy National Library of Medicine

[Mfonirii ni yɔɔ baafa 7]

Esa akɛ Kristo sɛɛnyiɛlɔi afee mɛi krokomɛi ejurɔ

[He ni Mfoniri ni yɔɔ baafa 4 lɛ Jɛ]

The Star, Johannesburg, S.A.