Ani Sanegbaa Kpakpa Yaa Nɔ yɛ Nyɛteŋ?

AFII fioo komɛi ni eho nɛ lɛ, Japan shikatoohe ko to woloŋmaa he akaŋshii ko he gbɛjianɔ. Saneyitso ni ahala kɛha akaŋshii nɛɛ ji “Suɔmɔ Wolo ni Mɔ ko ni Eye Afii 60 Ŋma.” Awo Japanbii ni eye kɛjɛ afii 50 kɛyashi afii 69 lɛ hewalɛ koni amɛjie “bɔ ni amɛnuɔ he diɛŋtsɛ” yɛ amɛhefatalɔi ahe lɛ kpo amɛtsɔɔ. Akaŋshilɔi lɛ ateŋ mɔ kome ŋma yɛ eŋa he akɛ: “Ekolɛ nɔ ni mawie nɛɛ baawo onaa ŋmɔlɔ, shi ebaadɔ mi waa kɛ́ mihaaa ole bɔ ni minuɔ he diɛŋtsɛ yɛ ohe, ni no ji: Miidao shi akɛ oha mi kɛ bo bote gbalashihilɛ mli.”

Yɛ hei babaoo lɛ, awooo mɛi hewalɛ ni amɛjie amɛhenumɔi akpo yɛ faŋŋ mli, ni nakai nɔŋŋ eji yɛ Asia maji lɛ ekomɛi amli. Kɛlɛ, mɛi ni fa fe 15,000 kɛ amɛhe wo nakai suɔmɔ woloŋmaa he akaŋshii lɛ mli. Bɔ ni mɛi babaoo kɛ amɛhe wo mli lɛ ha asáa ashi akaŋ lɛ ekoŋŋ, ni akala woji yɛ suɔmɔ woji nɛɛ ahe. Enɛ tsɔɔ akɛ mɛi babaoo shweɔ akɛ amɛaajie bɔ ni amɛnuɔ he diɛŋtsɛ yɛ amɛmli yɛ amɛhefatalɔi lɛ ahe kpo amɛtsɔɔ amɛ. Shi kɛlɛ, jeee mɛi fɛɛ sumɔɔ akɛ amɛfee nakai. Mɛni hewɔ ebaa lɛ nakai? Ekolɛ nɔ hewɔ ni amɛjieee amɛhenumɔi akpo amɛtsɔɔɔ ji akɛ, ebiɔ mɔdɛŋbɔɔ kɛ hesaa yɛ amɛgbɛfaŋ dani amɛnyɛɔ amɛhaa mɛi krokomɛi—tamɔ amɛhefatalɔi nuɔ bɔ ni amɛnuɔ he amɛhaa lɛ shishi diɛŋtsɛ.

Hitoshi Kato ni ŋma wolo ko ni kɔɔ hejɔɔmɔ ní abaa yɛ nitsumɔ mli lɛ he lɛ tsɔɔ mli akɛ, yɛ Japanbii ni kɛ afii babaoo ebote gbalashihilɛ mli lɛ agbɛfaŋ lɛ, ŋamɛi lɛ ji mɛi ni nyiɛɔ hiɛ koni atse gbala mli, ni enɛ jɛ dɔlɛ nibii ni amɛkɛto afii babaoo. Ekɛfata he akɛ: “Nɔ kroko hu ni haa ebaa lɛ nakai ji akɛ, kɛ́ naagbai te shi lɛ, hefatalɔi lɛ taaa shi ní amɛaasusu gbɛ nɔ ni amɛaatsɔ kɛtsu he nii.”

Bei komɛi lɛ ŋamɛi lɛ sumɔɔ ni atse gbala mli kɛ́ amɛwumɛi ba nitsumɔ mli hejɔɔmɔ sɛɛ nɔŋŋ, ni enɛ haa wumɛi lɛ anaa kpɛɔ amɛhe. Ekolɛ afii babaoo eho ni hefatalɔi lɛ ejieko amɛhenumɔi akpo amɛtsɔko amɛhe. Eeenyɛ eba akɛ, ekolɛ wu lɛ kɛ ŋa lɛ bɔɔ mɔdɛŋ koni amɛjie amɛhenumɔi  akpo, shi amɛyanyɛɛɛ amɛha amɛsanegbaa afee nɔ ni miishɛɛ yɔɔ mli. Yɛ nɔ najiaŋ ni sanegbaa aaaha naanyobɔɔ kpakpa akã amɛteŋ lɛ, be fɛɛ be nɛɛ, etsɔ naataamɔ.

Mɛɛ gbɛ nɔ wu kɛ ŋa aaatsɔ amɛtsu naataamɔi ni baa amɛteŋ lɛ ahe nii yɛ toiŋjɔlɛ mli, ní amɛnyɛ amɛjie amɛhenumɔi akpo faŋŋ amɛtsɔɔ amɛhe yɛ miishɛɛ mli? Ekolɛ, eeefee bo naakpɛɛ akɛ ooole akɛ ŋaawoo kpakpa fe fɛɛ lɛ bɛ wolo ko ni gbalashihilɛ he ŋaawolɔ ko ŋma nyɛsɛɛ nɛɛ mli, shi moŋ eyɛ blema wolo ko ni mɛi enya he afii ohai abɔ, ni ji Biblia lɛ mli.