Good News for People of All Nations

ENƐ ji wolo bibioo ni ajie lɛ kpo yɛ afi 2004 kɛ afi 2005 “Okɛ Nyɔŋmɔ Anyiɛ” Yehowa Odasefoi a-Kpokpaa Wulu nɔ Kpee lɛ shishi lɛ saneyitso. Wolo bibioo nɛɛ ateŋ eko hiɛ baafai 96, ni shɛɛ sane kuku ni aŋma yɛ wiemɔi 92 mli lɛ yɔɔ mli, kɛjɛ Acholi wiemɔ nɔ kɛyashi Zulu wiemɔ nɔ, ni afee koni akɛye abua mɛi babaoo bɔni afee ni amɛnine anyɛ ashɛ Maŋtsɛyeli sanekpakpa lɛ nɔ. (Mateo 24:14) Niiashikpamɔi ni nyiɛ sɛɛ nɛɛ ji nɔ ni fɔɔ kaa be mli ni akɛ wolo bibioo lɛ tsuɔ nii lɛ.

• Beni weku ko ni ji Odasefoi lɛ anine shɛ wolo bibioo lɛ nɔ yɛ kpokpaa wulu nɔ kpee lɛ shishi sɛɛ lɛ, amɛyasara abɔɔi etɛ ni maŋ lɛ kɛfee shisharamɔhei lɛ. Amɛkɛ mɛi ni jɛ India, Netherlands, Pakistan, kɛ Philippines kpe yɛ jɛmɛ. Wu lɛ wie akɛ: “Eyɛ mli akɛ gbɔmɛi nɛɛ fɛɛ nuɔ Blɔfo wiemɔ fioo moŋ, shi akɛni amɛkɛ amɛmaŋ jɛkɛ waa hewɔ lɛ, amɛná miishɛɛ waa beni wɔkɛ shɛɛ sane ni yɔɔ amɛ diɛŋtsɛ amɛwiemɔ mli lɛ tsɔɔ amɛ lɛ. Eha amɛnu wɔjeŋ muu fɛɛ nitsumɔ lɛ kɛ ekomefeemɔ ni yɔɔ wɔteŋ lɛ shishi waa diɛŋtsɛ.”

• Odasefonyo ko kɛ wolo bibioo lɛ tsɔɔ enaanyo nitsulɔ ko ni jɛ India. Enaanyo nitsulɔ lɛ ná miishɛɛ waa beni ena wiemɔi srɔtoi pii yɛ mli lɛ, ni ekane shɛɛ sane lɛ yɛ lɛ diɛŋtsɛ ewiemɔ mli. Enɛ ha amɛgba saji babaoo ni kɔɔ Biblia lɛ he. Naanyo nitsulɔ ko ni jɛ Philippines lɛ naa kpɛ ehe beni ena lɛ diɛŋtsɛ emaŋ wiemɔ yɛ wolo bibioo lɛ mli lɛ, ni ebaná he miishɛɛ akɛ ebaasumɔ ni ekase Yehowa Odasefoi ahe nii babaoo.

• Odasefonyo ko kɛ yoo ko ni jɛ Nepal wie yɛ tɛlifoŋ nɔ yɛ Canada, ni yoo lɛ kpɛlɛ nɔ akɛ ekɛ lɛ baakase Biblia lɛ, shi eshashao shi akɛ eeefɔ̃ nyɛmi yoo lɛ nine kɛba eshĩa. Shi kɛlɛ, beni Odasefonyo lɛ gba yoo lɛ wolo bibioo lɛ mli shɛɛ sane yɛ Nepal wiemɔ mli lɛ, yoo lɛ kɛ miishɛɛ fɔ̃ nyɛmi yoo lɛ nine akɛ eba eshĩa. Esa akɛ ena shɛɛ sane ni yɔɔ lɛ diɛŋtsɛ emaŋ wiemɔ mli lɛ! Kɛjɛ no sɛɛ kɛbaa nɛɛ, amɛfeɔ Biblia mli nikasemɔ lɛ yɛ yoo lɛ shĩa.