Sanebimɔi ni Jɛ Kanelɔi Adɛŋ
Sanebimɔi ni Jɛ Kanelɔi Adɛŋ
Mɛni wɔbaanyɛ wɔkase kɛjɛ naatsĩi ni yɔɔ 2 Mose 23:19 lɛ mli, nɔ ni kɛɔ akɛ: “Kaahoo toobi ni tseko fufɔ” lɛ?
Famɔ nɛɛ ni yɔɔ Mose Mla lɛ mli ní jeɔ kpo yɛ hei etɛ yɛ Biblia lɛ mli lɛ baanyɛ aye abua wɔ ni wɔnu nɔ ni Yehowa buɔ akɛ eji nɔ ni ja, emusuŋtsɔlɛ, kɛ emlihilɛ lɛ shishi. Emaa bɔ ni enyɛ̃ɔ apasa jamɔ kwraa ehaa lɛ hu nɔ mi.—2 Mose 34:26; 5 Mose 14:21.
Ákɛ aaahoo toobi loo kooloo kroko ni enyɛ tseko lɛ fufɔ lɛ baate shi awo bɔ ni Yehowa to nibii ahe gbɛjianɔ yɛ adebɔɔ naa lɛ. Nyɔŋmɔ kɛ nyɛ lɛ fufɔ lɛ ha koni eha toobi lɛ aná niyenii ní eda. Taakɛ woloŋlelɔ ko tsɔɔ mli lɛ, toobi ni lɛ diɛŋtsɛ enyɛ tseko lɛ fufɔ ní aaahoo lɛ lɛ jieɔ “bulɛ ni abɛ kɛha gbɛjianɔ ni Nyɔŋmɔ eto ni efee lɛ krɔŋkrɔŋ ni yɔɔ nyɛ kɛ bi teŋ” lɛ kpo.
Kɛfata he lɛ, mɛi komɛi susuɔ akɛ toobi ni enyɛ tseko lɛ fufɔ ní aaahoo lɛ lɛ aaanyɛ afee wɔŋjalɔi anifeemɔ ni amɛkɛbiɔ koni nugbɔ anɛ. Kɛ nakai eji lɛ, no lɛ naatsĩi lɛ bu Israelbii lɛ ahe kɛjɛ jeŋmaji ni bɔle amɛ lɛ ajamɔŋ nifeemɔi ní nilee kɛ mɔbɔnalɛ bɛ mli lɛ ahe. Mose Mla lɛ je gbɛ egu Israelbii lɛ koni amɛkanyiɛ yɛ nakai jeŋmaji lɛ akusumii lɛ anaa.—3 Mose 20:23.
Yɛ naagbee lɛ, nɛkɛ mla nɛɛ tsɔɔ akɛ Yehowa musuŋtsɔlɛ lɛ fa babaoo. Yɛ anɔkwale mli lɛ, akɛ kitãi ni tamɔ nakai nɔŋŋ ní teɔ shi eshiɔ niseniianii ni afeɔ kooloi lɛ ewo Mla lɛ mli, ni ehaaa afee nii ni baate shi awo nibii ahe gbɛjianɔ ni ato yɛ adebɔɔ naa lɛ. Ákɛ nɔkwɛmɔnɔ lɛ, Mla lɛ eŋmɛɛɛ gbɛ ni akɛ kooloo ní kɛ enyɛ ehiko shi gbii kpawo lɛ ashã afɔle, ni eŋmɛɛɛ gbɛ ni agbe kooloo kɛ ebi fɛɛ gbi kome, ni asaŋ eŋmɛɛɛ gbɛ hu ni amɔ loofɔlɔ ni bu wɔji anɔ lɛ ní aloo ewɔji lɛ afata he loo ni amɔ loofɔlɔ nyɛ kɛ ebii lɛ fɛɛ kɛjɛ loofɔlɔtsu lɛ mli.—3 Mose 22:27, 28; 5 Mose 22:6, 7.
Ekã shi faŋŋ akɛ Mla lɛ jeee nɔ ni kɛ famɔi kɛ naatsĩi ni yɔɔ haŋtsii haa kɛkɛ. Sɛɛnamɔi ni yɔɔ Mla lɛ he lɛ ateŋ ekome ji akɛ emli shishitoo mlai lɛ yeɔ ebuaa wɔ ni wɔnáa jeŋba he tɛi ni nɔ kwɔlɔ, ni wɔjieɔ Yehowa sui ni yɔɔ naakpɛɛ lɛ akpo yɛ gbɛ ni ja nɔ.—Lala 19:8-12.
[He ni Mfoniri ni yɔɔ baafa 31 lɛ Jɛ]
© Timothy O’Keefe/Index Stock Imagery