Nibii ni Baaye Abua Bo Yɛ Okɛ Ohefatalɔ lɛ Sanegbaa Mli

‘KULƐ esaaa akɛ makɛɛ nakai.’ ‘Mihaaa sane lɛ afee faŋŋ.’ Ani okɛ ohefatalɔ lɛ egba sane ni onu he nɛkɛ pɛŋ? Sanegbaa ji ŋaalee nifeemɔ ni esa akɛ akase. Taakɛ eji yɛ ŋaalee nifeemɔi fɛɛ agbɛfaŋ lɛ, mɛi komɛi nyɛɔ amɛkaseɔ lɛ oya, yɛ be mli ni etɔɔ mɛi krokomɛi kɛ nakai feemɔ. Fɛɛ sɛɛ lɛ, kɛ́ oji mɛi ni sanegbaa waa kɛhaa amɛ lɛ ateŋ mɔ ko po lɛ, obaanyɛ okase gbɛ ni oootsɔ nɔ oha ohefatalɔ lɛ ale osusumɔi yɛ gbɛ ni yɔɔ hiŋmɛi nɔ, ni oha sanegbaa kpakpa aya nɔ yɛ okɛ lɛ teŋ.

Bei komɛi lɛ, bɔ ni weku mli loo maŋ nɔ ni mɔ jɛ lɛ amlibii feɔ amɛnii amɛhaa lɛ náa bɔ ni ekɛ ehefatalɔ yeɔ ehaa lɛ nɔ hewalɛ. Yɛ hei komɛi lɛ, nɔ ni akɛɔ ji akɛ, ‘Kɛ́ nuu ji bo lɛ, esaaa akɛ owieɔ babaoo.’ Ekolɛ mɛi baabu hii ni feɔ  nakai lɛ akɛ mɛi ni bɛ yitseiaŋ, ní wieɔ kɛkɛ. Shi Biblia lɛ kɛɔ akɛ: “Mɔ fɛɛ mɔ he afee oya kɛ ninumɔ, ehumi shi kɛ wiemɔ.” (Yakobo 1:19) Ŋaawoo nɛɛ kɔɔ hii kɛ yei fɛɛ ahe, ni ehaa wɔnaa hu akɛ, sanegbaa biɔ babaoo fe wiemɔ kɛkɛ. Mɛi enyɔ baanyɛ agba sane be kakadaŋŋ, shi te ebaaba lɛ eha tɛŋŋ kɛ́ amɛbooo amɛhe toi? Ekã shi faŋŋ akɛ, sanegbaa kpakpa ko eyaŋ nɔ. Taakɛ ŋmalɛ ni atsɛ́ yisɛɛ kɛtsɔ hiɛ lɛ tsɔɔ lɛ, sane toiboo ji nifeemɔ titri ni yeɔ buaa ni sanegbaa kpakpa yaa nɔ yɛ mɛi ateŋ.

Henumɔi kɛ Susumɔi ní Ajieɔ lɛ Kpo ní Wiemɔ Bɛ Mli

Yɛ hei komɛi lɛ, ŋamɛi bɛ hegbɛ akɛ amɛtsɔɔ amɛjwɛŋmɔ yɛ sane ko he. Ni jeee wumɛi ahe sane ko ji nɔ ni yaa nɔ yɛ weku lɛ mli. Yɛ hei ni tamɔ nakai lɛ, kɛ́ wu loo ŋa miitao nɔ ko lɛ, ehefatalɔ lɛ kaa eyiŋ yɛ he. Ŋamɛi lɛ ekomɛi ahe esa kɛ nibii ni amɛwumɛi taoɔ lɛ yɔsemɔ, ni amɛtsuɔ he nii amɛhaa amɛ oya. Wu kɛ ŋa ni yɔɔ shihilɛ ni tamɔ nɛkɛ mli lɛ jieɔ amɛsusumɔi kɛ henumɔi akpo ní wiemɔ bɛ mli. Bei pii lɛ, mɔ kome pɛ náa gbɛ ni tamɔ nɛkɛ ni mɔ tsɔɔ nɔ ehaa ehefatalɔ leɔ esusumɔi kɛ bɔ ni enuɔ he ehaa lɛ he sɛɛ. Bɔ ni ebaa lɛ ji akɛ, ŋa lɛ baanyɛ abɔ mɔdɛŋ koni ena nɔ ni ewu lɛ susuɔ loo bɔ ni enuɔ he ehaa, shi wu lɛ efeee nakai yɛ eŋa lɛ gbɛfaŋ.

Eji anɔkwale akɛ, yɛ hei komɛi lɛ, hii kɛ amɛhiɛ fɔ̃ɔ shi ni amɛleɔ amɛŋamɛi lɛ ahenumɔŋ hiamɔ nii, ni amɛtsuɔ he nii amɛhaa amɛ. Shi eji sanegbaa kpakpa aaaya nɔ yɛ wumɛi kɛ ŋamɛi ni yɔɔ hei ni tamɔ nɛkɛ lɛ ateŋ kulɛ, amɛgbalashihilɛ lɛ baasɔ jogbaŋŋ.

Sanegbaa He Miihia

Sanegbaa ní akɛ nɔ ko eteee yɛ mli lɛ nyɛɔ etsĩɔ béi naa, ni ehaa mɔ nuɔ enaanyo shishi jogbaŋŋ hu. Beni Israel batsɔ maŋ etsɛko lɛ, Rubenbii, Gadbii, kɛ Manase akutso lɛ fã ní yɔɔ Yordan Faa lɛ bokagbɛ lɛ ma “afɔleshãalatɛ kpeteŋkpele ni sa akɛ akwɛ” yɛ Yordan naa. Akutsei krokomɛi ni yɔɔ faa lɛ anaigbɛ lɛ eyanuuu nɔ ni amɛfee lɛ shishi. Akɛni amɛyasusu akɛ amɛnyɛmimɛi ni yɔɔ Yordan bokagbɛ lɛ etsɔmɔ hemɔkɛyeli kwalɔi hewɔ lɛ, amɛsaa amɛhe koni amɛfã ta amɛshi “atuatselɔi” lɛ. Shi dani amɛaafã ta lɛ, amɛtsu koni ayabi akutsei ni yɔɔ bokagbɛ lɛ adaaŋ sane. Kwɛ nilee gbɛ ni amɛkɔ! Amɛná amɛle akɛ, amɛnyɛmimɛi ni yɔɔ bokagbɛ lɛ emaaa afɔleshãalatɛ lɛ koni amɛkɛshã afɔlei amɛha nyɔŋmɔi krokomɛi. Shi moŋ amɛfee nakai akɛni amɛyashe gbeyei akɛ wɔsɛɛ lɛ, akutsei krokomɛi lɛ aaabakɛɛ amɛ akɛ: “Nyɛbɛ gbɛnaa ko yɛ Yehowa ŋɔɔ!” lɛ hewɔ. No hewɔ lɛ, amɛma afɔleshãalatɛ lɛ koni no aye odase akɛ amɛ hu amɛjáa Yehowa. (Yoshua 22:10-29) Amɛwo afɔleshãalatɛ gbɛi akɛ Odase, ejaakɛ no ye odase akɛ amɛkpɛlɛ nɔ akɛ Yehowa ji anɔkwa Nyɔŋmɔ lɛ.—Yoshua 22:34.

Bɔ ni akutsei enyɔ kɛ fã lɛ gbála nibii amli amɛha akutsei krokomɛi lɛ ha amɛtsake amɛjwɛŋmɔ, ni amɛkɛ amɛtawuu nibii lɛ shwie shi. Hɛɛ, saji ní ata shi asusu he, ní akɛ nɔ ko eteee yɛ mli lɛ ku ta naa. Sɛɛ mli beni Israelbii lɛ tse Yehowa Nyɔŋmɔ ni ji amɛ mfonirifeemɔŋ wu lɛ hiɛ atũa lɛ, ekɛɛ amɛ akɛ ebaajɛ musuŋtsɔlɛ mli ‘ewie ni eta amɛtsuiŋ.’ (Hoshea 2:14) Kwɛ nɔkwɛmɔnɔ kpakpa ni esa akɛ gbalashihilɛ mli hefatalɔi akase! Hɛɛ, bɔɔ mɔdɛŋ ni kɛ́ fee lɛ, okɛ ohefatalɔ lɛ ata shi ni nyɛgba sane ni eta etsuiŋ, bɔni afee ni kɛ́ nɔ ko lɛ, enyɛ enu bo shishi. Enɛ he miihia, titri lɛ kɛ́ sane ni nyɛbaasusu he lɛ ji dɔlɛ nɔ̃. Pattie Mihalik ní ŋmaa saji yɛ United States adafitswaa wolo ko mli lɛ wie akɛ: “Mɛi kɛɔ akɛ wiemɔ waaa, kɛlɛ eji nɔ ko ni anyɛŋ akɛ shika ahé. Ekolɛ ebaawa kɛha mɛi komɛi akɛ amɛaaha ale amɛsusumɔi, kɛlɛ nakai ni amɛaafee lɛ he yɛ sɛɛnamɔ kwraa fe shika ni akɛyato shikatoohe.”

Yaa Ohiɛ yɛ Sanegbaa Mli

Ekolɛ, gbalashihilɛ mli hefatalɔi komɛi baakɛɛ akɛ, ‘Wɔjeee gbalashihilɛ shishi jogbaŋŋ.’ Mɛi krokomɛi hu baamu sane naa akɛ, ‘Wɔgbalashihilɛ nɛɛ lɛ, ehiŋ saamɔ.’ Amɛteŋ mɛi komɛi baanu he akɛ, kɛjɛ amɛkpeemɔ gbi lɛ  sɛɛ lɛ, amɛnyɛŋ amɛya amɛhiɛ yɛ sanegbaa mli. Kɛlɛ, susumɔ mɛi ni yɔɔ hei ni amɛfɔlɔi kɛ amɛwekumɛi ji mɛi ni yataoɔ gbalashihilɛ mli hefatalɔi bahaa amɛ lɛ ahe okwɛ. Mɛi ni yɔɔ hei ni tamɔ nakai lɛ ateŋ mɛi babaoo haa sanegbaa kpakpa hiɔ amɛ kɛ amɛhefatalɔi lɛ ateŋ ákɛ wu kɛ ŋa.

Afee gbãla aha nuu kɛ yoo ko ni hi shi yɛ Bokagbɛ maji lɛ eko mli. Bɔ ni ato amɛgbalashihilɛ lɛ he gbɛjianɔ aha ji akɛ, aha tsulɔ ko fã gbɛ kakadaŋŋ ni eyatao yoo ebaha nuu lɛ. Kɛlɛ, wu kɛ ŋa nɛɛ ní hi shi aaafee afii 4,000 ni eho nɛɛ lɛ ha sanegbaa ni sa kadimɔ waa hi amɛteŋ. Isak ni ji nuu ni awieɔ ehe lɛ kɛ yoo ni batsɔ eŋa lɛ kɛ tsulɔ lɛ kpe yɛ ŋa ko nɔ. Tsulɔ lɛ “gba Isak saji fɛɛ ni eyaye lɛ.” Biblia lɛ tsa gbalashihilɛ nɛɛ he amaniɛbɔɔ lɛ nɔ akɛ: “Ni Isak kɛ [Rebeka] lɛ ba enyɛ Sara bu lɛ mli [ekɛ no feemɔ tsɔɔ akɛ amɛbote gbalashihilɛ mli]; ni eŋɔ Rebeka ni ebatsɔ eŋa, ni esumɔ lɛ.”—1 Mose 24:62-67.

Kadimɔ akɛ, klɛŋklɛŋ lɛ, Isak bo amaniɛbɔɔ ni akɛba lɛ toi, “ni [no sɛɛ lɛ],” eŋɔ Rebeka akɛ eŋa. Tsulɔ lɛ ji mɔ ko ni etu ehe eha Yehowa ni ji Nyɔŋmɔ ni Isak jáa lɛ. No hewɔ lɛ, Isak baanyɛ ekɛ ehe afɔ̃ tsulɔ nɛɛ nɔ. Kɛkɛ ni Isak “sumɔ” Rebeka, mɔ ni batsɔ eŋa lɛ.

Ani Isak kɛ Rebeka tee amɛhiɛ yɛ sanegbaa mli? Beni amɛbinuu Esau kɛ Hetbiyei enyɔ komɛi bote gbalashihilɛ mli lɛ, naagba wulu ko te shi yɛ weku lɛ mli. Rebeka “kɛɛ” Isak akɛ: “Mijeŋ hilɛ eje mitsine yɛ Hetbiyei lɛ ahewɔ. Kɛji Yakob [amɛbinuu fioo lɛ] wɛ Hetbiyei . . . ni ji shikpɔŋ nɛɛ nɔ biyei lɛ eko lɛ, te mahi jeŋ makɛɛ tɛŋŋ?” (1 Mose 26:34; 27:46) Eyɛ faŋŋ akɛ, eha ewu le ejwɛŋmɔ yɛ gbɛ ni yɔɔ faŋŋ nɔ.

Isak kɛɛ Yakob ní ekɛ Esau ji haaji lɛ koni ekaŋɔ Kanaan biyei lɛ eko ákɛ eŋa. (1 Mose 28:1, 2) Rebeka tsɔɔ esusumɔ. Gbalashihilɛ mli hefatalɔi nɛɛ nyɛ amɛsusu weku mli sane ko ní baanyɛ ekɛ mlifu aba lɛ he yɛ omanyeyeli mli, ni eji nɔkwɛmɔnɔ kpakpa kɛha wɔ mɛi ni wɔyɔɔ ŋmɛnɛ lɛ. Shi kɛ́ gbalashihilɛ mli hefatalɔi nyɛɛɛ amɛkɛ amɛhe akpãa gbee hu? Mɛni amɛbaanyɛ amɛfee?

Kɛ́ Gbeekpamɔ Eyabaaa

Kɛ́ gbeekpamɔ eyabaaa okɛ ohefatalɔ lɛ teŋ lɛ, okɛ lɛ akabé ní ofooo edaaŋ. Kɛ́ jeee nakai lɛ, nɔ ni no baatsɔɔ ji akɛ: Obɛ miishɛɛ, ni osumɔɔɔ ni lɛ hu enáa miishɛɛ. Shi ekolɛ, ohefatalɔ lɛ nuuu nɔ ni otaoɔ ni afee kɛ bɔ ni onuɔ he ohaa lɛ shishi jogbaŋŋ.

Ebaabi ni okɛ ohefatalɔ lɛ ata shi ni nyɛsusu nii ahe. Kɛ́ sane lɛ baanyɛ atée mlifu shi lɛ, no lɛ ekolɛ ebaawa akɛ mɔ aaaye ehe nɔ. Be ko lɛ, Isak fɔlɔi ni ji Abraham kɛ Sara kɛ naagba ko ni mli wa kpe. No mli lɛ Sara ji kene, ni no hewɔ lɛ, taakɛ afeɔ yɛ nakai beaŋ lɛ, eŋɔ etsulɔ yoo Hagar eha Abraham koni ekɛ lɛ afɔ́. Abraham kɛ Hagar fɔ́ binuu, ni egbɛi ji Ishmael. Sɛɛ mli lɛ, Sara ná musu ni efɔ́ binuu eha Abraham, ni lɛ ji Isak. Beni Sara tseɔ Isak fufɔ lɛ, eyɔse akɛ Ishmael yeɔ ebi lɛ he fɛo. Sara na akɛ nɔ ni yaa nɔ lɛ baagba ebi lɛ naa, no hewɔ lɛ, ewo Abraham ŋaa koni eshwie tsulɔ yoo lɛ kɛ ebi Ishmael kɛje ewe lɛ. Hɛɛ, Sara kɛɛ ewu ejwɛŋmɔ, ni ekɛ sane lɛ lɔgɔɔɔ shi. Shi Abraham náaa sane ni ekɛfɔ̃ ehiɛ lɛ he miishɛɛ.

Mɛɛ gbɛ nɔ atsɔ atsu gbeekpamɔ ni eyabaaa lɛ he nii? Biblia lɛ bɔɔ amaniɛ akɛ: “Nyɔŋmɔ kɛɛ Abraham akɛ: Kaaha oblanyo lɛ kɛ otsulɔ yoo lɛ sane lɛ miifee dɔlɛ sane yɛ ohiɛ; nibii fɛɛ ni Sara ekɛo lɛ, bo egbee toi yɛ mli; ejaakɛ Isak mli aaatsɛ́ oseshi yɛ.” Abraham bo Yehowa Nyɔŋmɔ gbee toi, ni efee taakɛ ekɛɛ lɛ lɛ pɛpɛɛpɛ.—1 Mose 16:1-4; 21:1-14.

Ekolɛ, obaakɛɛ akɛ, ‘Kɛ́ Nyɔŋmɔ aaajɛ ŋwɛi ekɛ wɔ awie lɛ, no lɛ ebaafee mlɛo kɛha wɔ ákɛ wɔɔnu wɔhe shishi!’ Sane nɛɛ gbalaa jwɛŋmɔ kɛbaa nɔ kroko ni yeɔ buaa kɛsaa béi yɛ gbalashihilɛ mli lɛ nɔ. Gbalashihilɛ mli hefatalɔi baanyɛ abo Nyɔŋmɔ toi. Yɛ mɛɛ gbɛ nɔ? Kɛtsɔ ekome ni amɛaafee kɛkane Nyɔŋmɔ Wiemɔ lɛ, ni amɛkɛ emli saji lɛ atsu nii ákɛ gbɛtsɔɔmɔ ni jɛ Nyɔŋmɔ ŋɔɔ lɛ nɔ.—1 Tesalonikabii 2:13.

 Ŋa Kristofonyo ko ni yɔɔ niiashikpamɔ babaoo lɛ kɛɛ akɛ: “Bei pii kɛ́ oblayoo ni ebote gbalashihilɛ mli ba koni miwo lɛ ŋaa yɛ egbalashihilɛ lɛ he lɛ, mibiɔ lɛ kɛji ekɛ ewu feɔ ekome kɛkaneɔ Biblia lɛ. Mɛi ni kɛ naagbai kpeɔ yɛ amɛgbalashihilɛ mli lɛ ateŋ mɛi pii efeee nakai.” (Tito 2:3-5) Wɔ fɛɛ wɔbaanyɛ wɔná nɔ ni ekpa shi ena nɛɛ he sɛɛ. Okɛ ohefatalɔ lɛ afee ekome kɛkane Nyɔŋmɔ Wiemɔ lɛ daa. Nakai feemɔ haa daa gbi lɛ, ‘onuɔ’ Nyɔŋmɔ gbee yɛ bɔ ni esa akɛ oba ojeŋ oha lɛ he. (Yesaia 30:21) Kɛlɛ, tsu kɔkɔbɔɔ nɛɛ he nii: Okɛ Biblia lɛ akatsu nii tamɔ kpãa ní okɛ miiyi ohefatalɔ, kɛ shishinumɔ akɛ kaafee ohe mɔ ko ni be fɛɛ be nɛɛ eetsɔɔ ehefatalɔ lɛ ŋmalɛ ko ni ekɛtsuuu nii. Yɛ no najiaŋ lɛ, kwɛmɔ gbɛ nɔ ní nyɛyi enyɔ lɛ fɛɛ nyɛaatsɔ nyɛkɛ nibii ni nyɛkaneɔ lɛ atsu nii.

Kɛ́ oobɔ mɔdɛŋ ni otsu naagba ko ni mli wa he nii lɛ, obaanyɛ otao woji ni wieɔ onaagba lɛ he kɛjɛ Watch Tower Publications Index * lɛ mli. Ŋɔɔ lɛ akɛ, kwɛmɔ ní okɛhaa ofɔlɔi ní amɛgbɔlɔ lɛ miitee béi shi yɛ oweku lɛ mli. Yɛ nɔ najiaŋ ni okɛ ohefatalɔ lɛ aaataa saji anaa yɛ nɔ ni esa akɛ efee kɛ nɔ ni esaaa akɛ efeɔ lɛ he lɛ, okɛ lɛ afee ekome kɛpɛi Index lɛ mli. Klɛŋklɛŋ lɛ, nyɛtaoa saneyitso ni ji “Parents” (Fɔlɔi). No sɛɛ lɛ, nyɛkwɛa emli saneyitsei bibii tamɔ “caring for aged parents” (fɔlɔi ní amɛgbɔlɔ lɛ akwɛmɔ). Nyɛfea ekome kɛkanea woji ni Yehowa Odasefoi fee ní atsɔɔ ni wieɔ saneyitso nɛɛ he. Onaa baakpɛ ohe yɛ bɔ ni Biblia kasemɔ woji ni eye ebua anɔkwa Kristofoi babaoo lɛ he baaba sɛɛnamɔ kɛha bo kɛ ohefatalɔ lɛ.

Ekome ni nyɛaafee kɛtao woji nɛɛ ní nyɛkane lɛ baaye abua nyɛ ni nyɛkɛ jwɛŋmɔ kpakpa asusu nyɛnaagba lɛ he. Nyɛbaana Ŋmalɛi ni atsɛ́ yisɛɛ kɛ ekrokomɛi ni atsɛ́ yisɛɛ shi aŋmalako amɛmli wiemɔi lɛ ni baaye abua nyɛ ni nyɛle Nyɔŋmɔ susumɔ yɛ naagba ni nyɛkɛkpe lɛ he. Nyɛfea ekome kɛkanea ŋmalɛi nɛɛ yɛ Biblia lɛ mli. Hɛɛ, nyɛbaanu nɔ ni Nyɔŋmɔ kɛɔ yɛ naagba ni nyɛkɛkpe lɛ he!

Ha Sanegbaa Kpakpa Ahi Nyɛteŋ

Ani oka shinaa ko ni be saŋŋ nɛ ní agbeleee lɛ gbelemɔ pɛŋ? Obaana akɛ, akɛni agbele etsɛ hewɔ lɛ, kɛ́ oogbele lɛ, dadei ni hiɛ mli lɛ amli gbɛɔ, ni egbeleɔ shɔ̃ɔ. Shi kɛ́ eji shinaa ko ni agbeleɔ daa, ni be fɛɛ be lɛ akɛ mu ewo dadei ni hiɛ mli lɛ amli lɛ, te onaa egbelemɔ ohaa tɛŋŋ? Obaana akɛ egbelemɔ waa kwraa. Nakai nɔŋŋ eji yɛ sanegbaa gbɛfaŋ. Kɛ́ okɛ ohefatalɔ lɛ gbaa sane daa, ní ofeɔ nakai yɛ Kristofoi asuɔmɔ mli lɛ, no lɛ taakɛ bɔ ni mu ni akɛwoɔ shinaa dadei amli lɛ haa egbelemɔ feɔ mlɛo lɛ, nakai nɔŋŋ suɔmɔ baaha efee mlɛo kɛha bo akɛ oooha ohefatalɔ lɛ ale osusumɔi ekɔɔɔ he eko kɛ́ ekɔɔ sane ko ni nyɛkɛ nyɛhe kpãaa gbee yɛ mli lɛ he.

Jee shishi ni okɛ ohefatalɔ lɛ abɔi sanegbaa. Eyɛ mli akɛ ekolɛ, shishijee lɛ, ebaabi mɔdɛŋbɔɔ babaoo yɛ ogbɛfaŋ bɔni afee ni sanegbaa ahi nyɛteŋ moŋ, shi tsu he nii. Kɛ́ ofee nakai lɛ, no lɛ naagbee lɛ, wekukpaa kpakpa baahi okɛ ohefatalɔ lɛ teŋ, ni nyɛbaanu nyɛhe shishi daa.

[Shishigbɛ niŋmaa]

[Mfoniri ni yɔɔ baafa 7]

Kɛ́ nyɛkɛ nyɛhe kpãaa gbee yɛ sane ko mli lɛ, ani obaatao Nyɔŋmɔ gbɛtsɔɔmɔ?