Yelikɛbuamɔ Ni Akɛha Chinabii Ni Yɔɔ Mexico Lɛ

“HII nyɔŋma ni jɛ jeŋmaji anɔ wiemɔi srɔtoi fɛɛ mli aaamɔ Yudanyo kome atade naamuu mli, amɛaakɛɛ: Wɔkɛ nyɛ aaatee; ejaakɛ wɔnu akɛ Nyɔŋmɔ kɛ nyɛ yɛ!” (Zakaria 8:23) Ŋmɛnɛ, gbalɛ ni yɔɔ miishɛɛ nɛɛ miiná emlibaa yɛ je lɛŋ fɛɛ. Gbɔmɛi “ni jɛ jeŋmaji anɔ wiemɔi srɔtoi fɛɛ mli” hiɛ mumɔŋ Israelbii lɛ amli bɔni afee ni amɛjá Yehowa Nyɔŋmɔ. Yehowa Odasefoi yɛ gbalɛ nɛɛ mlibaa he miishɛɛ waa. Amɛteaŋ mɛi babaoo miikase maji krokomɛi anɔ wiemɔ bɔni afee ni amɛná shiɛmɔ nitsumɔ ni yaa nɔ yɛ jeŋ fɛɛ lɛ mli gbɛfaŋnɔ.

Yehowa Odasefoi ni yɔɔ Mexico lɛ hu miifee nakai nɔŋŋ. Gbɔmɛi ni yɔɔ Mexico ní wieɔ China wiemɔ lɛ ayifalɛ shɛɔ 30,000. Yɛ afi 2003 lɛ mli lɛ, amɛteaŋ mɛi 15 tee Kristo gbele lɛ Kaimɔ ni afee yɛ Mexico City lɛ shishi. No ha Odasefoi ni yɔɔ Mexico lɛ yɔse akɛ abaanyɛ aye abua mɛi ni wieɔ China wiemɔ lɛ koni amɛná Nyɔŋmɔ he nilee babaoo. Bɔni afee ni aná shiɛlɔi babaoo koni amɛye amɛbua gbɔmɛi ni wieɔ China wiemɔ nɛɛ lɛ, ato skul ko ni hé nyɔji etɛ he gbɛjianɔ koni akɛtsɔse Odasefoi ni yɔɔ Mexico lɛ yɛ bɔ ni akɛ wiemɔ kuku tsuɔ nii kɛkpaa sane hiɛ yɛ Mandarin China wiemɔ mli. Kɛ́ abu naa lɛ, Odasefoi fɛɛ ni tee skul nɛɛ ayifalɛ ji 25. Beni skul lɛ ba naagbee lɛ, Chinabii ni yɔɔ Mexico City lɛ maŋ onukpa ko ni wieɔ Mandarin lɛ ba skul lɛ naagbee nifeemɔ lɛ shishi, ni no ha ana hewalɛ kpakpa ni nikasemɔ lɛ ená yɛ mɛi ni wieɔ China wiemɔ lɛ anɔ. Chinabii askul ko ni yɔɔ jɛmɛ lɛ wo nikaselɔi lɛ ateŋ mɛi etɛ ahe nyɔji fɛɛ koni amɛyatsá China wiemɔ ni amɛkaseɔ lɛ nɔ yɛ maŋsɛɛ.

Tsɔsemɔ lɛ fã ko ji akɛ, yɛ be mli ni atsɔɔ nikaselɔi lɛ wiemɔ lɛ fioo komɛi lɛ, ahaa amɛkɛ nɔ ni amɛkase lɛ gbaa sane. Beni nikaselɔi lɛ ahe sa kɛ wiemɔ lɛ fioo komɛi awiemɔ lɛ, amɛbɔi shiɛmɔ yɛ China wiemɔ mli yɛ Mexico City kpokpaa ni nitsumɔhei fa yɛ mli lɛ mli. Nikaselɔi ni yɔɔ ekãa lɛ kɛ mɛi 21 je Biblia kasemɔ shishi. Wolo bibioo ni ji Mɛni Nyɔŋmɔ Taoɔ yɛ Wɔdɛŋ? ni akɛ Roma niŋmaai ni atsɛ́ɔ lɛ Pinyin lɛ tsu nii kɛtsɔɔ shishi kɛtee China wiemɔ mli lɛ ye ebua babaoo yɛ enɛ feemɔ mli.

Mɛɛ gbɛ nɔ Odasefoi ni kpaako kwraa amɛkaseɔ China wiemɔ lɛ tsɔɔ amɛfeɔ Biblia mli nikasemɔi lɛ? Shishijee lɛ, nɔ̃ pɛ ni amɛnyɛɔ amɛkɛɔ ji akɛ, “Qing Du [Ofainɛ ni okane]” kɛkɛ lɛ amɛkɛ amɛwao etsɔɔ wolo lɛ mli kuku lɛ, kɛ no sɛɛ lɛ sanebimɔ lɛ hu. Beni mɔ lɛ ekane ni eha sanebimɔ lɛ hetoo yɛ China wiemɔ mli sɛɛ lɛ, amɛkɛɔ lɛ akɛ, “Shei shei [Oyiwaladɔŋŋ]” kɛ, “Hen Hao [Ayekoo].”

Atsɔ gbɛ ni tamɔ nɛkɛ nɔ akɛ yoo ko ni tsɛ́ɔ ehe Kristofonyo lɛ je Biblia kasemɔ shishi. Beni amɛgbe nikasemɔ ni ji etɛ lɛ naa lɛ, Odasefonyo lɛ yiŋ etɛ̃ɛɛ lɛ kɛji akɛ yoo lɛ enu nikasemɔ lɛ shishi  diɛŋtsɛ. No hewɔ lɛ, Odasefonyo lɛ ha nyɛminuu ko ni ji Chinanyo fata ehe kɛtee yoo lɛ ŋɔɔ. Beni nyɛminuu lɛ bi yoo lɛ kɛji eyɛ saji komɛi ni ebaabi lɛ, yoo lɛ bi akɛ: “Ani ebaabi ni male seremɔ dani abaptisi mi?”

Etsɛɛɛ ni ato Asafoŋ Wolo Nikasemɔ shishi, ni kɛ́ aja mli lɛ, mɛi 9 ni wieɔ China wiemɔ yafataa Mexicobii Odasefoi 23 ni yɔɔ jɛmɛ lɛ ahe kɛfeɔ nikasemɔ nɛɛ. Chinanyo datrɛfonyo ko ní be ko lɛ, helatsɛ ko ni ekwɛ lɛ lɛ ha lɛ Buu-Mɔɔ kɛ Awake! woji tɛtrɛbii ni yɔɔ Spain wiemɔ mli lɛ ekomɛi lɛ fata mɛi ni baa kpee nɛɛ ahe. Akɛni enyɛɛɛ ekane Spain wiemɔ lɛ hewɔ lɛ, eha mɔ ko tsɔɔ emli wiemɔi lɛ fioo komɛi ashishi eha lɛ. Beni eyɔse akɛ wolo tɛtrɛɛ lɛ wieɔ Biblia lɛ he lɛ, ebi helatsɛ lɛ kɛji enine baanyɛ ashɛ eko nɔ yɛ China wiemɔ mli. Yoo lɛ ha enine shɛ eko nɔ, ni ajɛ Yehowa Odasefoi anitsumɔhe nine ni yɔɔ Mexico lɛ ato gbɛjianɔ koni Odasefonyo ko ni wieɔ China wiemɔ ayasara lɛ. Beni datrɛfonyo nɛɛ yɔɔ enyɛ ŋɔɔ yɛ China lɛ, no mli lɛ enáa Biblia ni enyɛ yɔɔ lɛ kanemɔ he miishɛɛ. Beni eshiɔ kɛyaa Mexico lɛ, emami kɛɛ lɛ akɛ ekakpa Biblia lɛ kanemɔ. No hewɔ lɛ, beni eyashɛ lɛ, esɔleɔ daa koni ená mɔ ko ni baanyɛ eye ebua lɛ koni ekase Nyɔŋmɔ ni Biblia lɛ wieɔ ehe lɛ he nii babaoo. Ekɛ miishɛɛ wie akɛ: “Nyɔŋmɔ ebo misɔlemɔ lɛ toi!”

Weku ko ni ji Chinabii ní yahai tsũ yɛ Mexiconyo yoo ko ni Yehowa Odasefoi kɛ lɛ kaseɔ Biblia lɛ shia lɛ fata mɛi ni baa wolo nikasemɔ lɛ shishi lɛ ahe. Eyɛ mli akɛ weku ni ji Chinabii nɛɛ nuuu Spain wiemɔ lɛ tsɔ moŋ, shi kɛ́ akɛ yoo lɛ miikase Biblia lɛ, amɛtaa shi ni amɛboɔ toi. Yɛ be ko mli lɛ, weku lɛ bi Odasefonyo ni kwɛɔ nikasemɔ lɛ nɔ lɛ kɛji akɛ eyɛ woji komɛi yɛ China wiemɔ mli. Etsɛɛɛ ni akɛ amɛ je Biblia mli nikasemɔ shishi yɛ China wiemɔ mli. Be fioo ko sɛɛ lɛ, weku lɛ ha ale akɛ amɛbaasumɔ ni amɛshiɛ amɛha amɛmaŋbii lɛ, ní agbɛnɛ hu amɛjɔɔ amɛhe nɔ amɛha Yehowa.

Yɛ anɔkwale mli lɛ, China wiemɔ kasemɔ wa. Shi kɛlɛ, taakɛ wɔna yɛ niiashikpamɔi srɔtoi ni wɔsusu he lɛ amli lɛ, yɛ Yehowa dɛŋ yelikɛbuamɔ naa lɛ, gbɔmɛi ni jɛ maji srɔtoi anɔ, ní Chinabii hu fata he lɛ miikase Nyɔŋmɔ suɔmɔnaa nifeemɔ yɛ Mexico, kɛ agbɛnɛ hu yɛ shikpɔŋ lɛ nɔ hei krokomɛi fɛɛ.

[Mfoniri ni yɔɔ baafa 17]

Mɛi komɛi ni miikase China wiemɔ yɛ Mexico City

[Mfoniri ni yɔɔ baafa 18]

Mexiconyo Odasefonyo ko ni miifee Biblia mli nikasemɔ yɛ China wiemɔ mli

[Mfoniri ni yɔɔ baafa 18]

Aatsu shĩa kɛ shĩa shiɛmɔ nitsumɔ lɛ he nii yɛ China wiemɔ mli, yɛ Mexico City