Ani Otamɔ Flamboyant Tso?

SHIƐLƆI enyɔ komɛi ni yɔɔ akrowa ko ni yɔɔ Port Moresby yɛ Papua New Guinea maŋ lɛ husu naa lɛ mli lɛ jɛ shiɛmɔ amɛmiiba shĩa. Beni amɛnyiɛ kɛbaa lɛ, amɛna tso fɛfɛo ko. Nuu nukpa lɛ kɛɛ akɛ: “Ei, naa flamboyant tso!” Etsɔ ehe ekwɛ oblanyo ni yɔɔ emasɛi lɛ, ni etee nɔ ekɛɛ akɛ: “Nakai gbɛi lɛ shishi ji ‘daa afi tso.’ Esoro tso nɛɛ yɛ tsei krokomɛi ni yɔɔ hulutsoo shikpɔji anɔ lɛ ateŋ babaoo he, ejaakɛ enɔ baai lɛ kpalaa daa afi, ni efeɔ tamɔ nɔ ni egbo. Shi kɛlɛ, kɛ́ nugbɔ bɔi nɛmɔ lɛ, etsɛ̃ɔ ekoŋŋ, egbáa fɔfɔii, ni esaa efeɔ fɛo ekoŋŋ.”

Abaanyɛ akase nɔ ko kɛjɛ flamboyant tso nɛɛ he. Taakɛ ehe nilelɔi komɛi tsɔɔ lɛ, abuɔ tso nɛɛ akɛ eji tsei srɔtoi enumɔ ni woɔ fɔfɔii fɛfɛji fe fɛɛ yɛ je lɛŋ lɛ ateŋ ekome. Eyɛ mli akɛ tso lɛ fɔfɔii kɛ enɔ baai lɛ kpalaa beni nunɛmɔ be eho moŋ, shi etoɔ nu yɛ emli. Eshishifãi lɛ yɛ hewalɛ ni ebaanyɛ ekwɛ̃ yɛ tɛsaai ni yɔɔ shikpɔŋ shishi tɔ̃ɔ lɛ ahe. Kɛtsɔ nɛkɛ gbɛ nɔ lɛ, tso lɛ nyɛɔ emaa shi shiŋŋ ni ekpeeɔ ahum ni naa wa naa. Kɛ wɔɔwie yɛ kukufoo mli lɛ, eshwereɔ yɛ shihilɛi ni mli wawai po amli.

Ekolɛ wɔbaayaje shihilɛi ni baaka bɔ ni wɔhemɔkɛyeli lɛ mli wa ha lɛ mli. Mɛni baaye abua wɔ koni wɔŋmɛ wɔtsui shi? Taakɛ flamboyant tso lɛ ji lɛ, wɔbaanyɛ wɔnu Nyɔŋmɔ Wiemɔ lɛ wala nu lɛ, ní wɔto eko yɛ wɔmli. Agbɛnɛ hu, esa akɛ wɔkpɛtɛ Yehowa ni ji ‘wɔtɛsaa’ lɛ he gbagbalii, ni nakai nɔŋŋ esa akɛ wɔkpɛtɛ esafo lɛ hu he. (2 Samuel 22:3) Eji anɔkwale akɛ, flamboyant tso lɛ ji nɔ ko ni mɛi ajwɛŋmɔ yaa nɔ waa ni haa wɔkaiɔ akɛ kɛ́ wɔyaje shihilɛ ko ni naa wa waa mli po, ní wɔkɛ yelikɛbuamɔ ni Yehowa kɛhaa lɛ tsu nii jogbaŋŋ kɛmɔ shi lɛ, wɔbaanyɛ wɔhiɛ wɔmumɔŋ hewalɛ kɛ shweremɔ lɛ mli. Kɛtsɔ nakai feemɔ nɔ lɛ, ‘wɔbaaná shiwoi lɛ’ ni ekɛhaa lɛ, ni naanɔ wala he shiwoo lɛ hu fata he.—Hebribii 6:12; Kpojiemɔ 21:4.