Ani Abonsam Yɛ Diɛŋtsɛ?

MƐNI ji osusumɔ yɛ Abonsam he? Ani osusuɔ ehe akɛ eji mɔ ko ni yɔɔ diɛŋtsɛ ni bɔɔ mɔdɛŋ akɛ elaka mɛi ni amɛfee nibii fɔji, aloo ákɛ emli kɛkɛ nibii fɔji fɛɛ ni afeɔ lɛ jɛ? Ani Abonsam ji mɔ ko ni esa akɛ ashe lɛ gbeyei, aloo etamɔ mɛi ní atsĩɔ amɛtã yɛ adesãi amli lɛ ateŋ mɔ ko kɛkɛ? Ani wiemɔ ni ji “abonsam” lɛ tsɔɔ hewalɛ ko ni anaaa ni fiteɔ nii yɛ wɔshibɔlemɔ ŋulami nɛɛ nɔ? Ani wiemɔ nɛɛ damɔ shi kɛha sui gbohii ni yɔɔ gbɔmɛi amli, taakɛ jamɔ he nilelɔi ni yɔɔ ŋmɛnɛ lɛ tsɔɔ?

Ebɛ naakpɛɛ mɔ akɛ adesai hiɛ susumɔi srɔtoi yɛ mɔ diɛŋtsɛ ni Abonsam ji he. Kwɛ bɔ ni eeewa akɛ aaayɔse mɔ ko ni he esa waa kɛ mɛi akasemɔ ní ekwa eefee enii tamɔ mɔ kroko lɛ! Enɛ feemɔ baawa waa titri lɛ kɛ́ mɔ nɛɛ etswa efai shi akɛ ehaŋ ayoo mɔ ni eji. Biblia lɛ tsɔɔ akɛ nakai pɛpɛɛpɛ Abonsam yɔɔ. Beni ewieɔ mɔ nɛɛ he akɛ Satan lɛ, ekɛɛ akɛ: “Satan diɛŋtsɛ tsakeɔ ehe etsɔɔ la bɔfo.” (2 Korintobii 11:​14) Eyɛ mli akɛ Abonsam ji mɔ fɔŋ moŋ, shi efeɔ ehe tamɔ mɔ kpakpa koni enyɛ elaka mɛi. Ni enáa miishɛɛ waa kɛ́ eha mɛi hé ye akɛ ejeee mɔ ni yɔɔ shihilɛ mli diɛŋtsɛ.

Belɛ, namɔ diɛŋtsɛ ji Abonsam? Mɛɛ be eba shihilɛ mli, ni te fee tɛŋŋ eba? Te enáa mɛi anɔ hewalɛ ŋmɛnɛ ehaa tɛŋŋ? Ani nɔ ko yɛ diɛŋtsɛ ní wɔbaanyɛ wɔfee kɛte shi wɔwo lɛ ni ekaná wɔ nɔ hewalɛ? Anɔkwa saji ni kɔɔ Abonsam he kɛjɛ ebɔɔ mli tɔ̃ɔ yɛ Biblia lɛ mli, ni ekɛ sanebimɔi nɛɛ ahetooi ni ja haa.

[Mfoniri ni yɔɔ baafa 3]

Kwɛ bɔ ni ebaawa waa akɛ aaayoo mɔ ko ni etswa efai shi akɛ ehaŋ ayɔse lɛ lɛ!