Ani Mesia He Miihia Wɔ?

EKOLƐ bo hu obaabi akɛ, “Ani Mesia he miihia wɔ?” Hɛɛ, nilee yɛ mli akɛ ooosusu he kɛji Mesia lɛ baanyɛ aná hewalɛ diɛŋtsɛ ko yɛ onɔ.

Ekolɛ mɛi komɛi ni obuɔ amɛwiemɔ baama nɔ mi kɛha bo akɛ hetoo lɛ yɛ faŋŋ, ni no ji: Mesia he miihia bo, ni jeee bo pɛ, shi moŋ mɛi fɛɛ. Beni Yudafoi amla he nilelɔ ko ni hi shi yɛ klɛŋklɛŋ afii 100 lɛ mli lɛ wieɔ Mesia lɛ he lɛ, eŋma akɛ: “Shi Nyɔŋmɔ shiwoi abɔ ni yɔɔ nɛɛ, emli hɛɛ lɛ nɔŋŋ yɔɔ.” Nilelɔ nɛɛ ma gbɛfaŋnɔ ni he hiaa ni Mesia lɛ tsuɔ yɛ wɔ-Bɔlɔ lɛ yiŋtoo akɛ ejɔɔ shikpɔŋ nɔ jeŋmaji lɛ fɛɛ lɛ he nitsumɔ mli lɛ nɔ mi. (2 Korintobii 1:20) Gbɛfaŋnɔ ni Mesia lɛ tsuɔ lɛ he hiaa waa akɛ, ebaa kɛ eshihilɛ yɛ shikpɔŋ nɔ ji nɔ titri ni Biblia gbalɛi wieɔ he. Henry H. Halley ŋma yɛ ewolo ko ni akɛpɛiɔ saji amli ní mɛi akpekpei abɔ kɛtsu nii nɔ ni fe afii 70 nɛ lɛ mli akɛ: “Aŋma Kpaŋmɔ Momo lɛ bɔni afee ni akɛtée mɛi amiishɛɛ shi yɛ [Mesia] lɛ he, ni akɛgbele gbɛ hu kɛha e-Baa lɛ.” Shi ani ehe miihia ni eba? Mɛni hewɔ esa akɛ osusu he?

Yɛ anɔkwale mli lɛ, “Mesia” shishi ji “Mɔ ni Afɔ Lɛ Mu” ni ekɛ gbɛi ni ale waa ni ji “Kristo” lɛ fɛɛ hiɛ shishinumɔ kome. Akɛni klɛŋklɛŋ adesai enyɔ ni ji Adam kɛ Hawa yakɔ gbɛ ni bulɛ bɛ mli hewɔ lɛ, ehe bahia ni Mɔ ni Encyclopædia Britannica, afi 1970 Nɔ̃ lɛ wieɔ ehe akɛ “kpɔlɔ ni fe fɛɛ” lɛ aba. Abɔ amɛ akɛ mɛi ni eye emuu, kɛ gbɛkpamɔ akɛ amɛbaahi shi yɛ Paradeiso mli kɛya naanɔ, shi nakai hegbɛ lɛ ŋmɛɛ amɛ. Ŋwɛibɔfo atuatselɔ ko ni sɛɛ mli lɛ abale lɛ akɛ Satan Abonsam lɛ kɛɛ amɛ akɛ amɛ-Bɔlɔ lɛ yɛ kpɛŋŋ tsɔ̃, ni akɛ, ebaahi eha amɛ kɛ́ amɛ diɛŋtsɛ amɛkpɛ amɛyiŋ yɛ nɔ ni ja kɛ nɔ ni ejaaa he.—1 Mose 3:1-5.

Alaka Hawa ni ehé nakai amale lɛ eye. Akɛni Adam yabu wekukpaa ni kã ekɛ eŋa lɛ teŋ fe Nyɔŋmɔ toi ni eeebo hewɔ lɛ, eyafata eŋa lɛ he yɛ atuatsemɔ ni Abonsam ji mɔ ni hɔ sɛɛ lɛ mli. (1 Mose 3:6; 1 Timoteo 2:14) Gbɛ ni amɛkɔ lɛ ha amɛŋmɛɛ hegbɛ akɛ amɛaahi shi kɛya naanɔ yɛ paradeiso mli, ni naagbai krokomɛi hu jɛ mli kɛba. Amɛshi esha kɛ nɔ ni jɛɔ mli baa ni ji gbele amɛha amɛshwiei ni kpaako amɛbaafɔ amɛ lɛ akɛ gboshinii.—Romabii 5:12.

Yehowa ni ji wɔ-Bɔlɔ lɛ to gbɛjianɔ nɔŋŋ koni ejaje nibii gbohii babaoo ni ejɛ atuatsemɔ lɛ mli kɛba lɛ. Ekɛ shishitoo mla ní sɛɛ mli akɛwo Mose Mla lɛ mli lɛ tsu nii ni ekɛto kpatamɔnɔ he gbɛjianɔ—nakai mla lɛ tsɔɔ akɛ esa akɛ nɔ ni aŋmɛɛ lɛ kɛ nɔ ni akɛtoɔ najiaŋ lɛ aye egbɔ. (5 Mose 19:21; 1 Yohane 3:8) Kɛ́ Adam  kɛ Hawa shwiei ni nii yɔɔ mɔbɔ lɛ aaahi shi yɛ shikpɔŋ nɔ yɛ Paradeiso mli kɛya naanɔ taakɛ eji Bɔlɔ lɛ yiŋtoo kɛha adesai aweku lɛ, no lɛ ebaabi ni atsu saji ahe nii yɛ nakai shishitoo mla lɛ kɛ gbeekpamɔ naa. Enɛ hewɔ ni Mesia lɛ baa lɛ.

Beni Yehowa Nyɔŋmɔ jajeɔ fɔbuu kojomɔ eshiɔ Abonsam lɛ, ejaje yɛ klɛŋklɛŋ Biblia mli gbalɛ lɛ mli akɛ: “Ni mikɛ nyɛɛ aaaŋmɛ okɛ yoo lɛ teŋ, kɛ oseshi kɛ eseshi teŋ. Eeetswa oyitso nɔ̃, ni bo hu oootswa enanetsitsi nɔ̃.” (1 Mose 3:15) Biblia he nilelɔ ko tsɔɔ mli akɛ sane nɛɛ ji “shiwoi ni Ŋmalɛi lɛ kɛhaa yɛ Mesia lɛ he lɛ amli klɛŋklɛŋ nɔ̃.” Nilelɔ kroko hu tsɔɔ mli akɛ Mesia lɛ nɔ Nyɔŋmɔ baatsɔ ni “ejie haomɔi fɛɛ ni ejɛ nakai eshafeemɔ lɛ mli kɛba lɛ kɛya,” ní yɛ nakai beaŋ nɔŋŋ lɛ ejɔɔ adesai aweku lɛ.—Hebribii 2:14, 15.

Shi ekolɛ oyɔse akɛ, shihilɛ mli ni adesai yɔɔ ŋmɛnɛ lɛ ehiii. Adesai aweku lɛ efee shwɛm. No hewɔ lɛ, wolo ni ji The World Book Encyclopedia lɛ kɛɛ akɛ: “Yudafoi babaoo miikpa Mesia ko gbɛ,” ni akɛ kɛ́ eba lɛ, “ebaajaje nibii gbohii fɛɛ, ni eye ewebii lɛ ahenyɛlɔi lɛ anɔ kunim.” Shi kɛlɛ, Biblia lɛ kɛɔ akɛ Mesia lɛ eba momo. Ani esa akɛ wɔhé nɔ ni Biblia lɛ kɛɔ lɛ wɔye? Abaaha sanebimɔ nɛɛ hetoo yɛ sane ni nyiɛ sɛɛ lɛ mli.