Biblia Lɛ Shishitsɔɔmɔ Kɛmiiya Italy Wiemɔ Mli Naagbai ni Akɛkpe

“BIBLIA lɛ fata woji babaoo ni aja fe woji krokomɛi fɛɛ yɛ wɔmaŋ [Italy] lɛ mli lɛ ahe, ni ekolɛ no ji wolo hu ní mɛi fioo ko pɛ kaneɔ. Hewalɛ fioo ko pɛ awoɔ Katolikbii lɛ koni amɛkase Biblia lɛ, ni asaŋ yelikɛbuamɔ ni amɛnine shɛɔ nɔ koni amɛkane lɛ daa ákɛ Nyɔŋmɔ Wiemɔ lɛ faaa. Mɛi yɛ ni amɛmiisumɔ akɛ amɛkase Biblia lɛ, shi bei pii lɛ, amɛnáaa mɔ ko atsɔɔ amɛ.”

Sane nɛɛ ní Italy osɔfoi lɛ jaje yɛ Osɔfonukpai Akpee ni afee yɛ afi 1995 lɛ teeɔ sanebimɔi komɛi ashi. Yɛ afii ohai abɔ ni eho lɛ amli lɛ, mɛi enyiɛ no mli lɛ amɛyɔɔ Italy ní kaneɔ Biblia lɛ? Mɛni hewɔ Biblia lɛ jaa yɛ maŋ lɛ mli eyaaa nɔ oyayaayai taakɛ eba lɛ yɛ maji krokomɛi anɔ lɛ? Mɛni hewɔ ekã he eji woji ni mɛi fioo pɛ kaneɔ yɛ Italy lɛ ateŋ ekome lɛ? Yinɔsane ni kɔɔ Bibliai ni atsɔɔ shishi kɛtee Italy wiemɔ mli lɛ he lɛ mlipɛimɔ yeɔ buaa ni wɔnine shɛɔ sanebimɔi nɛɛ ahetooi komɛi anɔ.

Ehé afii ohai abɔ dani aná French wiemɔ, Italy wiemɔ, Portugal wiemɔ, Spain wiemɔ, kɛ wiemɔi krokomɛi ni fata he lɛ kɛjɛ Latin wiemɔ mli. Yɛ Europa maji ni awieɔ Latin wiemɔ yɛ jɛmɛ lɛ ekomɛi amli lɛ, wiemɔ ni maŋbii lɛ ateŋ mɛi babaoo nuɔ lɛ bafee wiemɔ ko ni mɛi bɔi he miishɛɛ námɔ, ni akɛbɔi woji aŋmalamɔ po. Bɔ ni wiemɔ ni maŋbii lɛ babaoo nuɔ lɛ tee hiɛ eha lɛ sa Biblia lɛ shishitsɔɔmɔ he. Yɛ mɛɛ gbɛ nɔ? Be ko ni eho lɛ, srɔtofeemɔ ni yɔɔ Latin ni ji wiemɔ ni abuɔ lɛ krɔŋkrɔŋ ní akɛfeɔ sɔlemɔ lɛ kɛ wiemɔ ni maŋbii babaoo nuɔ lɛ teŋ lɛ bada aahu akɛ kɛ́ aawie Latin lɛ, mɛi ni eyako skul pɛŋ lɛ nyɛɛɛ anu shishi.

Beni shɛɔ afi 1000 lɛ, no mli lɛ, kɛ́ aha maŋbii ni yɔɔ Italy ŋshɔkpɔ lɛ nɔ lɛ ateŋ mɔ fɛɛ mɔ Latin Vulgate lɛ eko po lɛ, amɛteŋ mɛi babaoo nyɛŋ akane. Osɔfoi anɔyeli kuu lɛ ŋɔ skul srɔtoi ni yɔɔ lɛ fɛɛ anɔkwɛmɔ amɛwo amɛshishi, ni univɛsiti enyɔoo komɛi ni yɔɔ yɛ nakai beaŋ lɛ hu fata he. Mɛi fioo pɛ ná hegbɛ amɛtee skul. No hewɔ lɛ, Biblia lɛ bafee “wolo ko ni aleee.” Kɛlɛ, mɛi pii shwe koni amɛnine ashɛ Nyɔŋmɔ Wiemɔ lɛ nɔ yɛ amɛ diɛŋtsɛ amɛwiemɔ mli bɔni afee ni amɛkane ni amɛnu shishi.

Osofoi lɛ ateŋ mei babaoo nu he akɛ Biblia shishitsɔɔmɔ lɛ woɔ jamɔŋ atuatsemɔ he hewalɛ. Taakɛ yinɔsaneŋmalɔ Massimo Firpo tsɔɔ mli lɛ, “kɛ́ atsɔɔ shishi kɛtee wiemɔ ni maŋbii babaoo nuɔ lɛ mli lɛ, [no baaha] mɛi anu wiemɔ ni osɔfoi lɛ wieɔ [ni ji Latin] ní mɛi babaoo nuuu, ní no haa osɔfoi lɛ pɛ tsuɔ jamɔŋ saji ahe nii lɛ shishi.” No hewɔ lɛ, nibii tamɔ skul ní anáaa hegbɛ aya, jamɔ mli saji, kɛ shihilɛ mli naagbai krokomɛi ji nɔ ni eha Italy maŋbii babaoo leee Biblia lɛ mli kɛbashi ŋmɛnɛ lɛ.

 Biblia Shishitsɔɔmɔi Komɛi ni Je Kpo Klɛŋklɛŋ

Afi 1200 afii lɛ amli ni atsɔɔ Biblia woji lɛ ashishi klɛŋklɛŋ kwraa kɛjɛ Latin wiemɔ mli kɛtee wiemɔ ni maŋbii babaoo nuɔ lɛ mli. Niji akɛŋmala Biblia fãi ní atsɔɔ nɛɛ, ni amɛjara wa waa. Beni shɛɔ afi 1300 afii lɛ amli lɛ, no mli lɛ aná shishitsɔɔmɔi babaoo, ni kɛ́ hooo lɛ atsɔɔ Biblia muu lɛ shishi kɛtee wiemɔ ni maŋbii babaoo nuɔ lɛ mli, eyɛ mli akɛ gbɔmɛi srɔtoi tsɔɔ emli woji lɛ ashishi yɛ bei srɔtoi amli kɛ yɛ hei srɔtoi. Mɛi tamɔ niiatsɛmɛi kɛ woloŋlelɔi ni nɔ ko yɔɔ amɛdɛŋ lɛ ji mɛi ni nyɛ shishitsɔɔmɔi ní mɛi ni tsɔɔ shishi lɛ ejieee amɛhe shi nɛɛ amɛhé, ni amɛ pɛ amɛnyɛ amɛkane.

Afii ohai abɔ ho ní maŋbii lɛ amli kpotoo leee woloŋ. Beni maŋ lɛ batsɔ maŋ kome yɛ afi 1861 lɛ po lɛ, no mli lɛ maŋbii lɛ 100 mlijaa 74.7 leee woloŋ. Mɔbɔ sane ji akɛ, beni nɔyeli hee ni aná yɛ Italy lɛ fee mla koni mɛi fɛɛ aya skul yaka ní aheee nɔ ko lɛ, Paapa Pius IX lɛ ŋma wolo eyaha maŋtsɛ lɛ yɛ afi 1870 mli ni ewo lɛ hewalɛ koni ete shi ewo mla lɛ, nɔ ni paapa lɛ wie he akɛ eji “haomɔ,” ni ákɛ awo nakai mla lɛ bɔni afee ni “akɛkpata skul srɔtoi ni Katolik sɔlemɔ lɛ yɔɔ lɛ ahiɛ kwraa” lɛ.

Biblia Muu ni Atsɔɔ Shishi Kɛtee Italy Wiemɔ Mli ní Je Kpo Klɛŋklɛŋ

Akala Biblia muu ni atsɔɔ shishi kɛtee Italy wiemɔ mli ní je kpo klɛŋklɛŋ lɛ yɛ Venice yɛ afi 1471 mli, ni tsɔɔ akɛ no mli lɛ, afii 16 eho kɛjɛ be ni akɛ tsɔne ni akɛŋmalaa woji bɔi nitsumɔ yɛ Europa lɛ. Ehé mɔ kome shihilɔ ko ni jɛ Camaldoli lɛ nyɔji kpaanyɔ ni ekɛgbe eshishitsɔɔmɔ lɛ naa. Shishitsɔɔmɔi ni yɔɔ no beaŋ lɛ anɔ titri ekwɛ ni efee enɔ̃ lɛ, ni nɔ ni efee ji akɛ ekɛ Latin Vulgate lɛ to nakai shishitsɔɔmɔi lɛ ahe ni ekɛjaje tɔmɔi ni yɔɔ mli lɛ, ni ejie amɛmli wiemɔi lɛ ekomɛi kɛjɛ mli ni ekɛ wiemɔi ni ale jogbaŋŋ yɛ he ni ehi ni ji Venetia ye najiaŋ. Eshishitsɔɔmɔ lɛ ji Biblia muu ni atsɔɔ shishi kɛtee Italy wiemɔ mli ni akala lɛ ateŋ klɛŋklɛŋ nɔ̃ ní mɛi saŋŋ anine shɛ eko nɔ.

Mɔ kroko ni tsɔɔ Biblia lɛ shishi ní ekala yɛ Venice ji Antonio Brucioli. Eji nilelɔ ko ni sumɔɔ Protestantbii asane, ni kɛlɛ, ekɛ Katolik Sɔlemɔ lɛ efooo tako mli. Yɛ afi 1532 mli lɛ, Brucioli kala Biblia ni ekwɛ blema Biblia ni aŋmala yɛ Hebri kɛ Hela wiemɔi amli lɛ anɔ ni etsɔɔ shishi lɛ. No ji klɛŋklɛŋ Biblia ní atsɔɔ shishi kɛtee Italy wiemɔ mli ní akwɛ blema Biblia ni aŋmala yɛ Hebri kɛ Hela wiemɔi amli lɛ anɔ afee nakai. Eyɛ mli akɛ jeee Italy wiemɔ krɔŋŋ ekɛtsɔɔ shishi moŋ, shi bɔ ni etsɔɔ wiemɔi lɛ ashishi pɛpɛɛpɛ lɛ sa kadimɔ jogbaŋŋ ejaakɛ no mli lɛ, mɛi babaoo bɛ blema wiemɔi tamɔ Hela kɛ Hebri he nilee ko. Brucioli kɛ Nyɔŋmɔ gbɛi lɛ wo hei ni esa akɛ ehi, ni gbɛi ni ekɛtsu nii lɛ ji “Ieova.” Biblia ní ekala lɛ bafee Biblia ni Italy Protestantbii kɛ mɛi ni wieɔ eshiɔ jamɔŋ nifeemɔi lɛ kɛtsu nii nɔ ni miihe ashɛ afii 100.

Mɛi krokomɛi hu tsɔɔ Biblia lɛ shishi kɛtee Italy wiemɔ mli, ni amɛteŋ mɛi komɛi ji Katolikbii, shi yɛ anɔkwale mli lɛ, nɔ ni amɛfee ji akɛ, amɛtsake Brucioli Biblia lɛ hiɛ fioo ni amɛkala lɛ ehee. Mɛi nɛɛ a-Bibliai lɛ ateŋ eko kwraa egbɛɛɛ eshwãaa yɛ gbɛ ni sa kadimɔ nɔ. Yɛ afi 1607 lɛ, Giovanni Diodati ni eji Calvin jamɔ lɛ mli osɔfo ní ehe bahia koni efɔlɔi ajo foi kɛya Switzerland bɔni afee ni amɛkɛjo yiwaa ni akɛbaa amɛnɔ yɛ jamɔ mli ní amɛkɛ amɛhe ewo lɛ hewɔ lɛ naa foi lɛ hu kwɛ blema Bibliai ni aŋmala yɛ Hebri kɛ Hela wiemɔi amli lɛ anɔ ni etsɔɔ shishi kɛtee Italy wiemɔ mli yɛ Geneva. Protestantbii ni yɔɔ Italy lɛ kɛ Biblia ní etsɔɔ shishi lɛ tsu nii afii ohai abɔ. Beni ajie Biblia nɛɛ kpo lɛ, no mli lɛ abuɔ akɛ eji Biblia ni atsɔɔ shishi jogbaŋŋ kɛtee Italy wiemɔ mli. Diodati Biblia lɛ ye bua Italybii ni amɛnu Biblia tsɔɔmɔi lɛ ashishi jogbaŋŋ. Shi osɔfoi lɛ kwɛ bɔni afee ni Biblia nɛɛ kɛ shishitsɔɔmɔi krokomɛi lɛ akagbɛ miishwã.

Biblia Lɛ​—“Wolo ko ní Aleee”

Wolo ni ji Enciclopedia Cattolica lɛ wie akɛ: “Sɔlemɔ lɛ haa ehiŋmɛi hiɔ woji ni esusuɔ akɛ amɛbaanyɛ amɛtée naagbai ashi lɛ ahe be fɛɛ be, shi dani akɛ woji akalamɔ tsɔnei baabɔi nitsumɔ lɛ, no mli lɛ sɔlemɔ lɛ ŋmalaaa woji ni agu lɛ agbɛi eshwieee shi ejaakɛ ashãa woji fɛɛ ni abuɔ akɛ amɛyɔɔ oshara lɛ.” Beni Jamɔŋ Hiɛtsakemɔ ní ha aná Protestantbii lɛ po je shishi lɛ, osɔfoi ni yɔɔ Europa maji babaoo amli lɛ tee nɔ amɛfee bɔ fɛɛ bɔ ni amɛaanyɛ koni amɛkaha woji ni akɛɛ eji jamɔ mli atuatselɔi awoji lɛ miigbɛ kɛmiishwã.  Shi yɛ Katolik osɔfoi agwa ko ni abɔ yɛ Trent yɛ afi 1546 kɛsusu Biblia lɛ ní atsɔɔ shishi kɛyaa wiemɔ ni maŋbii babaoo nuɔ lɛ mli lɛ he lɛ sɛɛ lɛ, tsakemɔ wulu ko ba. Mligbalamɔ ba osɔfoi lɛ ateŋ. Mɛi komɛi kɛɛ Biblia lɛ ní atsɔɔ shishi kɛyaa wiemɔ ni maŋbii babaoo nuɔ lɛ mli lɛ ji “nɔ ni haa mɛi teɔ shi amɛwoɔ sɔlemɔ lɛ tsɔɔmɔi lɛ,” ni no hewɔ lɛ, amɛfĩ sɛɛ akɛ agu enɛ feemɔ. Mɛi ni kɛɛ akagu enɛ feemɔ lɛ hu tsɔɔ mli akɛ, kɛ́ agu lɛ, no baaha Protestantbii ni ji “[amɛ]henyɛlɔi” lɛ akɛɛ akɛ, sɔlemɔ lɛ gu Biblia lɛ ní atsɔɔ shishi kɛyaa wiemɔ ni maŋbii babaoo nuɔ lɛ mli lɛ bɔni afee ni amɛkɛtsimɔ “juu-kɛfɔ̃ kɛ shishiumɔ nifeemɔi” ni yaa nɔ yɛ sɔlemɔ lɛ mli lɛ anɔ.

Akɛni gbeekpamɔ eyabaaa amɛteŋ hewɔ, osɔfoi ni yabɔ gwa lɛ nyɛɛɛ akpɛ amɛyiŋ yɛ sane lɛ he, shi moŋ amɛkpɛlɛ nɔ akɛ amɛbaaya nɔ amɛbu Vulgate lɛ ákɛ no ja, kɛkɛ ni ebatsɔ Biblia ní Katolik Sɔlemɔ lɛ kɛtsuɔ nii. Shi Carlo Buzzetti, ni no mli lɛ etsɔɔ nii yɛ Pontifical University Salesianum ni yɔɔ Rome lɛ tsɔɔ mli akɛ, Vulgate lɛ ni akpɛlɛ nɔ ákɛ “eja” lɛ tsɔɔ akɛ “aama nɔ mi akɛ no pɛ ji Biblia ni esa akɛ akɛtsu nii.” Nibii ni tee nɔ yɛ sɛɛ mli lɛ ma enɛ nɔ mi.

Yɛ afi 1559 lɛ, Paapa Paul IV ha akala wolo ko ní woji fɛɛ ni agu ákɛ Katolikbii aaakane, amɛhɔ̃ɔ, amɛtsɔɔ shishi, aloo amɛhé eko lɛ agbɛi yɛ mli, ni no ji klɛŋklɛŋ nɔ̃ ni je kpo. Abu nakai woji lɛ akɛ amɛhiii, ni ákɛ amɛkɛ mɔ hemɔkɛyeli kɛ jeŋba woɔ oshara mli. Brucioli shishitsɔɔmɔ lɛ kɛ Biblia krokomɛi ni atsɔɔ shishi kɛtee wiemɔ ni maŋbii babaoo nuɔ lɛ amli lɛ fata woji ni agu lɛ ahe. Ashwie mɛi fɛɛ ni kɛ gbɛtsɔɔmɔ nɛɛ tsuuu nii lɛ kɛjɛ sɔlemɔ lɛ mli. Naatsĩi ni yɔɔ wolo ni akala yɛ afi 1596 ní woji fɛɛ ni agu lɛ agbɛi yɔɔ mli lɛ amli wa kwraa fe tsutsu nɔ̃ lɛ. Atsɔɔ yɛ nakai wolo lɛ mli akɛ, akpɛlɛɛɛ ni mɔ ko tsɔɔ Biblia lɛ shishi kɛyaa wiemɔ ni maŋbii babaoo nuɔ lɛ mli, ni akpɛlɛɛɛ hu ni akalaaa shishitsɔɔmɔi ni yɔɔ momo lɛ ekomɛi afataa he. Abi koni akpata nakai Biblia shishitsɔɔmɔi lɛ fɛɛ hiɛ.

Enɛ hewɔ lɛ, beni afi 1500 afii lɛ ba naagbee lɛ, ashãshãa Bibliai babaoo yɛ sɔlemɔ lɛ kpo teŋ. Nifeemɔ nɛɛ ha mɛi babaoo ná susumɔ akɛ jamɔ mli atuatselɔi ni kɛ Ŋmalɛi lɛ tsuɔ nii, ni mɛi kã he amɛhiɛ susumɔ ni tamɔ nɛkɛ. Shwɛ sharao ni akpata Bibliai kɛ Biblia he woji fɛɛ ni yɔɔ maŋbii awojiatoohei kɛ mɛi ashiai amli lɛ hiɛ, ni afii 200 ni nyiɛ sɛɛ ba lɛ, Katoliknyo ko etsɔɔɔ Biblia lɛ shishi kɛyaaa Italy wiemɔ mli. Bibliai ni Protestant woloŋlelɔi tsɔɔ shishi​—ni atsɔ teemɔŋ aja akɛni ashe gbeyei ákɛ akɛ nine baafɔ̃ nɔ hewɔ​—lɛ pɛ gbɛ shwã Italy ŋshɔkpɔ lɛ nɔ. No hewɔ lɛ, yinɔsaneŋmalɔ Mario Cignoni tsɔɔ mli akɛ: “Afii ohai abɔ ho ní maŋbii ni amɛjeee osɔfoi lɛ kaneee Biblia lɛ. Biblia lɛ batsɔ wolo ko ní aleee, ni Italybii babaoo hi shi amɛwala gbii abɔ fɛɛ ní amɛkaneee emli sane kome po.”

 Agbɔjɔ Naatsĩi lɛ Mli

Sɛɛ mli lɛ, Paapa Benedict XIV lɛ tsɔ akpɔ ko ni ewo yɛ wolo ni akala yɛ June 13 afi 1757 ní woji ni agu lɛ agbɛi yɔɔ mli lɛ he lɛ nɔ etsake naatsĩi ni no mli lɛ eyɔɔ lɛ hiɛ, ni “ekɛ hegbɛ ha akɛ abaanyɛ akane Bibliai ni atsɔɔ shishi kɛtee wiemɔ ni maŋbii babaoo nuɔ lɛ mli ní akalaa yɛ osɔfonukpai lɛ agbɛtsɔɔmɔ shishi ni asaŋ Paapa lɛ ekpɛlɛ nɔ lɛ.” Akpɔ nɛɛ hã Antonio Martini, ní sɛɛ mli lɛ ebatsɔ osɔfonukpa yɛ Florence lɛ to gbɛjianɔ akɛ ebaatsɔɔ Vulgate lɛ shishi. Ekala klɛŋklɛŋ fã ni etsɔɔ shishi lɛ yɛ afi 1769, ni beni egbe fã ni eshwɛ lɛ shishitsɔɔmɔ naa lɛ, ekala Biblia muu lɛ fɛɛ yɛ afi 1781 mli. Taakɛ Katolik wolo ko tsɔɔ mli lɛ, “anyɛŋ awie Bibliai ni atsɔɔ shishi kɛtee Italy wiemɔ mli lɛ ahe ní atsĩii” Martini shishitsɔɔmɔ lɛ “tã.” Dani Martini baakala eshishitsɔɔmɔ lɛ, no mli lɛ Katolikbii ni nuuu Latin wiemɔ lɛ nyɛɛɛ akane Bibliai ni sɔlemɔ lɛ ŋmɛɔ gbɛ akɛ amɛbaanyɛ amɛkane lɛ. Yɛ afii 150 ni nyiɛ sɛɛ ba lɛ, Martini shishitsɔɔmɔ lɛ pɛ ji Biblia shishitsɔɔmɔ ni aŋmɛ Katolikbii ni yɔɔ Italy lɛ agbɛ akɛ amɛkane.

Afee tsakemɔ wulu ko yɛ osɔfoi agwabɔɔ ko ní ale lɛ akɛ Vatican II lɛ shishi. Yɛ afi 1965 lɛ, wolo ni ji Dei Verbum lɛ wo hewalɛ koni “akwɛ blema ŋmalɛ krɔŋkrɔŋi lɛ anɔ titri ni atsɔɔ shishi jogbaŋŋ kɛ agbɛnɛ hu yɛ gbɛ ja nɔ . . . kɛya wiemɔi srɔtoi amli,” ni no ji be klɛŋklɛŋ kwraa ni akɛ hewalɛwoo ni tamɔ nakai ha. Yɛ afii fioo komɛi ni tsɔ nakai be lɛ hiɛ, ni ji yɛ afi 1958 lɛ, nitsumɔhe ni ji Pontificio istituto biblico (Paapa lɛ Biblia Nitsumɔhe) lɛ kala “klɛŋklɛŋ Biblia ni Katolikbii kwɛ blema nɔ̃ ni aŋmala yɛ Hebri kɛ Hela wiemɔi amli lɛ nɔ amɛtsɔɔ shishi lɛ.” Biblia shishitsɔɔmɔ nɛɛ kɛ Nyɔŋmɔ gbɛi lɛ tsu nii yɛ ehei komɛi, ni bɔ ni aspɛli gbɛi lɛ ji “Jahve.”

Shi ni ate awo Biblia lɛ shishi ni atsɔɔ kɛtee wiemɔ ni maŋbii babaoo nuɔ lɛ mli lɛ eye awui babaoo kɛbashi ŋmɛnɛ. Taakɛ Gigliola Fragnito tsɔɔ mli lɛ, “no eha heyelilɔi lɛ bɛ nɔmimaa akɛ amɛbaanyɛ amɛkɛ amɛjwɛŋmɔ kɛ henilee atsu nii.” Kɛfata he lɛ, akɛ jamɔŋ nifeemɔi ní Katolikbii babaoo buɔ akɛ amɛhe hiaa fe Biblia lɛ nyɛ̃ mɛi anɔ. Eyɛ mli akɛ amrɔ nɛɛ mɛi kpotoo ji mɛi ni le nikanemɔ moŋ, shi naagbai tamɔ nɔ ni wɔwie he lɛ haa amɛtsiɔ amɛhe kɛjɛɔ Ŋmalɛi lɛ ahe.

Shi kɛlɛ, Yehowa Odasefoi ashiɛmɔ nitsumɔ lɛ etée mɛi amiishɛɛ shi yɛ Italy Biblia lɛ he. Yɛ afi 1963 mli lɛ, Odasefoi lɛ kala New World Translation of the Christian Greek Scriptures lɛ yɛ Italy wiemɔ mli. Yɛ afi 1967 mli lɛ, amɛkala New World Translation muu lɛ fɛɛ yɛ Italy wiemɔ mli. Aja shishitsɔɔmɔ nɛɛ nɔ ni fe ekomekome 4,000,000 yɛ Italy pɛ. New World Translation lɛ kɛ Nyɔŋmɔ gbɛi ni ji Yehowa lɛ wo hei fɛɛ ni esa akɛ ehi lɛ, ni nɔ kroko hu ni haa esoroɔ lɛ kwraa yɛ shishitsɔɔmɔi krokomɛi lɛ ahe ji akɛ, nɔ̃ pɔtɛɛ ni blema Bibliai ni aŋmala yɛ Hebri kɛ Hela wiemɔi amli lɛ taoɔ anu shishi lɛ ji nɔ ni atsɔɔ shishi yɛ shishitsɔɔmɔ nɛɛ mli.

Yehowa Odasefoi yaa shia kɛ shia, ni amɛkaneɔ Ŋmalɛ lɛ mli shɛɛ sane ni haa mɔ náa hiɛnɔkamɔ lɛ amɛtsɔɔ mɛi fɛɛ ni sumɔɔ akɛ amɛbo toi lɛ, ni amɛgbálaa mli hu amɛtsɔɔ amɛ. (Bɔfoi lɛ Asaji 20:​20) Belɛ, be kroko kɛ́ okɛ Yehowa Odasefoi kpe lɛ, bi amɛ koni amɛjɛ bo diɛŋtsɛ o-Biblia lɛ mli amɛtsɔɔ bo shiwoo ni yɔɔ miishɛɛ ní Nyɔŋmɔ kɛha ákɛ etsɛŋ ni ekɛ “shikpɔŋ hee ni jalɛ hiɔ mli” baaba lɛ.​—2 Petro 3:⁠13.

[Shikpɔŋ he mfoniri ni yɔɔ baafa 13]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Venice

ROME

[Mfoniri ni yɔɔ baafa 15]

Brucioli kɛ Nyɔŋmɔ gbɛi ní espɛli lɛ akɛ Ieova wo Biblia ni etsɔɔ shishi lɛ mli

[Mfoniri ni yɔɔ baafa 15]

Bibliai ni atsɔɔ shishi kɛtee Italy wiemɔ mli lɛ fata woji ni aŋmala amɛgbɛi akɛ agu lɛ ahe

[He ni Mfoniri ni yɔɔ baafa 13 lɛ Jɛ]

Baafa ni aŋma Biblia lɛ gbɛi yɛ nɔ: Biblioteca Nazionale Centrale di Roma

[Hei ni Mfonirii ni yɔɔ baafa 15 lɛ Jɛ]

Brucioli Biblia lɛ: Biblioteca Nazionale Centrale di Roma; Wolo ni aŋmala woji ni agu lɛ agbɛi yɛ mli: Su concessione del Ministero per i Beni e le Attività Culturali