Sanebimɔi ni Jɛ Kanelɔi Adɛŋ

Te bɔfo Paulo tsɔɔ tɛŋŋ beni ekɛɛ akɛ yei ‘afee dioo yɛ asafoi lɛ amli’ lɛ?

Paulo ŋma kɛyaha Kristofoi asafo ni yɔɔ Korinto lɛ akɛ: ‘Taakɛ bɔ ni eyɔɔ yɛ hetselɔi asafoi lɛ fɛɛ mli lɛ, nyɛhaa yei lɛ afea dioo yɛ asafoi lɛ amli, ejaakɛ aŋmɛɛɛ amɛ gbɛ ni amɛwie.’ (1 Korintobii 14:33, 34) Bɔni afee ni wɔnu enɛ shishi jogbaŋŋ lɛ, ebaahi jogbaŋŋ akɛ wɔɔsusu shihilɛ ni ba ni ha Paulo kɛ ŋaawoo lɛ ha lɛ he.

Paulo wie saji ni kɔɔ kpeei ni Kristofoi asafo lɛ feɔ lɛ ahe yɛ 1 Korintobii yitso 14 lɛ mli. Etsɔɔ nɔ ni esa akɛ asusu he yɛ kpeei nɛɛ ashishi lɛ mli, ni etsɔɔ bɔ ni esa akɛ afee kpeei nɛɛ aha. (1 Korintobii 14:1-6, 26-34) Kɛfata he lɛ, ema nɔ hewɔ ni afeɔ Kristofoi akpeei lɛ nɔ mi—“koni asafo lɛ nane amɔ shi.”—1 Korintobii 14:4, 5, 12, 26.

Famɔ ni Paulo kɛha akɛ ‘afee dioo’ lɛ jeɔ kpo shii etɛ yɛ 1 Korintobii yitso 14 lɛ mli. Esoro mɛi ni ekɛwie yɛ shihilɛi srɔtoi etɛ lɛ fɛɛ mli yɛ asafo lɛ mli, shi yɛ shihilɛ lɛ eko fɛɛ eko mli lɛ, yiŋtoo kome lɛ nɔŋŋ hewɔ ewie nakai lɛ—koni “afee nii fɛɛ bɔ ni yɔɔ fɛo kɛ gbɛnaa gbɛnaa.”—1 Korintobii 14:40.

Klɛŋklɛŋ lɛ, Paulo kɛɛ akɛ: ‘Kɛji aawie lilɛi srɔto lɛ, daa nɛɛ, mɛi enyɔ loo, kɛ́ efá aahu lɛ, mɛi etɛ pɛ awie, mɔ komekome, ni mɔ kome hu atsɔɔ shishi. Shi kɛji shishitsɔɔlɔ ko bɛ lɛ, ha ni efee dioo yɛ asafo lɛ mli, shi ewie eha lɛ diɛŋtsɛ ehe kɛ Nyɔŋmɔ.’ (1 Korintobii 14:27, 28) Enɛ etsɔɔɔ akɛ nakai mɔ lɛ akawie kwraa yɛ kpeei ashishi, shi moŋ esa akɛ efee dioo yɛ bei komɛi amli. Yɛ anɔkwale mli lɛ, nine shɛŋ yiŋtoo hewɔ ni afeɔ kpeei—ni ji koni akɛha mɔ nane amɔ shi—lɛ nɔ kɛ́ mɔ lɛ kɛ wiemɔ kroko ni anuuu shishi lɛ wie.

Nɔ ni ji enyɔ lɛ, Paulo kɛɛ akɛ: ‘Gbalɔi lɛ, mɛi enyɔ loo mɛi etɛ awie, ni mɛi ni eshwɛ lɛ akojo. Shi kɛji ajie nɔ ko kpo atsɔɔ mɔ ko ni tá shi lɛ, tsutsu mɔ lɛ afee dioo.’ Enɛ etsɔɔɔ akɛ klɛŋklɛŋ gbalɔ lɛ akawie yɛ kpeei ashishi, shi moŋ etsɔɔ akɛ esa akɛ efee dioo yɛ bei komɛi amli. Kɛkɛ lɛ mɔ ni atsɔ naakpɛɛ gbɛ nɔ ajie ninaa lɛ kpo  atsɔɔ lɛ lɛ baanyɛ ekɛ asafo lɛ awie, ni enɛ baaha nine ashɛ yiŋtoo hewɔ ni afeɔ kpee—ni ji ní “awie atsɔɔ mɛi fɛɛ”—lɛ nɔ.—1 Korintobii 14:26, 29-31.

Nɔ ni ji etɛ lɛ, Paulo kɛ yei ni ji Kristofoi lɛ pɛ wie akɛ: ‘Nyɛhaa yei lɛ afea dioo yɛ asafoi lɛ amli, ejaakɛ aŋmɛɛɛ amɛ gbɛ ni amɛwie, shi moŋ amɛba amɛhe shi.’ (1 Korintobii 14:34) Mɛni hewɔ Paulo kɛ famɔ nɛɛ ha nyɛmimɛi yei lɛ? Koni afee nɔ fɛɛ nɔ yɛ gbɛjianɔtoo naa yɛ asafo lɛ mli. Ekɛɛ akɛ: “Shi kɛ́ amɛmiisumɔ akɛ amɛkase nɔ ko lɛ, amɛbi amɛ diɛŋtsɛ amɛwumɛi yɛ shia. Ejaakɛ eyɛ hiɛgbele ha yei akɛ amɛaawie yɛ asafo mli.”—1 Korintobii 14:35.

Ekolɛ nyɛmimɛi yei lɛ ateŋ mɛi komɛi teɔ shi woɔ nɔ ni akɛɔ yɛ asafo lɛ mli lɛ. Paulo ŋaawoo lɛ ye ebua nyɛmimɛi yei lɛ koni amɛtsi amɛhe kɛjɛ sakasaka nifeemɔ ni tamɔ nɛkɛ he, ní amɛkɛ heshibaa akpɛlɛ gbɛhe ni amɛyɔɔ mli yɛ Yehowa yitsoyeli gbɛjianɔtoo lɛ mli lɛ nɔ, titri lɛ, nɔ ni kɔɔ amɛwumɛi ahe lɛ. (1 Korintobii 11:3) Kɛfata he lɛ, kɛ́ nyɛmimɛi yei lɛ fee dioo lɛ, amɛkɛbaatsɔɔ akɛ amɛkɛfeee oti ni ma amɛhiɛ akɛ amɛbaatsɔmɔ tsɔɔlɔi yɛ asafo lɛ mli. Beni Paulo ŋma kɛyaha Timoteo lɛ, etsɔɔ akɛ ejaaa akɛ yoo aaatsɔɔ nii: “Shi mihaaa yoo hegbɛ akɛ etsɔɔ nii aloo eye nuu nɔ, shi moŋ efee dioo.”—1 Timoteo 2:12.

Ani no tsɔɔ akɛ esaaa akɛ Kristofonyo yoo wieɔ kwraa yɛ asafoŋ kpee shishi? Dabi. Yɛ Paulo gbii lɛ amli lɛ, yei Kristofoi ni ekolɛ mumɔ krɔŋkrɔŋ lɛ tsirɛ amɛ lɛ, sɔle loo amɛgba yɛ asafo lɛ mli yɛ bei komɛi amli. Yɛ bei ni tamɔ nɛkɛ mli lɛ, amɛyɔseɔ gbɛhe ni amɛyɔɔ mli lɛ kɛtsɔ amɛyitso nɔ ni amɛhàa lɛ nɔ. * (1 Korintobii 11:5) Kɛfata he lɛ, yɛ Paulo gbii lɛ amli kɛ agbɛnɛ hu yɛ wɔgbii nɛɛ amli lɛ, awoɔ nyɛmimɛi yei kɛ hii fɛɛ hewalɛ koni amɛjaje amɛhiɛnɔkamɔ lɛ amɛtsɔɔ yɛ faŋŋ mli. (Hebribii 10:23-25) Kɛfata enɛ ni nyɛmimɛi yei feɔ yɛ shiɛmɔ nitsumɔ lɛ mli lɛ he lɛ, amɛjajeɔ amɛhiɛnɔkamɔ lɛ ni amɛwoɔ mɛi krokomɛi hewalɛ yɛ asafoŋ kpeei ashishi kɛtsɔ tsɛ́ ni atsɛ́ɔ amɛ ni amɛkɛ hetooi ni sa jogbaŋŋ haa lɛ nɔ, kɛ agbɛnɛ hu kɛtsɔ hegbɛ ni ahaa amɛ ni amɛkɛ amɛhe awo nɔkwɛmɔnii loo skul nifeemɔi amli lɛ nɔ.

Enɛ hewɔ lɛ, yei Kristofoi ebɔɔɔ mɔdɛŋ akɛ amɛaaŋɔ hegbɛ ni nuu yɔɔ lɛ kɛtsɔɔ asafo lɛ nii, ni amɛkɛ enɛ feemɔ tsɔɔ akɛ ‘amɛfeɔ dioo.’ Amɛbiii saji ni teeɔ naataamɔi ashi kɛteee shi amɛwooo hegbɛ ni mɛi ni tsɔɔ nii yɛ asafo lɛ mli lɛ yɔɔ lɛ. Kɛ nyɛmimɛi yei Kristofoi tsu gbɛhe ni amɛyɔɔ mli yɛ asafo lɛ mli lɛ he nii lɛ, enɛ haa toiŋjɔlɛ babaoo hiɔ asafo lɛ mli, ni ehaa ‘nɔ fɛɛ nɔ’ ni afeɔ yɛ asafoŋ kpeei ashishi lɛ ‘yaa nɔ bɔ ni baaha mɛi anane amɔ shi.’—1 Korintobii 14:26, 33.

[Shishigbɛ niŋmaa]