Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Belɛ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛni ji yiŋtoi komɛi ahewɔ ni efɔŋfeemɔ efa babaoo ŋmɛnɛ lɛ?

Efɔŋfeemɔ ni adesai sumɔɔ lɛ fata he ni nifɔjianii efa nakai lɛ. (1 Mose 8:21) Nɔ kroko hu ni eha eba lɛ nakai ji akɛ, mɛi babaoo bɛ Nyɔŋmɔ suɔmɔnaa nifeemɔ he anɔkwa nilee. Kɛfata he lɛ, Satan ni ji mɔ ni je efɔŋfeemɔ shishi lɛ kã he ekɛ ehe miiwo adesai asaji amli.—1/1, baafa 4-6.

• Mɛɛ nibii kpakpai baanyɛ ajɛ wiemɔ ni wɔɔwie yɛ be ni sa mli lɛ mli aba? (Abɛi 12:25)

No baanyɛ aha mɔ ni wɔkɛwieɔ lɛ afee nii kɛ nɔmimaa, ni ebaanyɛ ewo lɛ hewalɛ loo ekanya lɛ, ni asaŋ no baanyɛ aha mɔ lɛ anu he hu akɛ asumɔɔ esane. Kɛfata he lɛ, mɔdɛŋ ni wɔbɔɔ koni wɔjie mɛi ayi lɛ yeɔ buaa wɔ ni wɔnaa nibii kpakpai ni yɔɔ amɛmli.—1/1, baafa 16-17.

• Mɛɛ nibii akɛto kpaŋmɔ adeka lɛ mli?

Aŋɔ tɛi tɛtrɛbii enyɔ ní aŋmala Mla lɛ yɛ nɔ kɛ mana fioo ato mli. Yɛ Kora atuatsemɔ lɛ sɛɛ lɛ, aŋɔ Aaron tso lɛ ayato Adeka lɛ mli koni aŋɔto okadi aha nakai yinɔbii lɛ loo akɛye odase ashi amɛ. (Hebribii 9:4) Ajie tso lɛ kɛ mana lɛ kɛjɛ Adeka lɛ mli dani ajɔɔ Salomo sɔlemɔtsu lɛ nɔ.—1/15, baafa 31.

• Mɛni hewɔ ehe bahia ni Yudafoi ni hi shi yɛ Nehemia gbii lɛ amli lɛ kɛ lai aya sɔlemɔwe lɛ?

Eyɛ mli akɛ Mose Mla lɛ biii ni akɛ lai abaha akɛ afɔle moŋ, shi yɛ Nehemia gbii lɛ amli lɛ, ehe bahia koni lai ahi sɔlemɔwe lɛ be fɛɛ be bɔni afee ni aná eko akɛshã afɔle yɛ afɔleshãalatɛ lɛ nɔ.—2/1, baafa 11.

• Mɛni ji Muratori Wolo Lɛ?

Efata ŋmalɛi ni akɛ niji ŋmala yɛ Latin mli lɛ ahe. Aŋma ŋmalɛi ni akwɛ nɔ aŋma Muratori nɔ̃ lɛ yɛ Hela wiemɔ mli yɛ afi 100 Ŋ.B. afii lɛ amli. No ji Kristofoi a-Hela Ŋmalɛi ni yɔɔ lɛ ateŋ nɔ ni etsɛ fe fɛɛ ní anyɛɔ akɛhe fɔ̃ɔ nɔ, ni etsĩɔ woji ni yɔɔ Hela Ŋmalɛi lɛ amli kɛ mɛi ni ŋmala lɛ hu atã.—2/15, baafa 13-14.

• Mɛni hewɔ Persia Manyɛ Washti ekpɛlɛɛɛ akɛ eyaa maŋtsɛ lɛ ŋɔɔ lɛ? (Ester 1:10-12)

Biblia lɛ etsɔɔɔ nɔ hewɔ ni maŋnyɛ lɛ fee nakai. Woloŋlelɔi komɛi kɛɛ efee nakai ejaakɛ esumɔɔɔ akɛ ebaa bulɛ ni ayɔɔ kɛha lɛ lɛ shi yɛ maŋtsɛ lɛ gbɔi ni etɔrɔ dãa lɛ ahiɛ. Ekolɛ maŋnyɛ ni he yɔɔ fɛo waa nɛɛ ebuuu ewu, ni nɔ ni efee lɛ bafee nɔkwɛmɔnɔ gbonyo kɛha ŋamɛi ni yɔɔ Persia Maŋtsɛyeli lɛ mli.—3/1, baafa 9.

• Kpɔmɔnɔ lɛ haa wɔyeɔ wɔhe yɛ mɛɛ gbɛ nɔ?

Yesu kpɔmɔ afɔleshãa lɛ baanyɛ aha wɔye wɔhe kɛjɛ esha ni akɛfɔ́ wɔ, kɛ nibii gbohii ni ejɛ mli kɛba lɛ hu ahe. (Romabii 6:23) Kpɔmɔnɔ lɛ haa anɔkwa Kristofoi yeɔ amɛhe kɛjɛɔ henilee ni buɔ mɔ fɔ he. Ni kɛ́ wɔná hemɔkɛyeli yɛ kpɔmɔnɔ lɛ mli lɛ, no baanyɛ aha wɔye wɔhe kɛjɛ gbeyeishemɔ akɛ wɔnaŋ shidaamɔ kpakpa yɛ Nyɔŋmɔ hiɛ lɛ he. (1 Yohane 2:1)—3/15, baafa 8.

• Mɛni wɔbaanyɛ wɔkase kɛjɛ Mla ni kɛɔ ákɛ akɛ toobi nyɛ fufɔ akahoo toobi lɛ mli? (2 Mose 23:19, NW)

Eji nifeemɔ ko ni wɔŋjalɔi kɛ amɛhe woɔ mli bɔni afee ni nugbɔ anɛ. (3 Mose 20:23) Nyɔŋmɔ fee fufɔ eha too nyɛ lɛ bɔni afee ni toobi lɛ aná eko eye ni eda. Fufɔ ni mɔ kɛaahoo toobi lɛ baatsɔɔ akɛ ebɛ bulɛ kɛha nyɛ kɛ bi teŋ wekukpãa ni Nyɔŋmɔ eto he gbɛjianɔ lɛ. Mla ni Nyɔŋmɔ kɛgu nifeemɔ ni tamɔ nakai lɛ tsɔɔ akɛ eji musuŋtsɔlɔ.—4/1, baafa 31.