Sanebimɔi ni Jɛ Kanelɔi Adɛŋ

Kɛ́ daimonioi miihao mɔ ko lɛ, mɛni ebaanyɛ efee koni ekɛye ehe kɛjɛ amɛdɛŋ?

Nyɔŋmɔ Wiemɔ lɛ tsɔɔ akɛ, mɛi ni daimonioi tutuaa amɛ lɛ baanyɛ aye amɛhe kɛjɛ haomɔi ni tamɔ nakai lɛ ahe. Sɔlemɔ yeɔ buaa babaoo ni mɔ náa heyeli ni tamɔ nakai. (Marko 9:25-29) Shi nibii krokomɛi yɛ ní ebaabi ni aŋkro ni daimonioi hao lɛ lɛ afee. Nibii komɛi ni Kristofoi ni hi shi yɛ klɛŋklɛŋ afii 100 lɛ mli lɛ fee lɛ haa anaa nɔ ni nakai nibii krokomɛi ni ebaabi ni mɔ lɛ afee lɛ ji.

Aŋkroaŋkroi komɛi ni hi shi yɛ blema Efeso lɛ kɛ amɛhe woɔ daimonioi anifeemɔi amli dani amɛbatsɔmɔ Kristo sɛɛnyiɛlɔi. Shi beni amɛkpɛ amɛyiŋ akɛ amɛbaasɔmɔ Nyɔŋmɔ lɛ, “ŋkunyaayelɔi lɛ . . . ba ni amɛkɛ amɛwoji lɛ babua shi ni amɛshã yɛ mɛi fɛɛ hiɛ.” (Bɔfoi lɛ Asaji 19:19) Heyelilɔi heei ni hi shi yɛ Efeso lɛ tsɔ amɛkunyaayeli woji lɛ ni amɛshã lɛ nɔ amɛkɛfee nɔkwɛmɔnɔ amɛha mɛi fɛɛ ni yɔɔ ŋmɛnɛ ní miisumɔ koni amɛye amɛhe kɛjɛ daimonioi atutuamɔi ahe lɛ. Esa akɛ aŋkroaŋkroi ni tamɔ nakai lɛ ashɛrɛ nibii fɛɛ ni kɛ mumɔi atsɛmɔ yɔɔ tsakpãa lɛ ashwie. Nibii nɛɛ ekomɛi ji woji, woji tɛtrɛbii, sinii, mumɔi atsɛmɔ saji ni akɛwo kɔmpiutai anɔ, lalai ni kɛ mumɔi atsɛmɔ yɔɔ tsakpãa ni amɔmɔ awo kpãai anɔ, kɛ nibii tamɔ sɛbɛ kɛ teremai ni kɛ mumɔi atsɛmɔ yɔɔ tsakpãa ní akɛwoɔ kuɛ loo hɛ ákɛ “hebuu nɔ̃” lɛ.—5 Mose 7:25, 26; 1 Korintobii 10:21.

Afii komɛi asɛɛ beni nakai Kristofoi ni hi Efeso lɛ ekpata amɛkunyaayeli woji lɛ ahiɛ lɛ, bɔfo Paulo ŋma akɛ: ‘Wɔkɛ mumɔi fɔji asafo ená nɔmɔ.’ (Efesobii 6:12) Paulo wo Kristofoi hewalɛ akɛ: “Nyɛwoa Nyɔŋmɔ tawuu nii lɛ fɛɛ, koni nyɛnyɛ abonsam ŋaatsɔɔi [nifeemɔi ni yɔɔ nigii] lɛ anaa nyɛdamɔ.” (Efesobii 6:11) Nakai ŋaawoo lɛ he yɛ sɛɛnamɔ lolo. Bɔni afee ni mumɔi fɔji anine akashɛ Kristofoi anɔ lɛ, ebaabi ni Kristofoi lɛ aya amɛhiɛ yɛ Nyɔŋmɔ he nilee ni buɔ amɛhe lɛ mli. Paulo ma nɔ mi akɛ: “Fɛɛ sɛɛ lɛ nyɛhiɛa hemɔkɛyeli tsɛ̃ŋ lɛ mli, nɔ̃ ni nyɛkɛaanyɛ mɔ fɔŋ lɛ gãi mlibii ní tsoɔ lɛ fɛɛ nyɛgbe lɛ.” (Efesobii 6:16) Biblia kasemɔ nɔ mɔ tsɔɔ ewajeɔ ehemɔkɛyeli. (Romabii 10:17; Kolosebii 2:6, 7) No hewɔ lɛ, Biblia ni wɔkaseɔ be fɛɛ be lɛ yeɔ buaa wɔ ni wɔnáa hemɔkɛyeli ní buɔ wɔhe kɛjɛɔ mumɔi fɔji atutuamɔi ahe.—Lala 91:4; 1 Yohane 5:5.

Ehe bahia ni Kristofoi ni hi Efeso lɛ atsu nifeemɔ ko hu ni he hiaa waa he nii. Paulo kɛɛ amɛ akɛ: “Nyɛkɛ sɔlemɔ kɛ faikpamɔ fɛɛ asɔlea daa yɛ mumɔ mli.” (Efesobii 6:18) Hɛɛ, ehe miihia koni mɛi ni yɔɔ ŋmɛnɛ ni miisumɔ akɛ amɛye amɛhe kɛjɛ daimonioi atutuamɔi ahe lɛ kɛ hiɛdɔɔ asɔle koni Yehowa abu amɛhe. (Abɛi 18:10; Mateo 6:13; 1 Yohane 5:18, 19) Biblia lɛ kɛɔ yɛ gbɛ ni ja nɔ akɛ: “No hewɔ lɛ nyɛbaa nyɛhe shi nyɛhaa Nyɔŋmɔ; nyɛtea shi nyɛwoa abonsam, ni eeejo nyɛnaa foi.”—Yakobo 4:7.

Esa akɛ mɔ ni daimonioi tutuaa lɛ lɛ asɔle kɛ hiɛdɔɔ, shi yɛ nakai beaŋ nɔŋŋ lɛ, anɔkwa Kristofoi krokomɛi hu baanyɛ asɔle aha aŋkro nɛɛ ní miishwe waa akɛ esɔmɔ Yehowa, ni no hewɔ lɛ eemia ehiɛ koni ewu eshi mumɔi fɔji lɛ. Amɛbaanyɛ amɛsɔle kɛbi Nyɔŋmɔ koni ewaje mɔ ni mumɔi fɔji lɛ haoɔ lɛ lɛ yɛ mumɔŋ, bɔni afee ni enyɛ edamɔ daimonioi lɛ atutuamɔi lɛ anaa. Akɛni Nyɔŋmɔ Wiemɔ lɛ kɛɔ akɛ, “jalɔ sɔlemɔ ni mli wa lɛ nyɛɔ nii babaoo etsuɔ” hewɔ lɛ, ekã shi faŋŋ akɛ, Nyɔŋmɔ tsuji asɔlemɔ lɛ he baaba sɛɛnamɔ kɛha mɛi ni miibɔ mɔdɛŋ koni ‘amɛte shi amɛwo Abonsam’ lɛ.—Yakobo 5:16.

[Mfoniri ni yɔɔ baafa 31]

Heyelilɔi ni hi shi yɛ Efeso lɛ kpata amɛkunyaayeli woji lɛ ahiɛ