Sanebimɔi ni Jɛ Kanelɔi Adɛŋ

Ani Kristofonyo baanyɛ ahiɛ henilee kpakpa mli kɛ́ eetsu nitsumɔ ni biɔ ni ehiɛ tawuu nii lɛ?

Yehowa Odasefoi ni yɔɔ je lɛŋ he fɛɛ he lɛ buɔ gbɛnaa nii ni Nyɔŋmɔ kɛha amɛ akɛ amɛkɛ heloonaa nibii aha amɛwekui lɛ akɛ eji hiɛdɔɔ sane. (1 Timoteo 5:8) Shi kɛlɛ, nitsumɔi pɔtɛɛi komɛi yɛ ni teɔ shi ewoɔ Biblia mli shishitoo mlai lɛ yɛ faŋŋ mli, ni esa akɛ akwa enɛɛmɛi. Enɛɛmɛi ateŋ ekomɛi ji nitsumɔ ni kɔɔ asɔshwɛmɔ, lá ni akɛtsuɔ nii yɛ gbɛ fɔŋ nɔ, kɛ tawashɛremɔ he nibii ni ayeɔ abuaa koni aha eya hiɛ lɛ ahe. (Yesaia 65:11; Bɔfoi lɛ Asaji 15:29; 2 Korintobii 7:1; Kolosebii 3:5) Shi kɛlɛ, nitsumɔi krokomɛi yɛ ni Biblia lɛ ejeee gbɛ eteee shi ewooo, shi amɛbaanyɛ amɛgbá mɔ lɛ henilee loo mɛi krokomɛi ahenilee naa.

Ní mɔ ko aaatsu heloonaa nitsumɔ ni biɔ ni ahiɛ tu loo tawuu nii kroko lɛ ji mɔ lɛ diɛŋtsɛ yiŋkpɛɛ. Shi kɛlɛ, nitsumɔ ni biɔ ni ahiɛ tawuu nii lɛ haa mɔ lɛ bafeɔ mɔ ko ni baanyɛ aye lá yi sɔ̃ kɛ́ abi ni ekɛ etawuu nii lɛ atsu nii lɛ. No hewɔ lɛ, esa akɛ Kristofonyo kɛ sɔlemɔ asusu he jogbaŋŋ kɛji akɛ eesumɔ ni ekpɛlɛ sɔ̃ ni baabi ni ekɛ oyaiyeli akpɛ eyiŋ akɛ ekɛ etawuu nii lɛ baatsu nii loo efeŋ nakai kɛ́ enɛ feemɔ baasa adesa wala he lɛ nɔ. Tawuu nii hiɛmɔ hu haa mɔ lɛ yajeɔ shihilɛ ko ni baaha mɔ ko ni tutuaa mɔ lɛ aye lɛ awui loo ni mɔ lɛ agbe lɛ loo ni afee lɛ nɔ ko kɛtɔ owele lɛ mli.

Mɔ ko yiŋkpɛɛ baanyɛ aná mɛi krokomɛi hu anɔ hewalɛ. Ákɛ nɔkwɛmɔnɔ lɛ, gbɛnaa nii ni kã Kristofonyo nɔ titri ji Nyɔŋmɔ Maŋtsɛyeli lɛ he sanekpakpa lɛ ni eeeshiɛ. (Mateo 24:14) Ani abaanyɛ atsɔɔ mɛi krokomɛi ni ‘amɛkɛ gbɔmɛi fɛɛ ahi shi yɛ hejɔlɛ loo toiŋjɔlɛ mli,’ ní yɛ nakai beaŋ nɔŋŋ lɛ atsu nitsumɔ ni haa anáa daaŋ ŋmaa kɛtsɔ tawuu nii ko hiɛmɔ nɔ? (Romabii 12:18) Ni gbekɛbii lɛ loo weku lɛ mli bii krokomɛi lɛ hu? Ani tu bibioo ko ni aaahiɛ yɛ shĩa lɛ kɛ amɛwala baawo oshara mli? Kɛfata he lɛ, ani mɛi krokomɛi anane baanyɛ atɔ̃tɔ̃ yɛ bɔ ni mɔ ko ekpɛ eyiŋ eha yɛ sane lɛ he lɛ hewɔ?—Filipibii 1:10.

Yɛ “naagbee gbii” nɛɛ amli lɛ, mɛi babaoo ji “mɛi ni hiɛ yɔɔ la, mɛi ni sumɔɔɔ ekpakpa.” (2 Timoteo 3:1, 3) Yɛ enɛ hewɔ lɛ, ani mɔ ko baanyɛ afee mɔ ni ‘sane ko bɛ ehe’ be fɛɛ be, kɛ́ ehala nitsumɔ ko ni biɔ ni ahiɛ tawuu nii ni ekolɛ no baaha basabasafeemɔ aba ekɛ aŋkroaŋkroi ni tamɔ nɛkɛ lɛ ateŋ lɛ? (1 Timoteo 3:10) Dabi kwraa. Yɛ yiŋtoo nɛɛ hewɔ lɛ, asafo lɛ ebuŋ mɔ ni tamɔ nɛkɛ akɛ mɔ ni “anáŋ ehe sane ko atã” kɛ́ etee nɔ ehiɛ tawuu nii yɛ be mli ni ajɛ mlihilɛ mli akɛ Biblia mli ŋaawoo eha lɛ lɛ fɛɛ sɛɛ. (1 Timoteo 3:2; Tito 1:5, 6) Enɛ hewɔ lɛ, nuu loo yoo ni tamɔ nɛkɛ lɛ jeee mɔ ni sa kɛha hegbɛi krɛdɛɛi komɛi yɛ asafo lɛ mli.

Yesu wo ekaselɔi lɛ ashi akɛ kɛ́ amɛkɛ Maŋtsɛyeli lɛ he nibii ye klɛŋklɛŋ gbɛhe yɛ amɛshihilɛi amli lɛ, no lɛ ehe ebahiaŋ ni amɛhao amɛhe tuutu yɛ shihilɛ mli hiamɔ nibii anamɔ he. (Mateo 6:25, 33) Yɛ anɔkwale mli lɛ, kɛ́ wɔŋɔ wɔhiɛ wɔfɔ̃ Yehowa nɔ kwraa kɛmɔ shi lɛ, “eeehiɛ [wɔ]mli; eŋmɛŋ gbɛ gbi ko gbi ko ni jalɔ adidã.”—Lala 55:23.