‘Miyelikɛbuamɔ Jɛɔ Yehowa Ŋɔɔ’

Yehowa Jɔɔ Mɛi ni Kɛ Amɛhe Shãa Afɔle Lɛ

NUU ko kɛ okɔokpe fãa gbɛ kɛtsɔɔ Cameroon koo hayii lɛ mli. Etaa okɔokpe lɛ nɔ ŋmɛlɛtswai abɔ kɛtsɔɔ gbɛ̀i ní nu ehà nɔ kɛ ŋmɔtɔi amli, ni etsɔmɔɔ osharai amli bɔni afee ni eyawo mɛi krokomɛi hewalɛ. Hii komɛi ni yɔɔ Zimbabwe lɛ nyiɛɔ kilomitai 15 kɛfoɔ faai ni eje ŋa bɔni afee ni amɛyatsɔɔ kuu ko ni yɔɔ he ko banee lɛ nii, ni kɛ́ amɛmiifo faai lɛ, amɛjieɔ amɛtadei kɛ amɛtokotai lɛ amɛtereɔ bɔni afee ni ekafɔ. Akɛni ŋmɛlɛtswaa kome yɛ leebi mra mli pɛ helatsɛmɛi akwɛlɔ ko náa ní akɛ lɛ kaseɔ nii hewɔ lɛ, yoo ní kɛ lɛ kaseɔ nii lɛ teɔ shi maŋkɛ̃ ŋmɛji ejwɛ ni eyiɔ mli koni ekɛ lɛ ayakase nii.

Mɛni je amɛhe yɛ mɛi ni kɛ mɔdɛŋbɔɔ tsuɔ nii nɛɛ fɛɛ ahe? Amɛ fɛɛ amɛji Yehowa Odasefoi abe fɛɛ sɔɔlɔi ni miitsɔɔ mɛi Biblia mli anɔkwalei lɛ. Be-fɛɛ sɔɔlɔi nɛɛ ateŋ mɛi komɛi ji daa gbɛgbalɔi kɛ gbɛgbalɔi krɛdɛɛi, maŋsɛɛ sanekpakpa jajelɔi, nɔkwɛlɔi gbɛfalɔi, kɛ mɛi akpekpei abɔ ni kɛ amɛhe eha ní amɛtsuɔ nii yɛ Betel shiai ni yɔɔ jeŋ fɛɛ lɛ amli lɛ. Su ko ni sa kadimɔ yɛ mɛi nɛɛ ahe ji akɛ, amɛ fɛɛ amɛkɛ amɛhe shãa afɔle. *

Yiŋtoo Kpakpa

Yehowa Odasefoi kɛ ŋaawoo ni bɔfo Paulo kɛha Timoteo lɛ tsuɔ nii. Ekɛɛ lɛ akɛ: “Bɔɔ mɔdɛŋ ni okɛ ohe adamɔ Nyɔŋmɔ hiɛ, akɛ mɔ ko ni sa, nitsulɔ ni hiɛ gbooo, ni jaa anɔkwale wiemɔ lɛ mli pɛpɛɛpɛ.” (2 Timoteo 2:​15) Shi sane lɛ ji, mɛni kanyaa Odasefoi akpekpei abɔ nɛɛ ni amɛsɔmɔɔ ákɛ be-fɛɛ sɔɔlɔi?

Kɛ́ abi be-fɛɛ sɔɔlɔi nɔ hewɔ ni amɛkɛ mɔdɛŋbɔɔ babaoo woɔ Yehowa sɔɔmɔ mli lɛ, amɛkɛɔ akɛ suɔmɔ ni amɛyɔɔ kɛha Nyɔŋmɔ kɛ amɛnanemɛi gbɔmɛi lɛ haa amɛfeɔ nakai. (Mateo 22:​37-39) Enɛ sa jogbaŋŋ, ejaakɛ kɛ́ jeee suɔmɔ haa amɛfeɔ nakai lɛ, no lɛ amɛmɔdɛŋbɔi lɛ fɛɛ baafee yaka.​—1 Korintobii 13:​1-⁠3.

Nitsumɔ ní akɛ He-Kɛafɔleshãa Tsuɔ

Kristofoi fɛɛ ní ejɔɔ amɛhe nɔ lɛ ekpɛlɛ nibimɔ ní Yesu kɛfɔ̃ɔ mɛi ahiɛ akɛ: “Kɛji mɔ ko miisumɔ akɛ enyiɛɔ misɛɛ lɛ, ha ní ekwa ehe ní ewó esɛŋmɔtso lɛ ní enyiɛ misɛɛ” lɛ nɔ. (Mateo 16:​24) Ní wɔɔkwa wɔhe lɛ tsɔɔ akɛ, esa akɛ wɔjɛ wɔsuɔmɔ mli wɔkɛ wɔhe aha Yehowa Nyɔŋmɔ kɛ Yesu Kristo koni wɔbatsɔmɔ amɛnii, ni wɔkɛ amɛgbɛtsɔɔmɔi atsu nii. Enɛ feemɔ eha mɛi babaoo kɛ amɛhe miishã afɔle yɛ be fɛɛ sɔɔmɔ nitsumɔ lɛ mli.

Odasefoi babaoo bɔɔ mɔdɛŋ waa koni amɛfee babaoo yɛ Yehowa sɔɔmɔ mli. Susumɔ Júlia ni eye afii 56 ní eji gbɛgbalɔ ni jɛ São Paulo yɛ Brazil lɛ he okwɛ. Ewie akɛ: “Nyɛmi nuu ko ni jɛ China tswa mi tɛlifon ni ebi mi kɛji masumɔ koni makase China wiemɔ. No mli lɛ, yɛ heni mifii etee hiɛ kɛshɛ lɛ hewɔ lɛ, ebako miyiŋ akɛ makase wiemɔ kroko. Shi gbii fioo komɛi asɛɛ lɛ, mikpɛlɛ nifeemɔ ni wa nɛɛ nɔ. Ŋmɛnɛ, minyɛɔ mishiɛɔ yɛ China wiemɔ mli.”

Yehowa Odasefoi anitsumɔhe nine ni yɔɔ Peru lɛ bɔ amaniɛ akɛ: “Gbɛgbalɔi ohai abɔ ejie ekãafeemɔ kɛ he-kɛafɔleshãa kpo yɛ nyɛsɛɛ afii nɛɛ amli kɛtsɔ shikpɔŋkukuji ni akɛwoko mɔ ko  dɛŋ lɛ ní amɛyatsuɔ mli nii lɛ nɔ. Amɛshĩɔ kɛyaa maji bibii ni yɔɔ shɔŋŋ ní shihilɛ mli nibii ni eba nɔ ŋmɛnɛ lɛ ekomɛi bɛ, ní nitsumɔ hu námɔ wa yɛ jɛmɛ lɛ amli. Nyɛmimɛi hii kɛ yei nɛɛ yɛ he miishɛɛ akɛ amɛkɛ nɔ fɛɛ nɔ ni ebaabi ni amɛkɛshã afɔle lɛ baafee nakai bɔni afee ni amɛnyɛ amɛtsu nɔ hewɔ ni amɛfãa kɛyaa hei ni tamɔ nakai lɛ he nii. Shi nɔ ni he hiaa fe fɛɛ ji akɛ, amɛshiɛmɔ nitsumɔ lɛ woɔ yibii kpakpai yɛ hei babaoo. Nɔkwɛlɔi gbɛfalɔi bɔɔ amaniɛ akɛ, kɛtsɔ daa gbɛgbalɔi ni kɛ amɛhe shãa afɔle nɛɛ anɔ lɛ, atotoo kui heei ashishi.”

Kristofoi komɛi kɛ amɛwala woɔ oshara mli bɔni afee ni amɛye amɛbua amɛnanemɛi heyelilɔi. (Romabii 16:​3, 4) Nɔkwɛlɔ gbɛfalɔ ko ni yɔɔ Afrika maŋ ko ní aawu ta yɛ jɛmɛ lɛ bɔ amaniɛ akɛ: “Beni eshwɛ fioo ni wɔbaashɛ he ni atsĩ gbɛ ni ji naagbee nɔ̃ ni kã shi kɛjɛ shikpɔŋkuku ni yɔɔ atuatselɔi lɛ akudɔmɔ shishi kɛyaa hei ni yɔɔ nɔyeli lɛ kudɔmɔ shishi lɛ yɛ lɛ, atuatselɔi ahiɛnyiɛlɔi ejwɛ kɛ amɛhe bulɔi babɔle mi kɛ miŋa, ni amɛbi koni wɔjie wɔhe shi. Beni wɔjie woji bibii ni wɔhiɛ ní tsɔɔ nɔ̃ gbɔmɛi ni wɔji lɛ wɔha amɛ ní amɛkwɛɔ mli lɛ, amɛyɔse akɛ he ni wɔjɛ lɛ yɛ nɔyeli lɛ kudɔmɔ shishi, no hewɔ lɛ, amɛyiŋ eyatɛ̃ɛ amɛ. Amɛfolɔ minaa akɛ miba amɛ shikpámɔ. No hewɔ lɛ, amɛshɛ mi amɛfɔ̃ bu ko mli. Miha amɛle mɛi ni wɔji, ni naagbee lɛ, amɛŋmɛɛ wɔhe.” Kwɛ bɔ ni asafoi ní amɛyasara lɛ amlibii lɛ amii shɛ amɛhe ákɛ gbalashihilɛ mli hefatalɔi nɛɛ nyɛ basara amɛ shweshweeshwe!

Yɛ naagbai ni be-fɛɛ sɔɔlɔi ni tamɔ nɛkɛ lɛ kɛkpeɔ lɛ fɛɛ sɛɛ lɛ, amɛyifalɛ miiya hiɛ yɛ jeŋ fɛɛ. (Yesaia 6:⁠8) Nitsulɔi ni kɛ ekãa tsuɔ nii nɛɛ buɔ hegbɛ ni amɛná kɛsɔmɔɔ Yehowa lɛ akɛ eji hegbɛ ko ni nɔ kwɔ waa. Mɛi akpekpei abɔ krokomɛi hu kɛ he-kɛafɔleshãa ni tamɔ nakai nɔŋŋ miijie Yehowa yi ŋmɛnɛ. Enɛ hewɔ lɛ, lɛ hu ejɔɔ amɛ babaoo. (Abɛi 10:​22) Akɛni nitsulɔi ni tsuɔ nii waa nɛɛ yɛ nɔmimaa akɛ ebaaya nɔ ejɔɔ amɛ ni efĩ amɛsɛɛ hu hewɔ lɛ, amɛkɛ lalatsɛ lɛ feɔ ekome kɛláa akɛ: ‘Miyelikɛbuamɔ jɛɔ Yehowa ŋɔɔ.’​—Lala 121:⁠2.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 9]

“Omaŋ lɛ aaaba yɛ ota gbi lɛ nɔ, yɛ amɛsuɔmɔ naa.”—LALA 110:3

[Akrabatsa ni yɔɔ baafa 8]

YEHOWA DƆƆ ETSUJI NI ETU AMƐHE AMƐHA LƐ LƐ AHE

“Nyɛfia shi ni nyɛkagbugbaa, ni nyɛtekea nɔ yɛ Nuŋtsɔ lɛ nitsumɔ lɛ mli daa nɛɛ, ejaakɛ nyɛle akɛ nyɛmɔdɛŋbɔɔ lɛ efeee yaka yɛ Nuŋtsɔ lɛ mli.”—1 Korintobii 15:⁠58.

“Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ . . . lɛ.”​—Hebribii 6:⁠10.