Esa akɛ Atsɛ́ Mɔ Kɛ Egbɛi

MƆ FƐƐ mɔ kwraa yɛ hegbɛ akɛ atsɛ́ɔ lɛ kɛ egbɛi. Yɛ maŋ ni ji Tahiti lɛ mli lɛ, awoɔ abifao ni ayashɛ lɛ afɔ̃ ni aleee enyɛ kɛ etsɛ lɛ po gbɛi. Nitsumɔhe ni yɔɔ jɛmɛ ni kwɛɔ fɔmɔ saji anɔ lɛ woɔ abifao ni akpoo lɛ lɛ gbɛi.

Kɛ́ hooo lɛ, adesai fɛɛ yɛ gbɛi, ni atsɛ́ɔ amɛ kɛ amɛgbɛi hu, shi kɛ́ wɔɔkɛɛ lɛ, mɔ pɔtɛɛ ko yɛ ni mɛi kpooɔ akɛ amɛaatsɛ́ lɛ kɛ egbɛi. Naakpɛɛ sane ji akɛ, mɔ nɛɛ ji ‘bii ni yɔɔ ŋwɛi kɛ shikpɔŋ lɛ nɔ lɛ atsɛ krɔŋŋ lɛ’! (Efesobii 3:14, 15) Sane lɛ ji, mɛi babaoo sumɔɔɔ akɛ amɛkɛ Bɔlɔ lɛ gbɛi ni yɔɔ Biblia lɛ mli lɛ aaatsɛ́ lɛ. Amɛsumɔɔ moŋ ni amɛtsɛ́ lɛ kɛ sablai tamɔ “Nyɔŋmɔ,” “Nuŋtsɔ,” loo “Naanɔ Tsɛ.” Mɛni mɔ ji egbɛi diɛŋtsɛ? Lalatsɛ lɛ haa sanebimɔ nɛɛ hetoo akɛ: “Bo, ni okome too ogbɛi ji Yehowa lɛ, bo ji mɔ ni kwɔ fe fɛɛ yɛ shikpɔŋ lɛ nɔ fɛɛ!”—Lala 83:19.

Yɛ afi 1800 afii lɛ amli beni London Missionary Society (London Maŋsɛɛ Sanekpakpa Shiɛlɔi Akuu) lɛ bashɛ Tahiti lɛ, no mli lɛ Polynesiabii lɛ miijá nyɔŋmɔi babaoo. Eko fɛɛ eko kɛ egbɛi, ni amɛjemawɔji lɛ agbɛi ji Oro kɛ Taaroa. Shi bɔni afee ni ana srɔto ni kã Nyɔŋmɔ ni Biblia lɛ wieɔ ehe lɛ kɛ nyɔŋmɔi krokomɛi nɛɛ ateŋ lɛ, nakai maŋsɛɛ sanekpakpa shiɛlɔi lɛ shashaooo shi kwraa akɛ amɛkɛ Nyɔŋmɔ gbɛi ni aŋmaa yɛ Tahiti wiemɔ mli akɛ Iehova lɛ aaatsu nii kɛmɔ shi.

Abale gbɛi nɛɛ jogbaŋŋ, ni akɛtsu nii babaoo yɛ sanegbai kɛ woji aŋmalamɔ mli. Tahiti Maŋtsɛ Pomare II, ní ye nɔ yɛ afi 1800 afii lɛ shishijee mli lɛ kɛtsu nii daa yɛ woji ni eŋmalaa lɛ amli. Wolo ko ni eŋma yɛ Blɔfo wiemɔ mli ni akɛto Tahiti kɛ ehewɔ Ŋshɔkpɔi lɛ a-Blema Nibii Atoohe lɛ maa sane nɛɛ nɔ mi, ni nakai wolo lɛ he mfoniri yɔɔ biɛ lɛ. Wolo nɛɛ tsɔɔ akɛ, mɛi kɛ Nyɔŋmɔ gbɛi lɛ tsu nii yɛ nakai beaŋ. Kɛfata he lɛ, Nyɔŋmɔ gbɛi lɛ je kpo shii akpei abɔ yɛ klɛŋklɛŋ Biblia ni atsɔɔ shishi kɛtee Tahiti wiemɔ mli, ni agbe naa yɛ afi 1835 mli lɛ mli.

[Mfoniri ni yɔɔ baafa 32]

Maŋtsɛ Pomare II

[He ni Mfoniri ni yɔɔ baafa 32 lɛ Jɛ]

Maŋtsɛ kɛ wolo: Collection du Musée de Tahiti et de ses Îles, Punaauia, Tahiti