Ani Oheɔ Oyeɔ akɛ Abonsam Yɛ Diɛŋtsɛ?

ŊMALƐI lɛ haa wɔleɔ akɛ Abonsam yɛ diɛŋtsɛ. Nɔ hewɔ ni adesai enaaa Nyɔŋmɔ lɛ, no nɔŋŋ hewɔ amɛnaaa Abonsam hu. Biblia lɛ kɛɔ akɛ: “Nyɔŋmɔ lɛ Mumɔŋ.” (Yohane 4:​24) Abonsam ji mumɔŋ bɔɔ nɔ̃. Shi kɛlɛ, ákɛ mɔ ni tamɔɔɔ Bɔlɔ lɛ, Abonsam yɛ shishijee.

Yehowa Nyɔŋmɔ etsɔ hiɛ ebɔ mumɔŋ bɔɔ nii akpekpei abɔ kwraa dani ebɔ adesai. (Hiob 38:​4, 7) Biblia lɛ tsɛ́ɔ mumɔŋ bɔɔ nii nɛɛ akɛ ŋwɛibɔfoi. (Hebribii 1:​13, 14) Nyɔŋmɔ bɔ amɛ fɛɛ ákɛ mɛi ni eye emuu, ni mɔ kome po bɛ amɛteŋ ni ji abonsam loo ákɛ ehiɛ su fɔŋ ko. Belɛ, te fee tɛŋŋ ni Abonsam ba shihilɛ mli? Wiemɔ ni ji “abonsam” lɛ shishi ji “heguɔgbelɔ,” ni ji mɔ ko ni wieɔ mɛi ahe amale wiemɔi kɛfiteɔ amɛ. “Satan” shishi ji “Shitee-kɛwolɔ.” Taakɛ bɔ ni mɔ ko ní kulɛ eyeɔ anɔkwa lɛ batsɔɔ julɔ kɛji eyaju lɛ, nakai nɔŋŋ Nyɔŋmɔ mumɔŋ bii lɛ ateŋ mɔ kome yatsu akɔnɔ fɔŋ ko ni ená lɛ he nii, ni no ha ebatsɔ Satan Abonsam. Biblia lɛ tsɔɔ bɔ ni feɔ ni mɔ fiteɔ ejeŋba lɛ mli yɛ nɛkɛ gbɛ nɔ, akɛ: “Mɔ fɛɛ mɔ lɛ, lɛ diɛŋtsɛ ekɔnɔ ni gbalaa lɛ ni lakaa lɛ lɛ kaa lɛ. No sɛɛ lɛ akɔnɔ lɛ, kɛ́ eŋɔ hɔ lɛ, efɔ́ɔ esha, ni esha lɛ hu, kɛ́ afee agbe naa lɛ efɔ́ɔ gbele.”​—Yakobo 1:​14, 15.

Nakai pɛpɛɛpɛ eba lɛ. Beni Yehowa Nyɔŋmɔ bɔ klɛŋklɛŋ adesai ni ji Adam kɛ Hawa lɛ, no mli lɛ ŋwɛibɔfo ni miitao etse atua eshi Nyɔŋmɔ lɛ yɛ jɛmɛ. Ele akɛ Yehowa kɛ famɔ ha Adam kɛ Hawa akɛ amɛfɔ́ ni amɛ yi shikpɔŋ lɛ nɔ obɔ̃ kɛ jalɔi, ní kɛ jamɔ baaha Bɔlɔ lɛ. (1 Mose 1:​28) Ŋwɛibɔfo nɛɛ na akɛ ebaanyɛ eha akɛ woo kɛ bulɛ aha lɛ. Hiɛjoomɔ ha ehiɛ kɔ̃ jamɔ ni esa akɛ adesai lɛ kɛha Bɔlɔ lɛ pɛ lɛ nɔ. Yɛ nɔ najiaŋ ni Nyɔŋmɔ mumɔŋ bi nɛɛ aaajie akɔnɔ fɔŋ nɛɛ kɛjɛ emli lɛ, etee nɔ esusu nɔ ni etao efee lɛ he, ni akɔnɔ fɔŋ ni ená lɛ mli yawa, ni no ha emale ni asaŋ etse atua. Susumɔ nɔ ni efee lɛ he okwɛ.

Ŋwɛibɔfo atuatselɔ lɛ tsɔ onufu nɔ ekɛ klɛŋklɛŋ yoo ni ji Hawa wie. Onufu lɛ bi Hawa akɛ: “Lɛɛlɛŋ, Nyɔŋmɔ kɛɛ akɛ: Nyɛkaye trom lɛ mli tsei ayibii lɛ fɛɛ eko lɛ?” Beni Hawa ha ele kitã ni Nyɔŋmɔ ewo amɛ kɛ toigbalamɔ ni ekɛbaaba amɛnɔ kɛji amɛyafeee toiboo lɛ, onufu  lɛ kɛɛ lɛ akɛ: “Jeee gboimɔ nyɛaagboi; shi moŋ le Nyɔŋmɔ le akɛ gbi nɔ ni nyɛaaye eko lɛ, nyɛhiŋmɛii aaagbele, ni nyɛaatsɔmɔ tamɔ Nyɔŋmɔ, ni nyɛaale ekpakpa kɛ efɔŋ.” (1 Mose 3:​1-⁠5) Naafolɔmɔ ni ekɛshi Nyɔŋmɔ ji akɛ, Nyɔŋmɔ kɛ anɔkwale ko etee Adam kɛ Hawa. Ni ákɛ kɛji Hawa ye tso lɛ nɔ yibii lɛ eko lɛ, ebaatsɔ tamɔ Nyɔŋmɔ, ni ebaanyɛ ekpɛ eyiŋ yɛ ekpakpa kɛ efɔŋ he. Enɛ ji klɛŋklɛŋ malemɔ ni jɛ mɔ ko naa. Malemɔ nɛɛ ha nakai ŋwɛibɔfo lɛ batsɔ heguɔgbelɔ. Ebatsɔ mɔ ni teɔ shi woɔ Nyɔŋmɔ hu. No hewɔ lɛ, Biblia lɛ wieɔ Nyɔŋmɔ henyɛlɔ nɛɛ he akɛ “blema onufu lɛ ní atsɛ́ɔ lɛ diabolo (naafolɔlɔ loo abonsam) lɛ kɛ satan (henyɛlɔ) lɛ.”​—Kpojiemɔ 12:⁠9.

‘Lé Ohe Nɔkwɛmɔ’

Abonsam nine shɛ nɔ̃ hewɔ ni emale lɛ nɔ. Biblia lɛ tsɔɔ akɛ: “Ni beni yoo lɛ na akɛ tso lɛ hi ha yeli, ni efeɔ hiŋmɛii akɔnɔ, ni tso lɛ baa mɔ tsine, ni etsɔɔ mɔ nii lɛ, etse enɔ yibii lɛ eko ni eye, ni eha ewu ni kɛ lɛ yɔɔ lɛ hu eko, ni eye.” (1 Mose 3:⁠6) Hawa hé Satan eye, ni egbo Nyɔŋmɔ nɔ toi. Hawa ha Adam hu ku Nyɔŋmɔ mla lɛ mli. Enɛ ha Abonsam nine shɛ klɛŋklɛŋ adesai enyɔ lɛ anɔ ni amɛtse atua amɛshi Nyɔŋmɔ. Kɛjɛ no sɛɛ kɛbaa nɛɛ, Satan ená adesai anifeemɔi anɔ hewalɛ yɛ gbɛ ni anaaa nɔ. Ni mɛni ji oti ni ma ehiɛ? No ji koni eha gbɔmɛi kɛ jamɔ ni amɛkɛaaha Nyɔŋmɔ lɛ aha lɛ moŋ. (Mateo 4:​8, 9) Yiŋtoo nɛɛ hewɔ Ŋmalɛi lɛ bɔɔ wɔ kɔkɔ akɛ: “Nyɛhiɛ akãa shi, nyɛsaraa; ejaakɛ nyɛhenyɛlɔ, abonsam lɛ, nyiɛ tamɔ jata ni hũuɔ eetao mɔ ni eeemi” lɛ.​—1 Petro 5:⁠8.

Kwɛ bɔ ni Biblia lɛ feɔ lɛ faŋŋ akɛ Abonsam ji mumɔŋ bɔɔ nɔ̃ ni yɔɔ diɛŋtsɛ ni ji ŋwɛibɔfo ko ni jeŋba ekpɔtɔ ni he yɔɔ oshara hu! Bɔni afee ni wɔhiɛ anyɛ ahi wɔhe nɔ lɛ, klɛŋklɛŋ lɛ, esa akɛ wɔyɔse akɛ nakai ŋwɛibɔfo lɛ yɛ shihilɛ mli diɛŋtsɛ. Shi wɔhiɛ ni wɔɔha ehi wɔhe nɔ, ni wɔya nɔ wɔle wɔhe nɔ kwɛmɔ jogbaŋŋ lɛ biɔ babaoo fe ní wɔɔyɔse akɛ eyɛ shihilɛ mli kɛkɛ. Esa akɛ wɔle Satan ‘ŋaatsɔi’ kɛ gbɛ̀i anɔ ni etsɔɔ elakaa mɛi lɛ hu. (2 Korintobii 2:​11) Mɛni ji eŋaatsɔi nɛɛ? Ni te wɔɔfee tɛŋŋ wɔkɛ shiŋŋfeemɔ adamɔ ŋaatsɔi nɛɛ anaa?

Abonsam Tsɔɔ Nibii ni He Hiaa Adesai lɛ Anɔ Enine Shɛɔ Amɛ Nɔ

Abonsam bɔi adesai ahe nikasemɔ kɛjɛ be ni abɔ amɛ tɔ̃ɔ. Ele bɔ ni adesai yɔɔ jogbaŋŋ ni ji nibii ni amɛsumɔɔ, nibii ni amɛnyaa he, kɛ nibii ni amɛshweɔ akɛ amɛná. Satan le jogbaŋŋ akɛ abɔ adesai kɛ hiamɔ nii akɛ amɛjá Nyɔŋmɔ, ni Abonsam tsɔɔ ŋaa gbɛ nɔ etsɔɔ hiamɔ nii nɛɛ nɔ enine shɛɔ adesai anɔ. Mɛɛ gbɛ nɔ etsɔɔ efeɔ enɛ? Efeɔ nakai kɛtsɔ Nyɔŋmɔjamɔ he apasa tsɔɔmɔi ni ehaa atsɔɔ adesai lɛ nɔ. (Yohane 8:​44) Nyɔŋmɔ he nii ni atsɔɔ yɛ sɔlemɔi lɛ amli lɛ ateŋ babaoo teɔ shi woɔ amɛhe, ni ehaa mɔ yiŋ futuɔ lɛ hu. Namɔ yiŋtoo he nii osusuɔ akɛ enɛ tsuɔ? Tsɔɔmɔi ni teɔ shi woɔ amɛhe lɛ fɛɛ nyɛŋ afee anɔkwale. Ani ejeee anɔkwale akɛ Satan ji mɔ ni to nibii babaoo ni atsɔɔ yɛ sɔlemɔi lɛ amli lɛ ahe gbɛjianɔ koni ekɛlaka gbɔmɛi? Yɛ anɔkwale mli lɛ, Biblia lɛ wieɔ ehe akɛ “je nɛŋ nyɔŋmɔ” ní eshwila mɛi ajwɛŋmɔ.​—2 Korintobii 4:⁠4.

Biblia mli anɔkwalei ni jɛ Nyɔŋmɔ ŋɔɔ lɛ buɔ mɔ he kɛjɛɔ jamɔŋ apasa tsɔɔmɔi ahe. Biblia lɛ kɛ anɔkwalei ni yɔɔ Nyɔŋmɔ Wiemɔ lɛ mli lɛ toɔ hɛfiinɔ ni blema asraafonyo kɛfiɔ emli koni ekɛbu ehɛ he lɛ he. (Efesobii 6:​14) Kɛ́ okase Biblia lɛ, ni okɛ emli sane lɛ tsu nii yɛ oshihilɛ mli tamɔ hɛfiinɔ ni okɛfi ohɛ lɛ, no lɛ Nyɔŋmɔ Wiemɔ lɛ baabu ohe kɛjɛ apasa tsɔɔmɔi kɛ saji ni ejaaa ni atsɔɔ yɛ Nyɔŋmɔ he lɛ ahe.

Bɔ ni adesai sumɔɔ ni amɛkɛ jamɔ aha mɔ ko lɛ eha amɛgbugbuu shi kɛmiitao nibii ni aleee  lɛ amli. Enɛ eha Satan hu ená gbɛ kokro ni eeetsɔ nɔ elaka adesai. Akɛni Satan le akɛ adesai sumɔɔ ni amɛle nibii ni yɔɔ naakpɛɛ kɛ gbeyei lɛ ahe nii babaoo hewɔ lɛ, etsɔ mumɔi atsɛmɔ nifeemɔi anɔ eha mɛi babaoo ebaje ekudɔmɔ shishi. Taakɛ bɔ ni gbɔbilɔ ko kɛ loo woɔ tsɔne mli kɛlakaa kooloi ni etaoɔ amɛ emɔ lɛ, nakai nɔŋŋ Satan hu tsɔɔ nibii tamɔ kablɛfii, ŋulamiiaŋkwɛmɔ, mɔ jwɛŋmɔŋ nɔ hewalɛnamɔ, ayɛkpɛmɔ, dɛ̃-kwɛmɔ kɛ ashwãifeemɔ nifeemɔi anɔ ekɛgbalaa mɛi yɛ je lɛŋ he fɛɛ he kɛbaa eŋɔɔ ni enine shɛɔ amɛnɔ.​—3 Mose 19:⁠31; Lala 119:​110.

Te oofee tɛŋŋ obu ohe ni mumɔi atsɛmɔ tsɔne lɛ akadu bo? Mose Wolo ni Ji Enumɔ 18:⁠10-12 lɛ kɛɔ akɛ: “Akana nyɛteŋ mɔ ko ní haa ebinuu loo ebiyoo tsɔɔ la mli, aloo mɔ ni kalaa, aloo ashwãifeelɔ aloo okɔmfo aloo ŋkunyaayelɔ, aloo kablɛfilɔ, aloo mɔ ni tsɛ́ɔ sisa, aloo ayɛ, aloo mɔ ni biɔ gbohii anii. Ejaakɛ Yehowa miihi mɔ fɛɛ mɔ ní feɔ nɛkɛ nii nɛɛ, ni nɛkɛ nihii nii nɛɛ nɔŋŋ hewɔ Yehowa, o-Nyɔŋmɔ lɛ, shwieɔ amɛ yɛ ohiɛ nɛɛ.”

Ŋaawoo ni Ŋmalɛ lɛ kɛhaa lɛ yɛ faŋŋ, ni no ji: Tsi ohe kɛjɛ mumɔi atsɛmɔ nifeemɔi ahe. Ni kɛji okɛ ohe ewo mumɔi atsɛmɔ nifeemɔi amli, shi amrɔ nɛɛ ootao okpa hu? Obaanyɛ onyiɛ nɔkwɛmɔnɔ ni mra be mli Kristofoi ni hi Efeso lɛ fee amɛfɔ̃ shi lɛ sɛɛ. Bilbia lɛ kɛɔ akɛ, beni amɛkpɛlɛ “Nuŋtsɔ lɛ [Yehowa, NW ] wiemɔ lɛ” nɔ lɛ, “ŋkunyaayelɔi lɛ hu ateŋ mɛi babaoo ba ni amɛkɛ amɛwoji lɛ babua shi ni amɛshã yɛ mɛi fɛɛ hiɛ.” Nakai woji lɛ ajara wa. Kɛ́ abu naa lɛ, efeɔ jwiɛtɛi kukuji 50,000 sɔŋŋ. (Bɔfoi lɛ Asaji 19:​19, 20) Shi kɛlɛ, Kristofoi ni yɔɔ Efeso lɛ shashaooo shi akɛ amɛaakpata woji nɛɛ ahiɛ.

Satan Kɛ Adesai Agbɔjɔmɔi Tsuɔ Nii

Henɔwomɔ ha ŋwɛibɔfo ni eye emuu lɛ batsɔ Satan Abonsam. Edũ henɔwomɔ kɛ pɛsɛnkunya ewo Hawa mli, ni no ha Hawa yasumɔ akɛ etsɔ tamɔ Nyɔŋmɔ. Satan etsɔ henɔwomɔ ni edũɔ ewoɔ mɛi amli lɛ nɔ enine eshɛ mɛi babaoo anɔ ŋmɛnɛ. Ákɛ nɔkwɛmɔnɔ lɛ, mɛi komɛi nuɔ he akɛ amɛnɔ kwɔlɔ fe mɛi krokomɛi yɛ amɛhewolo nɔ su, wiemɔ ni amɛwieɔ loo maŋ nɔ ni amɛjɛ lɛ hewɔ. Kwɛ bɔ ni enɛ kɛ nɔ ni Biblia lɛ tsɔɔ lɛ kpãaa gbee kwraa ha! (Bɔfoi lɛ Asaji 10:​34, 35) Biblia lɛ feɔ lɛ faŋŋ akɛ: “Lá kome [Nyɔŋmɔ] eŋɔfee gbɔmɛi adesai fɛɛ.”​—Bɔfoi lɛ Asaji 17:⁠26.

Gbɛ ni hi jogbaŋŋ ni wɔɔtsɔ nɔ wɔte shi wɔshi Satan yɛ mɔdɛŋ ni ebɔɔ koni edũ henɔwomɔ ewo wɔmli ji ni wɔba wɔhe shi. Biblia lɛ woɔ wɔ ŋaa koni ‘wɔkabu wɔdiɛŋtsɛ wɔhe tuutu fe bɔ ni sa akɛ wɔbuɔ wɔhe.’ (Romabii 12:⁠3) Biblia lɛ yaa nɔ ekɛɔ akɛ: “Nyɔŋmɔ lɛ, ekuɔ hewolɔi anaa, shi heshibalɔi eduroɔ.” (Yakobo 4:⁠6) Gbɛ kroko hu ni nɔ̃ bɛ ni wɔbaanyɛ wɔtsɔ nɔ wɔte shi wɔshi Satan yɛ mɔdɛŋ ni ebɔɔ koni eha wɔwó wɔhe nɔ ji ni wɔjie heshibaa kɛ sui krokomɛi ni Nyɔŋmɔ náa he miishɛɛ lɛ akpo yɛ wɔshihilɛ mli.

 Abonsam efee klalo hu akɛ ebaatsɔ nibii ni feɔ adesai akɔnɔ yɛ gbɛ ni esaaa nɔ lɛ anɔ enine ashɛ wɔ nɔ. Yehowa Nyɔŋmɔ yiŋtoo kɛha adesai ji ni amɛná miishɛɛ yɛ shihilɛ mli. Kɛ́ atsu akɔnɔi ahe nii yɛ gbɛ ni kɛ Nyɔŋmɔ suɔmɔnaa nifeemɔ kpãa gbee nɔ lɛ, ehaa mɔ náa miishɛɛ diɛŋtsɛ. Shi Satan lakaa mɛi koni amɛtsu amɛkɔnɔi ahe nii yɛ gbɛ ni ejaaa nɔ. (1 Korintobii 6:​9, 10) Ebaafee nɔ ni hi akɛ okɛ ojwɛŋmɔ aaama nibii ni he tse ni sa yijiemɔ lɛ anɔ. (Filipibii 4:⁠8) Enɛ feemɔ baaye abua bo koni onyɛ okudɔ osusumɔi kɛ ohenumɔi.

Yaa Nɔ Ote Shi Owo Abonsam

Ani obaanyɛ oye omanye yɛ Abonsam ni oteɔ shi owoɔ lɛ lɛ mli? Hɛɛ, obaanyɛ ofee nakai. Biblia lɛ maa nɔ mi kɛhaa wɔ akɛ: “Nyɛtea shi nyɛwoa abonsam, ni eeejo nyɛnaa foi.” (Yakobo 4:⁠7) Kɛji ote shi owo Satan lɛ, no haŋ eshi bo amrɔ nɔŋŋ ni ekpa bo kaa be mli ni oyaa nɔ okaseɔ Nyɔŋmɔ he nii lɛ. Nɔ ni tamɔɔɔ nakai lɛ, Abonsam baaku sɛɛ ebaka bo ekoŋŋ yɛ “be ni sa mli.” (Luka 4:​13, NW ) Shi kɛlɛ, esaaa akɛ enɛ haa osheɔ Abonsam gbeyei. Kɛ́ otee nɔ ote shi owo lɛ lɛ, enyɛŋ etsi bo kɛjɛ anɔkwa Nyɔŋmɔ lɛ he.

Shi kɛlɛ, dani ooonyɛ ote shi owo Abonsam lɛ, ebaabi ni ole mɔ ni eji, kɛ gbɛ̀i anɔ ni etsɔɔ elakaa mɛi, kɛ agbɛnɛ hu bɔ ni oofee obu ohe kɛjɛ eŋaatsɔɔi lɛ ahe. Nyɔŋmɔ Wiemɔ ni ji Biblia lɛ mli pɛ obaaná nakai anɔkwa nilee lɛ kɛjɛ. No hewɔ lɛ, okɛ shiŋŋfeemɔ atsu yiŋ ni okpɛ akɛ obaakase Ŋmalɛi ni ajɛ mumɔŋ aŋma lɛ he nii, ni okɛ nɔ ni okaseɔ lɛ hu atsu nii yɛ oshihilɛ mli. Yehowa Odasefoi ni yɔɔ he ni oyɔɔ lɛ yɛ he miishɛɛ akɛ amɛaaye abua bo koni okase nii ni tamɔ nɛkɛ yɛ be ni hi kɛha bo ní amɛheee bo nɔ ko. Ofainɛ kaashashao shi akɛ ootao amɛsɛɛ gbɛ loo ní ooŋma kɛyaha mɛi ni fee wolo tɛtrɛɛ nɛɛ kɛha yelikɛbuamɔ.

Beni okaseɔ Biblia lɛ, ebaabi ni ohiɛ ahi nɔ akɛ Satan baanyɛ ekɛ shitee-kɛwoo loo yiwaa atsu nii koni ekɛha okpa anɔkwale ni yɔɔ Nyɔŋmɔ Wiemɔ lɛ mli lɛ kasemɔ. Ekolɛ mɛi ni sumɔɔ osane lɛ ateŋ mɛi komɛi amli baafu bo yɛ Biblia lɛ ni okaseɔ lɛ hewɔ. Ekolɛ amɛbaafe nakai yɛ anɔkwalei ni yɔɔ miishɛɛ ni yɔɔ mli lɛ ní amɛleee lɛ hewɔ. Mɛi krokomɛi hu baaye ohe fɛo. Shi ani Nyɔŋmɔ baaná he miishɛɛ kɛ́ oŋmɛ gbɛ ni nibii tamɔ enɛɛmɛi ha okpa nii ni okaseɔ lɛ? Abonsam miitao ni eje onijiaŋ wui bɔni afee ni okpa anɔkwa Nyɔŋmɔ lɛ he nii ni okaseɔ lɛ. Ani esa akɛ oha Satan aye omanye yɛ enɛ feemɔ mli? (Mateo 10:​34-39) Satan efeee nɔ ko nɔ ko ehaaa bo. Shi Yehowa ji mɔ ni duroɔ bo wala. Belɛ, tswaa ofai shi akɛ obaate shi owo Abonsam koni ‘oha Yehowa tsui anyɔ emli.’​—Abɛi 27:⁠11.

[Mfoniri ni yɔɔ baafa 6]

Mɛi ni batsɔmɔ Kristofoi lɛ shã mumɔi atsɛmɔ nifeemɔi ahe woji ni amɛyɔɔ lɛ

[Mfoniri ni yɔɔ baafa 7]

Okɛ shiŋŋfeemɔ akpɛ oyiŋ akɛ obaakase Biblia lɛ