Ŋwɛibɔfoi Mɛi ni Amɛji

MAŊTSƐ ko ni ye maŋtsɛyeli kpeteŋkpele ko nɔ lɛ heee nɔ ni ekɛ ehiŋmɛi na lɛ eyeee. Ena ni mɔ ko miihere hii etɛ komɛi ni abu amɛ fɔ ni ashɛrɛ amɛ awo la kɛ flɔnɔɔ mli lɛ ayiwala! Namɔ here amɛyiwala? Maŋtsɛ lɛ diɛŋtsɛ kɛɛ mɛi etɛ ní ahere amɛyiwala lɛ akɛ: “Ajie [nyɛ-Nyɔŋmɔ] lɛ yi akɛ etsu ebɔfo, ni ebajie etsuji ní ŋɔ amɛhiɛ amɛfɔ̃ enɔ” lɛ. (Daniel 3:28) Nakai Babilon maŋtsɛ ní ye nɔ, nɔ ni fe afii 2000 ni eho nɛ lɛ kɛ ehiŋmɛi na ŋwɛibɔfo ko here mɛi ayiwala. Mɛi ni hi shi yɛ blema lɛ ateŋ mɛi babaoo hé ye akɛ ŋwɛibɔfoi yɛ. Mɛi ni yɔɔ ŋmɛnɛ lɛ hu ateŋ mɛi babaoo heɔ yeɔ akɛ ŋwɛibɔfoi yɛ, ni amɛnuɔ he hu akɛ ŋwɛibɔfoi nɛɛ náa amɛshihilɛi anɔ hewalɛ yɛ gbɛ ko nɔ. Namɛi ji ŋwɛibɔfoi lɛ, ni namɔ bɔ amɛ?

Biblia lɛ tsɔɔ akɛ, mumɔi ji ŋwɛibɔfoi lɛ taakɛ bɔ ni Nyɔŋmɔ hu ji Mumɔ lɛ. (Lala 104:4; Yohane 4:24) Ayɛ ŋwɛibɔfoi akpekpe toi akpei abɔ. (Kpojiemɔ 5:11) Ni “hewalɔi ekãalɔi” ji amɛ fɛɛ hu. (Lala 103:20) Eyɛ mli akɛ ŋwɛibɔfoi tamɔ adesai kɛ shishinumɔ akɛ amɛ hu amɛyɛ sui kɛ hegbɛ akɛ amɛ diɛŋtsɛ amɛkpɛɔ amɛyiŋ moŋ, shi afɔɔɔ ŋwɛibɔfoi lɛ ákɛ adesai dani amɛbatsɔmɔ ŋwɛibɔfoi. Yɛ anɔkwale mli lɛ, Nyɔŋmɔ ebɔ ŋwɛibɔfoi lɛ afii babaoo kwraa dani ebɔ adesa—dani ebɔ wɔshibɔlemɔ ŋulami ni ji Shikpɔŋ lɛ po. Biblia lɛ kɛɔ akɛ, beni Nyɔŋmɔ ‘to shikpɔŋ lɛ shishi lɛ, leebi ŋulamii [ŋwɛibɔfoi] lɛ fɛɛ lá nyamɔ lala shikome ni Nyɔŋmɔ bii lɛ fɛɛ kwa bɔ oshe.’ (Hiob 38:4, 7) Akɛni Nyɔŋmɔ ni bɔ ŋwɛibɔfoi lɛ hewɔ lɛ, atsɛ́ɔ amɛ Nyɔŋmɔ bii.

Mɛni hewɔ Nyɔŋmɔ bɔ ŋwɛibɔfoi lɛ? Mɛɛ gbɛfaŋnɔ ŋwɛibɔfoi tsuɔ yɛ adesai ashihilɛ mli? Ani amɛnáa wɔshihilɛ nɔ hewalɛ ŋmɛnɛ? Akɛni amɛ diɛŋtsɛ amɛnyɛɔ amɛkpɛɔ amɛyiŋ hewɔ lɛ, ani no eha amɛteŋ mɛi komɛi eyakɔ gbɛ ni Satan Abonsam kɔ lɛ, ni no hewɔ lɛ amɛbatsɔmɔ Nyɔŋmɔ henyɛlɔi? Biblia lɛ haa sanebimɔi nɛɛ ahetoo yɛ gbɛ ni ja nɔ.