Harmagedon Ani Ebaakpata Nibii Fɛɛ Ahiɛ Butuu?

HARMAGEDON! Ani wiemɔ nɛɛ haa mɛi babaoo ahiɛkpatamɔ loo jeŋ muu fɛɛ ni akɛ la aaashã kwraa lɛ he mfonirifeemɔ baa ojwɛŋmɔ mli? Yɛ je lɛŋ hei srɔtoi babaoo lɛ, wiemɔ ni ji “Harmagedon” lɛ fata Biblia mli wiemɔi fioo komɛi ni ebatsɔ wiemɔi ni anuɔ daa yɛ mɛi asanegbaa mli lɛ ahe. Akɛ wiemɔ nɛɛ tsuɔ nii yɛ hei srɔtoi babaoo koni akɛtsɔɔ hiɛkpatamɔ ni yɔɔ gbeyei ni adesai kɛbaakpe. Nibii ni ajieɔ yɛ sinii amli lɛ haa mɛi susuɔ akɛ “Harmagedon” ko ni yɔɔ gbeyei baaba. Mɛi leee wiemɔ lɛ he nɔ ko tsɔ̃, ni susumɔi ni ahiɛ yɛ he lɛ hu ejaaa. Eyɛ mli akɛ susumɔi ni ahiɛ yɛ eshishinumɔ he lɛ fá babaoo moŋ, shi susumɔi nɛɛ ateŋ babaoo kɛ nɔ ni Biblia lɛ—ni ji wolo ni aná wiemɔ lɛ kɛjɛ mli lɛ—tsɔɔ yɛ Harmagedon he lɛ kpaaa gbee.

Akɛni Biblia lɛ tsɔɔ akɛ Harmagedon kɛ “je nɛŋ naagbee lɛ” yɛ tsakpãa hewɔ lɛ, ani okpɛlɛɛɛ nɔ akɛ ehe miihia ni oná nɔ ni wiemɔ lɛ tsɔɔ diɛŋtsɛ lɛ he shishinumɔ ni yɔɔ faŋŋ? (Mateo 24:3) Ni ani efeŋ nɔ ni nilee yɔɔ mli akɛ oookwɛ Nyɔŋmɔ Wiemɔ lɛ ni ji anɔkwale jɛɛhe fe fɛɛ lɛ mli, bɔni afee ni ole nɔ ni Harmagedon ji diɛŋtsɛ, kɛ nɔ ni ebaatsɔɔ kɛha bo kɛ oweku lɛ?

Niiamlipɛimɔ ni tamɔ nɛkɛ lɛ baatsɔɔ akɛ yɛ nɔ najiaŋ ni Harmagedon baakpata nibii fɛɛ ahiɛ butuu lɛ, ebaaha mɛi ni sumɔɔ ni amɛhi jalɛ jeŋ hee ko mli ní amɛshwere yɛ mli lɛ aná shihilɛ ni yɔɔ miishɛɛ. Abaaha oná Ŋmalɛ naa anɔkwale ni he hiaa nɛɛ he shishinumɔ ni yɔɔ faŋŋ yɛ be mli ni osusuɔ nɔ ni Harmagedon shishinumɔ diɛŋtsɛ ji lɛ he yɛ sane ni nyiɛ sɛɛ lɛ mli lɛ.

[Akrabatsa/Mfoniri ni yɔɔ baafa 3]

MƐNI OSUSUƆ AKƐ HARMAGEDON JI?

• Nuklea ni akɛbaakpata adesai ahiɛ

• Shihilɛ mli nibii ahiɛkpatamɔ

• Ŋulami wulu ko ni baagbee shikpɔŋ lɛ nɔ

• Mɛi fɔji ahiɛ ni Nyɔŋmɔ baakpata